ဝၢႆးလင်သိုၵ်းၵဝ်ႈၵၢင်ႉ MNDAA တိုၵ်းလိုပ်ႈသိုၵ်းတဢၢင်း TNLA ဢွၵ်ႇၼႂ်းၸႄႈဝဵင်းၵူတ်ႉၶၢႆယဝ်ႉ ဝၼ်းလဵဝ်ၵူၺ်း ၵူၼ်းသိုၵ်းၵဝ်ႈၵၢင်ႉ ၸိူဝ်းတူင်ႉၼိုင်ယူႇသဝ်းၼႂ်းပိုၼ်ႉတီႈ ထုင်ႉ ၼမ်ႉၽၵ်းၵႃ ၸီႉသင်ႇ လၢတ်ႈႁႂ်ႈသိုၵ်းၶၢင် KIA ပူတ်းယႃႉပႅတ်ႈၵဵတ်ႉလၢၼ်ႇ ဢၼ်တင်ႈဝႆႉၼိူဝ်သဵၼ်ႈတၢင်း လူင်ႁၢႆးဝေး ၵူတ်ႉၶၢႆ – မူႇၸေႊ ဝႃႈၼႆ။
လိူင်ႈၼႆႉ ၵူၼ်းမိူင်းတႆးပွတ်းႁွင်ႇၵေႃႉၸမ်ၸႂ်ၵၼ်တင်း သိုၵ်းၶၢင် KIA လၢတ်ႈဝႃႈ “ၼိူဝ်သဵၼ်ႈတၢင်းလူင်ႁၢႆးဝေး မိူင်းတႆးပွတ်းႁွင်ႇ လႃႈသဵဝ်ႈ-မူႇၸေႊၼႆႉ ၵဵတ်ႉလၢၼ်ႇၸုမ်းသိုၵ်း ၶၢင် ၼမ်ႁႅင်းၼႃႇလႄႈ ႁႂ်ႈသိုၵ်းၶၢင် ပူတ်းယႃႉပႅတ်ႈၵဵတ်ႉ လၢၼ်ႇတီႈၼမ်ႉၽၵ်းၵႃ။ ၶဝ်ၵႂႃႇလၢတ်ႈသိုၵ်းၶၢင် မိူဝ်ႈဝႃး (16/3/2026) ယၢမ်းတၢမ်းၶမ်ႈ ဝၢႆးလင် ၶဝ်ႁူပ်ႉၵၼ်တင်း သိုၵ်းမၢၼ်ႈ တီႈလႃႈသဵဝ်ႈယဝ်ႉၼၼ်ႉ။ မိူဝ်ႈလဵဝ် ၵူၼ်းမိူင်းပိုၼ်ႉတီႈၼႂ်းထုင်ႉၼမ်ႉၽၵ်းၵႃၵေႃႈ ဢွၼ်ၵၼ်မႆႈၸႂ် ၵူဝ်သိုၵ်းၶႄႇၵဝ်ႈၵၢင်ႉ တင်း သိုၵ်းၶၢင် ယိုဝ်းၵၼ်ထႅင်ႈယူႇ” ဝႃႈၼႆ။
ၼိူဝ်သဵၼ်ႈတၢင်းလူင်ႁၢႆးဝေး လုၵ်ႉၵူတ်ႉၶၢႆ ၵႂႃႇတၢင်းဝဵင်းမူႇၸေႊ တီႈထုင်ႉၼမ်ႉၽၵ်းၵႃၼႆႉ မီးၵဵတ်ႉလၢၼ်ႇ သိုၵ်းၸၢဝ်းၶိူဝ်းလၢႆၸုမ်း ၶႅၼ်ႈၵၼ်ယူႇသဝ်း တူင်ႉၼိုင်ၵႂႃႇမႃးဝႆႉယူႇ ၼၼ်ႉ မီးမွၵ်ႈ 10 တီႈပၢႆ ဝႃႈၼႆ။
ၵဵဝ်ႇၵပ်းလူၺ်ႈ သိုၵ်းၶႄႇၵဝ်ႈၵၢင်ႉ ဢွၵ်ႇၶေႃႈပူင်ၸီႉသင်ႇႁႂ်ႈသိုၵ်းၶၢင် KIA ပူတ်းထွၼ်ၵဵတ်ႉလၢၼ်ႇ ဢွၵ်ႇပႅတ်ႈ ၼႂ်းထုင်ႉၼမ်ႉၽၵ်းၵႃ ၼိူဝ်သဵၼ်ႈတၢင်းလူင်ႁၢႆးဝေးၼၼ်ႉသေ ၽူႈၶၢၼ်ပၢၵ်ႇ သိုၵ်းၶၢင် KIA ၸဝ်ႈသိုၵ်းလူင် ၼေႃႇပူႇတႄႉလၢတ်ႈဝႃႈ “မိူဝ်ႈလဵဝ် ၵဵတ်ႉလၢၼ်ႇသိုၵ်းၶၢင် တိုၵ်ႉတင်ႈဝႆႉပဵၼ်မိူၼ်ၵဝ်ႇယူႇ။ ဢမ်ႇပႆႇထိုင်တီႈဝႃႈ သိုၵ်းၵဝ်ႈၵၢင်ႉ မိပ်ႇငႅၼ်းႁႂ်ႈႁဵတ်းၼႆ။ ၶဝ်ၵေႃႈဢမ်ႇပႆႇမႃးလၢတ်ႈသင်တီႈငဝ်ႈငုၼ်းႁဝ်း ပဵၼ်တၢင်းၵၢၼ်သင်” ဝႃႈၼႆ။
သင်သိုၵ်းၵဝ်ႈၵၢင်ႉ တင်း သိုၵ်းၶၢင် ယိုဝ်းတိုၵ်းၵၼ်ထႅင်ႈ ၼိူဝ်သဵၼ်ႈတၢင်းလူင်ႁၢႆးဝေးၸိုင် ၵူၼ်းမိူင်းၸိူဝ်းယူႇၼႂ်းပိုၼ်ႉတီႈလႄႈ ရူတ်ႉၵႃးၸိူဝ်းတေႃႉတၢင်ႇၶူဝ်းၵုၼ်ႇ ၼႂ်းမိူင်းတႆး ပွတ်းႁွင်ႇ တေႁူပ်ႉတၢင်းယၢပ်ႇၵိၼ်းထႅင်ႈၵမ်းၼိုင်ႈယူႇ။
ယွၼ်ႉၼၼ် ၵဵဝ်ႇၵပ်းလူၺ်ႈၵၢၼ်သိုၵ်း ၼႂ်းမိူင်းတႆးပွတ်းႁွင်ႇၼၼ်ႉသေ ၵူၼ်းမိူင်းပိုၼ်ႉတီႈတႄႉ တုၵ်းယွၼ်းဝႆႉဝႃႈ – ၶႂ်ႈႁႂ်ႈၽူႈၼမ်းၸုမ်းသိုၵ်းၵူႈၸုမ်း ႁူပ်ႉဢုပ်ႇၵၼ်သေ တူၵ်း လူင်းလႆႈၸႂ်ၵၼ်ၼိူဝ်ၽိူၼ်ၵႂႃႇ ငၢႆႈငၢႆႈလူမ်လူမ်ၵူၺ်း ၼႆယဝ်ႉ။
တႄႇဝၼ်းတီႈ 16/3/2026 မႃး သိုၵ်းၵဝ်ႈၵၢင်ႉ ၵုမ်းၵမ်ဝႆႉ ၼိူဝ်သဵၼ်ႈတၢင်းလူင် ၵႄႈၵၢင်ထုင်ႉၼမ်ႉၽၵ်းၵႃ- ၼမ်ႉၶမ်း ၵူၺ်းဢမ်ႇၵႃး ၾၢႆႇသိုၵ်းၵဝ်ႈၵၢင်ႉ ၸႂ်ႉတိုဝ်းၶိူင်ႈတရူၼ်ႊသေ ၸွမ်းယိုဝ်းသႂ်ႇတပ်ႉပၢင်သဝ်း ဢွင်ႈတီႈမီးသိုၵ်းတဢၢင်း (TNLA) ႁၢဝ်ႈႁႅင်းသေတႃႉ မိူဝ်ႈၼႆႉ ဝၼ်းတီႈ 17/3/2026 တႄႉ သဵင်ၵွင်ႈယဵၼ်ဝႆႉယဝ်ႉၼႆ ၵူၼ်းမိူင်းပိုၼ်ႉတီႈ ၸႄႈဝဵင်း ၼမ်ႉၶမ်းလၢတ်ႈ။
ဝၢႆးလင် သိုၵ်းၵဝ်ႈၵၢင်ႉ တင်း သိုၵ်းတဢၢင်းယိုဝ်းတိုၵ်းၵၼ်ႁိုင်ၶၢဝ်းတၢင်း သွင်ဝၼ်းယဝ်ႉ မိူဝ်ႈဝႃး ဝၼ်းတီႈ 16/3/2026 သိုၵ်းၵဝ်ႈၵၢင်ႉ ရူတ်ႉၵႃးတၢင်ႇၶူဝ်းၵုၼ်ႇ လႄႈ ရူတ်ႉၵႃး ဢွၼ်ႇၵူႈသႅၼ်း လတ်းၶၢမ်ႈၵႂႃႇမႃးၼိူဝ် သဵၼ်ႈတၢင်းလူင်ႁၢႆးဝေး လႃႈသဵဝ်ႈ-မူႇၸေႊ ပဵၼ်တၢင်းၵၢၼ် ၼႆယဝ်ႉ။
လႆႈႁူႉဝႃႈ တီႈထုင်ႉၼမ်ႉၽၵ်းၵႃၼႆႉ ၾၢႆႇသိုၵ်းၶၢင် KIO ဢွၵ်ႇလိၵ်ႈပဵၼ်တၢင်းၵၢၼ်ဝႆႉဝႃႈ ႁႂ်ႈၵူၼ်းမိူင်းၾၢင်ႉၵႂႃႇမႃးပႆ သူၼ် ႁႆႈ ၼႃး ၊ ၵူႈႁိူၼ်း တေလႆႈၶုတ်းဝႆႉလုၵ်းပႅပ်ႉ လုၵ်းထႅၼ်ႉ၊ ပေႃးဝၢႆးလင် ၵၢင်ၶမ်ႈ 8 မူင်းၵႂႃႇ တိုၼ်းတေဢမ်ႇလႆႈဢွၵ်ႇႁိူၼ်းၽႂ်မၼ်းလႃးလႃး ႁႂ်ႈၾၢင်ႉၵၼ်မီးသတိယူႇၵိၼ်ၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ