ပေႃးၽူႈပွင်မိူင်းဢမ်ႇလီ ၵူၼ်းမိူင်းၼႆႉ ယူႇလႂ်ၵေႃႈ မီးၽေးၼမ်တီႈၼၼ်ႈ ဢမ်ႇတွၼ်ႉလႆႈယူႇၵတ်းယဵၼ်လွတ်ႈၶဵၼ် ။ ပွတ်းတၢင်းမိူင်းႁူမ်ႈတုမ်မၢၼ်ႈတွၼ်ႈၼိူဝ် ၼႂ်းတိူင်းၸႄႈၵႅင်းလႄႈ ၼႂ်းမိူင်းၶၢင်ၸိူဝ်းၼႆႉၵေႃႈ ၸဵမ်မိူဝ်ႈသိုၵ်းမၢၼ်ႈ ပႆႇယိုတ်းမိူင်း ၸၢဝ်းတႆးလႅင် ၸၢဝ်းၶၢင် ဢမ်ႇသူႈလႆႈယူႇသႃႇလူမ်ၸႂ် ယွၼ်ႉမီးၸုမ်းယိပ်းၵွင်ႈၵၢင်ႇၼင်ႇၵၼ် ၵႆႉတုမ်ႉတိူဝ်ႉၵၼ် ။ ၸုမ်းယိပ်းၵွင်ႈၵၢင်ႇဢမ်ႇသူႈဝႆႉၵၢင်ၸႂ်ၵူၼ်းမိူင်းပဵၼ်ယႂ်ႇ ပေႃးထၢင်ႇထိူမ်သင်ဢိတ်းဢွတ်းၵေႃႈ တီႉၺွပ်းၵုမ်းၶင် ။

ၼႂ်းႁူဝ်လိူၼ်ၼႆႉၵူၺ်း ၽူႈႁၵ်ႉၾိင်ႈငႄႈလိၵ်ႈလၢႆးတႆးလႅင် ၺႃးသိုၵ်းၶၢင်တီႉၺွပ်းၵႂႃႇ ဢမ်ႇယွမ်း 4 ၵေႃႉ လူၺ်ႈဢမ်ႇလၢတ်ႈလွင်ႈတၢင်းသင်တီႈၵူၼ်းဝၢၼ်ႈၵူၼ်းမိူင်း။ ဝၢႆးၼၼ်ႉ ၾၢႆႇသိုၵ်းတႆးလႅင်ၵေႃႈ သမ်ႉၶိုၼ်းတီႉၺွပ်း ၸၢဝ်းၶၢင် ဢမ်ႇယွမ်း 30 ၵေႃႉတီႈမိူင်းၵွင်ၼႆထႅင်ႈ။ ပေႃးသိုၵ်း 2 ၸုမ်းဢမ်ႇထုၵ်ႇမေႃးၵၼ်ၸိုင် ၵူၼ်းမိူင်းၵူၺ်းတေသၢင်ႈ။ ဢၼ်ၵူၼ်းလုမ်ႈၾႃႉမုင်ႈမွင်းယူႇႁူမ်ႈၵၼ်ၵတ်းၵတ်းယဵၼ်ယဵၼ်ဢၼ်ဝႃႈၼၼ်ႉၵေႃႈ တေဢမ်ႇၸၢင်ႈလႆႈသေပွၵ်ႈယဝ်ႉ။

သိုၵ်းၶၢင် KIA ဢမ်ႇလၢတ်ႈသင်တႅၵ်ႇလႅင်းသေ တီႉၺွပ်းၵုမ်းၶင်ဝႆႉ ၵူၼ်းပိုၼ်ႉတီႈ ထုင်ႉၼွင်မႄႈမၢႆႈ ဢိၼ်းတေႃႇၵျီး ၸႄႈတွၼ်ႈမိူင်းယၢင်း ၸႄႈမိူင်းၶၢင် ဢမ်ႇယွမ်း 4 ၵေႃႉ ။ ဢၼ်ၺႃးတီႉၺွပ်းသမ်ႉ ပဵၼ်ၸၢဝ်းတႆးလႅင်လွၼ်ႉလွၼ်ႉလႄႈ ၸၢင်ႈႁဵတ်းႁႂ်ႈ ပၼ်ႁႃၸၢဝ်းၶိူဝ်းယႂ်ႇထႅင်ႈၵူၺ်းၼႆ ၵူၼ်းပိုၼ်ႉတီႈလၢတ်ႈၼင်ႇၼႆ ။

ၶၢဝ်ႇတႄႉ လိုဝ်းၵၼ်ဝႃႈ ၽူႈဢွၼ်ႁူဝ်ၸုမ်းတၢင်းၵႃႈၾိင်ႈထုင်းတႆးလႅင် 2 ၵေႃႉ တေႃႇၺုၼ်ႉယီႇ လႄႈ ဢူးဝိၼ်းၸေႃႇ ဢၼ်ယူႇတီႈဝၢၼ်ႈၼမ်ႉမီလွင်ႇ ထုင်ႉဢိၼ်းတေႃႇၵျီး ၸႄႈတွၼ်ႈမိူင်းယၢင်း ၺႃးသိုၵ်းၶၢင် တီႉၺွပ်းၵႂႃႇ ၸဵမ်မိူဝ်ႈ ဝၼ်းတီႈ 06/07/2026 ၼႆႉ။

ၵူၺ်းၵႃႈ ၵူၼ်းပိုၼ်ႉတီႈဢၼ်ႁူႉၸွမ်းလွင်ႈၼႆႉ လၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်ၺႃးတီႉၺွပ်းၵႂႃႇၼႆႉ ၸိုဝ်ႈ ဢူးဝိၼ်းၸေႃႇ ဢႃယု 40 ပၢႆ ၊ ပႃႈမေႇဢွင်ႇ ဢႃယု 50 ပၢႆ လႄႈ သွင်ၽူဝ်မေး ဢႃယု 30 ပၢႆ သွင်ၵေႃႉ ” ဝႃႈၼႆ ။

သိုပ်ႇလၢတ်ႈဝႃႈ တေႃႇၺုၼ်ႉယီႇ ႁူဝ်ၼႃႈၸုမ်းတၢင်းၵႃႈၾိင်ႈငႄႈတႆးလႅင်ၼၼ်ႉတႄႉ တၼ်းပၢႆႈသွၼ်ႈဝႆႉ တီႈလွတ်ႈၽေးလႄႈ ၵပ်းသိုပ်ႇၸူးမၼ်းပႆႇလႆႈ ၊ ၵူၺ်းႁႂ်ႈယိုၼ်ယၼ်လႆႈႁူဝ်ပၢၵ်ႇတဵမ်တႄႉ ပႆႇမီးၼင်ႇၵဝ်ႇ ဝႃႈၼႆ။

တေႃႇထိုင် မိူဝ်ႈၼႆႉ ဝၼ်းတီႈ 10/07/2026 ၼႆႉ သိုၵ်းၶၢင်ပႆႇပွင်ႇၶၢဝ်ႇသင်ပၼ်ၵူၼ်းမိူင်း ၊ ၵူၼ်းဝၢၼ်ႈမၢင်ၸိူဝ်းၵေႃႈ ငိၼ်းဝွင်းဝႅင်းဝႃႈ တေပွႆႇလွတ်ႈပၼ်ၶိုၼ်း ၵူၼ်း 4ၵေႃႉၼၼ်ႉ မိူဝ်ႈၼႆႉယူႇၼႆသေတႃႉ ပႆႇလၢၵ်ႇလၢႆးသင်။

ၼၢင်းယိင်းၸၢဝ်းတႆးလႅင် ၵေႃဢၼ်ႁူႉၸွမ်းလွင်ႈၼႆႉ လၢတ်ႈၼႄဝႃႈ –

ပေႃးႁိုင်ပဵၼ် 4-5 ဝၼ်းယဝ်ႉ ပႆႇႁူႉဝႃႈ ၺွပ်းၵႂႃႇယွၼ်ႉသင် ၊ ၵူၼ်းလူင်ၼႂ်းဝၢၼ်ႈၼႂ်းသူၼ် ဢွၼ်ၵၼ်ၵႂႃႇၸွမ်းႁႃၵေႃႈ သိုၵ်းၶၢင်ၶဝ် ဢမ်ႇပၼ်ထူပ်းတူဝ်။ ဢူးဝိၼ်းၸေႃႇၼၼ်ႉတႄႉ မီးလွင်ႈလူဝ်ႇထၢမ်ၼႆသေႁွင်ႉၵႂႃႇ ။ ပႃႈမေႇဢွင်ႇၼၼ်ႉၵေႃႈ လုၵ်ႈၸၢႆးမၼ်းသမ်ႉ ၺႃးသိုၵ်းတႆးလႅင် ႁွင်ႉၵႂႃႇႁၢပ်ႇၵၢၼ်သိုၵ်းဝႆႉလႄႈ ၼႄးပႃႈမေႇဢွင်ႇ ပၼ်ၶၢဝ်ႇသိုၵ်းတႆးလႅင်လႄႈ ၸင်ႇႁွင်ႉၵႂႃႇ ၊ တီႉပႃးၼၢင်းယိင်းထႅင်ႈၵေႃႉၼိုင်ႈ ၼၼ်ႉသမ်ႉ ပီႈဢၢႆႈမၼ်း ႁၢပ်ႇၵၢၼ်သိုၵ်းတႆးလႅင်ဝႆႉလႄႈၼႆဢေႃႈ ။ ၽူဝ်မၼ်းၼၢင်းသမ်ႉ မႆႈၸႂ်ႇလႄႈ ၵႂႃႇၸွမ်းၶႆႈ ၼၼ်ႉၵေႃႈ ၺႃးတီႉပႃး ။တင်းမူတ်းၺႃးတီႉၺွပ်း 4 ၵေႃႉ

ၽိူဝ်ႇထိုင်မႃး ဝၼ်းတီ 08/07/2026 ၼႆႉ ၾၢႆႇသိုၵ်းတႆးလႅင် SNA သမ်ႉ တီႉၺွပ်းၵူၼ်းၶိူဝ်းၶၢင် ၼႂ်းဢွင်ႈတီႈၵိူဝ်းယမ်သႃႇသၼႃႇၶရိတ်ႉ ဢၼ်ၵူၼ်းပိုၼ်ႉတီႈႁွင်ႉဝႃႈ ၵျွင်း KBC ၼႂ်းဝၢၼ်ႈသႃးမေႃႇ ၸႄႈဝဵင်းမိူင်းၵွင် ၵႂႃႇ ၵူၼ်းၸၢဝ်းၶၢင် ဢမ်ႇယွမ်း 30 ၵေႃႉ ၼႂ်းၼၼ်ႉ ပႃးမုၼ်ၸဝ်ႈၶရိတ်ႉလႄႈလုၵ်ႈဢွၼ်ႇ ပႃးၼႆ သိုဝ်ႇၶၢဝ်ႇၶၢင် KNG ႁၢႆးငၢၼ်းဝႆႉၼင်ႇၼႆ။

ပိူင်ပဵၼ်ၸိူဝ်းၼႆႉ ၵမ်ႈၼမ်တႄႉထတ်းသၢင်ႁၼ်ဝႃႈ သိုၵ်းၼင်ႇၵၼ် ႁဵတ်းၶိတ်ႈၵၼ် ၊ တီႉၺွပ်းၵူၼ်းမိူင်းသေ ဢဝ်ပေႉပုၼ်ႈၵၼ် ။ ဢၼ်တုၵ်ႉဢၼ်ယၢပ်ႇသမ်ႉ ပဵၼ်ၵူၼ်းမိူင်းတင်းသွင်ၸၢဝ်းၶိူဝ်း ။ တေႃႇထိုင်မိူဝ်ႈလဵဝ် သိုၵ်းတႆးလႅင် SNA လႄႈ သိုၵ်းၶၢင် KIA ပႆႇပိုၼ်ၽၢဝ်ႇသင်လွင်ႈၼႆႉ။

ဢၼ်သိုၵ်းၶၢင် တီႉၺွပ်းၸၢဝ်းတႆးလႅင်ၵႂႃႇၼႆႉ ပဵၼ်ယွၼ်ႉၶဝ်ထၢင်ႇထိူမ်ဝႃႈ ၵူၼ်းဝၢၼ်ႈၸိူဝ်းၼႆႉ တိတ်းတေႃႇ ၵပ်းသိုပ်ႇၵၼ်တၢင်းသိုၵ်းတႆးလႅင် SNA ။ တီႈတေႉမၼ်း လွင်ႈဝႃႈ ၵူၼ်းဝၢၼ်ႈလႄႈသိုၵ်းတႆးလႅင်ၵွင်ႉၵၢႆႇၵၼ်ၼႆၼၼ်ႉ မၢင်ၽဝ်ႇၵေႃႈ ပဵၼ်ပီႈပဵၼ်ၼွင်ႉၵၼ်သေ ဢမ်ႇၸၢင်ႈၵၢင်းယၢၼ်ၵၼ်လႆႈလႄႈ ၵႃႈလႆႈလၢတ်ႈတေႃႇၵၼ်ၵေႃႈတေမီး ။ ယွၼ်ႉဝႃႈ လုၵ်ႈလၢၼ်တႆးလႅင် မၢင်ၸိူဝ်းၵေႃႈ ၺႃးၸုမ်းသိုၵ်းတႆးလႅင်ႁွင်ႉၵႂႃႇႁဵတ်းသိုၵ်းၵေႃႈသမ်ႉမီးလူး ၊ ၶၢင်ၵေႃႈမိူၼ်ၼၼ် သိုၵ်းၶၢင်ၵေႃႈ တေၸၢင်ႈမႃးလၢတ်ႈတေႃႇၵၼ်တင်းၵူၼ်းမိူင်းၶၢင်ယူႇ မၼ်းဢမ်ႇၵၢင်းယၢၼ်ၵၼ်လႆႈလူး ၼႆ ၵူၼ်းၸၢႆး ၽူႈတူင်ႉၼိုင်ၼႂ်းၸုမ်းၾိင်ႈငႄႈတႆးလႅင်ၵေႃႉၼိုင်ႈလၢတ်ႈၼင်ႇၼႆ –

သိုၵ်းၸုမ်းလႂ်ၵေႃႈ ၵိုင်ႇလီ ၸႅၵ်ႇသေ ႁၼ်ယူႇ ဢၼ်လႂ်ပဵၼ်ၵူၼ်းမိူင်းလႄႈၵူၼ်းသိုၵ်း။ သိုၵ်းလႄႈၵူၼ်းမိူင်း လွင်ႈလၢတ်ႈလွင်ႈၸႃတေႃႇၵၼ်တႄႉ ၵႃႈတေလႆႈမီးယူႇ ။ ၸိူင်ႉၼႆၼႆႉ ၸၢဝ်းၶိူဝ်းလႂ်ၵေႃႈ တေမီးယူႇ ။ ဢမ်ႇဝႃႈ တေပဵၼ်ယၢင်း ၊ တေပဵၼ်ရၶႅင်ႇ တေပဵၼ်ၶၢင်ၵေႃႈယဝ်ႉ တင်းသိုၵ်းတင်းၵူၼ်းမိူင်းတႄႉ မၼ်းႁိုဝ်ၵၢင်းယၢၼ်ၵၼ်လႆႈ သိုၵ်းၵေႃႈ ဢမ်ႇလုၵ်ႉတီႈၵူၼ်းမိူင်းသေပဵၼ်ၵႂႃႇၵူၺ်းႁိုဝ် ။ ပေႃးဝႃႈ ႁၼ်ထၢင်ႇထိူမ်ၵေႃႉလႂ်ၵေႃႈ တီႉၺွပ်းၵုမ်းၶင်ၵၼ်ၵူၺ်းတႄႉ ဢမ်ႇႁႃသဵၼ်ႈတၢင်းတႃႇၸၢဝ်းၶိူဝ်းၶဝ်ႈဢွၵ်ႇၵၼ်လႆႈယူႇ ၸၢင်ႈႁဵတ်းႁႂ်ႈ ၸၢဝ်းၶိူဝ်းၼင်ႇၵၼ် တႅၵ်ႇၵၼ်ၵူၺ်း

သိုပ်ႇလၢတ်ႈဝႃႈ ပဵၼ်သိုၵ်းၸၢဝ်းၶိူဝ်းလႂ်ၵေႃႈယဝ်ႉ ဢဝ်သုၼ်ႇတူဝ်ၶႂ်ႈပဵၼ်ယႂ်ႇၵူၺ်းတႄႉ ဢမ်ႇလႆႈလွင်ႈၵတ်းယဵၼ် သေပွၵ်ႈယဝ်ႉ ။ တီႈတေႉမၼ်း ၸၢဝ်းၶိူဝ်းလႂ်ၵေႃႈယဝ်ႉ သုၼ်ႇလႆႈသုၼ်ႇပဵၼ်တိုၼ်းလူဝ်ႇလႆႈမီး ။ ၸၢဝ်းၶိူဝ်းၼင်ႇၵၼ် တေလႆႈၼပ်ႉယမ်သေ ၶဝ်ႈႁႃၵၼ် မၼ်းၸင်ႇတေၵတ်းယဵၼ်လႆႈ ။ ဢၼ်တေႁဵတ်းလႆႈၵေႃႈ ၸုမ်းၸိူဝ်းဢဵၼ်ႁႅင်းယႂ်ႇ ၸိူဝ်းမီးဢႃႇၼႃႇၶဝ် ၵိုင်ႇလီႁႃလၢႆးတၢင်းၵႄႈလိတ်ႈယူႇ ဝႃႈၼႆ ။

မိူဝ်ႈၼႂ်းဝၼ်းတီႈ 7 ၵျူႊလၢႆႊၼၼ်ႉၵေႃႈ လုၵ်ႈၸုမ်းသိုၵ်းၶၢင်သွင်ၵေႃႉ ၵိၼ်လဝ်ႈမဝ်းသေ လၼ်ႇယိုဝ်းၵွင်ႈ ၵႃႈပွင်ႇၵႃႈပဵၼ် ။ ႁဵတ်းႁႂ်ႈမၢၵ်ႇၵွင်ႈ တိူဝ်ႉသႂ်ႇ ပူႇၵၢင်ႉၼႂ်းဝၢၼ်ႈႁူၺ်ႈလူင်(ဝှေလုံ) ဢူးဢၢႆႈၼွင်ႇ လႄႈ တေႃႇၶျူဝ်ႇၶျူဝ်ႇဢူး လူႉတၢႆ ၊ မၢတ်ႇၸဵပ်းၸွမ်းထႅင်ႈ 2 ၵေႃႉ။လုၵ်ႈသိုၵ်းၶၢင် ၵေႃႉပူၼ်ႉပႅၼ်ၼၼ်ႉ ၶိုၼ်းယိုဝ်းတူဝ်ၵဝ်ႇ လူႉတၢႆၶိုၼ်း ၼႆ Kachin Waves ႁၢႆးငၢၼ်းဝႆႉ။

ၼွင်မႄႈမၢႆႈၼႆႉ မီးလုၵ်ႈသိုၵ်းတပ်ႉၸုမ်းမႁႃႇ 9 တပ်ႉသိုၵ်းၶၢင် လႄႈ သိုၵ်းတႆးလႅင် တူင်ႉၼိုင်ဝႆႉ ။ ယူႇယူႇၵေႃႈ မီးပၢင်တိုၵ်း ၵူၼ်းမိူင်းဢမ်ႇတွၼ်ႉလႆႈယူႇသႃႇ မႃး ။ ၸူးၸႂ်တႄႉ ၶႂ်ႈႁႂ်ႈ သိုၵ်းၸိူဝ်းၼႆႉ ပဵၼ်ႁူဝ်ႉၵင်ႈပၼ်ၵူၼ်းမိူင်း ။ၼႆႉသမ်ႉ ၵုမ်ႇႁဵတ်းႁႂ်ႈၵူၼ်းမိူင်းလႆႈတုၵ်ႉလႆႈယၢပ်ႇယူႇၵူၺ်း ၼႆ ၵူၼ်းပိုၼ်ႉတီႈလၢတ်ႈ။

မိူဝ်ႈပူၼ်ႉမႃး လိူၼ်ၵျူၼ်ႊ ပီ 2025 ၼၼ်ႉၵေႃႈ ၸၢႆးၸဵင်ႇလုၺ်ႇဢူး ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆးတႆးလႅင် ထုင်ႉၼွင်မႄႈမၢႆႈ ၺႃးသိုၵ်းၶၢင် တီႉၺွပ်းၵုမ်းၶင်ပွၵ်ႈၼိုင်ႈ ၼႆ သိုဝ်ႇတႆးလႅင် ဢွၵ်ႇဝႆႉၼင်ႇၼႆ ။

ၼႂ်းၸႄႈတွၼ်ႈမိူင်းယၢင်း ထုင်ႉဢိၼ်းတေႃႇၵျီး ႁိုဝ် ၼွင်မႄႈမၢႆႈ ၼႆႉ ၸဵမ်ပိုင်းၵေႃႈ တိုၼ်းပဵၼ်ထုင်ႉတႆးလႅင် ယူႇသဝ်းလႄႈ ၊ ၾိင်ႈတႆးလႅင်ၵေႃႈတိုၼ်းႁိူင်းမႃးၸဵမ်လႂ် ။ သင်ဝႃႈ ၵူၼ်းတူင်ႉၼိုင်ၾိင်ႈတႆးလႅင် ၺႃးတီႉၺွပ်း ၸိူင်ႉၼႆလၢႆၵမ်းတႄႉ ပၼ်ႁႃၸၢဝ်းၶိူဝ်း ၸၢင်ႈယႂ်ႇမႃးလိူဝ်သေၼႆႉ ။

ၽႂ်ပေႉၽႂ်ၵေႃႈ ဢမ်ႇလီ။ ၸၢဝ်းၶိူဝ်းၽႂ် ပိၵ်ႉဢိုတ်းၾိင်ႈငႄႈၽႂ်ၵေႃႈ ဢမ်ႇလီ ။ မၼ်းတုမ်ႉတိူဝ်ႉသုၼ်ႇလႆႈသုၼ်ႇ ပဵၼ်ၵူၼ်းၵူၺ်း- ၵူၼ်းၼႂ်းပိုၼ်ႉတီႈၼွင်မႄႈမၢႆႈ ဢွၼ်ၵၼ်လၢတ်ႈတၢင်းႁၼ်ထိုင်ၼင်ႇၼႆ ။

ၼႂ်းထုင်ႉၼွင်မႄႈမၢႆႈ ၸႄႈတွၼ်ႈမိူင်းယၢင်း ၸႄႈမိူင်းၶၢင် ၼႆႉ ဝၢၼ်ႈဢၼ်တႆးယူႇသဝ်း မီးဢမ်ႇယွမ်း 20 ဝၢၼ်ႈ ။

မိူဝ်ႈလဵဝ် ဝၢၼ်ႈတႆးၸိူဝ်းၼႆႉ ၵူၼ်းၼုမ်ႇဢမ်ႇႁတ်းယူႇၵၼ်ၼမ်ယဝ်ႉလႄႈ တႃႇလုမ်းလႃး သူၼ်ႁႆႈၼႃးၵူၺ်းၵေႃႈ ၵူၼ်းဢမ်ႇၵုမ်ႇ ။ ၵူၼ်းၸၢႆး ဢႃယု 40 -50 ၵေႃႈ ဢမ်ႇဝႆႉ ၵမ်းၵမ်းၺႃးသိုၵ်းၸုမ်းၼၼ်ႉၸုမ်းၼႆႉ ၺွပ်းႁၢပ်ႇၵၢၼ် သိုၵ်းလႄႈ ထုင်ႉဢၼ် ၶဝ်ႈယၢမ်ႈဢွၵ်ႇၼမ်ၵေႃႈ မိူဝ်ႈလဵဝ် ယဵၼ်းပဵၼ်ထုင်ႉဢၼ်မီးတူင်ႈၼႃး ႁၢမ်းၼမ် ၼႆ ၵူၼ်းပိုၼ်ႉတီႈလၢတ်ႈ။
ဝၢၼ်ႈမိူင်းၼိုင်ႈလုၵ်ႈၼႆႉ သင်ဝႃႈၶႂ်ႈႁႂ်ႈၶိုၼ်ႈယႂ်ႇလွတ်ႈလႅဝ်းၸိုင် တၵ်းလႆႈမီးလွင်ႈၵတ်းယဵၼ်ၼႂ်းပိုၼ်ႉတီႈ ၊ ၸုမ်းယႂ်ႇတေလႆႈတူၺ်းလူၸုမ်းလဵၵ်ႉ ၸုမ်းယိပ်းၵွင်ႈၵၢင်ႇတေလႆႈတူၺ်းလူလုမ်းလႃးၵူၼ်းမိူင်း ။ ပေႃးၸိူင်ႉၼၼ် ၸင်ႇတေၸဵဝ်းထိုင်တီႈဢၼ်ၵူႈၵေႃႉၶႂ်ႈလႆႈ – လွင်ႈယူႇႁူမ်ႈၵၼ်ၵတ်းၵတ်းယဵၼ်ယဵၼ် Peace and Harmony ၼႆဢမ်ႇႁၢင်ႉ ။