ယၢမ်းလဵဝ် တီႈမိူင်းထႆးပွတ်းတႂ်ႈ လၢႆလၢႆၸႄႈဝဵင်း ဢိၵ်ႇပႃးဝဵင်းလူင်ႁၢတ်ႇယႂ်ႇ ဢၼ်ပဵၼ်ဝဵင်းယႂ်ႇသုတ်း မၢႆ 5 ၼႂ်းမိူင်းထႆးၼၼ်ႉ ၼမ်ႉၼွင်းထူမ်ႈဝႆႉႁၢဝ်ႈႁႅင်း။ ႁွင်ႈၵၢၼ်ၾၢႆႇၵဵဝ်ႇၶွင်ႈၽေးသၽႃႇဝမိူင်းထႆး DDPM ပိုၼ်ၽၢဝ်ႇဝႆႉဝႃႈ မီးၵူၼ်းထူပ်းၽေးၼမ်ႉ မွၵ်ႈ 2 လၢၼ်ႉၵေႃႉ လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ် လႄႈ ၵမ်ႈၽွင်ႈယွၼ်းတၢင်းၸွႆႈထႅမ် တႃႇတေၶၢႆႉတီႈယူႇသဝ်း ဝႃႈၼႆ။

တႄႇဝၼ်းတီႈ 19 ဝၼ်းပုတ်ႉဝူင်ႈပူၼ်ႉမႃးၼႆႉ ၼမ်ႉယိုင်ႈၼွင်းထူမ်ႈ ၼႂ်းၸႄႈတွၼ်ႈ သူင်ၶလႃ ဝဵင်းလူင်ႁၢတ်ႇယႂ်ႇ ႁၢဝ်ႈႁႅင်း၊ တေႃႇထိုင်ဝၼ်းဢၢင်းၵၢၼ်းၼႆႉ ၾူၼ်တူၵ်းဢမ်ႇထၢတ်ႇသေ ၼမ်ႉတိုၵ်ႉၼွင်းၶိုၼ်ႈဝႆႉ။ သဵၼ်ႈတၢင်းရူတ်ႉၵႃးရူတ်ႉၾႆး ႁိူၼ်းယေး ဝတ်ႉဝႃးၽႃသိူဝ်ႇ ႁူင်းသဝ်း ႁူင်းလႅမ်းတင်းၼမ် ၼမ်ႉၼွင်းထူမ်ႈဝႆႉလႄႈ ယၢပ်ႇၽိုတ်ႇ တႃႇပၢႆႈၽေးၼမ်ႉတင်း တႃႇႁႃၵိၼ်လဵင်ႉတွင်ႉ။

ဝဵင်းႁၢတ်ႇယႂ်ႇၼႆႉ ၼွၵ်ႈလိူဝ် ၵူၼ်းမိူင်းထႆးၵူၺ်းဢမ်ႇၵႃး ႁႅင်းၵၢၼ်ၵူၼ်းမိူင်းမၢၼ်ႈ၊ ႁႅင်းၵၢၼ်ပီႈၼွင်ႉတႆးၵေႃႈ ယူႇသဝ်းႁဵတ်းၵၢၼ်ဝႆႉတင်းၼမ်။ ယွၼ်ႉၼမ်ႉၼွင်းထူမ်ႈသေ ဢမ်ႇလႆႈႁဵတ်းၵၢၼ် ဢမ်ႇၸၢင်ႈၵႂႃႇတၢင်းလႂ် လူဝ်ႇတၢင်းၸွႆႈထႅမ်ဝႆႉၼႆ ႁႅင်းၵၢၼ်ၼၢင်းယိင်းၵေႃႉၼိုင်ႈ လၢတ်ႈ။

ၼမ်ႉၼွင်းထူမ်ႈႁၢဝ်ႈႁႅင်းမႃး ၶၢဝ်းတၢင်းၼိုင်ႈဝူင်ႈၼႆႉ မီးၵူၼ်းလူႉတၢႆ 10 ပၢႆ။ ၵူၼ်းၸိူဝ်းလႆႈၶၢမ်ႇယူတ်းယႃတူဝ်ၵေႃႈ မီးဝႆႉတင်းၼမ်။ လွင်ႈၼမ်ႉၼွင်းထူမ်ႈတီႈဝဵင်းႁၢတ်ႇယႂ်ႇယၢမ်းလဵဝ်ၼႆႉ ၼႂ်းၶၢဝ်းတၢင်း 15 ပီ ပဵၼ်ဢၼ်ႁၢဝ်ႈႁႅင်းသုတ်း ၼႆယဝ်ႉ။