ဝၼ်းတီႈ 12/10/2025 ယၢမ်းတၢမ်းၶမ်ႈ 5 မူင်းပၢႆ သိုၵ်းမၢၼ်ႈယိုတ်းမိူင်း ၸႂ်ႉႁိုဝ်းမိၼ် ပွႆႇမၢၵ်ႇလူင် တူၵ်းသႂ်ႇႁိူၼ်းယေးၵူၼ်းမိူင်း ၸိူဝ်းယူႇသဝ်းၼႂ်းၵႄႈၵၢင် ဝဵင်းမိူင်းၵုတ်ႈ လႄႈ မိူင်းလူင် လူႉၵွႆၵႂႃႇႁၢဝ်ႈႁႅင်း။
မၢၵ်ႇလူင် တူၵ်းတႅၵ်ႇသႂ်ႇ ႁိမ်းဝၢၼ်ႈၼႃးလူင် လုၵ်ႈၼိုင်ႈ လႄႈ ႁိမ်းဝၢၼ်ႈပၸီႇ သွင်လုၵ်ႈၼႆ ၵူၼ်းမိူင်းပိုၼ်ႉတီႈ လၢတ်ႈၼႄၼင်ႇၼႆ။
“ဢွင်ႈတီႈမၢၵ်ႇလူင်ၵႂႃႇတူၵ်းတႅၵ်ႇသႂ်ႇၼႆႉ ပဵၼ်ဝႆႉမိူၼ်သဵၼ်ႈတၢင်းၽႄ။ ပေႃးလုၵ်ႉတၢင်းၼွင်ၶဵဝ်ၵႂႃႇၵေႃႈ တေလႆႈလတ်းဢွင်ႈတီႈ ၼၼ်ႈ။ ႁိမ်းၼၼ်ႉသမ်ႉ မီးၸုမ်းသိုၵ်းၶဝ် တင်ႈဝႆႉၵဵၵ်ႉလၢၼ်ႇလႄႈ တေၶႂ်ႈပွႆႇတီႈၵဵၵ်ႉၼၼ်ႉႁိုဝ်ဢမ်ႇႁူႉၼႃႇ။ ႁိူၼ်းၵူၼ်းမိူင်းတႄႉ လူႉၵွႆၵႂႃႇၸွမ်းၼမ်ယူႇ။”
ၾၢႆႇတပ်ႉသိုၵ်းတဢၢင်း (TNLA) ၵေႃႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင် ႁႅင်း 250 ပွင်ႊ 3 လုၵ်ႈ၊ တိူဝ်ႉႁိူၼ်းယေးၵူၼ်းမိူင်းလူႉၵွႆၵႂႃႇ 4 လင် ။
လႆႈႁူႉဝႃႈ ယၢမ်းလဵဝ် တီႈဝၢၼ်ႈၼႃးလူင် သဵၼ်ႈတၢင်းၽႄ ၼိူဝ်သၢႆတၢင်း ဝဵင်းပၢင်ႇဢူႈလူင်- မိူင်းၵုတ်ႈ လႄႈ မိူင်းၵုတ်ႈ-ၵျွၵ်ႉမႄး ဢၼ်ၶဝ်ႈပႃးဝႆႉၼႂ်းၼႃႈတီႈ ၸႄႈဝဵင်းမိူင်းၵုတ်ႈၼၼ်ႉ သိုၵ်းတဢၢင်း (TNLA) လႄႈ ၸုမ်းသိုၵ်းၵူၼ်းၼုမ်ႇမၢၼ်ႈ ထုင်ႉပဵင်း (PDF) ၶဝ်ပဵၼ်ပၢင်တိုၵ်းၵၼ်ဝႆႉတင်း သိုၵ်းမၢၼ်ႈယိုတ်းမိူင်းၶဝ် ႁၢဝ်ႈႁႅင်းယူႇၼႆယဝ်ႉ။
မိူဝ်ႈပူၼ်ႉမႃး ဝၼ်းတီႈ 7 လိူၼ်ဢွၵ်ႊထူဝ်ႊပိူဝ်ႊ ယၢမ်းဝၢႆးဝၼ်းၼၼ်ႉၵေႃႈ သိုၵ်းမၢၼ်ႈယိုတ်းမိူင်းပွႆႇမၢၵ်ႇသႂ်ႇ ႁိမ်းမိူင်းလူင် တီႈဝၢၼ်ႈမႆႉႁုင်းၼၼ်ႉသေ ၼၢင်းယိင်း လႄႈ လုၵ်ႈဢွၼ်ႇ လူႉတၢႆၵႂႃႇ 10 ၵေႃႉ မၢတ်ႇၸဵပ်းၵႂႃႇ 3 ၵေႃႉ။
ဝၢႆးလင်သိုၵ်းမၢၼ်ႈယိုတ်းမိူင်း တႄႇယိုတ်းၵုမ်းလႆႈၶိုၼ်း ဝဵင်းၼွင်ၶဵဝ် လႄႈ ဝဵင်းၵျွၵ်ႉမႄးယဝ်ႉဢမ်ႇႁိုင် ၸႂ်ႉတိုဝ်း ႁိူဝ်းမိၼ်တိုၵ်းသေ ပွႆႇမၢၵ်ႇလူင်သႂ်ႇ ၼႂ်းၼႃႈတီႈသိုၵ်းတဢၢင်းၵုမ်းၵမ်ဝႆႉဝၢႆးလင် ပၢင်တိုၵ်းၽႅၼ်ၵၢၼ်ယၼ်ႇသိုၵ်းၼၼ်ႉၵွႆးဢမ်ႇၵႃး ၸႂ်ႉတိုဝ်းပႃး ၶိူင်ႈတရူၼ်ႊၵူႈသႅၼ်းသႅၼ်း လေႃႇတိုၵ်းသႂ်ႇႁၢဝ်ႈႁႅင်းယူႇဢမ်ႇထၢတ်ႇ ၼႆယဝ်ႉ။
လႆႈႁူႉဝႃႈ ဢၼ်သိုၵ်းမၢၼ်ႈ သိုပ်ႇၶႂ်ႈယိုတ်းဢဝ်ၶိုၼ်းယူႇၼႆႉ ပဵၼ်ဝဵင်းမိူင်းၵုတ်ႈ၊ မိူင်းလူင် လႄႈ ဝဵင်းသီႇပေႃႉ ၸဵမ်ၸိူဝ်းၼႆႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ