မိူဝ်ႈဝႃး ဝၼ်းတီႈ11/5/2026 ယၢမ်းႁူဝ်ၶမ်ႈ 5 မူင်း 50 ၼၼ်ႉ  ၵူၼ်းၸၢႆးၵေႃႉၼိုင်ႈယူႇဝၢၼ်ႈ ပၢင်ႇႁႆႈ ဢိူင်ႇၼႃးဢၢႆႈၶၢၼ်ႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ   ယႃႉမၢၵ်ႇဢၼ် မၼ်းၸၢႆး ၵဵပ်းမႃးၼၼ်ႉလႄႈ ႁဵတ်းႁႂ်ႈတႅၵ်ႇၽူင်ႉသႂ်ႇ  တၢႆ ထင်တီႈ  ။

မၼ်းၸၢႆးပဵၼ် ၸၢႆးထုၼ်းႁၢၼ်ႇ ဢႃယု 33 ပီ ။ ၽွင်းမၼ်းၸၢႆးၵႂႃႇထိူၼ်ႇၼၼ်ႉ မၼ်းၸၢႆးႁၼ်မၢၵ်ႇသႅၼ်း  RPG  ဢၼ်ဢမ်ႇတႅၵ်ႇလႄႈ ၵဵပ်းမႃးယႃႉတီႈႁိူၼ်း။  မၢၵ်ႇၼၼ်ႉတႅၵ်ႇသႂ်ႇမၼ်းၸၢႆး ႁဵတ်းႁႂ်ႈၶႃပုတ်းၶၢတ်ႇတင်းသွင်ၾၢႆႇ၊ မိုဝ်းပုတ်းၶၢတ်ႇၵႂႃႇၶွၼ်ၼိုင်ႈ၊ ၼႃႈဢူၵ်းမၼ်းၸၢႆးလႅဝ်ၵႂႃႇၽၢၵ်ႇၼိုင်ႈသေ တၢႆထင်တီႈၵႂႃႇ ဝႃႈၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မၼ်းၵႂႃႇၵဵပ်းလႆႈၼႂ်းသူၼ်ၶဝ်သေ ဢဝ်မိူဝ်းတွႆလဵၼ်ႈ မိူဝ်းယႃႉတီႈသိုင်ႇမၼ်းသေ မၢၵ်ႇတႅၵ်ႇၽူင်ႉ တိၼ်ပုတ်းမိုဝ်းပုတ်းတၢႆထင်ႇတီႈၵႂႃႇ။ ပဵၼ်မၢၵ်ႇသႅၼ်း RPG ၶွင်သိုၵ်းမၢၼ်ႈ ”- ဝႃႈၼႆ ။

ဝဵင်းၸႄႈဝဵင်းၵျွၵ်ႉမႄးၼႆႉ ပၢင်တိုၵ်းၵႆႉမီးၼႃႇလႄႈ ၵဵဝ်ႇၵပ်းလွင်ႈ မၢၵ်ႇမႅင်းၾင်လိၼ်ၼႆႉသေ ၸုမ်းတူင်ႉၼိုင်လွင်ႈလွတ်ႈၽေးမၢၵ်ႇမႅင်း ၵႆႉလူင်းပိုၼ်ႉတီႈ   ပၼ်ၾၢင်ႉၵူၼ်းမိူင်းဝႆႉဝႃႈ သင်ထူပ်းႁၼ် မၢၵ်ႇမႅင်း ႁႂ်ႈပွင်ႇၶၢဝ်ႇ ပၼ်ၽူႈမီးပုၼ်ႈၽွၼ်းၵမ်းလဵဝ်   ယႃႇတိူဝ်ႉ ၊ ယႃႇယႃႉ လႃးလႃး  ဝႃႈၼႆ။

ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၵိၼ်းၸႂ်လႄႈ ၵူၼ်းတၢင်းဝၢၼ်ႈ  ၸိူဝ်းထူပ်းႁၼ်  မၢၵ်ႇမႅင်းလႄႈ မၢၵ်ႇၵွင်ႈၸိုၼ်းယၢမ်းဢၼ်ဢမ်ႇတႅၵ်ႇသေၵိုတ်းဝႆႉ ၼၼ်ႉ ဢမ်ႇသူႈလႃႈလီႈၵႂႃႇပွင်ႇၶၢဝ်ႇၸဝ်ႈၼႃႈတီႈ။   ၵဵပ်းဝႆႉသေပႂ်ႉဢဝ်ၶၢႆ။ ၵမ်ႈၽွင်ႈၵေႃႈ ၶႅၵ်းဢဝ်ယၢမ်းၼႂ်းမၼ်းသေ ဢဝ်ႁဵတ်းၶိုၼ်းမၢၵ်ႇပွႆႇပႃ ၸိူဝ်းၼႆႉ – ၵူၼ်းပိုၼ်ႉတီႈလၢတ်ႈၼင်ႇၼႆ ။  

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“လွၵ်းၵၢတ်ႇတႄႉဢမ်ႇမီး တေပဵၼ်လၵ်ႉသိုဝ်ႉလွမ်ၶၢႆ ၵူၺ်း ၊ တီႈပွတ်းတင်းၼမ်ႉမၸိူဝ်းၼႆႉၼႆ ပေႃးမၢၵ်ႇတိုၵ်ႉလီၼႆႉလႆႈမွၵ်ႈ 2 သႅၼ်ထိုင် 3 သႅၼ်ပျႃး ၸိူဝ်းၼႆႉဢေႃႈ”- ဝႃႈၼႆ ။  

တီႈၼႂ်းၸႄႈဝဵင်းၵျွၵ်ႉမႄးၼႆႉ ဝၢႆးတပ်ႉသိုၵ်းမၢၼ်ႈ ယိုတ်းၵုမ်းလႆႈၶိုၼ်းၼၼ်ႉယူႇတီႈႁွင်ႈၽူႈမီးပုၼ်ႈၽွၼ်း ဢမ်ႇပႆႇယၢမ်ႈမီးပၢင်ႁူပ်ႉထူပ်းလၢတ်ႈၼႄပၼ်တင်းႁူႉ ၵဵဝ်ၵပ်းလွင်ႈ မၢၵ်ႇမႅင်းၼႆႉႁႂ်ႈထိုင်တီႈ  -ၵူၼ်းပိုၼ်ႉတီႈလၢတ်ႈ ။

မိူၼ်ၼင်ႇၼႆ ဝၼ်းတီႈ 25/10/2025   ဝၼ်းသဝ် ဝၢႆးဝၼ်း 1 မူင်းပၢႆ ထဝ်ႈၸၢႆးၵေႃႉၼိုင်ႈလႄႈ ဢွၼ်ႇယိင်းၵေႃႉၼိုင်ႈ ၽွင်းၵႂႃႇဢဝ်ၶူဝ်းၶွင် တီႈထဵင်ၼႂ်းႁႆႈ ႁိမ်းဝၢၼ်ႈၼမ်ႉမင်းၼၼ်ႉ ၽႃႇၺႃးမၢၵ်ႇ ဢၼ်ႁၢင်ႈၵၢင်ဝႆႉႁိမ်းတၢင်းသေ လႆႈမၢတ်ႇၸဵပ်းလူႉတၢႆ ဝႃႈၼႆ။

မၢၵ်ႇမႅင်းၾင်လိၼ်ၼႆႉမၼ်းဢမ်ႇမီးဝႃႈ မူတ်းဢႃယု။ ၾင်ဝႆႉႁၢင်ႈဝႆႉႁိုင်ၵေႃႈႁိုဝ်ၵေႃႈယဝ်ႉ သင်မီးဢၼ်ၵႂႃႇယဵပ်ႇသႂ်ႇၵေႃႈတိုၼ်းတႅၵ်ႇလႆႈ။ သင်ဝႃႈဢမ်ႇမီးဢၼ်ၵႂႃႇယဵပ်ႇသႂ်ႇလႃးလႃးသေ ႁေႃလူမ်းႁေႃလႅတ်ႇႁေႃၾူၼ်ၵႂႃႇယဝ်ႉသေတႃႉၵေႃႈဢမ်ႇၸၢင်ႈဝၢင်းၸႂ်လႆႈ။ၸၢင်ႈတႅၵ်ႇသႂ်ႇၵူၼ်း၊ တူဝ်သတ်းတတ်းမႅင်း၊ ဢမ်ႇလူႉတၢႆၵေႃႈ တူဝ်ၶိင်းဢၢင်ႇၵႃႇလူႉသုမ်း။

ပေႃးတေလႆႈၵႂႃႇၼႂ်းသူၼ်ၼႂ်းႁႆႈ ၊ ၼႂ်းယုမ်းၸိူဝ်းၼႆႉၼႆၸိုင် ႁႂ်ႈၾၢင်ႉသတိၵိုၵ်းတူဝ်ဝႆႉတႃႇသေႇ။ ပေႃး ထၢင်ႇထိူမ်ဝႃႈ မီးမၢၵ်ႇမႅင်းၼႆၸိုင်ႇ ယႃႇပေၵႂႃႇၸမ် ၊ ၵႂႃႇတိူဝ်ႉ ၊ ၵႂႃႇယႃႉ ၊ ယႃႇဢဝ်မႆႉၶႄႇ ယႃႇၵႂႃႇတိူဝ်ႉ တွႆႇလႃးလႃး။ ပွႆႇတူဝ်သတ်း မိူၼ်ၼင်ႇ ( မႃ ၊ မႅဝ်း ) ၵႂႃႇၼူမ်ၵႂႃႇတူၺ်းၵေႃႈ ဢမ်ႇၵိုင်ႇလီႁဵတ်း။ တင်းၵူၼ်းတင်းသတ်း တေလႆႈၶတ်းၸႂ်ယဵပ်ႇၶိုၼ်းႁွႆးတိၼ်ၵဝ်ႇသေထွႆလင်သုတ်ႉဢွၵ်ႇႁၢင်ႇယၢၼ်မႃးၵႆၵႆ မွၵ်ႈ 1 ဝႃး ။

တႃႇတေပၼ်ၾၢင်ႉၵူၼ်းၸိူဝ်းတေလတ်းၽၢၼ်ႇၵႂႃႇမႃး ႁႂ်ႈပေႃးႁူႉဝႃႈ မီးၽေးမၢၵ်ႇမႅင်းၼၼ်ႉ ႁႂ်ႈႁဵတ်း မိၵ်ႈမၢႆဝႆႉသေဢၼ်ဢၼ်မိူၼ်ၼင်ႇ ပၵ်းလၵ်းႁဵတ်းၶႂၢႆႇၶႃပႄဝႆႉ။ ဢမ်ႇၼၼ် တႅမ်ႈလိၵ်ႈပၼ်ၾၢင်ႉ ဝႆႉသေ ၼႅတ်ႈၵႂႃႇသေႃႇၵႂႃႇလၢတ်ႈၵၢင်ႉၵႄႇလႄႈ ၽူႈမီးပုၼ်ႈၽွၼ်းၾၢႆႇႁူမ်ႇလူမ်ႈ၊ ၵူၼ်းၼႂ်းဝၢၼ်ႈ -ယႃႇႁႂ်ႈၸႂ်ႉသဵၼ်ႈတၢင်းဢၼ်မီးၽေးမၢၵ်ႇမႅင်းၼၼ်ႉ ။