ၼႂ်းၵၢင်လိူၼ်ဢေႊပရႄႊလ် ၶၢဝ်းပွႆးသွၼ်းၼမ်ႉ (သၢင်းၵျၢၼ်ႇ) ဝၼ်းတီႈ 15/4/2026 ၼႆႉ သိုၵ်းတဢၢင်း (TNLA) ဢွၵ်ႇလိၵ်ႈပိုၼ်ၽၢဝ်ႇ ပဵၼ်တၢင်းၵၢၼ် ႁူမ်ၸူမ်းၸွမ်း ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ လႆႈၶိုၼ်ႈၸၼ်ႉပဵၼ်ၸွမ်ၸိုင်ႈ ပဵၼ်တၢင်းၵၢၼ် ၼႆယဝ်ႉ။

ၼႂ်းလိၵ်ႈပိုၼ်ၽၢဝ်ႇၼၼ်ႉ တႅမ်ႈပႃးဝႆႉဝႃႈ – မုင်ႈမွင်း လူင်ပွင်ၸိုင်ႈမႂ်ႇ ဢၼ်ဢူးမိၼ်းဢွင်ႇလၢႆႇ တေၼမ်းၼႃႈ ၵႂႃႇၼႃႈၼၼ်ႉ သိုပ်ႇထိင်းသိမ်းၶေႃႈတူၵ်းလူင်းၵိၼ်ၵႅၼ်ႇ ၵိုတ်းတိုၵ်း ၵၼ်ၵႂႃႇသေ ၵႄႈလိတ်ႈပၼ်ႁႃၵၢၼ်မိူင်း ႁႃၶေႃႈတွပ်ႇၵႂႃႇထႅင်ႈ ၼႆယဝ်ႉ။

မိူဝ်ႈပီ 2025 လိူၼ်ဢွၵ်ႊထူဝ်ႊပိူဝ်ႊ ဝၼ်းတီႈ 28 ၼၼ်ႉ ၸုမ်းလူင်ပွင်ၸိုင်ႈမိူင်းၶႄႇ ယူႇၵၢင်ႁဵတ်းၶဵဝ်ပၼ် သေ ၸုမ်းသိုၵ်းတဢၢင်း (TNLA) လႆႈလူင်းလၢႆးမိုဝ်းၵိုတ်းတိုၵ်းၵၼ် တင်းသိုၵ်းမၢၼ်ႈ တီႈပၢင်ဢုပ်ႇဢူဝ်း ၵၢၼ်လူင်းလၢႆးမိုဝ်းၵိုတ်းတိုင်းႁၢႆႇၵိၼ်ႇ ၵမ်းထူၼ်ႈ 9 ၼၼ်ႉဝႆႉ။

ယွၼ်ႉၼၼ် ၸုမ်းသိုၵ်းတဢၢင်း ဢၼ်ယၢမ်ႈယိုဝ်းတိုၵ်း သိုၵ်းမၢၼ်ႈ မိူဝ်ႈပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၼၼ်ႉ ၸင်ႇႁဵတ်းလိၵ်ႈပိုၼ်ၽၢဝ်ႇဢွၵ်ႇ ပဵၼ်တၢင်းၵၢၼ်သေ ၸႅင်ႈဝႆႉဝႃႈ – ႁႂ်ႈသိုၵ်းမၢၼ်ႈ လႄႈ လူင်ပွင်ၸိုင်ႈမႂ်ႇ ဢၼ်ဢူးမိၼ်းဢွင်ႇလၢႆႇ တေၼမ်းၼႃႈၸတ်းပွင်ၵႂႃႇၼၼ်ႉ ထိင်းသိမ်းပၼ် ၶေႃႈတူၵ်းလူင်း ၵိုတ်းတိုၵ်းၵၼ်၊ ႁႃလၢႆးတၢင်းၵႄႈ လိတ်ႈပၼ်ႁႃ တႃႇလႆႈၶေႃႈတွပ်ႇ ၵၢၼ်ငမ်းယဵၼ်ယူႇ ဝႃႈၼႆ။

ဝၢႆးလင်မိၼ်းဢွင်ႇလၢႆႇ ၸွမ်ၸိၵ်းသိုၵ်းမၢၼ်ႈ လႆႈၶိုၼ်ႈၸၼ်ႉပဵၼ်ၸွမ်ၸိုင်ႈ ပဵၼ်တၢင်းၵၢၼ်ယဝ်ႉၼႆႉ ၸုမ်းတပ်ႉသိုၵ်းဝႃႉ (UWSA) လႄႈ တပ်ႉသိုၵ်းမိူင်းလႃး (NDAA) ၸိူဝ်းမီး ႁႅင်းၶိူင်ႈၵွင်ႈၵၢင်ႇ ႁႅင်းငိုၼ်းတွင်းယႂ်ႇသေ မီးဢႃႇၼႃႇၸွမ်းသဵၼ်ႈတၢင်း ၵၢၼ်ၵႃႉၶၢႆ မိူင်းၶႄႇ-မိူင်းမၢၼ်ႈသေ ပၵ်းသဝ်း ငဝ်ႈငုၼ်းယူႇဝႆႉၸွမ်းလႅၼ်လိၼ် ၼၼ်ႉ သူင်ႇလိၵ်ႈယိုၼ်ႈထိုင် ၸူးလူင်ပွင်ၸိုင်ႈမႂ်ႇ ႁူမ်ၸူမ်းၸွမ်း မိၼ်းဢွင်ႇလၢႆႇ လႆႈၶိုၼ်ႈပဵၼ်ၸွမ်ၸိုင်ႈ ဢွၼ်တၢင်းသုတ်းပိူၼ်ႈ။