ၵူၼ်းပိုၼ်ႉတီႈ ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ တုၵ်းယွၼ်း သိုၵ်းၶႄႇၵဝ်ႈၵၢင်ႉ MNDAA ႁႂ်ႈပိုတ်ႇၶိုၼ်းႁူင်းႁဵၼ်း ၼင်ႇႁိုဝ်လုၵ်ႈႁဵၼ်းလုၵ်ႈဢွၼ်ႇ တေဢမ်ႇႁၢင်ႇၵႆတင်း လိၵ်ႈလၢႆးပၢႆးပၺ်ႇၺႃႇ ဝႃႈၼႆ။

သိုၵ်းၶႄႇၵဝ်ႈၵၢင်ႉ ၶဝ်ႈၵုမ်း ၸႄႈဝဵင်းၵူတ်ႉၶၢႆသေ ၽွင်းလိူၼ်ဢေႊပရိူဝ်ႊလ်ပူၼ်ႉမႃး သင်ႇပိၵ်ႉဢိုတ်းပႅတ်ႈႁူင်းႁဵၼ်း 130 ပၢႆဢၼ်ၵေႃႇမတီႇပၢႆးပၺ်ႇၺႃႇတဢၢင်း TLEC ဢွၼ်ၼမ်းပိုတ်ႇဝႆႉ၊ လုၵ်ႈႁဵၼ်း 1200 ပၢႆ ႁၢမ်းသုၼ်ႇသွၼ်ႁဵၼ်းၵႂႃႇ။

ၼင်ႇႁိုဝ် ႁူင်းႁဵၼ်းၸိူဝ်းၼၼ်ႉ တေပိုတ်ႇၶိုၼ်းၼႆႉ ၵေႃႇမတီႇ လိၵ်ႈလၢႆးလႄႈယဵၼ်ႇငႄႈ ၸၢဝ်းၶိူဝ်းႁူမ်ႈတုမ် ဝဵင်းၵူတ်ႉၶၢႆ လႆႈတုၵ်းယွၼ်းဝႆႉတီႈ ၽူႈမီးပုၼ်ႈၽွၼ်း သိုၵ်းၶႄႇၵဝ်ႈၵၢင်ႉ MNDAA။ ပိုတ်ႇၸွမ်း ပိူင်ႁူင်းႁဵၼ်း သုၼ်ႇတူဝ်ၵေႃႈလီ ဢမ်ႇၼၼ် ပိူင်ပၢႆးပၺ်ႇၺႃႇ ဢၼ်မႂ်ႇၵေႃႈလီ ႁႂ်ႈသိုၵ်းၶႄႇၵဝ်ႈၵၢင်ႉ ပၼ်ပၢႆးပၺ်ႇၺႃႇ လွတ်ႈလႅဝ်းၶိုၼ်း ဝႃႈၼႆ။

လိူဝ်ၼၼ်ႉ ၸွမ်းၼင်ႇပိူင်ပၢႆးပၺ်ႇၺႃႇသိုၵ်းၶႄႇၵဝ်ႈၵၢင်ႉသေ တီႈႁွင်းႁဵၼ်းသုၼ်ႇတူဝ်လႆႈ လႆႈသွၼ်ႁဵၼ်း ဝၢႆးဝၼ်း 1မူင်းၵူၺ်းလႄႈ တွၼ်ႈတႃႇပေႃႈမႄႈလုၵ်ႈႁဵၼ်းၵေႃႈ ပဵၼ်ဢၼ်ယၢပ်ႇၽိုတ်ႇဝႆႉ။

သိုၵ်းၶႄႇၵဝ်ႈၵၢင်ႉ ပိုၼ်ၽၢဝ်ႇဝႆႉ ၼႂ်းလိူၼ်ဢေႊပရႄႊလ် ပူၼ်ႉမႃးၼႆႉဝႃႈ ၼႂ်း 4 ၸႄႈတွၼ်ႈ 8 ၸႄႈဝဵင်းၼႆႉ လႆႈပိုတ်ႇဝႆႉႁူင်းႁဵၼ်း 100 ပၢႆ။ ၵူၺ်းၵႃႈ ၼႂ်းၸႄႈဝဵင်းၵူတ်ႉၶၢႆ ဢၼ်ယိုတ်းၵုမ်းလႆႈဝႆႉ တီႈသိုၵ်းတဢၢင်းၼၼ်ႉ တေပိုတ်ႇႁူင်းႁဵၼ်းလၢႆလင် ဢၼ်ဝႃႈၼၼ်ႉတႄႉ ပႆႇလႆႈႁူႉၸွမ်း။