Friday, March 29, 2024

ၶၢဝ်းမိူင်းသုၵ်ႉ ၸုမ်းယိပ်းၵွင်ႈၵၢင်ႇႁိပ်ႈၵဵပ်းၵူၼ်းသိုၵ်း ၵူၼ်းမိူင်းပွတ်းႁွင်ႇၵိၼ်းၸႂ်တႃႇယူႇၵိၼ်

Must read

ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း လၢႆမူႇၸုမ်း သၢင်ႉသိုၵ်းမႂ်ႇ ထိုင်ၼႂ်းႁိူၼ်းယေးၼႂ်းၸိုင်ႈတႆးပွတ်းႁွင်ႇ၊ ဢၼ်လႆႈပၢႆႈတင်းမုင်ႉႁေႃႁိူၼ်းၵေႃႈမီး    ဝႃႈၼႆ။  

Photo Credit to Mongyaw Youth- ႁၢင်ႈမိူင်းယေႃ

တႄႇဢဝ် ႁူဝ်ပီ 2021 ၼႆႉမႃး ၵူၼ်းမိူင်း ထုင်ႉပွတ်းမိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ထုၵ်ႇၸုမ်းယိပ်းၵွင်ႈ ၵၢင်ႇၸၢဝ်းၶိူဝ်း ၼႂ်းမိူင်းတႆး ဢၼ်တူင်ႉၼိုင် ဝႆႉတၢင်း ပွတ်းတွၼ်ႈၼၼ်ႉ သၢင်ႉသိုၵ်းမႂ်ႇ ၶဝ်ႈတီႉၺွပ်း ၵူၼ်းမိူင်း ထိုင်ၼႂ်းႁိူၼ်း။    ၵူၼ်းမိူင်း ပဵၼ်ၼမ်ႉႁူ ၼမ်ႉတႃ ဢမ်ႇၶႂ်ႈႁဵတ်းသိုၵ်း ၸူဝ်းၵၼ်ပၢႆႈ တင်းမုင်ႉႁေႃႁိူၼ်းၵေႃႈ မီးတင်းၼမ်  ၵူၼ်းပွတ်းလႃႈသဵဝ်ႈလၢတ်ႈ။

- Subscription -

ၵူၼ်းတၢင်းထုင်ႉမိူင်းယေႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူႈပွၵ်ႈ ပူၼ်ႉမႃးၼၼ်ႉ ၶဝ်တေယွၼ်းၵူၼ်း   ႁႂ်ႈသူင်ႇပၼ် ၼႆၵူၺ်း။ တႄႇဢဝ်ႁူဝ်ပီၼႆႉမႃး ဢမ်ႇၸႂ်ႈၸိူင်ႉၼၼ်ယဝ်ႉ ၶဝ်ၶဝ်ႈ ၺွပ်းထိုင် ၼႂ်းႁိူၼ်းယေး ၵမ်းလဵဝ်ၶႃႈယဝ်ႉ။ ၽွင်းၶဝ် မႃးတီႉၼၼ်ႉ ၶဝ်ဢမ်ႇမႃးၵၢင်ဝၼ်း ၶဝ်မႃးယၢမ်းၵၢင်ၶမ်ႈ ၵၢင်ၶိုၼ်းလိုၵ်း မိူဝ်ႈ ၽွင်း ပိူၼ်ႈၼွၼ်းယဵၼ်ၵၼ်ၼၼ်ႉၶႃႈဢေႃႈ ပီၼႆႉ ၶဝ်မႃးၵဵပ်းႁၢဝ်ႈႁႅင်းၶႃႈယဝ်ႉ”- ဝႃႈၼႆ။

ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ဢၼ်တူင်ႉၼိုင် ယူႇဝႆႉတၢင်းပွတ်းထုင်ႉမိူင်းယေႃ ၼၼ်ႉသမ်ႉ ပဵၼ်ၸုမ်းသိုၵ်း ၵူဝ်ႈၵၢင်ႉ MNDAA ၊ သိုၵ်းၶၢင် KIA ၊ သိုၵ်းတဢၢင်း TNLA ၊ သိုၵ်းရၶႅင်ႇ AA ၊ သိုၵ်းဝၢၼ်ႈႁႆး SSPP ၊ ၶွင်ႇသီႇသိုၵ်းမၢၼ်ႈ/ တပ်ႉမ တေႃႇ လႄႈ ၸုမ်းပျီႇတူႉၸိတ်ႉ မၢၼ်ႈပၢင်ႇ ၸိူဝ်းၼႆႉ  ။

“ၸုမ်းသိုၵ်းဢၼ်ၵဵပ်းႁၢဝ်ႈႁႅင်းၼႆႉ သိုၵ်းၶၢင် သိုၵ်းၶႄႇၵူဝ်းၵၢင်ႉလႄႈ သိုၵ်းတဢၢင်း ၸိူဝ်းၼႆႉ။ ၶဝ်ၶဝ်ႈတီႉၺွပ်းၽႅဝ်ၼႂ်း ႁိူၼ်းယေး  ၵမ်းလဵဝ်ၶႃႈ။မၢင်ႁိူၼ်းမီးလုၵ်ႈၸၢႆးလဵဝ် ၊ ပေႃးပၼ်ၵေႃႈဢမ်ႇမီးၽႂ်ႁဵတ်းၵၢၼ်ၼႃႈႁိူၼ်း ၊ ပေႃးႁွင်ႉပေႃးႁႆႈၵေႃႈမီးဢေႃႈ။    သိုၵ်းၶူဝ်းၶဵဝ်တႄႉ ၶဝ်တေယွၼ်းမႃးၸိူင်ႉၼၼ်ၵူၺ်း။ ဢမ်ႇၶဝ်ႈတီႉၺွပ်းမိူၼ်ၶဝ်ၸိူဝ်းၼၼ်ႉ”- ၵူၼ်းမိူင်းယေႃ သိုပ်ႇလၢတ်ႈ  ၼင်ႇၼႆ။

ၼႃႈႁိူၼ်းၸိူဝ်းဢမ်ႇၸၢင်ႈပၼ်ၵူၼ်းသိုၵ်းၵေႃႈ လႆႈဢွၼ်ၵၼ်ပၢႆႈၵႂႃႇယူႇသၢပ်ႇဝဵင်း၊ ၼႂ်းၵႄႈၵၢၼ်မိူင်းသုၵ်ႉယုင်ႈ လႄႈၼႂ်းၵႄႈၵၢပ်ႈတၢင်းပဵၼ်ၵႃႇလ လႅၼ်လိၼ်ပိၵ်ႉဢိုတ်းဝႆႉသေတႃႉ မၢင်ၸိူဝ်း လႆႈသၢၼ်ၶတ်းလွင်ႈၶဵင်ႇတႃႉသေ ဢၢၼ်းၵႂႃႇႁဵတ်းၵၢၼ်မိူင်းႁိမ်းႁွမ်း ၵေႃႈမီး။

“ၸႂ်ႈၶႃႈဢေႃႈ မိူဝ်ႈလဵဝ် ၵူၼ်းမိူင်းၼႆႉ ဢွၼ်ၵၼ်ပၢႆႈတင်းႁိူၼ်း တင်းယေးၶႃႈ။ ၵမ်ႈၼမ် ဢၼ်ပၢႆႈတႄႉၵေႃႈ ပဵၼ်ပီႈ ၼွင်ႉလွႆ ပီႈၼွင်ႉၶႄႇ ၵူဝ်းၵင်ႉလႄႈ ပီႈၼွင်ႉၶၢင် ၵမ်ႈၽွင်ႈၶႃႈဢေႃႈ”-  ၵူၼ်းၼုမ်ႇ ထုင်ႉမိူင်းယေႃ ၵေႃႉၼိုင်ႈ လၢတ်ႈ ၼႄၼင်ႇၼႆ။

ထုင်ႉမိူင်းယေႃၼႆႉ မီးၾၢႆႇဢွၵ်ႇဝဵင်းလႃႈသဵဝ်ႈ။ တင်းမူတ်း မီး 31 ဢိူင်ႇ ၵမ်ႈၼမ်ပဵၼ်ၸုမ်းဢူၺ်းလီ ပွတ်းႁွင်ႇ တင်း ၶွင်ႇသီႇသိုၵ်းမၢၼ်ႈလႄႈ ၸုမ်းပျီႇ တူႉၸိတ်ႉမၢၼ်ႈပၢင်ႇ ၸိူဝ်းၼႆႉ တူင်ႉၼိုင် ယူႇသဝ်း။ ၵူၼ်းမိူင်းၵမ်ႈၼမ်သမ်ႉႁဵတ်းၵၢၼ်ၽုၵ်ႇသွမ်ႈ လႄႈၵႃႉၶၢႆႁႃၵိၼ်လဵင်ႉတွင်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း