သိုၵ်းၶႄႇၵဝ်ႈၵၢင်ႉ MNDAA တင်း သိုၵ်းတဢၢင်း TNLA ၽူႈၼမ်းတင်းသွင်ၸုမ်း ႁူပ်ႉဢုပ်ႇဢူဝ်းၵၼ် လွင်ႈပၼ်ႁႃပၢင်တိုၵ်း လႄႈ ၵၢၼ်သိုၵ်း တီႈဝဵင်းၵၢတ်ႇၵဝ်ႇ (လၢဝ်ႇၵၢႆး) ႁိုင် ၶၢဝ်းတၢင်းသွင်ဝၼ်းယဝ်ႉသေတႃႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉ (19/3/2026) ၵေႃႈ ပႆႇတူၵ်းလူင်းၵၼ်လႆႈတေႉတေႉ ၼႆယဝ်ႉ။

တႄႇဝၼ်းတီႈ 17 လိူၼ်မၢတ်ႉၶျ် မႃး ၽူႈၼမ်းၾၢႆႇသိုၵ်းတဢၢင်း TNLA ၸၼ်ႉၵႅမ်ႁူဝ်ပဝ်ႈ 2 ၸွမ်ႁၢၼ် တႃးၶူႇလၼ်း ၼမ်းၼႃႈသေ ၵႂႃႇႁူပ်ႉထူပ်းဢုပ်ႇဢူဝ်းၸွမ်း ၽူႈၼမ်းသိုၵ်း ၶႄႇၵဝ်ႈၵၢင်ႉ ပိူဝ်ႈတႃႇၵႄႈလိတ်ႈ ပၼ်ႁႃၵၢၼ်သိုၵ်း ဢၼ်ပဵၼ်ပၼ်ႁႃယူႇ ၼႂ်းၸႄႈဝဵင်းၵူတ်ႉၶၢႆ လႄႈ ၼိူဝ်သဵၼ်ႈတၢင်းလူင်ႁၢႆးဝေး သႅၼ်ဝီ-မူႇၸေႊ-ၼမ်ႉၶမ်းၼၼ်ႉ ဝႃႈၼႆ။

လူၺ်းယေႇဢူး ၽူႈၶၢၼ်ပၢၵ်ႇၸုမ်းသိုၵ်းတဢၢင်း TNLA လၢတ်ႈတီႈၽူႈတွႆႇႁွၵ်ႈဝႃႈ “ႁၢၼ်ႉတေႃႇထိုင်ယၢမ်းလဵဝ်ၼႆႉ ဢမ်ႇပႆႇလႆႈၶေႃႈတူၵ်းလူင်းသင်ၵၼ်လႄႈ ဢမ်ႇပႆႇၸၢင်ႈယိုၼ်ယၼ်ၶေႃႈ မၵ်းမၼ်ႈသင်ၵၼ်တေႉတေႉ။ ၽူႈယႂ်ႇၵူၼ်းလူင်း တူဝ်တႅၼ်းၾၢႆႇႁဝ်း ၸိူဝ်းၵႂႃႇပၢင်ၵုမ်ၼၼ်ႉၵေႃႈ ဢမ်ႇပႆႇပွၵ်ႈမႃးထိုင်ၶိုၼ်း။ ငဝ်းလၢႆးပၢင်ဢုပ်ႇဢူဝ်း မိူၼ်ႁိုဝ် မီးၸိူင်ႉ ႁိုဝ်ၼႆတႄႉ ဢမ်ႇပႆႇၸၢင်ႈလၢတ်ႈလႆႈ တႅတ်ႈတေႃး” ဝႃႈၼႆ။

ဝၢႆးလင်သိုၵ်းၶႄႇၵဝ်ႈၵၢင်ႉ ၵုမ်းၵမ်ပၼ်ႇၵၢၼ်ၽွင်းငမ်း ၶဝ်ႈဢဝ်တီႈယူႇဝႆႉၶိုၼ်း ၸွမ်းပိုၼ်ႉတီႈသိုၵ်းတဢၢင်း ယၢမ်ႈၵုမ်းၵမ်ၼၼ်ႉယဝ်ႉ ၾၢႆႇသိုၵ်းၶႄႇၵဝ်ႈၵၢင်ႉ ၸတ်းႁႅင်းသိုၵ်း ၶိုၼ်ႈၵႂႃႇၸွမ်းၾၢႆႇလင် သိုၵ်းတဢၢင်း ထိုင်ၾၢႆႇၼွၵ်ႈဝဵင်းၼမ်ႉၶမ်း ၵူၺ်းဢမ်ႇၵႃး ၸွမ်းပိုၼ်ႉတီႈဝဵင်းၼမ်ႉတူႈၵေႃႈ ၾၢႆႇသိုၵ်းၶႄႇၵဝ်ႈၵၢင်ႉ ၽိူမ်ႉႁႅင်းသိုၵ်းဝႆႉပႃးထႅင်ႈ တူဝ်ႈတၼ်းတႃႇၸတ်းပၢင်တိုၵ်းယူႇၼႆ ၶၢဝ်ႇႁူင်လိုဝ်းဢွၵ်ႇဝႆႉသေတႃႉ ယွၼ်ႉၽူႈၼမ်းၸုမ်းသိုၵ်းတင်းသွင်ၾၢႆႇ ၸတ်းပၢင်ႁူပ်ႉထူပ်းဢုပ်ႇဢူဝ်းၵၼ်ယူႇလႄႈ သဵင်ၵွင်ႈၸင်ႇဢမ်ႇတႅၵ်ႇသေ ယဵၼ်ဝႆႉၸူဝ်ႈၶၢဝ်း ၼႆယဝ်ႉ။

ၼႂ်းၶၢဝ်းတၢင်းမီးၶၢဝ်ႇႁူင်လိုဝ်းဝႃႈ သိုၵ်းၶႄႇၵဝ်ႈၵၢင်ႉ ၸတ်းႁႅင်းသိုၵ်းႁွတ်ႈၽႅဝ်ဢဝ်တီႈယူႇဝႆႉ ၾၢႆႇၼွၵ်ႈဝဵင်း ၼမ်ႉၶမ်းၼႆၼၼ်ႉ ၽူႈႁၢပ်ႇၵၢၼ်ၼႂ်းႁွင်ႈၵၢၼ်သိုၵ်းတဢၢင်း ဝဵင်းၼမ်ႉၶမ်းၵမ်ႈၽွင်ႈ ဢွၼ်ၵၼ်တေႃႉဢဝ် ၶူဝ်းလဵင်း လႄႈ ယႃႈယႃ တီႈၼႂ်းႁူင်းယႃလူင်ဝဵင်းၼမ်ႉၶမ်း တၢင်ႇၵႃးလူင်ဢွၵ်ႇဝဵင်းၵႂႃႇပႃးလႄႈ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ဢွၼ်ၵၼ်မႆႈၸႂ်ၵူဝ်ပၢင်တိုၵ်းလၢမ်းၶဝ်ႈထိုင် ၼႂ်းဝဵင်းၼမ်ႉၶမ်း ၼႆဝ်ႉ။

ၵဵဝ်ႇလူၺ်ႈလွင်ႈၼႆႉသေ လူၺ်းယေႇဢူး ၽူႈၶၢၼ်ပၢၵ်ႇသိုၵ်းတဢၢင်း TNLA တႄႉ ယိုၼ်ယၼ်တွပ်ႇလၢတ်ႈ တီႈၸုမ်းၶၢဝ်ႇၽူႈတွႆႇႁွၵ်ႈဝႆႉဝႃႈ “ၼႂ်းၶၢဝ်းတၢင်းဝၼ်းသွင်ဝၼ်းၼႆႉ ပၢင်တိုၵ်းယဵၼ်ဝႆႉ သဵင်ၵွင်ႈဢမ်ႇတႅၵ်ႇယဝ်ႉ။ လွင်ႈဝႃႈ ႁွင်ႈၵၢၼ်ၽွင်းငမ်းသိုၵ်းတဢၢင်း ၼႂ်းဝဵင်းၼမ်ႉၶမ်း ၶၢႆႉၶူဝ်းလဵင်းဢွၵ်ႇ ဢၼ်ဝႃႈၼၼ်ႉ ဢမ်ႇၸႂ်ႈလွင်ႈတေႉမၼ်း။ ပူၼ်ႉမႃးၼႂ်းဝၼ်းတီႈ 14/15 ၼၼ်ႉတႄႉ ယွၼ်ႉပၢင်တိုၵ်းတိုၵ်ႉ ႁၢဝ်ႈႁႅင်းလႄႈ ၾၢႆႇႁဝ်းၸင်ႇလႆႈ ႁၢင်ႈႁႅၼ်းဝႆႉလူင်ႈၼႃႈတႄႉ မီးယူႇ။ မိူဝ်ႈလဵဝ် ပၢင်တိုၵ်းၵေႃႈဢမ်ႇမီး သဵင်ၵွင်ႈၵေႃႈဢမ်ႇတႅၵ်ႇယဝ်ႉလႄႈ ႁွင်ႈၵၢၼ်ၽွင်းငမ်း လႄႈ ႁူင်းယႃလူင်ၸိူဝ်းၼႆႉ ပိုတ်ႇဝႆႉၶိုၼ်းမိူၼ်ၵဝ်ႇယဝ်ႉ” ဝႃႈၼႆ။

ၽွင်းသိုၵ်းၶႄႇၵဝ်ႈၵၢင်ႉ တင်း သိုၵ်းတဢၢင်း ယိုဝ်းတိုၵ်းၵၼ်ႁၢဝ်ႈႁႅင်းယူႇ ၼႂ်းၸႄႈဝဵင်းၵူတ်ႉၶၢႆ လႄႈ ၼိူဝ်သဵၼ်ႈတၢင်းလူင်ႁၢႆးဝေး သႅၼ်ဝီ ထိုင် သုၼ်ၵၢၼ်ၵႃႉၶၢႆ 105 လၵ်း လႄႈ ၾၢႆႇၼွၵ်ႈဝဵင်းၼမ်ႉၶမ်းၼၼ်ႉ ၵူၼ်းသိုၵ်းတဢၢင်း ၸိူဝ်းမၢတ်ႇၸဵပ်းၵႂႃႇ မီး 18 ၵေႃႉ၊ ၸိူဝ်းၺႃး သိုၵ်းၶႄႇၵဝ်ႈၵၢင်ႉ တီႉၺွပ်းၵႂႃႇ မီးမွၵ်ႈ 100 ၵေႃႉ မၢင်ၸိူဝ်းၺႃးသိုၵ်းၶႄႇၵဝ်ႈၵၢင်ႉ ပေႃႉထုပ်ႉႁႅမ် ၸိူဝ်းၼႆႉထႅင်ႈ ၼႆယဝ်ႉ။

ပိူဝ်ႈတႃႇၵႄႈလိတ်ႈပၼ်ႁႃ ၵၢၼ်သိုၵ်း ပၢင်တိုၵ်းသိုၵ်းတဢၢင်း တင်း သိုၵ်းၶႄႇၵဝ်ႈၵၢင်ႉၼၼ်ႉ ၾၢႆႇသိုၵ်းတဢၢင်း လႆႈတႅမ်ႈလိၵ်ႈယိုၼ်ႈသူင်ႇထိုင်ဝႆႉတီႈ ႁူဝ်ပဝ်ႈ FPNCC လႄႈ လူင်ပွင်ၸိုင်ႈမိူင်းၶႄႇ ၶဝ်ႈယူႇၵၢင် ၵႄႈလိတ်ႈပၼ်ႁႃဝႆႉ ဝႃႈၼႆ။