ၾၢႆႇမိူင်းၶႄႇပိုတ်ႇၾၢႆၼမ်ႉ ဢၼ်သၢင်ႈဝႆႉၼိူဝ်မႄႈၼမ်ႉမၢဝ်းၼၼ်ႉလႄႈ ႁဵတ်းႁႂ်ႈၼမ်ႉထူမ်ႈတူင်ႈၼႃး ဢိၵ်ႇပႃးသူၼ် ဢၼ်မီးၸွမ်းသၢပ်ႇၼမ်ႉမၢဝ်း ၾၢႆႇႁွင်ႇဝဵင်းၼမ်ႉၶမ်း ဝၢၼ်ႈၸိူဝ်း တိတ်းၸပ်းၵၼ်တင်း ထုင်ႉလွႆႁူဝ်သိူဝ် လႅၼ်လိၼ်မိူင်းၶႄႇ-  မိူင်းတႆးပွတ်းႁွင်ႇ။

မိူဝ်ႈဝၼ်းတီႈ 18 လိူၼ်တီႊသႅမ်ႊပိူဝ်ႊ ၼမ်ႉမၢဝ်းၵိုင်ႉၵၢင်ႉယိုင်ႈၶိုၼ်ႈမႃး ထူမ်ႈသႂ်ႇတူင်ႈၼႃး လႄႈ သူၼ်ၶဝ်ႈၵၢပ်ႇ၊ သူၼ်သွႆႈ၊ သူၼ်ၽၵ်းယိူဝ်ႈၼၢင်းၶဵဝ် ၶွင်ၵူၼ်းဝၢၼ်ႈၵုၼ်ၵႅင်း၊ ဝၢၼ်ႈၵွင်းၼွင် မွၵ်ႈ 20 ဢေႊၶိူဝ်ႊပၢႆ ၸဝ်ႈသူၼ်ၸဝ်ႈၼႃး လူႉသုမ်းငိုၼ်းၵႂႃႇတင်းၼမ် ၼႆယဝ်ႉ။

ၸၢႆးတႆး ၸဝ်ႈသူၼ် ဝၢၼ်ႈၵုၼ်ၵႅင်း ၼႂ်းၸႄႈဝဵင်းၼမ်ႉၶမ်း လၢတ်ႈၼႄတီႈၽူႈတွႆႇႁွၵ်ႈဝႃႈ “မၼ်းယၢပ်ႇၸႂ် ၼႃႇဢိူဝ်ႈ။  ဢလၢင်း (ငိုၼ်းတိုၼ်း) သူၼ်၊ ၼႃးၼႆႉ မၼ်းၵႃႈႁႅင်းၼႃႇ။ ၵႃႈၸိူဝ်ႉၽၼ်း၊ ၵႃႈၾုၼ်ႇ၊ ၵႃႈႁဵတ်းသူၼ်ႁဝ်းၼႆႉ လႆႈၵူႈယိုမ်ငိုၼ်းပိူၼ်ႈ ဝႆႉ။ ၶႄႇၶဝ်ပွႆႇၼမ်ႉၼႆႉ မီးသွင်ဝၼ်းယဝ်ႉ။ ပေႃးၶဝ်ပွႆႇၶဝ်သမ်ႉပွႆႇတင်းဝၼ်း တင်းဝၼ်း။ ယွမ်ႇတၢင်းႁဝ်းၼႆႉ သမ်ႉၺႃးတီႈတႅမ်ႇ ပဵၼ်တူင်ႈႁႅင်းၼႃႇ။ ပေႃးၼမ်ႉမၢဝ်းၼမ်ဢိတ်းၼိုင်ႈၵူၺ်းၵေႃႈ သူၼ်၊ ၼႃးၸိူဝ်းၼႆႉ ထူမ်ႈမူတ်းယဝ်ႉ” ဝႃႈၼႆ။

ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ယဝ်ႉသေ သိုၵ်းတဢၢင်း ၶဝ်ႈၵုမ်းၵမ် ၸႄႈဝဵင်းၼမ်ႉၶမ်း ပၼ်ႇၵၢၼ်ၽွင်းငမ်းဝႆႉ ပဵၼ်တၢင်းၵၢၼ်။ ၾၢႆႇသိုၵ်းတဢၢင်း ၵႂႃႇပၢၼ်ႈၼမ်ႉ သၢင်ႈတႃႈႁိူဝ်းမႂ်ႇ တီႈၼမ်ႉမၢဝ်းလႄႈ ႁဵတ်းႁႂ်ႈၼမ်ႉ ဢမ်ႇၸၢင်ႈလႆလူင်းလီလႆႈ ဢိင်ၼိူဝ်ၵူၼ်းပိုၼ်ႉတီႈလၢတ်ႈသေ လႆႈႁူႉၸွမ်းၼင်ႇၼႆ။

ၼုမ်ႇၸၢႆး ၵေႃႉယူႇဝႆႉၼႂ်းၸႄႈဝဵင်းၼမ်ႉၶမ်းၵေႃႉၼိုင်ႈ လၢတ်ႈၼႄဝႃႈ “တၢင်းႁၢင်ၼမ်ႉမၢဝ်းၼၼ်ႉ သိုၵ်းလွႆၶဝ်မႃးပၢၼ်ႈၼမ်ႉ ႁဵတ်းတႃႈႁိူဝ်းဝႆႉၼိူဝ်ၶူဝ်ၼၼ်ႉ။ ၵွပ်ႈၼၼ်ႉၼမ်ႉ ဢမ်ႇပေႃးလႆလေႃႈလီ။ ႁဵတ်းႁႂ်ႈၼမ်ႉမၢဝ်းယိုင်ႈၶိုၼ်ႈမႃးထူမ်ႈသႂ်ႇတူင်ႈၼႃး၊ သူၼ်ၸိူဝ်းၼႆႉငၢႆႈလိူဝ်ၵဝ်ႇ။ ၵူႈပွၵ်ႈၼႆႉၼမ်ႉထူမ်ႈသူၼ်ႁဝ်းၶၢဝ်းၾူၼ်ၵူၺ်း။ မိူဝ်ႈလဵဝ်ၼႆႉ ၾူၼ်ၵေႃႈဢမ်ႇတူၵ်း။ လႅတ်ႇမႆႈတႅင်ႈတႅင်ႈၵေႃႈ ၺႃးၼမ်ႉထူမ်ႈ။” ဝႃႈၼႆ။

မိူဝ်ႈႁူဝ်လိူၼ်ၵျူႊလၢႆႊပူၼ်ႉမႃးၼႆႉၵေႃႈ ၾူၼ်တူၵ်းႁၢဝ်ႈႁႅင်းထပ်းၵၼ်လၢႆဝၼ်းလႄႈ ၼမ်ႉမၢဝ်းၵိုင်ႉၵၢင်ႉ ၼွင်းၶိုင်ႈမႃးလုပ်ႇထူမ်ႈသႂ်ႇႁိူၼ်းယေးၵူၼ်းမိူင်း ဝၢၼ်ႈၵုၼ်ႁႆး၊ ဝၢၼ်ႈ ၼွင်ၶမ်း၊ ဝၢၼ်ႈၼွင်မႃႉတႃႊ၊ မၢၼ်ႈၵုၼ် (တႂ်ႈ)၊ မၢၼ်ႈသွၼ်း၊ ဝၢၼ်ႈၵုၼ်ၵႅင်း၊ ဝၢၼ်ႈၵွင်းၼွင် ၸိူဝ်းၼႆႉ တူင်ႈၼႃး လႄႈ သူၼ်ၵူၼ်းဝၢၼ်ႈ လူႉၵွႆၵႂႃႇ ဢမ်ႇယွမ်း 4000 ဢေႊၶိူဝ်ႊ ဝႃႈၼႆ။

ဝၢၼ်ႈၵုၼ်ၵႅင်းၼႆႉ မီးဝႆႉၼႂ်းၸႄႈဝဵင်းၼမ်ႉၶမ်းသေတႃႉ ၸမ်ၵၼ်တင်းပွတ်းထုင်ႉလွႆႁူဝ်သိူဝ် ၸႄႈမိူင်းၶၢင်။ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ၸွမ်းသၢပ်ႇလႅၼ်လိၼ် မိူင်းတႆး- မိူင်း ၶႄႇၼႆႉ ႁဵတ်းၵၢၼ်ၽုၵ်ႇသွမ်ႈၶဝ်ႈ၊ ၶဝ်ႈၵၢပ်ႇ၊ သူၼ်ဢွႆႈ လႄႈ ၽၵ်းၶဵဝ်ၸိူဝ်းၼႆႉ ပဵၼ်ပိူင်လူင် ၼႆယဝ်ႉ။

တႅမ်ႈ-ၶုၼ်ၶိင်း