ဢွၼ်ႇယိင်း ဢႃယုမွၵ်ႈ 17 ပီ ၵေႃႉၼိုင်ႈ ဢၼ်ပၢႆႈၽေးသိုၵ်းမႃးသွၼ်ႈယူႇဝႆႉ တီႈဝဵင်းလႃႈသဵဝ်ႈၼႆႉ ယၢမ်းလဵဝ် ထူပ်းတၢင်းယၢပ်ႇၽိုတ်ႇဝႆႉ တႃႇတေယူတ်းယႃတၢင်းပဵၼ်ၵွၵ်းႁူဝ်ယႂ်ႇ ၼႆႉ ယွၼ်ႉတၢင်းပဵၼ်ၼႆႉသေ သင်ဢမ်ႇၽႃႇတတ်းၸိုင် တေၸၢင်ႈႁၢဝ်ႈႁႅင်းမႃးလိူဝ်ၵဝ်ႇလႄႈ ၸၢင်ႈထူပ်းတၢင်းယၢပ်ႇၽိုတ်ႇၼမ် ၼႆယဝ်ႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵွၵ်းႁူဝ်ဢွၼ်ႇယိင်းၼၼ်ႉ ပႃးမႃးၸဵမ်မိူဝ်ႈၵိူတ်ႇယဝ်ႉ။ ယွၼ်ႉၵွၵ်းႁူဝ်ယႂ်ႇၼႆႉသေ တေၸၢင်ႈတုမ်ႉယွၼ်ႈၸပ်းမႃးၸွမ်းတိၼ်ၸွမ်းမိုဝ်း။ ၸွမ်းတူဝ်ၶိင်းမၼ်းၼၢင်းတႄႉ တေမီးတီႈၵွၵ်းႁူဝ်ၵူၺ်း ဢၼ်ယႂ်ႇ။ ဢၼ်လမ်ႇလွင်ႈမၼ်းတႄႉ ပေႃးလႆႈၽႃႇပႅတ်ႈၵွၵ်းႁူဝ်ယဝ်ၸိုင် ထၢင်ႇတေ ၶႅၼ်းမႃးယူႇ။ ၶဝ်ၶႂ်ႈၽႃႇတတ်းယူႇ ပေႃးမီးၸဝ်ႈတႃႇၼတႄႉ လွင်ႈၼႆႉ ႁဝ်းၶႃႈ လႆႈထၢမ်ၶဝ်တႅတ်ႈတေႃးယဝ်ႉ”- ဝႃႈၼႆ။

ၵဵဝ်ႇလူၺ်ႈ ၽွၼ်းယွၼ်ႈၵွၵ်းႁူဝ်ယႂ်ႇ ဢွၼ်ႇယိင်းၼႆႉသေ ႁဵတ်းႁႂ်ႈၶႅၼ်ၶႃမၼ်းၼၢင်း ဢမ်ႇမီးႁႅင်း တႃႇတေၸုၵ်းပႆၵႂႃႇမႃးလႆႈလႄႈ ပဵၼ်ဢၼ်ယၢပ်ႇၽိုတ်ႇဝႆႉ။ ယွၼ်ႉၼၼ် လႆႈ ၼွၼ်းယူႇဝႆႉတီႈၵဝ်ႇတီႈလဵဝ်သေ လႆႈလုမ်းလႃးဝႆႉ ၸိူင်ႉၼၼ်ၵူၺ်း ဝႃႈၼႆ။

“တိုၵ်ႉဢၢမ်းယူႇၼႆႉ မိူဝ်ႈတႄႇမၼ်းယူဝ်ပဵၼ်တီႈၵွၵ်းႁူဝ်ၵူၺ်း ၽိူဝ်ႇဢဝ်မိုဝ်းမၼ်းဢွၵ်ႇမႃး ၼၼ်ႉၵေႃႈ လဵၵ်ႉလဵၵ်ႉၵူၺ်း၊ ၽိူဝ်ႇတူၺ်းၸွမ်းတိၼ်ၸွမ်းၶႃမၼ်းၼၢင်းၵေႃႈလဵၵ်ႉ ၸွမ်းတူဝ်ၶိင်းဢႅဝ်ၸိူဝ်းၼႆႉၵေႃႈ မၼ်းမိူၼ်ၼိူဝ်ႉၸပ်းလုပ်ႇၵႂႃႇၸိူင်ႉၼၼ်ယဝ်ႉ။ တိၼ်မၼ်းၼၢင်းၵေႃႈ ႁဵဝ်ႇၵႂႃႇ ဢဵၼ်မၼ်းၵေႃႈၶႅင် ငွၵ်းဝႆႉၸိူင်ႉၼၼ်။ မိုဝ်းမၼ်းၼၢင်း တႃႇၶွၼ်ၼိုင်ႈၵေႃႈ ငွၵ်းဝႆႉမိူၼ်ၵၼ် မၼ်းဢမ်ႇသိုဝ်ႈလႆႈ။ တေၼင်ႈတေလုၵ်ႉၵႂႃႇမႃးလႂ်ၵေႃႈ တေလႆႈႁွပ်ႇၵႂႃႇမႃး မိူၼ်လုၵ်ႈဢွၼ်ႇၼၼ်ႉယဝ်ႉ။ ပေႃးတေၽိုၼ်ႉၵေႃႈ မၼ်းၼၢင်း တေႁွင်ႉမႄႈမၼ်းသေ မႃးၽိုၼ်ႉပၼ်။ ၵွၵ်းႁူဝ်တႄႉ တူင်ႉၵႂႃႇတူင်ႉမႃး ဝၢႆႇၵႂႃႇဝၢႆႇမႃး လႆႈယူႇ။ မၼ်းတေသၢၼ်ႈ ပေႃးသၢၼ်ႈၼႆ မၼ်းတေၸဵပ်း ၸိူင်ႉၼၼ်ဢေႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းလႃႈ သဵဝ်ႈ သိုပ်ႇလၢတ်ႈၼႄၼင်ႇၼႆ။

ၵေႃႉပဵၼ်မႄႈလုၵ်ႈဢွၼ်ႇၼႆႉ ပဵၼ်ၵူၼ်းႁဵတ်းၵိၼ်ၵၢၼ်ႁႃၸဝ်ႉၵိၼ်ၶမ်ႈၵူၺ်း တႃႇတေဢဝ်ၵႂႃႇယူတ်းယႃတူဝ် ၵႂႃႇၽႃႇတတ်းၸိူင်ႉၼၼ်တႄႉ လႆႈမႆႈၸႂ်ဝႆႉ ယွၼ်ႉဢမ်ႇမီးငိုၼ်းတွင်း ႁၢၼ်ႉတေႃႇထိုင်ယၢမ်းလဵဝ်။

“မိူဝ်ႈမၼ်းၼၢင်းလဵၵ်ႉလဵၵ်ႉတႄႉ ယၢမ်ႈၵႂႃႇၼႄတီႈႁူင်းယႃယူႇ ၵႂႃႇၼႄယူႇသေတႃႉၵေႃႈ ၶဝ်ဢမ်ႇမီးငိုၼ်း တွင်းတႃႇတေၵႂႃႇၽႃႇတတ်းၼၼ်ႉၼႃႇ။ ယွၼ်ႉဢမ်ႇမီးငိုၼ်းတွင်းသေ ယူႇမႃးတေႃႇထိုင်ယၢမ်းလဵဝ် မီးၵႂႃႇ 7-8 ပီယဝ်ႉ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။

ဢွၼ်ႇယိင်း ၵွၵ်းႁူဝ်ယႂ်ႇၼႆႉ ၸိုဝ်ႈႁွင်ႉ မသူႉသူႉပႅင်ႇ (မစုစုပိုင်) ဢႃယုတေမီးမွၵ်ႈ 17 ပီ။ ပဵၼ်ၵူၼ်းဝၢၼ်ႈ ပၢင်ပဝ်းဢွၼ်ႇ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ယွၼ်ႉပၢင်တိုၵ်း သိုၵ်းမၢၼ်ႈတင်း သိုၵ်းတဢၢင်း TNLA ၼၼ်ႉသေ ႁဵတ်းႁႂ်ႈၵူၼ်းမိူင်း လႆႈဢွၼ်ၵၼ်ပၢႆႈၽေးသိုၵ်း မႃးသွၼ်ႈယူႇဝႆႉတီႈထမ်ႇမယူင်ႇ ပွၵ်ႉၼိုင်ႈ ဝဵင်းလႃႈသဵဝ်ႈ ႁူဝ်ၵူၼ်း 400 ပၢႆ။ ၵူၼ်းမိူင်းဢၼ်လႆႈပၢႆႈၽေးသိုၵ်း မႃးသွၼ်ႈယူႇဝႆႉ တီႈဝဵင်းလႃႈသဵဝ်ႈၼႆႉ မီးၶၢဝ်းတၢင်း 8 ဝၼ်းယဝ်ႉ ယင်းပႆႇၸၢင်ႈပွၵ်ႈၶိုၼ်းႁိူၼ်းယေးၽႂ်မၼ်း။