သိုၵ်းၵဝ်ႈၵၢင်ႉ MNDAA လႄႈ သိုၵ်းတဢၢင်း TNLA ဢုပ်ႇၵုမ်ၵၼ်ၼႂ်းဝၼ်းတီႈ 17 – 18 လႄႈ ဝၼ်းတီႈ 20 လိူၼ်မၢတ်ႉၶျ်ၼႆႉ တီႈဝဵင်းလၢဝ်ႇၵၢႆးသေ တူၵ်းလူင်းၵိုတ်းတိုၵ်းၵၼ် ဝဵင်းၵူတ်ႉၶၢႆတႄႉ သိုၵ်းၵဝ်ႈၵၢင်ႉသိုပ်ႇၵုမ်းၵႂႃႇဝႃႈၼႆ။

လူၺ်းယေႇဢူး ၽူႈၶၢၼ်ပၢၵ်ႇ ၾၢႆႇပွင်ႇၶၢဝ်ႇတပ်ႉသိုၵ်းတဢၢင်းလၢတ်ႈတီႈႁွင်ႈၵၢၼ်ၶၢဝ်ႇ People’s Spring – Myanmar Now- Khit Thit သိုဝ်ႇၶၢဝ်ႇမၢၼ်ႈလၢႆလၢႆဢၼ်ဝႆႉဝႃႈ – “ပၢင်ဢုပ်ႇၵုမ်ၵၼ်ယဝ်ႉတူဝ်ႈၵႂႃႇမိူဝ်ႈဝႃး။ တူၵ်းလူင်းၵၼ်လႆႈတႃႇၵိုတ်းတိုၵ်းၵၼ်သေဢမ်ႇၵႃး မိူဝ်းၼႃႈမႃးၵေႃႈ တေဢမ်ႇႁႂ်ႈပဵၼ်ပၼ်ႁႃၸိူင်ႉၼႆထႅင်ႈ။ ၼွၵ်ႈလိူဝ်ၼႆႉ 2 ၸုမ်းၼႆႉတေသိုပ်ႇႁဵတ်းဢူၺ်းလီၵၼ်ၵႂႃႇထႅင်ႈ”– ဝႃႈၼႆ။

ၽွင်း 2 ၸုမ်းၵႂႃႇဢုပ်ႇၵၼ်တီႈလၢဝ်ႇၵၢႆးယူႇၼႆႉ သိုၵ်းၵဝ်ႈၵၢင်ႉ ၶဝ်ႈပိုတ်းယိုဝ်းပႃးတပ်ႉပၢင်သဝ်းသိုၵ်းလွႆတဢၢင်း တီႈဢီႇၼၢႆး ၼႂ်းၵႄႈၵၢင် လႃႈသဵဝ်ႈ -ၼမ်ႉတူႈသေ ယိုတ်းလႆႈမိူဝ်ႈဝႃး ဝၼ်းတီႈ 20/03/2026 ၼင်ႇၵဝ်ႇ။

ၵူၼ်းပိုၼ်ႉတီႈယိုၼ်ယၼ်လၢတ်ႈတီႈၽူႈတွႆႇႁွၵ်ႈဝႃႈ -“ သိုၵ်းၵဝ်ႈၵၢင်ႉမႃးလၢတ်ႈသိုၵ်းလွႆဝႃႈ ပေႃးဢမ်ႇၶႂ်ႈပဵၼ်ပၼ်ႁႃ ႁႂ်ႈထွႆထွၼ်ပၼ်ၼႆလႄႈ ၾၢႆႇၼိုင်ႈၵေႃႈထွႆထွၼ်ပၼ်ၵႂႃႇလီလီၵူၺ်း။ ဝၢႆးႁေၼၼ်ႉ သိုၵ်းၶႄႇၵဝ်ႈၵၢင်ႉၵေႃႈ ထႅမ်ႁႅင်းသိုၵ်းမႃးယူႇဝႆႉတီႈဢီႇၼၢႆးၼႆႉသမ်ႉပေႃးတဵမ်ၵႂႃႇမူတ်း။ သိုၵ်းလွႆတႄႉ ထွႆၶိုၼ်ႈၵႂႃႇယူႇဝႆႉတီႈတၢင်းၼိူဝ်လွႆ ဢၼ်မီးႁိမ်းတၢင်းၶွႆႈ လႃႈသဵဝ်ႈ- ၼမ်ႉတူႈ- မိူင်းယဵၼ်ၼၼ်ႉၼႆ။ မၼ်းပဵၼ်သဵၼ်ႈတၢင်းဢၼ်လမ်ႇလွင်ႈတေႃႉႁႄႈ ၼမ်ႉတူႈလႄႈ လႅပ်ႈၶဝ်တေဢမ်ႇယဝ်ႉလၢႆၵႂႃႇမွၵ်ႈၼႆႉၵူၺ်းႁိုဝ်ၼႆပဵၼ်ဢၼ်လီမႆႈၸႂ်။ ၵမ်ႈၽွင်ႈဝႃႈ သိုၵ်းၶႄႇၼႆႉ ၶိုၼ်ႈၵႂႃႇထိုင်တၢင်းမၢၼ်ႈၸၢမ်ပုၼ်ႉယဝ်ႉၼႆၵေႃႈမီး။”- ဝႃႈၼႆ။

လွင်ႈၼႆႉလူၺ်းယေႇဢူး ဢမ်ႇလၢတ်ႈပႃးပဵၼ်တၢင်းၵၢၼ်သေတႃႉ မၼ်းၼၢင်းလၢတ်ႈၵႂႃႇဝႃႈ “ 2 တပ်ႉၸုမ်းတူၵ်းလူင်းၵၼ်လႆႈပႃးလွင်ႈတမ်းဝၢင်း တီႈယူႇတပ်ႉယူႇၽွင်ႈ၊ ၶၢဝ်ႇဢၼ်ၽႄႈယူႇဝႃႈ ဝဵင်းဢၼ် TNLA ၵုမ်းဝႆႉ 3 ဝဵင်းၼႆႉ လႆႈမွပ်ႈပၼ် MNDAA ၵုမ်းၵႂႃႇဢၼ်ဝႃႈၼၼ်ႉတႄႉဢမ်ႇၸႂ်ႈ။ ဢၼ်တူၵ်းလူင်းၵၼ်လႆႈထႅင်ႈဢၼ်ၼိုင်ႈတႄႉ တင်း 2 ၾၢႆႇတေလႆႈပွႆႇပၼ်ၵူၼ်းသိုၵ်းဢၼ်တီႉၺွပ်းၵုမ်းၶင်ဝႆႉၸိူဝ်းၼၼ်ႉ” – ဝႃႈၼႆ။

သိုၵ်းလွႆတဢၢင်းလႄႈသိုၵ်းၵဝ်ႈၵၢင်ႉ ဢၼ်ပဵၼ်သိုၵ်းဢူၺ်းလီၵၼ်သေ ႁူမ်ႈၵၼ်ၸတ်းပၢင်တိုၵ်းၽႅၼ်ယၼ်ႇသိုၵ်း 1027 ပိုတ်းယိုဝ်းသိုၵ်းမၢၼ်ႈမႃးၼႆႉ ၶိုၼ်းမႃးတွၵ်ႉတႅၵ်ႉမီးပၼ်ႁႃၵၼ်လွင်ႈသိုၵ်းတဢၢင်းၸႂ်ႉသိုၵ်းၵဝ်ႈၵၢင်ႉ ပူတ်းပႅတ်ႈၵွင်ႈထၢႆႇ CCTV တီႈဝဵင်းၵူတ်ႉၶၢႆ။ ဝၢႆးၼၼ်ႉသိုၵ်းတဢၢင်းလိုပ်ႈသိုၵ်းၶႄႇၵဝ်ႈၵၢင်ႉဢွၵ်ႇဝဵင်းၵူတ်ႉၶၢႆ မိူဝ်ႈလိူၼ်ၾႅပ်ႉပိဝ်ႊရီႊပူၼ်ႉမႃး။

သိုၵ်းၶႄႇၵဝ်ႈၵၢင်ႉၶိုၼ်းလိုပ်ႈလမ်းပိုတ်းယိုဝ်းတိုၵ်းတေႃးသိုၵ်းတဢၢင်း ၼႂ်းၸႄႈဝဵင်းလႃႈသဵဝ်ႈ – သႅၼ်ဝီၸိူဝ်းၼႆႉသေ လႆႈပိုတ်းယိုဝ်းၵၼ်တေႃႇထိုင်ဝၼ်းတီႈ 16/3/2026 ၼႂ်းၸႄႈဝဵင်းၵူတ်ႉၶၢႆ ၊ ၼႂ်းၸႄႈဝဵင်းလႃႈသဵဝ်ႈ လႄႈ ၼႂ်းၸႄႈဝဵင်းၼမ်ႉၶမ်းၸိူဝ်းၼႆႉ။ ၵူၼ်းသိုၵ်းတဢၢင်းၺႃးသိုၵ်းၶႄႇၵဝ်ႈၵၢင်ႉတီႉၺွပ်းဝႆႉ 100 ပၢႆ လူၺ်းယေႇဢူးတွပ်ႇတီႈသိုဝ်ႇၶၢဝ်ႇလၢႆလၢႆဢၼ်ၼင်ႇၼႆ။