မိူဝ်ႈဝၼ်းတီႈ 17 / 1 / 2026 ယၢမ်းႁူဝ်ၶမ်ႈ 5 မူင်း သိုၵ်းလွႆႁႅင်းသိုၵ်းၵူၼ်း 27 ၵေႃႉ လုၵ်ႉတီႈ ဝၢၼ်ႈၵၢတ်ႇပွၵ်ႉတႂ်ႈ ဢိူင်ႇတေႃႉသၢင်ႇသေ ၶဝ်ႈၽိုတ်ႉယူႇဢိူမ်ႈႁိမ်းၵူၼ်းသိုၵ်း SSPP တူင်ႉၼိုင် တီႈႁိမ်းဝၢၼ်ႈလူင်တေႃႉသၢင်ႇ ႁဵတ်းႁႂ်ႈသွင်ၾၢႆႇၶဵင်ႈၶႅင်ၵၢၼ်သိုၵ်းတေႃႇၵၼ် တီႈၼႂ်းဢိူင်ႇ တေႃႉသၢင်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼႆယဝ်ႉ ။
တႄႇဢဝ်ဝၼ်းတီႈ17/1/2026 တေႃႇထိုင်ဝၼ်းမိူဝ်ႈၼႆႉ ဝၼ်းတီႈ 22/1/2026 ၶၢဝ်းတၢင်း 6 ဝၼ်း သိုၵ်းလွႆ (TNLA) ၽိုတ်ႉၶဝ်ႈဢွင်ႈတီႈသိုၵ်း SSPP ယူႇသၢမ်ၵမ်း ။ မိူဝ်ႈဝၼ်းတီႈ 16 ၼိုင်ႈပွၵ်ႈ ၊ 18 ၼိုင်ႈပွၵ်ႈ ၊ 21 ၼိုင်ႈပွၵ်ႈ ၼႆယဝ်ႉ ။
ၵူၼ်းၸၢႆးၼႂ်းပိုၼ်ႉတီႈ ဢၼ်ႁူႉလွင်ႈတူင်ႉၼိုင်ၼႂ်းၵၢၼ်သိုၵ်းလၢတ်ႈၽူႈတွႆႇႁွၵ်ႈဝႃႈ -“ ၶဝ်ၽိုတ်ႉ ယူႇဢိူမ်ႈႁိမ်းတီႈ SSPP ယူႇ 2 တီႈ ၊ တီႈၼိုင်ႈၼႆႉ တေပဵၼ်တၢင်းၵွင်းမူးလွႆ ၵမ်ႉၵေႃႇၾၢႆႇ တူၵ်း ဝၢၼ်ႈတေႃႉသၢင်ႈ ၊ ထႅင်ႈတီႈၼိုင်ႈၼႆႉ ပဵၼ်တီႈလွႆၵွင်းမူးၶမ်း ၾၢႆႇႁွင်ႇ ဝၢၼ်ႈလူင်တေႃႉသၢင်ႇ ။ သိုၵ်း SSPP ဝႃႈ ပေႃးၾၢႆႇသိုၵ်းလွႆၶဝ်သိုပ်ႇၶိုၼ်ႈၸူးထႅင်ႈတႄႉတေလႆႈယိုဝ်းၵၼ်”- ဝႃႈၼႆ ။
ဝၢႆးၼၼ်ႉ သိုၵ်းလွႆၶိုၼ်းထွႆလူင်း ယူႇၸွမ်းတိၼ်လွႆသေ တေႃႇထိုင်ဝၼ်းမိူဝ်ႈၼႆႉ တိုၵ်ႉၶဵင်ႈၶႅင် ၵၢၼ်သိုၵ်းတေႃႇၵၼ် ၊ ၾၢႆႇတၢင်းသိုၵ်း SSPP တႄႉတိုၵ်ႉပႂ်ႉတူၺ်းငဝ်းလၢႆး မၼ်းယူႇ – ၵူၼ်းပိုၼ်ႉတီႈလၢတ်ႈ ။
ဢွင်ႈတီႈသိုၵ်းသွင်ၾၢႆႇၶဵင်ႈၶႅင်ၵၼ်လႄႈ ပေႃးလုၵ်ႉတီႈဝၢၼ်ႈတေႃႉသၢင်ႇ ပႆၵႂႃႇ တေမီး မွၵ်ႈ 5 မိၼိတ်ႉ ။ တီႈသိုၵ်းသွင်ၾၢႆႇ ၶဵင်ႈၶႅင်ၵၢၼ်သိုၵ်းတေႃႇၵၼ်ၼၼ်ႉ ယွၼ်ႉမၼ်းၸမ်ၵၼ် တင်းဝၢၼ်ႈလႄႈ ႁဵတ်းႁႂ်ႈၵူၼ်းပိုၼ်ႉတီႈမႆႈၸႂ် ၵူဝ်ပဵၼ်ပၢင်တိုၵ်းၵၼ် ၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ -“ထိုင်မိူဝ်ႈၼႆႉ သိုၵ်းလွႆပႆႇထွႆဢွၵ်ႇ တိုၵ်ႉမီးဝႆႉၸွမ်းတိၼ်လွႆ ၼၼ်ႉလႄႈ ၵူၼ်းဝၢၼ်ႈတေႃႉသၢင်ႇ ဢွၼ်ၵၼ်မႆႈၸႂ် ၵူဝ်သဵင်ၵွင်ႈတႅၵ်ႇ ၵူဝ်ပဵၼ်ပၢင်တိုၵ်း ၵမ်ႈၽွင်ႈလႆႈႁၢင်ႈႁႅင်းၶူဝ်းလဵင်းဝႆႉ ၼႂ်းတိူၵ်ႈၼႂ်းထူင်ယူႇယဝ်ႉၶႃႈ ”-ဝႃႈၼႆ ။
လွင်ႈၼႆႉ ယူႇတီႈၽူႈတွႆႇႁွၵ်ႈၶတ်းၸႂ်တိတ်းတေႃႇၸူး SSPP ယူႇၵေႃႈတိတ်းတေႃႇဢမ်ႇလႆႈ။
ဝၢၼ်ႈတေႃႉသၢင်ႇၼႆႉ ဝၢႆး သိုၵ်း RCSS တင်း သိုၵ်းSSPP ပဵၼ်ပၢင်တိုၵ်းၵၼ် မိူဝ်ႈပီ 2021 ၼၼ်ႉယဝ်ႉ ၊ သိုၵ်း SSPP ပၵ်းသဝ်းတူင်ႉၼိုင်ဝႆႉ ။ ဝၢၼ်ႈတေႃႉသၢင်ႇလႄႈ ဝဵင်းၵျွၵ်ႉမႄးၼႆႉ ယၼ်ၵႆၵၼ်မွၵ်ႈ 20 လၵ်းပၢႆ ။
ယၢမ်းလဵဝ် တၢင်းပွတ်းဢိူင်ႇတေႃႉသၢင်ႇၼႆႉ သိုၵ်း TNLA, SSPP တူင်ႉၼိုင်ယူႇဝႆႉၼႆသေတႃႉ ဢွင်ႈတီႈၶဝ်ၶဵင်ႈၶႅင်ၵၼ်ဝႆႉတၢင်းဝၢၼ်ႈတေႃႉသၢင်ႇၼႆႉ ပဵၼ်ပိုၼ်ႉတီႈ SSPP တူင်ႉၼိုင်ဝႆႉ ၸဵမ်မိူဝ်ႈ ပီ 2022 မႃး – လႆႈႁူႉၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ