မၢၵ်ႇတႅၵ်ႇတိူဝ်ႉ ထဝ်ႈယိင်း လႄႈ လုၵ်ႈဢွၼ်ႇ 2 ၵေႃႉ  မၢတ်ႇၸဵပ်းႁၢဝ်ႈႁႅင်း တီႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ   ။   

မိူဝ်ႈဝႃးဝၼ်းတီ 25/3/2026 ယၢမ်းၵၢင်ဝၼ်း 12 မူင်းၶိုင်ႈ ထဝ်ႈယိင်းလႄႈ လုၵ်ႈဢွၼ်ႇ 2 ၵေႃႉ   ၵႂႃႇၵဵပ်းၽိုၼ်း တီႈၼႂ်းဝၢင်းလုမ်း ၸုမ်းၼၢင်းယိင်းတဢၢင်း (တအာင်းအမျိုးသမီးရေးရာ) ၼၼ်ႉ ၵႂႃႇၵွင်ႉမႅၼ်ႈမၢၵ်ႇၵိုတ်းၶၢင်ႉၶမ်ဝႆႉ တႅၵ်ႇတိူဝ်ႉႁဵတ်းႁႂ်ႈထဝ်ႈယိင်းလႄႈ လုၵ်ႈဢွၼ်ႇ 2 ၵေႃႉ  မၢတ်ႇၸဵပ်းႁၢဝ်ႈႁႅင်း လႆႈႁၢမ်ႇသူင်ႇႁူင်းယႃ ။

ထဝ်ႈယိင်းၼၼ်ႉပဵၼ် တေႃႇဢေးသူၺ်ႇယႄႇ ဢႃယု 63 ပီ ၊ လုၵ်ႈဢွၼ်ႇ 2 ၵေႃႉတႄႉပဵၼ် မွင်ႇၼၢႆႇမိၼ်းထုၼ်းဢႃယု 13 ပီ လႄႈ မသူႉၵလျႃႇ ဢႃယု 10 ပီ ။ တင်းသၢမ်ၵေႃႉၼႆႉ ယၢမ်းလဵဝ် လႆႈသူင်ႇ ယူတ်းယႃတူဝ်ဝႆႉတီႈႁူင်းယႃ ဝဵင်းသႅၼ်ဝီ  ယဝ်ႉဝႃႈၼႆ ။

ၵူၼ်းၸၢႆးယူႇဝဵင်းၵူတ်ႉၶၢႆၵေႃႉၼိုင်ႈ တႅမ်ႈတၢင်ႇတီႈသိုဝ်ႇတူင်ႇဝူင်းဝႃႈ – “ၽွင်းၶဝ်သၢမ်ၵေႃႉ ၵႂႃႇႁႃၽိုၼ်း တီႈၼႂ်းဝၢင်းလုမ်း ၸုမ်းၼၢင်းယိင်းတဢၢင်းၼၼ်ႉ ၶဝ်ၵႂႃႇႁၼ်မၢၵ်ႇႁူဝ်သိုၵ်း။ ၽိူဝ်ႇၶဝ်ၵႂႃႇယိပ်းဢဝ်မၢၵ်ႇႁူဝ်သိုၵ်းၼၼ်ႉၵေႃႈ မၢၵ်ႇဢၼ်မူၵ်းဝႆႉတႂ်ႈမၢၵ်ႇႁူဝ်သိုၵ်းၼၼ်ႉတႅၵ်ႇ။ ၸၢၵ်ႇမၢၵ်ႇတိူဝ်ႉသႂ်ႇၶဝ်လႄႈလႆႈမၢတ်ႇၸဵပ်းၵႂႃႇ  ”– ဝႃႈၼႆ ။

ၵဵဝ်ၵပ်းလွင်ႈမၢၵ်ႇမႅင်းၵိုတ်းၶင်ႉၼႆႉ ၼၢင်းယိင်းၽူႈၶဝ်ႈၸုမ်းၸွႆႈထႅမ်ၼႂ်းတူင်ႇဝူင်းၵေႃႉၼိုင်ႈ ပၼ်ၾၢင်ႉလၢတ်ႈဝႃႈ-“ပေႃးၵႂႃႇၼႂ်းၼႃႈလိၼ်ဢၼ်ယၢမ်ႈပဵၼ်ပၢင်တိုၵ်း ၼၼ်ႉၸိုင် ၸၢင်ႈလႆႈထူပ်းႁၼ် မၢၵ်ႇၵွင်ႈၸိုၼ်း ယၢမ်းလဵၵ်ႉယႂ်ႇ  ဢၼ်ၸၢင်ႈတႅၵ်ႇၽူင်ႉပဵၼ်ၽေး ၊  ပေႃးႁၼ်ၼႆ တိုၼ်းဝႃႈယႃႇၶဝ်ႈၸမ်လႃးလႃး။ ၸၢင်ႈတႅၵ်ႇၽူင်ႉ ၸၢင်ႈမၢတ်ႇၸဵပ်းႁၢဝ်ႈႁႅင်း ဢမ်ႇၼၼ် ၸၢင်ႈထိုင်တၢႆလူးၵွၼ်ႇ”-ဝႃႈၼႆ ။  

ဝဵင်းၵူတ်ႉၶၢႆၼႆႉ ပဵၼ်ဝဵင်းၵိုၼ်း ငိုၼ်းၶွၼ်ႈဝဵင်းၼိုင်ႈ။ မီးမၢၼ်ႈ ၊  တႆး ၊  ၶၢင် ယူႇႁူမ်ႈၵၼ်ဝႆႉ။ ၵူၺ်းၵႃႈၽွင်းပၢင်တိုၵ်း ၽႅၼ်ယၼ်ႇသိုၵ်း 1027 ၼၼ်ႉ သိုၵ်း TNLA လႄႈ MNDAA ပိုတ်းယိုဝ်းယိုတ်းလႆႈဝႆႉတီႈသိုၵ်းမၢၼ်ႈသေ ႁူမ်ႈၵၼ်ပၼ်ႇၵၢၼ်ၽွင်းငမ်းဝႆႉ။

ၼႂ်းၵၢင်လိူၼ် ၾႅပ်ႊပိဝ်ႊရီႊ ပီ 2026 ၼႆႉ သိုၵ်းတဢၢင်း (TNLA) လႄႈ သိုၵ်းၵဝ်ႈၵၢင်ႉ (MNDAA) ပဵၼ်ပၼ်ႁႃ လွင်ႈၵၢၼ်ဢုပ်ႉပိူင်ႇၼႃႈတီႈၽွင်းငမ်းၵၼ်သေ ၽိတ်းၵၼ်ထုပ်ႉၵၼ် လၼ်ႇၵွင်ႈတေႃႇၵၼ် သွင်ၾၢႆႇလႆႈပဵၼ်ပၢင်တိုၵ်းၵၼ် ။ ဝၢႆးႁူဝ်ၼႃႈသွင်ၾၢႆႇ ဢုပ်ႇဢူဝ်းတူၵ်းလူင်းၵၼ်ယဝ်ႉ ယၢမ်းလဵဝ် သိုၵ်းၶႄႇၵဝ်ႈၵၢင်ႉ ၶဝ်ႈၵုမ်းၵမ် ၸတ်းၵၢၼ်ၽွင်းငမ်းဝႆႉ။