သိုၵ်းမၢၼ်ႈပွႆႇမၢၵ်ႇ တီႈလႅၼ်ၶႅၼ်ႈ  မိူင်းယႆ – သီႇပေႃႉ တီႈဢၼ်သိုၵ်းၵဝ်ႈၵၢင်ႉယူႇသဝ်းဝႆႉၼၼ်ႉ ႁဵတ်းႁႂ်ႈၵူၼ်းမိူင်းမွၵ်ႈ 300 ၵေႃႉ လႆႈငိူင်ႉပၢႆႈၽေးသိုၵ်း- ယၢမ်းလဵဝ် တႄႉဢွၼ်ၵၼ်ပွၵ်ႈၶိုၼ်းႁိူၼ်းယေးယဝ်ႉဝႃႈၼႆ။

9/1/2026 ယၢမ်းၵၢင်ၼႂ် 10 မူင်းၶိုင်ႈ သိုၵ်းမၢၼ်ႈဢဝ်ႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ႁိမ်းဝၢၼ်ႈ သႅၼ်တေႃ ဢၼ်မီးၼိူဝ်သဵၼ်ႈတၢင်းၸႄႈဝဵင်းမိူင်းယႆၵႂႃႇတၢင်း ဝဵင်းသီႇပေႃႉ ႁဵတ်းႁႂ်ႈၵူၼ်းမိူင်းလႆႈငိူင်ႉပၢႆႈၽေးသိုၵ်း ။ ယၢမ်းလဵဝ် ယွၼ်ႉပၢင်တိုၵ်း ယဵၼ်လႄႈ ၵူၼ်းမိူင်းဢွၼ်ၵၼ် ပွၵ်ႈမိူဝ်းႁိူၼ်းယေးၽႂ်မၼ်း ၼႆယဝ်ႉ ။

ၵူၼ်းပၢႆႈၽေး300 ပၢႆၼႆႉ ပဵၼ်ၵူၼ်းဝၢၼ်ႈၼႃးပႅင် ၊ ၼႃးမွင် ၊ ၼွင်ၸူမ်ႉ ၊ ၼမ်ႉမႅတ်ႇ ၊ ပႅင်းၺွင် ၸိူဝ်းၼႆႉသေ ႁူဝ်ၵူၼ်းမီး 274 ၵေႃႉ ၊ ၸၢႆး 90 ၵေႃႉလႄႈ ယိင်း 184 ၵေႃႉ ဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ယွၼ်ႉႁိူဝ်းမိၼ်မႃးပွႆႇမၢၵ်ႇလႄႈ ၵူၼ်းဝၢၼ်ႈ 5 ဝၢၼ်ႈ လႆႈငိူင်ႉပၢႆႈဝႆႉတီႈႁူင်းႁဵၼ်းဝၢၼ်ႈပၢၼ်းၼႆႉ ၊ ၾၢႆႇသိုၵ်းမၢၼ်ႈဝႃႈ တေၵႂၢတ်ႇလၢင်ႉ ၼႃႈတီႈၼႆ ၊ မိူဝ်ႈၼၼ်ႉ ႁူင်းၸၢၵ်ႈၵိူဝ်ဝၢၼ်ၵေႃႈ လႆႈပိုၵ်ႉဝႆႉ 5 ဝၼ်း မိူဝ်ႈၼႆႉတႄႉပိုတ်ႇၶိုၼ်းယဝ်ႉ ၵူၼ်းပၢႆႈၽေးသိုၵ်းၵေႃႈ ပွၵ်ႈၶိုၼ်းယဝ်ႉ ”- ဝႃႈၼႆ ။

သိုၵ်းမၢၼ်ႈဢဝ်ႁိူဝ်းမိၼ်တိုၵ်း Jet Fighter မိူဝ်းပၼ်ႇလဵပ်ႈၸွမ်းဝၢၼ်ႈ ႁိမ်းႁွမ်းထုင်ႉသႅၼ်တေႃသေ ၶိုၼ်းသူင်ႇႁိူဝ်းမိၼ်သႅၼ်း Y-12 ၵႂႃႇပွႆႇမၢၵ်ႇ တူၵ်းသႂ်ႇ ၼႂ်းထိူၼ်ႇ ႁိမ်းဝၢၼ်ႈ ၼမ်ႉၸၢမ် လႄႈ ဝၢၼ်ႈၼမ်ႉၵူမ်ႇ ဢမ်ႇယွမ်း 5 လုၵ်ႈ။ ဢွင်ႈတီႈမၢၵ်ႇတူၵ်းသႂ်ႇၼၼ်ႉ ႁၢင်ႇၵႆၵၼ်တင်း ဝၢၼ်ႈသႅင်ၵႅဝ်ႉ မွၵ်ႈ 10 လၵ်းၼႆ ၵူၼ်းမိူင်းပိုၼ်ႉတီႈလၢတ်ႈၼင်ႇၼႆ။

ႁွင်ႈၵၢၼ်ၾၢႆႇပိုၼ်ၽၢဝ်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP ပိုၼ်ၽၢဝ်ႇ ဝႆႉမိူဝ်ႈဝၼ်းတီႈ 10/1/2026 ၼၼ်ႉဝႃႈ လွင်ႈၶွၼ်ႊမသျိၼ်ႊသိုၵ်းမၢၼ်ႈ ဢဝ်ႁိူဝ်းမိၼ် ပိုတ်းယိုဝ်း ၼႂ်းၸႄႈဝဵင်းသီႇပေႃႉ လႄႈ ၸုမ်းႁဵတ်းၵၢၼ်ၽိတ်းမၢႆမီႈ ၸုမ်းဢၼ်ၵဵဝ်ႇၵွင်ႉ ၵႂၢတ်ႇလၢင်ႉ ပိုၼ်ႉတီႈယိုဝ်းၵွင်ႈၸိူဝ်းၼၼ်ႉ ဢမ်ႇၵဵဝ်ၶွင်ႈၵၼ်တင်းၸုမ်း SSPP ၼႆယဝ်ႉ ။

ၵဵဝ်ၵပ်းလွင်ႈၼႆႉ သိုၵ်းမၢၼ်ႈတႄႉပိုၼ်ၽၢဝ်ႇဝႆႉ ၼႂ်းဝၼ်းတီႈ 11/1/2026 ၼၼ်ႉဝႃႈ ဝၢႆးလင် ပွႆႇမၢၵ်ႇတီႈၼႂ်းပိုၼ်ႉတီႈၼႂ်းၸႄႈဝဵင်းမိူင်းယႆယဝ်ႉ တီႉၺွပ်းလႆႈ ၶိူဝ်းၶွင်ၸႂ်ႉသွႆႈ ၼႂ်းၵၢၼ်လႅၼ်ငိုၼ်းဢွၼ်ႊလၢႆႊၵျႃႊၽျႅၼ်ႉ လႄႈ ၶိူင်ႈႁဵတ်းဢွၵ်ႇယႃႈမဝ်းၵမ် ၼႆယဝ်ႉ ။

ၽွင်းသိုၵ်းမၢၼ်ႈၵႂၢတ်ႇလၢင်ႉၼႃႈတီႈ တီႈတၢင်းၼႂ်းၸႄႈဝဵင်းသီႇပေႃႉ ထုင်ႉၼမ်ႉလၼ်ႈ မိူဝ်ႈဝၼ်းတီႈ 8 ၼၼ်ႉၵေႃႈ သိုၵ်းမၢၼ်ႈ ယိုဝ်းသိမ်းဢဝ်လႆႈ ၶိူင်ႈ  ၶွမ်ႊပိဝ်ႊတိူဝ်ႊ 53 လုၵ်ႈ ၊ ၾူင်း 11 လုၵ်ႈ ၊ သတႃႊလိင်ႉ 5 လုၵ်ႈ လႄႈ ထူပ်းႁၼ် ဢွင်ႈတီႈ ႁုင်ယႃႈမဝ်းၵမ် ၼႆယဝ်ႉ ။ 

တႄႇၵၢင်ပီ 2025 လိူၼ်ဢေႃးၵၢတ်ႉသ်မႃး ၸုမ်းၵျႃႊၽျႅၼ်ႉ ၵႂႃႇတင်ႈႁူင်းႁဵတ်းၵၢၼ်ဝႆႉ ၸွမ်းထုင်ႉၼႂ်းၼႃႈတီႈ သိုၵ်းၵဝ်ႈၵၢင်ႉၵုမ်းၵမ် တီႈလႅၼ်လိၼ် ဝဵင်းသီႇပေႃႉ- မိူင်းယႆ ၸဵမ်ၸိူဝ်းၼႆႉ လႆႈႁူႉၼင်ႇၼႆ။