ယွၼ်ႉၾူၼ်တူၵ်းႁၢဝ်ႈႁႅင်း ပဵၼ်ၼမ်ႉထူမ်ႈၼမ်ႉၼွင်း တီႈၼႂ်းၵုၼ်ၶဵဝ်ဢေႊသျႃႊ ၸဵင်ႇၸၢၼ်းဝၼ်းဢွၵ်ႇ 3 ၸိုင်ႈမိူင်း မိူၼ်ၼင်ႇ မိူင်းဢိၼ်ႊတူဝ်ႊၼီႊသျႃႊ၊ မိူင်းမလေႊသျႃႊ တင်း မိူင်းထႆး မီးၵူၼ်းလူႉတၢႆ 600 ပၢႆ၊ ႁူဝ်ၼပ်ႉၵူၼ်း တႃႇ 4 လၢၼ်ႉပၢႆသမ်ႉ လႆႈထူပ်းၽေး ယၢပ်ႇၽိုတ်ႇၵိၼ်းၸႂ်ဝႆႉ ဝႃႈၼႆ။

လူမ်းလႅင်ႉၶၢဝ်းမႆႈ ဢၼ်ဢမ်ႇသူႈလႆႈႁၼ်ၼၼ်ႉ ၽတ်ႉထွင်းၶဝ်ႈၼႂ်းပိုၼ်ႉတီႈ မႃႊလႅတ်ႉၵႃႊ လႄႈ ႁဵတ်းႁႂ်ႈၾူၼ်လူမ်းတူၵ်းႁၢဝ်ႈႁႅင်း ႁိုင်ၶၢဝ်းတၢင်း 1 ဝူင်ႈပၢႆ။
ၾၢႆႇၽူႈမီးပုၼ်ႈၽွၼ်းပိုၼ်ၽၢဝ်ႇဝႆႉ ၼႂ်းဝၼ်းတီႈ 30/11/2025 ၼႆႉဝႃႈ – ယွၼ်ႉၽေးၼမ်ႉသေ တီႈမိူင်းဢိၼ်ႊတူဝ်ႊၼီႊသျႃႊ မီးၵူၼ်းလူႉတၢႆ 435 ၵေႃႉ ပဵၼ်ဢၼ်ၼမ်လိူဝ်ပိူၼ်ႈသုတ်း၊ တီႈမိူင်းထႆး မီးၵူၼ်းလူႉတၢႆ 170 ၵေႃႉလႄႈ တီႈမိူင်းမလေႊသျႃႊသမ်ႉ မီးၵူၼ်းလူႉတၢႆ 3 ၵေႃႉ ၼႆယဝ်ႉ။

တီႈၵုၼ် သူႊမႃႊထရႃႊ မိူင်းဢိၼ်ႊတူဝ်ႊၼီႊသျႃႊၼၼ်ႉ ယွၼ်ႉလိၼ်ၵူၼ်ႇပင်းသေ သဵၼ်ႈတၢင်းၵပ်းသိုပ်ႇၵႂႃႇမႃး ၶၢတ်ႇ – ၵွႆ၊ ၸုမ်းၾၢႆႇၸွႆႈထႅမ်ၶဝ် လႆႈၸႂ်ႉႁိူဝ်းမိၼ်သေ သူင်ႇပၼ် တၢင်းၸွႆႈထႅမ်ဝႆႉ။ ပိုၼ်ႉတီႈၵမ်ႈၽွင်ႈ ၸိူဝ်းမီးဝႆႉၾၢႆႇတူၵ်း ၵုၼ်သူႊမႃႊထႂႃႊၼၼ်ႉ ယၢပ်ႇၽိုတ်ႇတႃႇလႆႈလွင်ႈၸွႆႈထႅမ်လႄႈ မီးလွင်ႈၸူၼ်လၵ်ႉၵၼ်ဝႆႉ။

တေႃႇထိုင်ယၢမ်းလဵဝ် တီႈမိူင်းဢိၼ်ႊတူဝ်ႊၼီးသျႃႊ တိုၵ်ႉမီးၵူၼ်းႁၢႆဝႆႉ 400 ပၢႆ၊ ႁူဝ်ၼပ်ႉၵူၼ်း တႃႇ 2 လၢၼ်ႉပၢႆသမ်ႉ လႆႈပၢႆႈၽၢတ်ႇယၢၼ်ႁိူၼ်းယေးတီႈယူႇသဝ်းဝႆႉ။
တီႈဝဵင်းႁၢတ်ႇယႂ်ႇ မိူင်းထႆးၵေႃႈ ၾူၼ်ၵိုင်ႉၵၢင်ႉတူၵ်းႁၢဝ်ႈႁႅင်း ၼႂ်းဝၼ်းလဵဝ်ၵူၺ်း ၼမ်ႉၾူၼ် တူၵ်းထိုင် 335 မီႊလီႊမီႊတိူဝ်ႊ၊ ပဵၼ်ဢၼ်တူၵ်းၼမ်သုတ်း ၼႂ်းၶၢဝ်းတၢင်း 300 ပီ။
ယၢမ်းလဵဝ် မိူင်းမလေႊသျႃႊ လႆႈယုၵ်ႉလိူၵ်ႈၶိုၼ်း ၶေႃႈပိုၼ်ၽၢဝ်ႇပၼ်ၾၢင်ႉၽေးလူမ်းလႅင်ႉဝႆႉယဝ်ႉသေတႃႉ ႁူဝ်ၼပ်ႉၵူၼ်း 18700 ပၢႆ တိုၵ်ႉလႆႈယူႇသဝ်းဝႆႉ တီႈဢွင်ႈၸွႆႈထႅမ်ၵူၼ်းထူပ်းၽေး။

ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းမလေႊသျႃႊ လၢတ်ႈဝႃႈ – ၵူၼ်းမိူင်းမလေႊသျႃႊ ၸိူဝ်းၶမ်ဝႆႉၼႂ်းမိူင်းထႆး တႃႇ 6200 ပၢႆၵေႃႈ လႆႈႁွင်ႉပွၵ်ႈမိူင်းၶိုၼ်းယဝ်ႉ ဝႃႈၼႆ။