ယၢမ်းလဵဝ် ၾၢႆႇသိုၵ်းမၢၼ်ႈၵေႃႈ ၶိုင်တႃႇတေၸတ်းပၢင်လိူၵ်ႈတင်ႈယူႇမႅၵ်းမႅၵ်း၊ ၸုမ်းလုၵ်ႉၽိုၼ်ႉၶၢဝ်းႁွင်/ သိုၵ်းၵႅတ်ႇၶႄၵူၼ်းမိူင်း PDF ၸိူဝ်းၼႆႉၵေႃႈ မုင်ႈၸူးတၢင်းယိူင်းဢၢၼ်း ၽႂ်မၼ်း။ ပေႃးတူၺ်းၶိုၼ်းလူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ၼႆၵေႃႈ ယူႇမိူင်းဝၼ်းတူၵ်းသေ ၸတ်းပၢင်ဢုပ်ႇဢူဝ်းတီႈၼိုင်ႈယဝ်ႉတီႈၼိုင်ႈ။ တူၺ်းပိူင်ပဵၼ်ၸိူဝ်းၼႆႉသေ ၵူၼ်းမိူင်း ဢမ်ႇၸၢင်ႈပိုတ်ႇၸႂ် ပိုင်ႈၸုမ်းလႂ်လႆႈတႄႉတႄႉ။ တူၺ်းၸုမ်းလႂ်ၵေႃႈ မိူၼ်ၼမ်ႉၽိုင်ႈတႃႈၶူမ်းလႅဝ်းဝႆႉ။  

မိူဝ်ႈတႄႇသိုၵ်းမၢၼ်ႈ ယိုတ်းဢႃႇၼႃႇတႄႉ ၵမ်ႈၼမ် ႁၼ်ဝႃႈ NUG ၼႆႉ ၸၢင်ႈပုတ်ႈတိၼ်တၢင်မိုဝ်းလႆႈ တေၸၢင်ႈပဵၼ်လႆႈလူင်ပွင်ၸိုင်ႈ ဢၼ်ၵူၼ်းမိူင်းယွမ်းႁပ်ႉဝႃႈၼႆသေတႃႉ ထိုင်မိူဝ်ႈလဵဝ် ပႆႇၼႄၼမ်ႉႁၼ်တူဝ်။ ၶၢဝ်းတၢင်း 4 ပီပၢႆ 5 ပီၵေႃႈၸမ်ယဝ်ႉလႄႈ NUG တေၶိုင်ပွင်ၵႂႃႇထႅင်ႈၸိူင်ႉႁိုဝ်ၼႆၼၼ်ႉ ပဵၼ်တီႈဢၼ်ၵူၼ်းမိူင်းသူၼ်ၸႂ်ဝႃႈၼႆသေတႃႉ မၢင်ၸိူဝ်းၵေႃႈတိုၼ်းဝႃႈ ၶၢတ်ႇတၢင်းမုင်ႈမွင်းၼိူဝ် NUG ယဝ်ႉ ၼႆၵေႃႈဝႃႈ။

ၵူၼ်းမိူင်း ၼႂ်းပတ်းပိုၼ်ႉမိူင်းႁူမ်ႈတုမ်မၢၼ်ႈၼႆႉ ဢမ်ႇၸႂ်ႈၶိူဝ်းလဵဝ်ၵၼ်သဵင်ႈ မၢင်ၸိူဝ်း ၽႃသႃၵႂၢမ်းလၢတ်ႈ ဢမ်ႇမိူၼ်ၵၼ် မၢင်ၸိူဝ်းၾိင်ႈၵိူဝ်းယမ် ဢမ်ႇမိူၼ်ၵၼ်။ ဢၼ်မီးၸၢဝ်းၶိူဝ်းလၢၵ်ႇလၢႆၼႆႉ မၼ်းဢမ်ႇၽိတ်းၽႂ်သေတႃႉ ဢၼ်ၽိတ်းလႄႈ ဢမ်ႇၶဝ်ႈၵၼ်သေပွၵ်ႈသမ်ႉ ပဵၼ်ၵၢၼ်ၸႅၵ်ႇဢႃႇၼႃႇႁႅင်းပွင်ဝၢၼ်ႈမိူင်း။

ဢိင်ၼိူဝ် လွင်ႈၸႅၵ်ႇဢႃႇၼႃႇၸိုင်ႈမိူင်း ဢမ်ႇတႅၵ်ႇလႅင်းၼၼ်ႉသေ ဝၢၼ်ႈမိူင်းသုၵ်ႉမႃး ၸဵမ်မိူဝ်ႈၸၢဝ်းၶိူဝ်းသၼ်လွႆ တႄႇႁူမ်ႈၵၼ်တင်းၸၢဝ်းမၢၼ်ႈထုင်ႉပဵင်းသေ ဢဝ်လွတ်ႈလႅဝ်းသဝ်းၶေႃႈမႃး ၼပ်ႉႁူဝ်သိပ်းပီ။

ဢိင်ၼိူဝ် ၽူႈၼမ်းၼႂ်းၵၢၼ်မိူင်း ဢမ်ႇသိုဝ်ႈယူဝ်းတေႃႇၵၼ်ၼၼ်ႉသေ ၵူၼ်းမိူင်းၵူႈၸၢဝ်းၶိူဝ်းၵေႃႈ မီးၸႂ်တႅၵ်ႇၸတ်ႉၼိူဝ်ၵၼ်မႃး။ ၽူႈၼမ်းၸၢဝ်းမၢၼ်ႈလၢႆသိုပ်ႇလၢႆပၢၼ်ၵေႃႈ တင်ႈၸႂ်ႁဵတ်းႁႂ်ႈၵူႈၸၢဝ်းၶိူဝ်း မေႃၸႅၵ်ႇၽႄၵၼ်မႃး။

သမ်ႉၶိုၼ်းဢဝ်ၶေႃႈဢၢင်ႈဝႃႈ တေႁဵတ်းႁႂ်ႈဝၢၼ်ႈမိူင်းပဵၼ်မိူင်းႁူမ်ႈတုမ် ၾႅတ်ႊတရႄႊတီႊမူဝ်ႊၶရေႊၸီႊၼႆသေ ႁွင်ႉႁူၺ်းၵူၼ်းမိူင်းလႄႈ ၸုမ်းယိပ်းၵွင်ႈၵၢင်ႇလၢႆၸုမ်းႁူမ်ႈမိုဝ်းၶဝ် ထႅင်ႈလူးၵွၼ်ႇ။ ၵူၺ်းၵႃႈ လၢႆးလၢတ်ႈလႄႈ လၢႆးႁဵတ်းဢမ်ႇမႅၼ်ႈႁွႆးလဵဝ်ၵၼ် ဢမ်ႇထိုင်ယွတ်ႈႁွတ်ႈတီႈပၢႆမႃးသေပွၵ်ႈၼႆ ၺႃးၽူႈထတ်းသၢင်ၵၢၼ်မိူင်းၶဝ်လၢတ်ႈမႃးယူႇတႃႇသေႇ။

မိူဝ်ႈႁူဝ်ပီ 2021 ၼႆႉၵေႃႈ သိုၵ်းမၢၼ်ႈ ၼႄၶေႃႈဢၢင်ႈဝႃႈ ၽွၼ်းပၢင်ႈပၢင်လိူၵ်ႈတင်ႈ 2020 ဢၼ် ပႃႇတီႇၼူၵ်ႉယုင်းပေႉပုၼ်ႈဝႆႉၼၼ်ႉ ဢမ်ႇသိုဝ်ႈယူဝ်းၼႆသေ ယိုတ်းဢႃႇၼႃႇၸိုင်ႈမိူင်း ၵုမ်းပႃးၽူႈမီးၵၢၼ်မိူင်းဢၼ်ၵဵဝ်ႇၸွမ်း ပႃႇတီႇၼူၵ်းယုင်းတင်းၼမ်တင်းလၢႆ။

ပီ 2021ၼၼ်ႉ ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ယိုတ်းမိူင်းမွၵ်ႈ 10 ဝၼ်းပၢႆၼႆႉၵူၺ်းၵေႃႈ ယူႇတီႈ ၸုမ်းယိပ်းၵွင်ႈၵၢင်ႇၵမ်ႈၽွင်ႈလႄႈ ၽူႈတၢင်တူဝ်ၸုမ်းလုၵ်ႉၽိုၼ်ႉ ပႃးတၢင်းတူဝ်တႅၼ်း ၶႃႈႁၢပ်ႇၵၢၼ်ၶုၼ် ဢၼ်သၢၼ်ၶတ်းသိုၵ်းမၢၼ်ႈ CDM လႄႈ ပႃးၸဵမ်ၸုမ်းဢၼ်ႁၼ်လီပႃႇတီႇၼူၵ်ႉယုင်း ၵမ်ႈၼမ် ဢွၼ်ၵၼ် ၽွတ်ႈၵေႃပွင်ၵၢၼ်တႅၼ်းတၢင်သၽႃးမိူင်းႁူမ်ႈတုမ် CRPH မႃး။

CRPH ၼႆႉ တၢင်းယိူင်းဢၢၼ်းသုင်သုတ်းၶဝ် တေမီးယူႇ 2 ၶေႃႈ –

1) ပိူဝ်ႈတႃႇ ဢႃႇၼႃႇၵူၼ်းမိူင်း ပေႃးတေၽႅဝ်ထိုင်ၶိုၼ်းၼႂ်းမိုဝ်းၵူၼ်းမိူင်း။

2) ပိူဝ်ႈတႃႇ ၵေႃႇသၢင်ႈမိူင်းႁူမ်ႈတုမ် ဢၼ်မႅင်ႇပိုၼ်ႉတီႈလွၵ်းပိူင်တီႊမူဝ်ႊၶရေႊၸီႊလႄႈ ၾႅတ်ႊတရႄႊ ၶဝ်ဝႃႈဝႆႉၸိူင်ႉၼၼ်ဝႆႉ။

ဝၢႆးၼၼ်ႉ ၸင်ႇၶွတ်ႇၽွတ်ႈ လူင်ပွင်ၸိုင်ႈၸၢဝ်းၶိူဝ်းၽွမ်ႉႁူမ်ႈ NUG (ဢၼ်ၵမ်ႈၼမ်ႁပ်ႉႁူႉဝႆႉဝႃႈ ပဵၼ်လူင်ပွင်ၸိုင်ႈ ၸူဝ်ႈၵၢင်မိူင်းႁူမ်ႈတုမ်)။ NUG ဢၼ်ဝႃႈၼႆႉၵေႃႈ သမ်ႉလႆႈႁဵတ်းၸွမ်း ၶေႃႈလႆႈၸႂ် NUCC ဢၼ်ႁွင်ႉဝႃႈ (အမျိုးသားညီညွတ်ရေးအတိုင်ပင်ခံကောင်စီ) ၶွင်ႇသီႇၵိူဝ်းၵုမ်လွင်ႈၽွမ်ႉႁူမ်ႈ ၸိူဝ်ႉၸၢတ်ႈၼၼ်ႉ။

NUG ၼႆႉ မိူဝ်ႈတႄႇတင်ႈမႃးၵေႃႈ ပဵၼ်လေႃႇပီႇၶွင် NLD ၼႂ်းမိူင်းၼွၵ်ႈမိူင်းသေ ၸင်ႇပဵၼ်မႃးၵူၺ်း လႄႈ ၾၢႆႇၸုမ်းၸၢဝ်းၶိူဝ်းၸိူဝ်းလုၵ်ႉၽိုၼ်ႉသိုၵ်းမၢၼ်ႈမႃးလၢႆသိုပ်ႇလၢႆပၢၼ် ၼၼ်ႉ ဢမ်ႇႁၼ်ဢွၵ်ႇလိၵ်ႈ ယိုၼ်ယၼ်ၵမ်းသိုဝ်ႈဝႃႈ တေႁူမ်ႈမိုဝ်းၸွမ်း။

တေဝႃႈ တူင်ႉၼိုင်ႁဵတ်းၸွမ်းၶၵ်ႉၵၢၼ်မိူင်း ဢၼ်ၵွင်ႉၵၢႆႇၸွမ်းမိူင်းႁူမ်ႈတုမ်တႄႉတႄႉယဝ်ႉၼႆၵေႃႈ တူဝ်တႅၼ်း NUG သမ်ႉ ယူႇၼွၵ်ႈမိူင်းၵမ်ႈၼမ်၊ ဢုပ်ႇဢူဝ်းၵၼ်၊ တူၵ်းလူင်းၵၼ် ၼိူဝ်ဢွၼ်ႊလၢႆႊၵူၺ်း။ ဢၼ်ယိုၼ်းထိုင်ၼႂ်းမိူင်းႁႅင်းဢေႇၼႃႇၼႆ ၵူၼ်းမိူင်းတႆးၵေႃႉၼိုင်ႈတႄႉ လၢတ်ႈတၢင်းႁၼ်ထိုင် ဝႆႉၼင်ႇၼႆ –

“ယူႇတီႈၸဵင်ႇၵူၼ်းမိူင်းယူဝ်းယူဝ်းသေတူၺ်းၼႆႉ ဢမ်ႇမီးလွင်ႈၶိုပ်ႈၼႃႈသင်ၼႃ။ လႆႈၵႂႃႇတင်ႈလုမ်း တီႈၼၼ်ႈတီႈၼႆႈဝႃႇ လႆႈၵႂႃႇႁူပ်ႉၵူၼ်းတီႈၼၼ်ႈတီႈၼႆႈဝႃႇၼႆ ပဵၼ်ၽိဝ်မၼ်း ၵူၺ်းၼႃႇ။ ၼႃႈတိူဝ်ႈမၼ်းၵူၺ်းၼႃႇ။ တႃႇတေတူင်ႉၼိုင်ၵမ်ႉထႅမ်တၢင်းၵၢၼ်မိူင်းၸိူဝ်းၼႆႉၵေႃႈ ဢမေႊရိၵၼ်ႊၶဝ် ဢွၼ်ႁဵတ်းၵူၺ်း။ ဢမ်ႇၸႂ်ႈ NUG ဢွၼ်ႁဵတ်း။ တေႃႈၼင်ႇ ပဵၼ်ၼွၵ်ႈမိူင်းၼႃ။ ပေႃးပဵၼ်ၼႂ်းမိူင်းၶႅၼ်းၼႃႇယဝ်ႉ ဢမ်ႇၸၢင်ႈႁဵတ်းသင်ယဝ်ႉ ၶဝ်တမ်ႉဢမ်ႇၸၢင်ႈမႃးၸိမ်ဢီႈသင်ၶႃႈလူင်”။   

ဝၢႆးသေ NUG ၶွတ်ႇၽွတ်ႈဢွၵ်ႇလႆႈၸုမ်းၵႅတ်ႇၶႄၵူၼ်းမိူင်း PDF သေ ပွင်ၵၢၼ်လုၵ်ႉၽိုၼ်ႉၶၢဝ်းႁွင် “နွေဦးတော်လှန်ရေး” ၼၼ်ႉမႃးထႅင်ႈၵေႃႈ ႁူႉဝႃႈလေႃႇတိုၵ်းသိုၵ်းမၢၼ်ႈ ဢဝ်ပေႉပုၼ်ႈသိုၵ်းမွၵ်ႈ ၼၼ်ႉၵူၺ်း ဢမ်ႇၽေႃႇၼမ်ႉၼႄတူဝ်ဝႃႈ ဝႆႉၼမ်ႉၼၵ်းတေႃႇၸၢဝ်းၶိူဝ်းမႃးၵႃႈႁိုဝ်။ ၸုမ်းၸိူဝ်းတူင်ႉ ၼိုင်တႃႇၸၢဝ်းၶိူဝ်းၵေႃႈ ဢမ်ႇၶဝ်ႈၸူးၶဝ်တႄႉတႄႉဝႃႈဝႃႈ။

တေႃႈၼင်ႇ ၼႂ်းၸုမ်း PDF ၶဝ်ၼင်ႇၵၼ် မီးပၼ်ႁႃၵၼ်မႃး၊ ၵူၼ်းဢၼ်ယူႇတႂ်ႈ NUG ၵေႃႈ ပၢႆးဝူၼ်ႉပိူင်ႈၵၼ်မႃးလႄႈ ပဵၼ်တီႈဝႃႈပဵၼ်တီႈၸီႉၸမ်ႈၵူၼ်းတင်းၼမ်ဝႆႉယူႇ။

ဢိင်ၼိူဝ်လွင်ႈၼႆႉ ၵူၼ်းၼုမ်ႇတူၼ်ႈတီး ဢၼ်ၶဝ်ႈႁဵတ်း PDF ဝႆႉၵေႃႉၼိုင်ႈ ၾၢၵ်ႇၵႂၢမ်းၸူးထိုင် NUG ဝႆႉတီႈၽူႈတွႆႇႁွၵ်ႈဝႃႈ  –  

“ၶႂ်ႈလၢတ်ႈထိုင် NUG တႄႉၵေႃႈ ၶၢဝ်းတၢင်းၸမ်တဵမ် 5 ပီယဝ်ႉလႄႈ မီးလွင်ႈၶိုပ်ႈၼႃႈယူႇသေတႃႉ မၢင်တွၼ်ႈ တိုၵ်ႉမီးတီႈယူပ်ႈယွမ်းယူႇ။ မိူၼ်ၼင်ႇ ၾၢႆႇၽွင်းငမ်းလႄႈသင် လွင်ႈပၵ်းပိူင်လႄႈသင် ၸိူဝ်းၼႆႉ။ ၸုမ်း PDF ၼႆႉ လီလႆႈပဵၼ်ၸုမ်းဢၼ် ၵႅတ်ႇၶႄၵူၼ်းမိူင်းၵူၺ်း။ ၵူၺ်းၵႃႈ မၢင်တီႈမီးလွင်ႈပူၼ်ႉပႅၼ်ဝႆႉ။ ၼႂ်းတပ်ႉၸုမ်း PDF ၼင်ႇၵၼ် မီးပၼ်ႁႃ ၵၼ်ၶိုၼ်းၵေႃႈမီးလႄႈ ဢမ်ႇၸႂ်ႈငဝ်းလၢႆးလီတႃႇ မိူဝ်းၼႃႈ၊ ၶႂ်ႈႁႂ်ႈ NUG ငူပ်ႉငီႉၵုမ်းၵႂႃႇ”- ဝႃႈၼႆ။

ၶုၼ်ၽွင်းလူင် ၾၢႆႇၵႅတ်ႇၶႄ ၶွင် NUG ပိုၼ်ၽၢဝ်ႇဝႆႉဝႃႈ တႂ်ႈၵုမ်းၵမ်မၼ်း မီးဝႆႉတပ်ႉၵွင် PDF 258 တပ်ႉ၊ ၼႂ်းၸႄႈဝဵင်း 250 ၼႆႉ တပ်ႉၵႅတ်ႇၶႄၵူၼ်းမိူင်း ဢၼ်ၶဝ်ဝႃႈ ပၵၽ (ပကဖ) ၼၼ်ႉ မီးဝႆႉတပ်ႉ ၵွင် 400 ပၢႆ။ ဝႃႈၼၼ်သေတႃႉ လွင်ႈၵမ်ႉၸွႆႈ NUG ဢမ်ႇထိုင်တီႈ၊ မၢင်တပ်ႉၵွင် ထူပ်းပၼ်ႁႃၶွင်ၵိၼ် ယမ်ႉဢမ်ႇၵုမ်ႇ၊ ၵွင်ႈၵၢင်ႇဢမ်ႇၸေးမိုဝ်းၼႆ ၵႆႉမီးၶၢဝ်ႇႁူဝ်ႈဢွၵ်ႇမႃး။

ၼႂ်းၶၢဝ်းတၢင်း ဢၼ်ၽွတ်ႈပဵၼ်ၸုမ်း NUG မႃးၼႆႉ ဢူးၵျေႃႇၼီႇ ၵႅမ်ၽွင်းလူင် NUG (ဒုဝန်ကြီး) လၢတ်ႈတီႈ BBC ဝႆႉဝႃႈ -“NUG ၼႆႉ ပဵၼ်မႃးလူၺ်ႈၵၢင်ၸႂ်ၵူၼ်းမိူင်း ယွၼ်ႉ ၼၼ် ၶႂ်ႈႁႂ်ႈၵူၼ်းမိူင်းယုမ်ႇယမ်၊ ၵူၼ်းၵမ်ႈၼမ်ၼႆႉ တေသူင်တူၺ်းၶၢဝ်ႇဢမ်ႇလီၵမ်ႈၼမ်လႄႈ ၶၢဝ်ႇ NUG ၵေႃႈ ၵမ်ႈၼမ် တေလိူၵ်ႈတူၺ်းၶၢဝ်ႇႁၢႆႉၶၢဝ်ႇၽၢင်း လွင်ႈဢၼ် NUG ဢမ်ႇလီ။ တီႈတႄႉမၼ်း NUG ႁဵတ်းၵၢၼ်မႃးဢၼ် လီၵေႃႈမီးတင်းၼမ်၊ ၵူၼ်းၵတ်ႉၵူၼ်းၶႅၼ်ႇၵေႃႈမီးတင်းၼမ်။ ႁႂ်ႈၵူၼ်းမိူင်းယုမ်ႇယမ်သေႁူမ်ႈၸွမ်း။ ဢၼ်လႂ်လီၵေႃႈသိုပ်ႇၵုမ်းသေႁဵတ်းၵႂႃႇ၊ ဢၼ်လႂ်ဢမ်ႇလီၵေႃႈ ႁႂ်ႈမူၼ်ႉမႄးၵၼ်ၵႂႃႇ”- ဝႃႈၼႆ။

တႃႇမိူင်းႁူမ်ႈတုမ် တေလွတ်ႈဢွၵ်ႇတႂ်ႈသွၵ်းတိၼ်သိုၵ်းမၢၼ်ႈၼႆႉ ၵူၼ်းမိူင်းလူဝ်ႇၽွမ်ႉႁူမ်ႈၵၼ်ၵူၺ်း ဢမ်ႇၵႃးၸုမ်းယိပ်းၵွင်ႈၵၢင်ႇၵူႈၸၢဝ်းၶိူဝ်း EROs ၸိူဝ်းၼၼ်ႉၵေႃႈ တၵ်းတေလႆႈၽွမ်ႉႁူမ်ႈၵၼ်သေ ပႆသဵၼ်ႈတၢင်းလဵဝ်ၵၼ် ၸင်ႇတေဢွင်ႇမၢၼ်ၼႂ်းၵၢၼ်မိူင်းၵၢၼ်သိုၵ်းလႆႈ။ ၵူၺ်းၵႃႈ တႃႇတေဢွၼ်ၵၼ်ၽွမ်ႉၸွမ်း NUG သမ်ႉ တူၺ်းၸုမ်းလႂ်ၵေႃႈ ယၢပ်ႇယဵၼ်းဝႆႉၼႆ ၽူႈတႅမ်ႈလိၵ်ႈ ႁိုၼ်း ၵႃယၢင်း ထတ်းသၢင်ၵၢၼ်မိူင်းဝႆႉၼင်ႇၼႆ-

“ႁူႉယူႇဝႃႈ လၢႆးၵၢၼ်NUG ၼႂ်းမိူဝ်ႈလဵဝ်ၼႆႉ ဢမ်ႇပဵၼ်ၵၢၼ်၊ ႁူႉယူႇဝႃႈ လူဝ်ႇလႆႈပိၼ်ႇပႅင်လႅၵ်ႈလၢႆႈ ယူင်ႉၶွတ်ႇၽွတ်ႈၸုမ်းလူင်ပွင်ၸိုင်ႈ ႁႂ်ႈလႆႈပႃးၸၢဝ်းၶိူဝ်း တင်းလၢႆယဝ်ႉ၊ လၢႆးႁဵတ်းသမ်ႉ မိူၼ်ၵူၼ်း ႁုပ်ႈၸၼ်ၵၢၼ်ႇထရႅၵ်ႉ ၵၢၼ်လုၵ်ႉၽိုၼ်ႉယူႇၵူၺ်းတႄႉ တႃႇတေပဵၼ်မႃးလူင်ပွင်ၸိုင်ႈမိူင်းႁူမ်ႈတုမ် ဝႆႉသေၵွၼ်ႇ၊ တေႃႈၼင်ႇ လူင်ပွင်ၸိုင်ႈမိူင်းမၢၼ်ႈပွတ်းထုင်ႉပဵင်းၵူၺ်းၵေႃႈ တေတင်ႈပဵၼ်လႆႈယၢပ်ႇယဝ်ႉ”။

ပေႃးတူၺ်းပိူင်ဢၼ် NUG ၶွတ်ႈၽွတ်ႈဝႆႉ မၢင်ဢၼ်ၵေႃႈ ပေႃးႁဵတ်းၸွမ်းလႆႈ လီတႃႇၵူၼ်းမိူင်းတႄႉတႄႉ။ မိူၼ်ၼင်ႇ ၸုမ်းပ 3 တူဝ် ဢၼ်ပဵၼ်ၾၢႆႇၵႅတ်ႇၶႄၵူၼ်းမိူင်း (ပြည်သူ့ကာကွယ်ရေးအဖွဲ့ – ပကဖ)၊ ၾၢႆႇၽွင်းငမ်းၵူၼ်းမိူင်း (ပြည်သူ့အုပ်ချုပ်‌ရေးအဖွဲ့ – ပအဖ) လႄႈ ၾၢႆႇႁူမ်ႇလူမ်ႈၵူၼ်းမိူင်း (ပြည်သူ့လုံခြုံရေးအဖွဲ့ – ပလဖ) ၸဵမ်ၸိူဝ်းၼႆႉ။

ၵူၺ်းၵႃႈ ပေႃးတူၺ်း မိူင်းမၢၼ်ႈတွၼ်ႈၼိူဝ် ပွတ်းတၢင်းတိူင်းၸႄႈၵႅင်း ဢၼ်မီးဢွင်ႈတီႈ PDF ၵုမ်းဝႆႉ ၸိူဝ်းၼၼ်ႉ မၢင်တီႈၵေႃႈ ၺႃးၸုမ်းဢၼ်ၶဝ် ၶွတ်ႇၽွတ်ႈဝႆႉ ပ 3 တူဝ် ၸိူဝ်းၼၼ်ႉ ပေႉၵိၼ်ၵူၼ်းမိူင်း ၶိုၼ်းၵေႃႈမီးၼႆ ၵူၼ်းပိုၼ်ႉတီႈၵေႃႈ လၢတ်ႈတီႈသိုဝ်ႇၶၢဝ်ႇယႂ်ႇလၢႆလၢႆဢၼ်ယူႇ။

တေႃႈၼင်ႇ ပဵၼ်ပွတ်းတွၼ်ႈ ဢၼ် NUG ၵုမ်းၵမ်ဝႃႈၼႆသေတႃႉ ယင်းဢမ်ႇၸတ်းၵၢၼ် လႆႈလီလီလႄႈ ပေႃးပဵၼ်မိူင်းဢၼ်ၸၢဝ်းၶိူဝ်းယူႇၼမ် ၸုမ်းယိပ်းၵွင်ႈၼမ်မိူၼ်မိူင်းတႆး တေယူႇႁူမ်ႈၵၼ်ၵႂႃႇ လႆႈၸိူင်ႉႁိုဝ်ၼႆ ပဵၼ်ဢၼ်ၼၵ်းၸႂ်ဝႆႉၼႆ ၵူၼ်းၼုမ်ႇတူင်ႉၼိုင်ၵၢၼ်မိူင်းၼႂ်းမိူင်းတႆးၵေႃႉၼိုင်ႈလၢတ်ႈ။