သိုၵ်းတဢၢင်း TNLA ၸီႉသင်ႇ ၶႃႈႁၢပ်ႇၵၢၼ်ၶုၼ်ၵူၼ်းၵိၼ်ငိုၼ်းလိူၼ်ပိၼ်ႇသိၼ်ႇ ၸိူဝ်းယူႇၼႂ်းဝဵင်းၼမ်ႉတူႈၶၢႆႉဢွၵ်ႇ ႁဵတ်းႁႂ်ႈ ၵူၼ်းၸိူဝ်းယူႇသဝ်းၶၢဝ်းႁိုင် ယၢပ်ႇၽိုတ်ႇတႃႇငိူင်ႉ ဢွၵ်ႇပၢႆႈၼႆယဝ်ႉ ။

တႄႇႁူဝ်လိူၼ်မၢတ်ႉၶျ်ၼႆႉမႃး ၽူႈမီးပုၼ်ႈၽွၼ်း ၼႂ်းႁွင်ႈၵၢၼ်ၽွင်းငၢမ်းသိုၵ်းတဢၢင်း TNLA ၸီႉသင်ႇ ႁႂ်ႈၶႃႈႁၢပ်ႇၵၢၼ်ၶုၼ်ၵဝ်ႇ လူင်ပွင်ၸိုင်ႈသိုၵ်းမၢၼ်ႈ ၸိူဝ်းယူႇတီႈၼႂ်းပွၵ်ႉ တတလ 4 ၼၼ်ႉၶၢႆႉဢွၵ်ႇပၼ် ႁႂ်ႈယဝ်ႉတူဝ်ႈၼႂ်းလိူၼ်ၼႆႉ။ ယၢမ်းလဵဝ် လင်ႁိူၼ်း မွၵ်ႈ 20 လင်ပၢႆလႆႈၶၢႆႉဢွၵ်ႇဝႆႉယဝ်ႉ ဝႃႈၼႆ ။

ၵူၼ်းၸၢႆးၵေႃႉယူႇၼႂ်းပိုၼ်ႉတီႈဝဵင်းၼမ်ႉတူႈလၢတ်ႈတီႈၽူႈတွႆႇႁွၵ်ႈဝႃႈ -“ယူႇတီႈႁွင်ႈၵၢၼ်ၽွင်းငမ်း TNLA ဢၼ်ၵုမ်းဝဵင်းၼမ်ႉတူႈယူႇတလဵဝ်ၼႆႉ သင်ႇႁႂ်ႈၶၢႆႉဢွၵ်ႇ ။ ယွၼ်ႉသင်လႄႈ ၸႂ်ႉၶၢႆႉဢၼ်ဝႃႈၼၼ်ႉတႄႉ ဢမ်လႆႈႁူႉလွင်ႈတၢင်းမၼ်းလီလီ ။ မိူဝ်ႈဢွၼ်တၢင်းတႄႉၶဝ်လၢတ်ႈဝႃႈ ၵူၼ်းၸိူဝ်းယူႇတီႈၼႂ်းဝဵင်းမီးၽေးၼမ် တေလႆႈၶၢႆႉဝႃႈၼႆႉဝႆႉၵူၺ်း ၵမ်း ၼႆႉတႄႉသင်ႇၶၢႆႉဢွၵ်ႇတေႉယဝ်ႉဢေႃႈ။ တီႈယူႇတႄႉၶဝ်ဢမ်ႇႁႃပၼ် ပေႃးဝႃႈၶၢႆႉၵေႃႈ တေလႆႈႁႃၶၢတ်ႈႁိူၼ်းယူႇႁင်းၵူၺ်း ၊ ဢမ်ႇၼၼ်ၵေႃႈတေလႆႈၵႂႃႇယွၼ်းယူႇ ႁိူၼ်းၶႃႈႁၢပ်ႇ ၵၢၼ်ၶုၼ်ဢၼ်ၵဝ်ႇႁႅင်း ဢၼ်ဢမ်ႇ မီးၵူၼ်းယူႇၼၼ်ႉၵူၺ်း။ ႁိူၼ်းၸိူဝ်းမီးၼႂ်းပွၵ်ႉ တတလ 1 2 3 ဢွင်ႈတီႈၸိူဝ်းၶဝ်ဢမ်ႇႁၢမ်ႈဝႆႉၼၼ်ႉသမ်ႉ ပဵၼ်ႁိူၼ်းဢမ်ႇလီႁိူၼ်းယွၵ်းလၢႆလၢႆ။ ႁိူၼ်းဢၼ်ႁဝ်းၶဝ်ယူႇဝႆႉမိူဝ်ႈလဵဝ်ႁႄ ၶဝ်မႃးၸႂ်ႉႁဝ်းၶၢႆႉဢွၵ်ႇမိူဝ်ႈလဵဝ်ၼႆႉတႄႉ တိုၵ်ႉၶႅမ်ႉယူႇႁႄပဵၼ်ဢၼ်လီမၼ်းဢေႃႈ”- ဝႃႈၼႆ ။

ႁိူၼ်းဢၼ်သိုၵ်း TNLA သင်ႇၶၢႆႉဢွၵ်ႇၼၼ်ႉ ပဵၼ်ႁိူၼ်းၵူၼ်းၸိူဝ်းႁဵတ်းၵၢၼ်ၼႂ်းႁွင်ႈၵၢၼ်လူင်ပွင်ၸိုင်ႈၵဝ်ႇ (ပိၼ်ႇသိၼ်ႇ) ဢၼ်မီးၾၢႆႇၼႃႈ ႁူင်းႁဵၼ်းၸၼ်ႉသုင် ဢထၵ (အ.ထ.က) 1 တေႃႇပေႃးထိုင် ႁူင်းပလိၵ်ႈ ၊ ႁူင်းယႃ ၸိူဝ်းၼႆႉ တင်းသဵင်ႈ- ၼႆၵူၼ်းပိုၼ်ႉတီႈလၢတ်ႈ ။

ၼႂ်းပွၵ်ႉ 4 ဝဵင်းၼမ်ႉတူႈ ႁိူၼ်းၵူၼ်းႁဵတ်းၵၢၼ်ၶုတ်းႁႄႈယူႇသဝ်းၼၼ်ႉ မီးႁိူၼ်းၸမ် 1000 လင်။ ၵူၼ်းၸိူဝ်းယူႇသဝ်းဝႆႉတီႈႁိူၼ်းၵူၼ်းႁဵတ်းၵၢၼ်ၶုတ်းႁႄႈၼၼ်ႉ ပဵၼ်ၵူၼ်း ႁဵတ်းၵၢၼ်ၵဝ်ႇ ၵိၼ်ၸၢင်ႈၶုတ်းႁႄႈတီႈမေႃႇပၢင်ႁႆးၼမ်ႉတူႈ ဢၼ်ၸိုဝ်ႈလိုဝ်းလင် ၽွင်းမိူဝ်ႈပၢၼ်ဢိင်းၵလဵတ်ႈ (ဗြိတိသျှ) ၵုမ်းၵမ်ၽွင်းငမ်းၼၼ်ႉဝႃႈၼႆ ။

ၵူၼ်းယူႇသဝ်းၼႂ်းဢွင်ႈတီႈ မေႃႇၶုတ်းႁႄႈပၢင်ႁႆးၼမ်ႉတူႈၼၼ်ႉ ၸိူဝ်းၶဝ်ႁဵတ်းၵၢၼ်ယူႇသဝ်းၵိၼ်ငိုၼ်းလိူၼ် လူင်ပွင်ၸိုင်ႈ သိုၵ်းမၢၼ်ႈ တေႃႇထိုင် သိုၵ်း TNLA ၶဝ်ႈၽွင်းငမ်းဝဵင်း ယွၼ်ႉသိုၵ်း TNLA ၸႂ်ႉၶၢႆႉဢွၵ်ႇသေ ႁဵတ်းႁႂ်ႈၵႂႃႇတုမ်ႉတိုဝ်ႉၵၢၼ်ႁႃၵိၼ်လဵင်ႉတွင်ႉ ယၢပ်ႇၽိုတ်ႇၵိၼ်းၸႂ် တီႈယူႇတင်းသဝ်းယူႇ ဝႃႈၼႆ ။

ၵူၼ်းၸၢႆးၵေႃႉယူႇၼႂ်းပိုၼ်ႉတီႈသိုပ်ႇလၢတ်ႈထႅင်ႈဝႃႈ -“ႁဝ်းၶႃႈယူႇမႃးၸဵမ်မိူဝ်ႈပၢၼ်ပူႇပၢၼ်မွၼ်ႇႁဝ်း ၊ လႆႈႁဵတ်းၵၢၼ်ၽုၵ်ႇသွမ်ႈႁႃၵိၼ်လဵင်ႉတွင်ႉဝႆႉ။ ႁဝ်းၽုၵ်ႇမိူၼ်ၼင်ႇမၢၵ်ႇတိုင်ႇယၢင်း (ဒညှင်းသီး) ၊ မၢၵ်ႇထေႃးပၢတ်ႈ (ထောပတ်ပင်) ၸိူဝ်းၼႆႉဝႆႉ ၊ ၵမ်းၼႆႉသမ်ႉ ၵိုင်ႉၵၢင်ႉၸႂ်ႉၶၢႆႉ ၸိူင်ႉၼႆယၢပ်ႇဝႆႉဢေႃႈ ၊ ၽႂ်ၵေႃႈဢမ်ႇပဵင်းပေႃးၸႂ်ၶႃႈ ”- ဝႃႈၼႆ ။

ဝဵင်းၼမ်ႉတူႈၼႆႉ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်း 2 မႃး သိုၵ်းတဢၢင်း (TNLA) ၵုမ်းၵမ်ပၼ်ႇၵၢၼ်ၽွင်းငမ်းဝႆႉ ပဵၼ်တၢင်းၵၢၼ် ။ ဝၢႆးၼၼ်ႉ ၽွင်းလိူၼ်တီႊသႅမ်ႊပိူဝ်ႊ ပီ 2023 ယိုတ်းသိမ်းလႆႈပႃး မေႃႇၶုတ်းႁႄႈ (ဘော်တွင်း) ဢၼ်ႁၢင်ႇၵႆႇၵၼ်တင်း ဝဵင်းၼမ်ႉတူႈ 14 လၵ်းၼၼ်ႉဝႃႈၼႆ။

မိူဝ်ႈႁူဝ်လိူၼ်ဢေႊပရႄႇ ပီ 2024 ၼၼ်ႉၵေႃႈ သိုၵ်းတဢၢင်း TNLA ယၢမ်ႈၸီႉသင်ႇတဵၵ်းၸႂ်ႉ ၵူၼ်းၵိၼ်ငိုၼ်းလိူၼ်ပိၼ်ႇသိၼ်ႇ လႄႈ ၵူၼ်းႁဵတ်းၵၢၼ်ၶုတ်းႁႄႈၸိူဝ်းယူႇသဝ်းၼႂ်းပွၵ်ႉၶႃႈႁၢပ်ႇၵၢၼ်ၶုၼ် တတလ (4) ဝဵင်းၼမ်ႉတူႈၶၢႆႉတီႈယူႇတၼ်းသဝ်းဢွၵ်ႇၵႂႃႇ ၼႂ်းၶၢဝ်းတၢင်း 10 ဝၼ်းၼႆပွၵ်ႈၼိုင်ႈ ဝႃႈၼႆ ။