သိုၵ်းမၢၼ်ႈတီႉၺွပ်းၵူၼ်းဝၢၼ်ႈဢူၵ်ႉတုၼ်း( အုတ်တွင်း ) 8 ၵေႃႉ ၼႂ်းၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ထိုင်ဝၼ်းမိူဝ်ႈၼႆႉ ဢမ်ႇလႆႈတင်းၵပ်းသိုပ်ႇၵၼ် တင်းၵူၼ်းတီႈႁိူၼ်း ၼႆယဝ်ႉ ။
ၼႂ်းဝၼ်းတီႈ 18 လိူၼ်ၵျူႊလၢႆႊၼႆႉ သိုၵ်းမၢၼ်ႈထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၵျွၵ်ႉငႅၵ်ႉ (ကျောက်ငှက်)သေ တုမ်ႉတိူဝ်ႉပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉ ၼႂ်းပိုၼ်ႉတီႈၵမ်းၼိုင်ႈ ။
ဝၢႆးပၢင်တိုၵ်းယဝ်ႉ ထိုင်မႃးဝၼ်းတီႈ 19 သိုၵ်းမၢၼ်ႈၶဝ်ႈၼႂ်းဝၢၼ်ႈဢူၵ်ႉတုၼ်းသေ တီႉၺွပ်း ၵူၼ်းဝၢၼ်ႈၵႂႃႇ 8 ၵေႃႉ ထိုင်ဝၼ်းမိူဝ်ႈၼႆႉ ဢမ်ႇလႆႈတင်းၵပ်းသိုပ်ႇၵၼ်တင်းၵူၼ်းတီႈႁိူၼ်း ။
ၵူၼ်းၸၢႆးၼႂ်းပိုၼ်ႉတီလၢတ်ႈၽူႈတွႆႇႁွၵ်ႈဝႃႈ -“ ပၢင်တိုၵ်းတႄႉ ဢမ်ႇတၼ်းပဵၼ်ႁၢဝ်ႈႁႅင်း ၊ ၵူၺ်းၾၢႆႇသိုၵ်းမၢၼ်ႈၺႃးငွႆးယိုဝ်းလႄႈ မီးၵူၼ်းလူႉတၢႆ ၊ ဝၢႆးပၢင်တိုၵ်းယဝ်ႉ သိုၵ်းမၢၼ်ႈ တီႉၵႂႃႇၵူၼ်း 8 ၵေႃႉ”- ဝႃႈၼႆ ။
တႄႇဝၼ်းတီႈ 16 ၼႆႉမႃး သိုၵ်းမၢၼ်ႈလႄႈ ၸုမ်းလုၵ်ႉၽိုၼ်ႉ တုမ်ႉတိူဝ်ႉပဵၼ်ပၢင်တိုၵ်းတင်း သဵၼ်ႈတၢင်း ဢွင်ႇပၢၼ်း – ယႂႃႇငၢၼ်ႇသေ သိုၵ်းမၢၼ်ႈထူဝ်းသိုၵ်းထႅမ်ႁႅင်းသိုၵ်း ၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း ဝႃႈၼႆ ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ယူႇတီႈယႂႃႇငၢၼ်ႇၼႆၵေႃႉ ဢမ်ႇမီးလွင်ႈႁူမ်ႇလူမ်ႈ ၊ ၵမ်ႉပဵၼ်ပၢင်တိုၵ်း ၵမ်ႉၶႃႈႁႅမ်ၵၼ်တၢႆ ၊ ပေႃးဢွၵ်ႇတႃႈဢွၵ်ႇတၢင်းၵေႃႈ မီးၸုမ်းၵူတ်ႇထတ်းမွၵ်ႈ 5 ၸုမ်းၼႆႉ ၊ ၵူတ်ႇထတ်းရူတ်ႉၵႃး ၊ ပေႃးပဵၼ်ၵူၼ်းဢၼ်ၶဝ်ထၢင်ႇထိူမ်ၼႆ ၶဝ်ႁွင်ႉၵူတ်ႇထတ်းႁၢဝ်ႈႁႅင်း မၢင်ပွၵ်ႈ လႆႈပၼ်ငိုၼ်းထႅင်ႈ”- ဝႃႈၼႆ ။
တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ။ သိုၵ်းမၢၼ်ႈလႄႈ ပျီႇတူႉၸိတ်ႉပဢူဝ်း ၼႄၼႃႈတိူဝ်ႈဝႃႈ တႃႇဢဝ်ႁူမ်ႇလူမ်ႈ ပၼ်ၼႂ်းဝၢၼ်ႈၼႂ်းဝဵင်းယူႇသေတႃႉ ၵၢင်ႉၵႄႇလႄႈ ၵူၼ်းမိူင်းၵႆႉၺႃး ၶႃႈႁႅမ် ဢမ်ႇဢဝ်ပုၼ်ႇၽွၼ်းပၼ်ႁႂ်ႈထိုင်တီႈၼႆယဝ်ႉ ။
မိူၼ်ၼင်ႇၼႆ မိူဝ်ႈဝၼ်းတီႈ 14/7/2026 ယၢမ်းႁူဝ်ၶမ်ႈ မီးၸုမ်းဢမ်ႇႁူႉၾၢႆႇၸုမ်းၼိုင်ႈ ၶဝ်ႈတီႉ ၺွပ်း ၶႃႈႁႅမ် ၵႅမ်ႁူဝ်ပဝ်ႈ DNDP လႄႈၵူၼ်းၶၢႆမူၵေႃႉၼိုင်ႈၵႂႃႇထႅင်ႈ ။ တႄႇလိူၼ်မေႊ ထိုင် လိူၼ်ၵျူႊလၢႆႊမႃးၼႆႉ ၵူၼ်းမိူင်း ၊ ပိဝ်ႇသေႃးထီးလႄႈ ၵၢင်ႉၵႄႇ ဝဵင်းယႂႃႇငၢၼ်ႇထုၵ်ႇၶႃႈႁႅမ် 13 ၵေႃႉ ၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ