တီႈဝဵင်းၵူတ်ႉၶၢႆ ဢၼ်သိုၵ်းတဢၢင်း တိုၵ်းလႆႈၽွင်းငမ်းဝႆႉၼၼ်ႉဢိင်ၼိူဝ်ငဝ်းလၢႆးဢမ်ႇပေႃးၶႂ်ႈ ၼိမ်သဝ်းၶိုၼ်းႁေၵူၼ်းတူၵ်းၶွၵ်ႈတႂ်ႈသိုၵ်းတဢၢင်းၵုမ်းၼၼ်ႉ ဢွၵ်ႇပၢႆႈလွတ်ႈဝႆႉ 30 ပၢႆ ယၢမ်းလဵဝ်သိုၵ်းတဢၢင်းတိုၵ်ႉလမ်းႁႃယူႇဝႃႈၼႆ။

ၵူၼ်းတူၵ်းၶွၵ်ႈၸိူဝ်းၼႆႉ ပၢႆႈမိူဝ်ႈဝၼ်ႈတီႈ1/11/2025 ယၢမ်းၵၢင်ၶိုၼ်း။ ၵူၼ်းမိူင်းဝဵင်းၵူတ်ႉၶၢႆလၢတ်ႈဝႃႈ “ ၵူၼ်းတူၵ်းၶွၵ်ႈၸိူဝ်းၼႆႉပဵၼ်ၵူၼ်းၶွၵ်ႈယွၼ်ႉယႃႈမဝ်းၵမ်၊ လွင်ႈလၵ်ႉၸၵ်ႉၶုတ်ႈၸိူဝ်းၼႆႉ။ ၶွၵ်ႈလူင်ၵူတ်ႉၶၢႆၼႆႉယႂ်ႇ- ၵႅၼ်ႇၶႅင်ထၢၼ်ႇၼႆႉႁဵတ်းႁိုဝ်လႄႈ ဢွၵ်ႇပၢႆႈလႆႈပဵၼ် 30 ပၢႆပဵၼ်ဢၼ်လီဢၢမ်းလူင်လၢင် – ဢမ်ႇၼၼ်ၵေႃႈ သိုၵ်းတဢၢင်းလၵ်ႉပွႆႇႁိုဝ်ဢမ်ႇႁူႉ။ ၵူၺ်းၵႃႈတေႃႇထိုင်မိူဝ်ႈၼႆႉ ပလိၵ်ႈတဢၢင်းလမ်းႁႃယူႇၵေႃႈပႆႇႁၼ်တီႉလႆႈၶိုၼ်း ”- ဝႃႈၼႆ။

ဢိင်ၼိူဝ်ပၢင်တိုၵ်းသိုၵ်းသိူဝ်ၼႂ်းမိူင်း၊ ငဝ်းလၢႆးဝၢၼ်ႈမိူင်းဢမ်ႇလီသေ ယၢမ်းလဵဝ်တီႈဝဵင်းၵူတ်ႉၶၢႆၼႆႉၽူႈလၵ်ႉၵူၼ်းၸူၼ်လိူင်ႇၼမ်။ ယၢမ်းလဵဝ်ၵူၼ်းတူၵ်းၶွၵ်ႈၸိူဝ်းၼၼ်ႉၶိုၼ်းလွတ်ႈဝႆႉလႄႈ ပဵၼ်ဢၼ်လီမႆႈၸႂ်လွင်ႈႁူမ်ႇလူမ်ႈၵူၼ်းမိူင်းတႄႉတႄႉ – ၵူၼ်းၵူတ်ႉၶၢႆလၢတ်ႈၼင်ႇၼႆ။

“မိူဝ်ႈၵွၼ်ႇသိုၵ်းၵဝ်ႈၵၢင်ႉဢဝ်ႁူမ်ႇလူမ်ႈၸွႆႈ။ ၸူဝ်ႈၵဝ်ႈၵၢင်ႉဢမ်ႇမီးၼႆႉသိုၵ်းလွႆ ဢမ်ႇဢဝ်ႁူမ်ႇလူမ်ႈလႆႈလႄႈ ၵူၼ်းလၵ်ႉၵူၼ်းၸူၼ်လိူင်ႇၼမ်” – ဝႃႈၼႆ။

လွင်ႈၵူၼ်းတူၵ်းၶွၵ်ႈတီႈၶွၵ်ႈဝဵင်းၵူတ်ႉၶၢႆ လၵ်ႉဢွၵ်ႇပၢႆႈပူၼ်ႉလွတ်ႈဝႆႉ 30 ပၢႆၼႆ ၾၢႆႇသိုၵ်းတဢၢင်းတႄႉ ပႆႇပိုၼ်ၽၢဝ်ႇသင်ဝႆႉ။

ဝဵင်းၵူတ်ႉၶၢႆၼႆႉ ပဵၼ်ဝဵင်းၵိုၼ်းငိုၼ်းၶွၼ်ႈဝဵင်းၼိုင်ႈ။ မီးမၢၼ်ႈ တႆး ၶၢင် ယူႇႁူမ်ႈၵၼ်ဝႆႉ။ ၵူၺ်းၵႃႈၽွင်းပၢင်တိုၵ်း ၽႅၼ်ယၼ်ႇသိုၵ်း 1027 ၼၼ်ႉ သိုၵ်း TNLA လႄႈ MNDAA ပိုတ်းယိုဝ်းယိုတ်းလႆႈဝႆႉတီႈသိုၵ်းမၢၼ်ႈ သေ ႁူမ်ႈၵၼ်ပၼ်ႇၵၢၼ်ၽွင်းငမ်းဝႆႉ။