ၵူၼ်းဝၢၼ်ႈ  ၵျွၵ်ႉငႅၵ်ႉ ၼႂ်းဢိူင်ႇမျၢႆႇ ၸႄႈဝဵင်းဝၢၼ်ႈငႂ်ႈ(ယႂႃႇငၢၼ်ႇ) ၸိုင်ႈတႆးပွတ်းၸၢၼ်း  ၺႃးၸုမ်းဢမ်ႇႁူႉၾၢႆႇၶဝ်ႈယိုဝ်းတၢႆၵိုၵ်းႁိူၼ်းထႅင်ႈ 3 ၵေႃႉ  ၼႂ်းၶၢဝ်းတၢင်း လိူၼ်လဵဝ် ၵူၼ်းမိူင်းဝၢၼ်ႈငႂ်ႈ(ယႂႃႇငၢၼ်ႇ ) ထုၵ်ႇၶႃႈႁႅမ်တၢႆယဝ်ႉ 9 ၵေႃႉ  ။

ၼႂ်းဝၼ်းတီႈ 20 /5/2026 ယၢမ်းတဵင်ႈၶိုၼ်းၼၼ်ႉ ၸုမ်းယိပ်းၵွင်ႈၵၢင်ႇၸုမ်းၼိုင်ႈ ၼႄးဝႃႈပဵၼ်ၶွၼ်ႉတဝ်ႉသိုၵ်းမၢၼ်ႈၼႆသေ ၶဝ်ႈဢဝ်ၵွင်ႈယိုဝ်း ၵူၼ်းၸၢႆး ဢႃယု 30 ပၢႆ သွင်ၵေႃႉ တၢႆၵိုၵ်းႁိူၼ်း ၼႂ်းဝၢၼ်ႈၵျွၵ်ႉငႅၵ်ႉ ။

မိူၼ်ၼင်ႇၼႆ ၼႂ်းဝၼ်းတီႈ 18 /5/2026 ယၢမ်းၵၢင်ၶမ်ႈၼၼ်ႉၵေႃႈ မၢပ်ႇၼႄးဝႃႈ ပဵၼ်ပိဝ်ႇသေႃးထီး ၶွၼ်ႉတဝ်ႉသိုၵ်းမၢၼ်ႈၼႆသေ  ၶဝ်ႈယိုဝ်းၵူၼ်းၸၢႆးၵေႃႉၼိုင်ႈတၢႆ ၼႂ်းဝၢၼ်ႈမျၢႆႇ ၼင်ႇၵဝ်ႇ။

ၵူၼ်းၸၢႆးဢႃယု 30 ပီၼႂ်းဝဵင်းယႂႃႇငၢၼ်ႇလၢတ်ႈၽူႈတွႆႇႁွၵ်ႈဝႃႈ -“တီႈယႂႃႇငၢၼ်ႇၼႆႉ ၵူၼ်းမိူင်းထုၵ်ႇၶႃႈႁႅမ်တၢႆယူႇၸိူင်ႉၼႆ ၼိုင်ႈဝူင်ႈၼိုင်ႈပွၵ်ႈ  ၊ ပေႃးသိုၵ်းမၢၼ်ႈၶဝ်ႈ ပၵ်းတပ်ႉတီႈဝၢၼ်ႈလႂ်ၵေႃႈ ဝၢၼ်ႈၼၼ်ႉယဝ်ႉၵူၼ်းမိူင်းထုၵ်ႇၶႃႈႁႅမ် ၊ ၵမ်းၼႆႉၵေႃႈ လၢတ်ႈဝႃႈ ပဵၼ် တလၢၼ်ႊ ( ၵူၼ်းပၼ်ၶၢဝ်ႇသိုၵ်းမၢၼ်ႈ) လႄႈ ပိဝ်ႇသေႃးထီး ( ၶွၼ်ႉတဝ်ႉသိုၵ်းမၢၼ်ႈ) ၼႆသေ ထုၵ်ႇၶႃႈႁႅမ်ၵႂႃႇသွင်ၵေႃႉ ၊ ၼႂ်းဝၢၼ်ႈမျၢႆႇၵေႃႈ ၵေႃႉၼိုင်ႈ ၊ ငဝ်းလၢႆးမိူဝ်ႈလဵဝ်ၼႆႉ ဢမ်ႇပႃးၾၢႆႇလႂ်ၼႆႉလီသေပိူၼ်ႈယဝ်ႉ”- ဝႃႈၼႆ ။

ၼႂ်းပိုၼ်ႉတီႈၼၼ်ႉ သိုၵ်းမၢၼ်ႈယိုတ်းမိူင်း ဢိၵ်ႇပႃး ၸုမ်းလုၵ်ႉၽိုၼ်ႉ တူင်ႉၼိုင်ၵႂႃႇမႃးဝႆႉ။ ပဵၼ်ၸုမ်းလႂ်ႁဵတ်းႁၢႆႉႁႅမ်တၢႆၵႂႃႇဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ် ၸဝ်ႈၼႃႈတီႈ ၼႂ်းပိုၼ်ႉတီႈၵေႃႈ ဢမ်ႇဢဝ်ပုၼ်ႈၽွၼ်းႁႂ်ႈထိုင်တီႈလႆႈ ဝႃႈၼႆ ။

 ဝၢႆးၵူၼ်းမိူင်း ထုၵ်ႇႁဵတ်းႁၢႆႉႁႅမ်တၢႆယဝ်ႉ သိုၵ်းမၢၼ်ႈႁၢမ်ႈၵူၼ်းမိူင်း ဢွၵ်ႇႁိူၼ်းၽွင်းၵၢင်ၶမ်ႈ 8 မူင်း ၊  ဢဝ်ႁူမ်ႇလူမ်ႈပႃးၼႂ်းပိုၼ်ႉတီႈဝႆႉႁၢဝ်ႈႁႅင်း   ။

ၼႂ်းလိူၼ်မေႊၼႆႉလိူၼ်လဵဝ် ၵူၼ်းမိူင်း ၼႂ်းၸႄႈဝဵင်းဝၢၼ်ႈငႂ်ႈ (ယႂႃႇငၢၼ်ႇ) ထုၵ်ႇမၢပ်ႇၼႄးဝႃႈ ပဵၼ်ပိဝ်ႇသေႃးထီး ၵူၼ်းႁဵတ်းၵေႃႉသိုၵ်းမၢၼ်ႈ ၊ ၶွၼ်ႉတဝ်ႉသိုၵ်းမၢၼ်ႈၼႆသေ ထုၵ်ႇၸုမ်းယိပ်းၵွင်ႈၵၢင် ႁဵတ်းႁၢႆႉႁႅမ်တၢႆ 9 ၵေႃႉယဝ်ႉ ၼႆယဝ်ႉ ။

ပေႃးသိုၵ်းမၢၼ်ႈၶဝ်ႈထႅမ်ႁႅင်းသိုၵ်းၼႂ်းဝၢၼ်ႈလႂ် ဢိူင်ႇလႂ်ၵေႃႈ ၵူၼ်းမိူင်းထုၵ်ႇၶႃႈႁႅမ်တၢႆလႄႈ ယၢမ်းလဵဝ် ႁဵတ်းႁႂ်ႈၵူၼ်းမိူင်းမႆႈၸႂ်လွင်ႈႁူမ်ႇလူမ်ႈဝႆႉ   ။

ၵူၼ်းၸၢႆး ဢႃယု 20 ပၢႆ  လၢတ်ႈၽူႈတွႆႇႁွၵ်ႈဝႃႈ -“ တီႈယႂႃႇငၢၼ်ႇၼႆႉ ၵူၼ်းမိူင်းၵႆႉထုၵ်ႇၶႃႈႁႅမ်ၼႃႇလႄႈ လႆႈမႆႈၸႂ်ၼႃႇ ၊ ပေႃးသိုၵ်းမၢၼ်ႈမႃးၼႆႉ ဢမ်ႇႁတ်းဢွၵ်ႇႁိူၼ်းယဝ်ႉ ၵူဝ်ၶဝ်တီႉၵႂႃႇႁဵတ်းသိုၵ်း ၊ ယဝ်ႉၵေႃႈ လၢတ်ႈၵေႃႈဢမ်ႇႁတ်းၵႂႃႇလၢတ်ႈတေႃႇၶဝ် ၵူဝ်မီးၵူၼ်းပၼ်ၶၢဝ်ႇဝႃႈ ပဵၼ်ၵူၼ်းၶဝ်ၼႆသေ ထုၵ်ႇႁႅမ်တၢႆ  ၊ ပေႃးၶဝ်(သိုၵ်းမၢၼ်ႈ)  ၶဝ်ႈမႃးၼႆႉ ၼွၼ်းၵေႃႈဢမ်ႇလပ်းယဝ်ႉလႆႈမႆႈၸႂ်ၼႃႇၶႃႈ ”- ဝႃႈၼႆ ။

ၸွမ်းၼင်ႇသဵၼ်ႈမၢႆ ၸုမ်းၶၢဝ်ႇၽူႈတွႆႇႁွၵ်ႈ ၵဵပ်းဝႆႉၼၼ်ႉ တႄႇၼႂ်းလိူၼ် ၵျႅၼ်ႊၼိဝ်ႊရီႊ ပီ 2026 ထိုင် ၼႂ်းလိူၼ်မေႊ ၼႂ်းၶၢဝ်းတၢင်း 5 လိူၼ်ၼႆႉၵူၺ်း ၵူၼ်းမိူင်းဝဵင်းဝၢၼ်ႈငႂ်ႈ (ယႂႃႇငၢၼ်ႇ ) ထုၵ်ႇၸုမ်းယိပ်းၵွင်ႈၵၢင်ႇၶႃႈႁႅမ်တၢႆ ဢမ်ႇယွမ်း 20 ၵေႃႉယဝ်ႉ ။ ၵူၺ်းၵႃႈပဵၼ်ၸုမ်းယိပ်းၵွင်ႈၵၢင်ႇၸုမ်းလႂ်လူင်းမိုဝ်းၶႃႈႁႅမ်ၼႆတႄႉဢမ်ႇလႆႈႁူႉ ဢမ်ႇၸၢင်ႈယိုၼ်ယၼ်။

တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ။