ၸွမ်းၼင်ႇ ႁွင်ႈၵၢၼ်ၾၢႆႇပိုၼ်ၽႄႈသူင်ႇၶၢႆၼမ်ႉမၼ်းၸၢၵ်ႈ တႂ်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 10/04/2026 ဝႃႈ – ၵႃႈၶၼ်ၼမ်ႉမၼ်းၸၢၵ်ႈ (ၻီႊသႄႊလ်) ၼိုင်ႈလီႊတႃႊပုင်ႈၶိုၼ်ႈမႃးထႅင်ႈ မွၵ်ႈ 1000 ပျႃး၊ ၶၼ်ၼမ်ႉမၼ်းၸၢၵ်ႈ ထၢတ်ႈသီႇ 92 – 95 ၵေႃႈ ပုင်ႈၶိုၼ်ႈမႃးၸွမ်း။

ၼမ်ႉမၼ်းထၢတ်ႈသီႇ သႅၼ်း 92 ၼႆႉ မိူဝ်ႈၵွၼ်ႇ ၼိုင်ႈလီႊတႃႊ 4700 ပျႃးပၢႆ၊ မိူဝ်ႈၼႆႉပုင်ႈၶိုၼ်ႈမႃးထိုင် 4900 ပျႃးပၢႆ။ၼမ်ႉမၼ်းထၢတ်ႈသီႇ သႅၼ်း 95 သမ်ႉ ၼိုင်ႈလီႊတႃႊ လုၵ်ႉတီႈ မွၵ်ႈ 4900 ပျႃးပၢႆ၊ ဝၼ်းမိူဝ်ႈၼႆႉ ပုင်ႈၶိုၼ်ႈမႃးထိုင် 5100 ပျႃးပၢႆ။ ၼမ်ႉမၼ်းၸၢၵ်ႈ ၻီႊသႄႊလ် ယူဝ်းယူဝ်းသမ်ႉ 6600 ပျႃးပၢႆ၊ ပရီႊမီႊယမ်ႊ ၻီႊသႄႊလ် သမ်ႉ 7900 ပျႃးပၢႆ။

ၵႃႈၶၼ်ၸိူဝ်းၼႆႉ ပဵၼ်ဢၼ်သိုၵ်းမၢၼ်ႈမၵ်းမၼ်ႈဝႆႉ တႃႇပၢမ်ႉၼမ်ႉမၼ်း ၶၢႆၸွမ်းလူၺ်ႈ QR Code ၵူၺ်း။ ရူတ်ႉၼိုင်ႈလမ်းၼႆႉ သွင်ဝူင်ႈၸင်ႇလႆႈၶႂၢင်ႉသႂ်ႇၼမ်ႉမၼ်း ၼိုင်ႈၵမ်း(ပဵၼ်တၢင်းၵၢၼ်)။

ၼႂ်းပိုၼ်ႉတီႈလၢႆလၢႆၸႄႈဝဵင်းၼႆႉ ၵႃႈၶၼ် သုင်လိူဝ်ၼၼ်ႉထႅင်ႈ၊ မၢင်တီႈ ၼမ်ႉမၼ်းၸၢၵ်ႈ (ထၢတ်ႈသီႇ) ၼိုင်ႈလီႊတႃႊ မိုၼ်ႇပၢႆ ၊ ပေႃးသိုဝ်ႉလပ်ႉလပ်ႉ ထိုင် 2-3 မိုၼ်ႇၸိူဝ်းၼႆႉၵေႃႈမီး ဝႃႈၼႆ။

ဢိင်ၼိူဝ်ပၼ်ႁႃပၢင်တိုၵ်း ဢီႊရၼ်ႊ- ဢိတ်ႉသ်ရေႊၼႂ်းဝၼ်းဢွၵ်ႇၵၢင်သေ သဵၼ်ႈတၢင်းတေႃႉတၢင်ႇၼမ်ႉမၼ်း သၢႆၼမ်ႉ ႁေႃႊမူတ်ႉသ် ပိၵ်ႉဢိုတ်းဝႆႉလႄႈ ၶၼ်ၼမ်ႉမၼ်းလုမ်ႈၾႃႉ ပုင်ႈၶိုၼ်ႈယိုၵ်ႈယိုၵ်ႈ ဢမ်ႇၵိုတ်းဢမ်ႇထၢတ်ႇ။ ဢိင်ၼိူဝ်ၶၼ်ၼမ်ႉမၼ်းသေ ၶၼ်ၶူဝ်းၵုၼ်ႇၵိၼ်ယမ်ႉၵေႃႈပုင်ႈၶိုၼ်ႈၸွမ်း။ ပိူင်လူင် ၵႃႈၶီႇရူတ်ႉၵႃးၵႂႃႇတႃႈပႆတၢင်း ပုင်ႈၶိုၼ်ႈ 2 ပုၼ်ႈ။ ဝၼ်းမိူဝ်ႈၼႆႉ ၵႃႈၶီႇရူတ်ႉၵႃးလုၵ်ႉတႃႈၵုင်ႈ-ဝဵင်းလိူဝ်ႇ ၼိုင်ႈၵေႃႉ ၸမ်သႅၼ်ပျႃး။ ၵႃႈၶိူင်ႈမိၼ်လုၵ်ႉမိူင်းတႆးၵႂႃႇဝဵင်းလိူဝ်ႇ ဢမ်ႇယွမ်း 6 သႅၼ်ပျႃး။ လုၵ်ႉမိူင်းတႆးၵႂႃႇတႃႈၵုင်ႈဢမ်ႇယွမ်း 9 သႅၼ်ပျႃး။