ၸုမ်းသိုၵ်းၼႂ်းမိူင်းတႆး ၼင်ႇၵၼ်ယိုဝ်းၵၼ်လႄႈ ၵူၼ်းမိူင်းငေႃႉ ၸႄႈဝဵင်းၵျွၵ်ႉမႄး ႁူဝ်ၵူၼ်း ႁိမ်းႁဵင် ၸိူဝ်းၺႃးၽေးသိုၵ်းသိူဝ် ၼၼ်ႉ ပႆႇၸၢင်ႈပွၵ်ႈႁိူၼ်းယေး၊ တိုၵ်ႉႁူပ်ႉတၢင်းယၢပ်ႇယူႇ လၢႆၸိူဝ်ႉလၢႆပိူင်။
တႄႇဢဝ် ႁူဝ်လိူၼ်ၵျႃႊလၢႆႊၼႆႉမႃး တေႃႇထိုင်ဝၼ်းတီႈ 13/7/2021 ၼႆႉ သိုၵ်းသွင်ၸုမ်းပိုတ်းယိုဝ်းၶဵင်ႈၶႅင်ၵၼ်ထႅင်ႈလႄႈ ၵူၼ်းဝၢၼ်ႈ 900 ပၢႆ ၊ ၼႂ်းဢိူင်ႇတေႃႉသၢင်ႇ ပၢႆႈၽေးသိုၵ်း မႃးယူႇဝႆႉ ၼႂ်းဝဵင်းမိူင်းငေႃႉ ၸႄႈဝဵင်းၵျွၵ်ႉမႄးထႅင်ႈ၊ တင်းၵူၼ်းပၢႆႈၽေး ၵဝ်ႇလႄႈမႂ်ႇႁူမ်ႈၵၼ်ႁိမ်းႁဵင် ပႆႇၸၢင်ႈပွၵ်ႈႁိူၼ်း၊ ယၢပ်ႇၽိုတ်ႇ လွင်ႈယူႇလွင်ႈၵိၼ်လၢႆလွင်ႈ။
ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈၽႅဝ်မႃးတီႈမိူင်းငေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ်ၼႆႉ ပၢင်တိုၵ်း တႄႉ ယဵၼ်လူင်းယဝ်ႉသေတႃႉ ၸွမ်းၼႂ်းမူႇဝၢၼ်ႈၸိူဝ်းၼၼ်ႉ တိုၵ်ႉမီးသိုၵ်းယူႇဝႆႉယူႇၶႃႈ။ ၸိူဝ်းပၢႆႈဢွၵ်ႇဝၢၼ်ႈၵွင်းလွင်းဝွင်းမႃးၵမ်ႈၽွင်ႈ မီးၶၢဝ်းတၢင်း 5 လိူၼ်ပၢႆယဝ်ႉၶႃႈ ပႆႇလႆႈပွၵ်ႈႁိူၼ်း၊ ယူႇတီႈၼႆႈၵေႃႈ ၵႂႃႇမႃး ႁႃၵိၼ်ယၢပ်ႇၼႃႇၶႃႈ”- ဝႃႈၼႆ။
ဢၼ်ၵူၼ်းပၢႆႈၽေးသိုၵ်း ၸိူဝ်းမႃးမီးတီႈမိူင်းငေႃႉ ပႆႇႁတ်းပွၵ်ႈဝၢၼ်ႈၼႆႉ ပႃးလွင်ႈ ၵူဝ်လႆႈသူင်ႇလုၵ်ႈလၢင်း၊ ၸဝ်ႈၽူဝ် ၵႂႃႇႁဵတ်းသိုၵ်း ။
“ယူႇၵေႃႈယၢပ်ႇ၊ ပွၵ်ႈမိူဝ်းဝၢၼ်ႈၶိုၼ်းၵေႃႈယၢပ်ႇ၊ ၵူဝ်လႆႈၵႂႃႇႁဵတ်းသိုၵ်းၼၼ်ႉၶႃႈၼႃႇ။ ပေႃးလုၵ်ႈဢမ်ႇၵႂႃႇ ပေႃႈတေလႆႈၵႂႃႇတႅၼ်းဢေႃႈ၊ ၽႂ်ၵေႃႈ ဢမ်ႇႁတ်းပွတ်ႈဝၢၼ်ႈၶႃႈ ”- ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈထိုင် ဝႆႉတီႈဝၢၼ်ႈပိုၼ်ႉ ၵေႃႉၼိုင်ႈ လၢတ်ႈတီႈၽူႈ တွႆႇႁွၵ်ႈၼင်ႇၼႆ။
ယၢမ်းလဵဝ်တီႈဝဵင်းၵျွၵ်ႉမႄး သမ်ႉမီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ ႁၢဝ်ႈႁႅင်း ၊ ဢၼ်လူႉတၢႆယွၼ်ႉတၢင်းပဵၼ်ၵေႃႈမီးလႄႈ ၵူၼ်းပၢႆႈၽေးသိုၵ်း လႆႈႁူပ်ႉလွင်ႈၶဵင်ႇတႃႉလၢႆလၢႆဢၼ် ပဵၼ်ဢၼ်ယၢပ်ႇၽိုတ်ႇလိူဝ်ႁႅင်း။
ၼႂ်းၸႄႈဝဵင်း ၵျွၵ်ႉမႄး၊ တၢင်းၵိင်ႇၸႄႈဝဵင်းမိူင်းငေႃႉ ပွတ်းဢိူင်ႇတေႃႉသၢင်ႇ ၼႆႉ သိုၵ်းမၢၼ်ႈ တင်း သိုၵ်းလွႆ၊ သိုၵ်းလွႆ TNLA, SSPP တင်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်း ၸဵမ်မိူဝ်ႈလိူၼ်မၢတ်ႉၶျ်မႃးတေႃႇထိုင်ယၢမ်းလဵဝ်။ ၵူၼ်းဝၢၼ်ႈပွတ်းတွၼ်ႈၼၼ်ႉ လႆႈဢွၼ်ၵၼ်ပၢႆႈယၢၼ်ႁိူၼ်းယေးတီႈယူႇ ၊ တုၵ်ႉယၢၵ်ႈမႃး မီးၶၢဝ်းတၢင်း 5 လိူၼ်ပၢႆယဝ်ႉ ဝႃႈၼႆ။
