ဝၼ်းတီႈ 20/05/2025 ၼႆႉ သိုၵ်းတဢၢင်း TNLA ဢွၵ်ႇၶေႃႈပူင်ၸီႉသင်ႇ ႁႂ်ႈၵူၼ်းပၢႆႈၽေး ၸိူဝ်း သွၼ်ႈယူႇတီႈၵျွင်းၶဵဝ်ၶမ်း ဢိူင်ႇတၢင်းၽႄ ဢုမ်ႇတီး ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၶၢႆႉ ဢွၵ်ႇၵႂႃႇတင်းသဵင်ႈ ၼႂ်းဝၼ်းတီႈ 21 ထိုင် 27 ႁႂ်ႈယဝ်ႉ ဝႃႈၼႆ။  

ၵူၼ်းပၢႆႈၽေး ၼႂ်းၸႄႈဝဵင်းၼွင်ၶဵဝ် ၵေႃႉၼိုင်ႈ လၢတ်ႈၼႄဝႃႈ -“ၸွမ်းႁိမ်းႁွမ်း တီႈၵျွင်းၶဵဝ်ၶမ်း ႁွပ်ႈႁွပ်ႈၼႆႉ မီးသိုၵ်းတဢၢင်းတင်း သိုၵ်းမၢၼ်ႈ လွမ်ႉႁွပ်ႈဢဝ်တီႈယူႇဝႆႉသေ တႃႇတေၶၢႆႉဢွၵ်ႇ ၵႂႃႇၼႆႉ မီးလွင်ႈယၢပ်ႇၽိုတ်ႇႁႅင်း။ ပေႃးဢွၵ်ႇဝၢင်းၵျွင်းၵႂႃႇၵေႃႈ ၵူဝ်သိုၵ်းတၢင်းသွင်ၾၢႆႇ ထၢင်ႇထိူမ် ၵၼ်သေ ယိုဝ်းၺႃးၵူၼ်းမိူင်းတၢႆထႅင်ႈ”- ဝႃႈၼႆ။

ဢိင်ၼိူဝ် လွင်ႈၼႆႉသေ ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းၼွင်ၶဵဝ်ၵေႃႉၼိုင်ႈ လၢတ်ႈၼႄဝႃႈ –

“ၵူၼ်းၸိူဝ်းဢၼ်ပၢႆႈၽေးမီးဝႆႉၼႂ်းၵျွင်းၼႆႉ တေဢမ်ႇလႆႈယူႇႁႄၵေႃႉ ၼႆဝႃႇ။ သိုၵ်းလွႆၶဝ် မႃး လၢတ်ႈ။ မိူဝ်ႈလဵဝ် ၼႂ်းၵျွင်းၼႆႉ မီးၵူၼ်းယူႇမွၵ်ႈ 100 ၵေႃႉပၢႆ။ တူၺ်းလၢႆးၶဝ်ၼႆႉ ၶဝ်တိုၼ်းသႂ်ႇ ၸႂ်ၶႂ်ႈႁႂ်ႈၵျွင်းၵွႆၼၼ်ႉယဝ်ႉဝႃႈ။ ပေႃးၵူၼ်းဝၢၼ်ႈဢွၵ်ႇၼႆၵေႃႈ ၶဝ်ဢၢၼ်းၶဝ်ႈမႃးယူႇၼၼ်ႉၼႃႇ။ ဢၼ်ယိုဝ်းၵူၼ်းတၢႆၵေႃႈ ပဵၼ်ၶဝ်ယိုဝ်း၊ ဢၼ်ၸီႉသင်ႇႁႂ်ႈပၢႆႈၵေႃႈ ပဵၼ်ၶဝ်”- ဝႃႈၼႆ။

ၵဵဝ်ႇၵပ်းလွင်ႈၼႆႉသေ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇတီႈၽူႈၶၢၼ်ႇပၢၵ်ႇ တပ်ႉသိုၵ်း တဢၢင်းၵေႃႈ ဢမ်ႇလႆႈ။

တႄႇၵၢင်လိူၼ်မေႊၼႆႉမႃး ၵူၼ်းပၢႆႈၽေးသိုၵ်း ၺႃးၸုမ်းယိပ်းၵွင်ႈၵၢင်ႇငွႆးယိုဝ်းသေ လူႉတၢႆ 3 ၵေႃႉ မၢတ်ႇၸဵပ်းဝႆႉ 2 ၵေႃႉ တီႈၵျွင်းၶဵဝ်ၶမ်း ဢိူင်ႇတၢင်းၽႄ ဢုမ်ႇတီး ၸႄႈဝဵင်းၼွင်ၶဵဝ်ၼႆႉ။

ၼႂ်းၸႄႈဝဵင်းၼွင်ၶဵဝ်ၼႆႉ မီးသိုၵ်းတဢၢင်း TNLA ဢဝ်တီႈယူႇဝႆႉ ၸဵမ်ၼႂ်းဝၢၼ်ႈ၊ ၼႂ်းဢိူင်ႇၸွမ်း ပွၵ်ႉ ၸိူဝ်းမီးၵူၼ်းဝၢၼ်ႈယူႇသဝ်းၼၼ်ႉသေ တဵၵ်းၸႂ်ႉလိုပ်ႈၵူၼ်းဝၢၼ်ႈ ၸိူဝ်းယူႇသဝ်းၼႂ်း ဢုမ်ႇတီး၊ တၢင်းၽႄ၊ ၶူၵ်ႉၼမ်ႉ၊ သၢမ်သိူဝ်၊ ဝၢၼ်ႈၼႃးၶေႃႉ ၸိူဝ်းၼႆႉဢွၵ်ႇဝၢၼ်ႈၵႂႃႇတင်းသဵင်ႈ ဝႃႈၼႆ။

တႅမ်ႈ – ၽူၺ်းၼုမ်ႇ