ပၢင်တိုၵ်း ၽႅၼ်ယၼ်ႇသိုၵ်း 1027 ပွၵ်ႈၵမ်းသွင်ၼႆႉ သိုၵ်းတဢၢင်း ၵုမ်းလႆႈ ၸႄႈဝဵင်းသီႇပေႃႉ၊ ဝဵင်းၵျွၵ်ႉမႄး၊ ဝဵင်းၼွင်ၶဵဝ်၊ ဝဵင်းမိူင်းလူင်၊ ဝဵင်းမိူင်းငေႃႉ၊ ဝဵင်းမိူင်းမိတ်ႈ၊ ဝဵင်းၼမ်ႉသၼ်ႇ၊ ဝဵင်းမၢၼ်ႈတူင်ႈ၊ ဝဵင်းၵူတ်ႉၶၢႆ၊ ဝဵင်းၼမ်ႉၶမ်း လႄႈ ဝဵင်းၼမ်ႉတူႈ ၸဵမ်ၸိူဝ်းၼႆႉ။

ပိူင်ပဵၼ် လွင်ႈႁိမ်ၸိင်းၼႃႈတီႈၵၼ်ၸိူဝ်းၼႆႉ ၶႄႇၵေႃႈ တိုၼ်းပၵ်းတႃပႂ်ႉတူၺ်းယူႇတႃႇသေႇ။ ပေႃးလႅပ်ႈတေတုမ်ႉတိူဝ်ႉၽွၼ်းပၢင်ႈၶႄႇယဝ်ႉၼႆ ၶႄႇတေႁွင်ႉဢဝ် ၸုမ်းၸိူဝ်းႁိမ်တီႈလိၼ်ၵၼ်ယူႇၼၼ်ႉ ၵႂႃႇဢုပ်ႇၵုမ်ငူပ်ႉငီႉၵၼ်။

ၶႄႇၼႆႉ ပေႃးတူၺ်း လႅပ်ႈတေပဵၼ်ၸႂ်ၸွမ်း သိုၵ်းၸၢဝ်းၶိူဝ်းလုၵ်ႉၽိုၼ်ႉလူဝ်လူဝ် ၵူၺ်းၵႃႈ ယူႇယူႇၵေႃႈ သမ်ႉပဵၼ်ၸႂ်ၸွမ်းသိုၵ်းမၢၼ်ႈ ။ၵၢၼ်သိုၵ်းၼႂ်းမိူင်းႁူမ်ႈတုမ်မၢၼ်ႈၼႆႉ ပဵၼ်လွၵ်းၸိူင်းဢၼ် ၶႄႇလဵၼ်ႈၵူၺ်း – ၽူႈထတ်းသၢင်ၵၢၼ်ႈမိူင်းၵႆႉတူၵ်ႇလၢတ်ႈၼင်ႇၼႆ။

ၼႂ်းပၢင်ဢုပ်ႇဢူဝ်းငူပ်ႉငီႉၵၼ် ဢၼ်ၶႄႇၼမ်းၸတ်းၸိူဝ်းၼၼ်ႉၵေႃႈ ၾၢႆႇသိုၵ်းမၢၼ်ႈ တုၵ်းယွၼ်းႁႂ်ႈ သိုၵ်းတဢၢင်း ထွႆထွၼ်ဢွၵ်ႇ တီႈဝဵင်းၼွင်ၶဵဝ် ၊ ၵျွၵ်ႉမႄး ၊သီႇပေႃႉ ၊ မိူင်းၵုတ်ႈ ၊ မိူင်းမိတ်ႈ ၸိူဝ်းၼႆႉ ။ ၾၢႆႇၼိုင်ႈၵေႃႈ သဵၼ်ႈတၢင်းၸိူဝ်းဢၼ်မီးၸွမ်းဝဵင်းၸိူဝ်းၼႆႉသမ်ႉ ပဵၼ်သဵၼ်ႈတၢင်းဢၼ် လမ်ႇလွင်ႈတႃႇၵႃႉၶၢႆၼွၵ်ႈမိူင်းၼႂ်းမိူင်းလႄႈ ၶႄႇၸင်ႇပၼ်ႁႅင်းဢီးၸွမ်းထႅင်ႈ ။

ဝႃႈၼၼ်သေတႃႉ ၵဵဝ်ႇလူၺ်ႈၶေႃႈတူၵ်းလူင်း သိုၵ်းတဢၢင်း လႄႈ သိုၵ်းမၢၼ်ႈ ဢုပ်ႇဢူဝ်းငူပ်ႉငီႉၵၼ် ၼႂ်းမိူင်းၶႄႇၼၼ်ႉ မီးလွင်ႈၶိုပ်ႈၼႃႈၸိူင်ႉႁိုဝ်ၼႆ ဢမ်ႇမီးၸုမ်းလႂ် ပိုၼ်ၽၢဝ်ႇဢွၵ်ႇၼႄပဵၼ်တၢင်းၵၢၼ် ။

ၵူၼ်းမိူင်းတႄႉ ဢမ်ႇႁူႉသင်ၸွမ်း လိူဝ်သေ ပႂ်ႉတူၺ်းငဝ်းလၢႆး။ မိူဝ်ႈတိုၵ်းၵၼ်ၵေႃႈ သိုၵ်းၵူၺ်းဢၼ်ၶႂ်ႈလႆႈၶႂ်ႈပဵၼ် ၊ ပေႃးတိုၵ်းယဝ်ႉတႄႉ ဢၼ်လႆႈတူၵ်းသုမ်း ဢမ်ႇမိုၼ်းႁူမိုၼ်းတႃလႆႈသမ်ႉ ပဵၼ်ၵူၼ်းမိူင်း ဢၼ်ယၢမ်ႈၾင်ႁူၵ်ႈ ၾင်ႁႄႇ ၵိူတ်ႇၵိုၵ်း ပိုၼ်ႉတီႈၸိူဝ်းၼႆႉ။

ဢၼ်ႁဵတ်းႁႂ်ႈ ၵူၼ်းမိူင်းလီဢိမ်ႇလီမိူဝ်ႇသိုၵ်းလိူဝ်သေၵဝ်ႇၼၼ်ႉ ပဵၼ်ယွၼ်ႉ ၽွၼ်းပၢင်ႈပၢင်တိုၵ်း။ သိုၵ်းဢူၺ်းလီပွတ်းႁွင်ႇ 3 ပီႈၼွင်ႉလႄႈသင် ၸုမ်းသိုၵ်း PDF လႄႈသင်ၸိူဝ်းၼႆႉ လေႃႇတိုၵ်းသိုၵ်းမၢၼ်ႈပေႉယဝ်ႉ ၵုမ်းလႆႈလၢႆဝဵင်းယဝ်ႉသေတႃႉ သမ်ႉၶိုၼ်းလႆႈမွပ်ႈပၼ်သိုၵ်းမၢၼ်ႈၶိုၼ်း။

ႁူဝ်လိူၼ် ဢွၵ်ႇထူဝ်ႊပိူဝ်ႊ 2025 ၼႆႉ သိုၵ်းတဢၢင်း လႆႈထွႆသိုၵ်းဢွၵ်ႇၼႂ်းဝဵင်းသေ ပၼ်သိုၵ်းမၢၼ်ႈၶဝ်ႈမႃးၵုမ်းၵမ်လႆႈၶိုၼ်း ၵျွၵ်ႉမႄး ၊ သီႇပေႃႉ( ၵျွၵ်ႉမႄးတႄႇ သိုၵ်းမၢၼ်ႈၵုမ်းၶိုၼ်း 01/10/2025 ၊ သီႇပေႃႉတႄႉ ၵုမ်းလႆႈၶိုၼ်း ဝၼ်းတီႈ 17/10/2025) ။ ၵွၼ်ႇၼႃႈၼၼ်ႉတႄႉ သိုၵ်းတဢၢင်းလႆႈထွႆထွၼ်ဢွၵ်ႇၶိုၼ်း တီႈဝဵင်းၼွင်ၶဵဝ် မိူဝ်ႈၼႂ်းလိူၼ်ၵျူႊလၢႆႊ 2025။

ပိူင်ပဵၼ်ၸိူဝ်းၼႆႉ ႁဵတ်းႁႂ်ႈၵူၼ်းမိူင်း ဢိမ်ႇမိူဝ်ႇၼိူဝ်ၵၢၼ်လုၵ်ႉၽိုၼ်ႉ ဢိမ်ႇၸၢၼ်ႈၼိူဝ်ၵၢၼ်သိုၵ်းၵၢၼ်မိူင်းမႃး ထိုင်တီႈဢမ်ႇၶႂ်ႈငိၼ်း ဢမ်ႇၶႂ်ႈႁၼ် လွင်ႈသိုၵ်းသိူဝ် ။ ယွၼ်ႉဝႃႈ ဝၢႆးတိုၵ်းယဝ်ႉၵေႃႈ ဢၼ်ၶိုပ်ႈၼႃႈ ၸုမ်းၸိူဝ်းလုၵ်ႉၽိုၼ်ႉ ဢမ်ႇႁၼ်သင်။

ထိုင်တီႈဝႃႈ ၵုမ်းလႆႈၵေႃႈ သမ်ႉဢမ်ႇလွတ်ႈတင်းၵူဝ်တင်းႁႄ ၊ ဢမ်ႇလွတ်ႈလွင်ႈတုၵ်ႉလွင်ႈမႆႈ လႄႈ ၵူၼ်းမိူင်းဢွၼ်ၵၼ် ပွင်ႉၶၢင်းဝႃႈ ဢမ်ႇႁူႉၶဝ်တေတိုၵ်းၵၼ် ပိူဝ်ႈသင်ၼႆယူႇ ။
ၵူၼ်းမိူင်းတႄႉ ဢမ်ႇပဵၼ်ၸႂ်သိုၵ်းၾၢႆႇလႂ်သေတႃႉ ပေႃးမီးပၢင်တိုၵ်းမႃးမိူဝ်ႈလႂ်ၵေႃႈ ၵႆႉၺႃးထၢင်ႇထိူမ်ဝႃႈ ပဵၼ်ၵူၼ်းၸုမ်းၼၼ်ႉၸုမ်းၼႆႉၼႆသေ ၸိူဝ်းတူၵ်းပဵၼ်တူဝ်ယိူဝ်ႇသေ ၺႃးတူတ်ႈၺႃးတၢမ်ႇၼႂ်းၵႄႈမၼ်းၵေႃႈမီး။

မိူဝ်ႈႁၢင်လိူၼ်ဢွၵ်ႉထူဝ်ႊပိူဝ်ႊၼႆႉၵေႃႈ သိုၵ်းမၢၼ်ႈယိုတ်းမိူင်း ၶဝ်ႈၵႂႃႇတီႈႁၢၼ်ႉၶၢႆၼမ်ႉၼဵင်ႈ ၼႂ်းပွၵ်ႉ (6) ဝဵင်းၵျွၵ်ႉမႄးၼၼ်ႉသေ တီႉၺွပ်း ၸဝ်ႈႁၢၼ်ႉ။ သင်ႇပိၵ်ႉဢိုတ်းႁၢၼ်ႉဝႆႉပႃးၵမ်းလဵဝ်။ ၵူၼ်းၸိူဝ်းႁဵတ်း ၽူႈၵွၼ်းပွၵ်ႉ၊ ၵွၼ်းဢိူင်ႇ ၽွင်းသိုၵ်းတဢၢင်းၵုမ်းၵမ်ဝဵင်းဝႆႉၼၼ်ႉၵေႃႈ ၺႃးတီႉၺွပ်းၵႂႃႇ – ဝႃႈၼႆ။

ၸွမ်းၼင်ႇ ၼႂ်းၶေႃႈတူၵ်းလူင်း ၵျီႊၼီႊဝႃႊၶွၼ်ႊဝႅၼ်ႊသျိၼ်ႊတႄႉ တိုၼ်းပႃးဝႆႉဝႃႈ – ၵူၼ်းမိူင်းၼႆႉဢမ်ႇမီးၶိူင်ႈၵွင်ႈၵၢင်ႇသင်။ ဢမ်ႇလႆႈပိုတ်းယိုဝ်းၽႂ်။ ၵွပ်ႈၼႆ ပေႃးပဵၼ်ပၢင်တိုၵ်းမႃး လူၺ်ႈလွင်ႈတၢင်းသင် သေၵေႃႈယဝ်ႉ- သိုၵ်း/ၸုမ်းယိပ်းၵွင်ႈၵၢင်ႇၸိူဝ်းၼႆႉႁၢမ်ႈတီႉၺွပ်းၵူၼ်းမိူင်းၵႂႃႇပဵၼ်တူဝ်ယိူဝ်ႇၼႂ်းၵၢၼ်သိုၵ်းသိူဝ် – ပႃးဝႆႉၼင်ႇၼႆ ။

မိူဝ်ႈလဵဝ် ပၢင်တိုၵ်းယဵၼ်ယဝ်ႉလႄႈ ၸူးၸႂ်ၵူၼ်းမိူင်းတႄႉ ၶႂ်ႈႁႂ်ႈပၢင်တိုၵ်းၼႆႉ ၵိုတ်းၵူႈတီႈသေ ႁႂ်ႈၸိုင်ႈမိူင်းပၼ်ႇၵၢၼ်ၶိုၼ်းလူၺ်ႈလၢႆးၵတ်းယဵၼ်။ ႁႂ်ႈလႆႈငၢႆႈလူမ်ၼႂ်းၵၢၼ်ႁႃၵိၼ်လဵင်ႉတွင်ႉ ။ မိူဝ်ႈလဵဝ် ပႆႇပဵၼ်လႆႈသင်ၵေႃႈ ႁႂ်ႈသဵၼ်ႈတႃႈသၢႆတၢင်းပိုတ်ႇပၢင်ႇလီလီသေ ႁႂ်ႈၸုမ်းသိုၵ်းၸိူဝ်းပႂ်ႉၸွမ်းတၢင်းၸိူဝ်းၼႆႉ တူၺ်းထိုင်လူလွမ်ပၼ်ၵူၼ်းမိူင်းၽွင်ႈ ၊ ယႃႇမိုင်ႉၶႂ်ႈၵဵပ်းငိုၼ်းၵဵပ်းၶွၼ်ႇၵူၼ်းမိူင်းၵူၺ်း ဝႃႈၼႆ။

ၽူႈတူင်ႉၼိုင်ႈ ၼႂ်းၸုမ်းတူင်ႇၵူၼ်း ဢၼ်ၵႂႃႇၸွႆႈထႅမ်ၼႂ်းၵျွၵ်ႉမႄး ၊ သီႇပေႃႉၼၼ်ႉ လၢတ်ႈၼႄၼင်ႇၼႆ –

ယွၼ်ႉပၢင်တိုၵ်းသေ ၵူၼ်းမိူင်းလႆႈသုမ်းၼမ်ၼႃႇ ၊ ၸုမ်းလႂ်မႃးၵေႃႈယဝ်ႉ ပဵၼ်ၼၼ်ႈယူႇၵူၺ်းလႄႈ ၶဝ်ဢမ်ႇမီးၸႂ်ၶႂ်ႈပိုင်ႈဢိင်သိုၵ်းၸုမ်းလႂ်ယဝ်ႉ။ ၵူၼ်းမိူင်းၵမ်ႈၼမ် ဢမ်ႇမီးတၢင်းမုင်ႈမွင်းၼိူဝ်သိုၵ်းၸုမ်းလႂ်ယဝ်ႉ ။ ဢၼ်ၵူၼ်းမိူင်းသုမ်းၼမ်ၼႆႉ ပဵၼ်ယွၼ်ႉသိုၵ်းမၢၼ်ႈမႃးပွႆႇမၢၵ်ႇသႂ်ႇၵေႃႈပိူင်ၼိုင်ႈ ၊ ၽွင်းၸဝ်ႈႁိူၼ်းဢမ်ႇယူႇၼၼ်ႉ မီးၵူၼ်းလၵ်ႉမႃးလၵ်ႉၵႂႃႇၵေႃႈ ပိူင်ၼိုင်ႈ ။ ယွၼ်ႉၸိူဝ်းၼၼ်ႉသေ ဢွၼ်ၵၼ်လူႉသုမ်းၼမ် ။ မၢင်တီႈ သဝ်ႁိူၼ်းၵေႃႈ ယင်းဢဝ်ၵႂႃႇပႃး ။ ဢၼ်မုင်းဢၼ်ၵင်ႈမၼ်းၸိူဝ်းၼႆႉၵေႃႈ ဢမ်ႇဝႆႉ ။ ပေႃးပဵၼ်ပၢင်တိုၵ်းမႃးမိူဝ်ႈလႂ်ၵေႃႈ ဢမ်ႇလႆႈၵူဝ်မၢၵ်ႇၵွင်ႈၵူၺ်း လႆႈၵူဝ်ပႃးၵူၼ်းလၵ်ႉၵူၼ်းၸူၼ် ။ ယွၼ်ႉၼၼ် ဢမ်ႇမီးၽႂ်ၶႂ်ႈႁႂ်ႈပဵၼ်ပၢင်တိုၵ်း ။ ၵူၼ်းမိူင်းၵေႃႈ ဢမ်ႇၶႂ်ႈပၼ်ႁႅင်းၸုမ်းလႂ်ယဝ်ႉ

ဝၢႆးသေ သိုၵ်းမၢၼ်ႈၶဝ်ဢဝ်တီႈယူႇ ၼႂ်းၵျွၵ်ႉမႄး ၊သီႇပေႃႉသေ ဢမ်ႇမီးပၢင်တိုၵ်းယဝ်ႉ ဝႃႈၼႆသေတႃႉ တႃႇတေၽိုၼ်ႉၽူး ပူၵ်းပွင်ၶိုၼ်း တီႈယူႇတီႈၵိၼ်ၵူၼ်းမိူင်းတႄႉ ဢမ်ႇငၢႆႈ ။ပေႃးဢဝ်ၵၢင်ၸႂ်ၵူၼ်းမိူင်းဝႃႈတႄႉ မိူဝ်ႈလဵဝ်ၼႆႉ ပႆႇထိုင်တီႈပူၵ်းပွင်ပၼ်ႁႂ်ႈၵုမ်ႇထူၼ်ႈၼႆသေတႃႉ ႁႂ်ႈလႆႈၵႃႉလႆႈၶၢႆ ႁႃၵိၼ်လဵင်ႉတွင်ႉထၢင်ႇႁၢင်ႈ ၼႆယဝ်ႉ။

ၼႂ်းပိုၼ်ႉတီႈ ၵျွၵ်ႉမႄးလႄႈ သီႇပေႃႉၼႆႉ ၵၢၼ်ၽုၵ်ႇႁႆႈၽုၵ်ႇသူၼ် ၵၢၼ်ႁႃၵိၼ်လဵင်ႉတွင်ႉ ဢမ်ႇပေႃးပိူင်ႈသင်ၵၼ် ။ ၵမ်ႈၼမ်ၵေႃႈ ၽုၵ်ႇၶဝ်ႈၵၢပ်ႇ ၊ ၽုၵ်ႇဢွႆႈဝႆႉၸိူဝ်းၼႆႉ။ ၵမ်ႈၼမ် လႆႈၽုၵ်ႇဝႆႉသေ ဢမ်ႇတၼ်းလႆႈလုမ်းလႃး ၵုမ်ႇပၢႆႈၽေးသိုၵ်း။

ဝၢႆးပၢင်တိုၵ်းယဝ်ႉၵေႃႈ တေၵႂႃႇဢဝ် မၢၵ်ႇၶဝ်ႈတဝ်ႈၼမ်ႉ ဢၼ်ၵိုတ်းၶင်ႉၼႂ်းႁႆႈၼႂ်းသူၼ်ၸိူဝ်းၼၼ်ႉၵေႃႈ ယၢပ်ႇၸႂ် ၊ လႆႈၵူဝ်မၢၵ်ႇမႅင်း ဢၼ်ႁၢင်ႈၵၢင်ဝႆႉ ။ ဝၢႆးၵႂႃႇဢဝ်မႃးယဝ်ႉၵေႃႈ ယၢပ်ၸႂ်ထႅင်ႈ ။တေတေႃႉတေသူင်ႇၶၢႆၼႆၵေႃႈ သမ်ႉဢမ်ႇထၢင်ႇႁၢင်ႈ။ ယွၼ်ႉသဵၼ်ႈတၢင်းတိုၵ်ႉၵႂႃႇယၢပ်ႇ မႃးယၢပ်ႇ ။ သိုၵ်းမၢၼ်ႈၵေႃႈ ပႂ်ႉၵူတ်ႇထတ်းႁၢဝ်ႈႁႅင်း ၼႆ
ၽူႈတူင်ႉၼိုင်ႈ ၼႂ်းၸုမ်းတူင်ႇၵူၼ်း ဢၼ်လႆႈလူင်းပိုၼ်ႉတီႈၼၼ်ႉ လၢတ်ႈၼႄၼင်ႇၼႆ –

ၵူၼ်းပိုၼ်ႉတီႈလၢတ်ႈတႄႉ ဢၼ်တေၸၢင်ႈၵႄႈလိတ်ႈလႆႈ ၵၢၼ်ႁႃၵိၼ်လဵင်ႉတွင်ႉၸူဝ်ႈၶၢဝ်းၵေႃႈ ပဵၼ် ၶဝ်ႈၵၢပ်ႇလႄႈ ဢွႆႈၸိူဝ်းၼႆႉဢေႃႈ ။ ၵူၺ်းၵႃႈ တေဝႃႈၵႂႃႇၶၢႆၼႆၵေႃႈ သဵၼ်ႈတၢင်းသမ်ႉ တိုၵ်ႉပိၵ်ႉဢိုတ်းဝႆႉလၢႆၾၢႆႇ ။ ပီၼႆႉတႄႉ လႆႈဝႃႈ ၶဝ်လူႉယႂ်ႇသုမ်းလူင်တေႉတေႉ ။ ၸဝ်ႈသူၼ်မၢင်ၸိူဝ်း တႃႇတေလႆႈႁႅင်းၵူၼ်းၵႂႃႇၵၢၼ်ႉၶဝ်ႈၵၢပ်ႇၵေႃႈ ဢမ်ႇမီးၵႃႈၸၢင်ႈမၼ်း ။ၸိူဝ်းၵႂႃႇဢဝ်မႃးယဝ်ႉၵေႃႈ သမ်ႉဢမ်ႇမီးတီႈၶၢႆမၼ်း ၼၢႆးၼႃႈ(ပွႆးၸႃး)ၸိူဝ်းၼႆႉၵေႃႈ ဢမ်ႇမႃးၽႅဝ်။ တေဝႃၵူႈငိုၼ်းသေပၼ်ႇၵၢၼ်ဝႆႉၼႆၵေႃႈ သမ်ႉဢမ်ႇမီးၽႂ်တေၵူႈပၼ်လႆႈ

ဢမ်ႇၵွမ်ႉဝႃႈ သီႇပေႃႉ ၵျွၵ်ႉမႄးၵူၺ်း မိူင်းတႆးပတ်းပိုၼ်ႉ မိူင်းႁူမ်ႈတုမ်ပတ်းပိုၼ်ႉၼႆႉ သင်ပၢင်တိုၵ်းသိုၵ်းသိူဝ် တိုၵ်ႉလၢမ်းၵႂႃႇၸိူင်ႉၼႆသေ ဢမ်ႇမီးဝၼ်းသုတ်းဝၼ်းတိူၵ်ႈတႄႉ ၵူၼ်းမိူင်း တေပႃးၵၼ်ၽၢၼ် တေပႃးၵၼ်ဢိုပ်းမူတ်းယဝ်ႉ။ လုၵ်ႈဢွၼ်ႇၵေႃႈ ႁၢမ်းသုၼ်ႇႁဵၼ်းသွၼ် ၊ ပၢႆးမၢၵ်ႇမီးတူၵ်းတႅမ်ႇ။ ၵမ်းလိုၼ်းၵေႃႈ ယွၼ်ႉပၢင်တိုၵ်းၼႆႉၵူၺ်း ဢၼ်တေၸုင်ၸၼ်ဢဝ် တူၵ်းတႅမ်ႈတူၵ်းယေႃႈ။ၸုမ်းလုၵ်ႉၽိုၼ်ႉၵေႃႈ သင်ဝႃႈ တိုၵ်းၵေႃႈ ႁူႉတီႈသုတ်းတီႈယဝ်ႉမၼ်းၼႆယင်းၶႅၼ်း သမ်ႉဢမ်ႇႁူႉတီႈယင်ႇတီႈတိူၵ်ႈမၼ်းသေ ႁူႉဝႃႈတိုၵ်းၵူၺ်းတႄႉ ၵၢၼ်မိူင်းၵေႃႈ ဢမ်ႇၶိုပ်ႈၼႃႈ ဝၢၼ်ႈမိူင်းၵေႃႈလူႉၵူၺ်းၼႆ – ၵူၼ်းၼုမ်ႇၽူႈလဵပ်ႈႁဵၼ်းၵၢၼ်မိူင်းၵေႃႉၼိုင်ႈလၢတ်ႈ။