ၵူၼ်းဝၢၼ်ႈၼႂ်းဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ 2 ၵေႃႉ ၵႂႃႇၵဵပ်းလႆႈမၢၵ်ႇမႅင်းသေ ဢဝ်ပွၵ်ႈမႃးႁိူၼ်း မၢၵ်ႇတႅၵ်ႇ သႂ်ႇလူႉတၢႆထင်ႇတီႈ – ဝႃႈၼႆ ။
ၼႂ်းဝၼ်းတီႈ 2 /11/2025 ယၢမ်းႁူဝ်ၶမ်ႈမွၵ်ႈ 5 မူင်း ၵူၼ်းမိူင်း 2 ၵေႃႉ တီႈပွၵ်ႉ 5 ထုင်ႉၼမ်ႉၽၵ်းၵႃ ၵဵပ်းလႆႈမႃး ၶိူင်ႈမၢၵ်ႇ သႅၼ်း 60 မမ ဢၼ်ပႆႇတႅၵ်ႇၼၼ်ႉ မႃးယႃႉတူၺ်း ။ မၢၵ်ႇတႅၵ်ႇၽူင်ႉသႂ်ႇ လူႉတၢႆ ထင်တီႈ 2 ၵေႃႉ ဝႃႈၼႆ ။
ၵူၼ်းပိုၼ်ႉတီႈလၢတ်ႈဝႃႈ -“ ၶဝ်ၶႂ်ႈလႆႈ ယၢမ်းၼႂ်းမၢၵ်ႇၼၼ်ႉသေၵႂႃႇၵဵပ်းမၢၵ်ႇမႃးယႃႉတူၺ်း တၢႆထင်တီႈ တင်းသွင်ၵေႃႉ ၊ ၵူၼ်းဢၼ်လူႉတၢႆၼၼ်ႉ ပဵၼ်သႅၼ်းပၢၼ်ၵၢင်တင်းသွင်ၵေႃႉ”- ဝႃႈၼႆ ။
ၵူၼ်းၸၢႆးသွင်ၵေႃႉၼၼ်ႉၽွင်း ၵႂႃႇၵဵပ်း ဢဝ်မၢၵ်ႇဢၼ်ၵိုတ်းၶင်ႉဝႆႉ မိူဝ်းၽွင်းပၢင်တိုၵ်းၼၼ်ႉသေ ၽွင်းမႃးယႃႉၼၼ်ႉ တႅၵ်ႇၽူင်ႉသႂ်ႇႁၢဝ်ႈႁႅင်း၊ မၢတ်ႇၸဵပ်းတီႈ ၵွၵ်းႁူဝ်လႄႈၼႃႈသေ လူႉတၢႆတင်းသွင်ၵေႃႉ လႆႈႁူႉၼင်ႇၼႆ ။
မိူဝ်ႈႁၢင်ပီ ပီၵၢႆပူၼ်ႉမႃးၼၼ်ႉၵေႃႈ ၵူၼ်းဝၢၼ်ႈပၢင်ႇၶႃး ထုင်ႉၼမ်ႉၽၵ်းၵႃ 2ၵေႃႉ ၵဵပ်းလႆႈမႃး ၶိူင်ႈမၢၵ်ႇ သႅၼ်း 60 မမ ဢၼ်ၵိုတ်းၶင်ႉဝႆႉ မိူဝ်ႈပၢင်တိုၵ်း၊ ၽွင်းဢဝ်မႃးယႃႉ တႃႇဢဝ်ဢွၵ်ႇယၢမ်းၼၼ်ႉ တႅၵ်ႇတိူဝ်ႉသႂ်ႇ တၢႆထင်တီႈတင်းသွင် ဝႃႈၼႆ။
ယွၼ်ႉၼၼ် ၽူႈလႂ်ၽႂ်သေဢမ်ႇဝႃႈ ပေႃးထူပ်းႁၼ် ၶိူင်ႈမၢၵ်ႇၵူႈသႅၼ်းသႅၼ်း ဢၼ်ၵိုတ်းၶင်ႉဝႆႉၽွင်းပၢင်တိုၵ်းၼၼ်ႉ ယႃႇပေၵႂႃႇယိပ်ႉတိူဝ်ႉ၊ ႁႂ်ႈပွင်ႇၶၢဝ်ႇပၼ်တီႈၽူႈမီးပုၼ်ႈၽွၼ်း ၼႂ်းဢိူင်ႇၼႂ်းဝၢၼ်ႈၼႆယဝ်ႉ ။
မၢၵ်ႇၵိုတ်းၶၢင်ႉဝႆႉၽွင်းပၢင်တိုၵ်းဢၼ်ဝႃႈၼႆႉ ၵႆႉလႄႇႁႃမီးၸွမ်း ပိုၼ်ႉတီႈပၢင်တိုၵ်းၵဝ်ႇ၊ တီႈဢၼ်ၺႃးၶိူင်ႈမိၼ် မႃးယိုဝ်းၸိူဝ်းၼၼ်ႉ။
မိူၼ်ၼင်ႇဝၢၼ်ႈႁၢမ်း ၊ ဢွင်ႈတီႈၵဵပ်းမၢၵ်ႇမိုဝ်ႉၸိုၼ်းယၢမ်း၊ တီႈဢၼ်ၾိုၵ်းၸၢမ်းပိုတ်းယိုဝ်းမၢၵ်ႇၶိူင်ႈၵွင်ႈၵၢင်ႇ၊ တီႈဢၼ်ၸုမ်းယိပ်းၵွင်ႈၵၢင်ႇၶဝ်တူင်ႉၼိုင်ၵႂႃႇမႃး၊ တီႈတပ်ႉပၢင်သဝ်းၵဝ်ႇ ၸိူဝ်းၼႆႉၵေႃႈ ၸၢင်ႈမီး ။ မၢၵ်ႇပွမ်း၊ မၢၵ်ႇမေႃႇထႃႇ၊ မၢၵ်ႇၵွင်ႈလူင် ဢၼ်ၸႂ်ႉယဝ်ႉဢမ်ႇတႅၵ်ႇသေၵိုတ်းဝႆႉၼၼ်ႉ ၵႂႃႇတိူဝ်ႉၺႃးဢိတ်းၼိုင်ႈၵူၺ်းၵေႃႈ တႅၵ်ႇငၢႆႈၼႃႇ။ မၢၵ်ႇမိုဝ်ႉၸိုၼ်းယၢမ်းဢၼ်မီးၽေး ၸိူဝ်းလၢတ်ႈမႃးၸိူဝ်းၼၼ်ႉတေမီးသီၶွၼ်ႇ၊ သီမူၼ်ႇ၊ သီၶဵဝ်၊ သီလႅင်ၶွၼ်ႇ ၸိူဝ်းၼႆႉၵူၺ်းဢမ်ႇၵႃး၊ မၢင်လုၵ်ႈၼႆႉ သီမၼ်းပေႃးလူၼ်ႇသေ သမ်ႉပေႃးႁေႃယူႇယဝ်ႉ။ မၢၵ်ႇမိုဝ်ႉၸိုၼ်းယၢမ်းၼႆႉ ၶမ်ဝႆႉ တႂ်ႈလိၼ် ၼိူဝ်လိၼ်ဝႆႉ ပီယၢဝ်းၶၢဝ်းႁိုင်ယဝ်ႉသေတႃႉၵေႃႈ ၸၢင်ႈတႅၵ်ႇလႆႈယူႇလႄႈ ပေႃးႁူႉမၼ်းပဵၼ်မၢၵ်ႇမိုဝ်ႉၸိုၼ်းယၢမ်းယူႇတႄႉၸိုင် ယႃႇပေၵႂႃႇၸမ် ယႃႇတိူဝ်ႉ ယႃႇတွႆႇ ယႃႇၶၢႆႉတီႈ ယႃႇဢဝ်သင်သင်ထိုမ်ႈသႂ်ႇ၊ ယႃႇဢဝ်ၵိူဝ်ၵႂႃႇဢွႆ ၵႂႃႇမူၵ်းဝႆႉ၊ ယႃႇဢဝ်ၼမ်ႉၵႂႃႇႁၢတ်ႇသႂ်ႇ လႃးလႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ