သိုၵ်းမၢၼ်ႈ ထႅမ်ႁႅင်းသိုၵ်း တၢင်းထုင်ႉမိူင်းယေႃ ၾၢႆႇဢွၵ်ႇဝဵင်းလႃႈသဵဝ်ႈ၊ ၸုမ်းဢူၺ်းလီ ပွတ်းႁွင်ႇ သမ်ႉ ယူႇဝႆႉၼႂ်းထုင်ႉမိူင်းယေႃလႄႈ ၵူၼ်းဝၢၼ်ႈၵူၼ်းမိူင်း မႆႈၸႂ်ၵူဝ်ပဵၼ်ပၢင်တိုၵ်း သိုၵ်းသိူဝ်။
ဝၼ်းတီႈ 18/3/2021 ၼႆႉ ၸုမ်းဢူၺ်းလီ ပွတ်းႁွင်ႇ ဢၼ်မီး သိုၵ်းၶႄႇၵူဝ်းၵၢင်ႉ MNDAA, သိုၵ်းၶၢင် KIA, သိုၵ်းလွႆTNLA လႄႈ ၸုမ်းသိုၵ်းရၶႅင်ႇ AA ႁႅင်းသိုၵ်း 300 ပၢႆ တူင်ႉၼိုင်ယူႇၼႂ်းထုင်ႉမိူင်းယေႃ၊ သိုၵ်းမၢၼ်ႈသမ်ႉ လုၵ်ႉတၢင်းလႃႈသဵဝ်ႈသေ မႃးမီးယူႇတီႈဝၢၼ်ႈၼႃးပႅၼ်း ၾၢႆႇတူၵ်းမိူင်းယေႃ မွၵ်ႈ 4 လၵ်း ။ ၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်း သိုၵ်းသိူဝ် ။
ၵူၼ်းပိုၼ်ႉတီႈ ထုင်ႉမိူင်းယေႃ လၢတ်ႈဝႃႈ – “တပ်ႉပွင်းၸူႉၶဝ် ႁွတ်ႈမႃးတီႈ မိူင်းယေႃ ႁဝ်းၶႃႈၼႆႉ ၸဵမ်မိူဝ်ႈ ဝၼ်းတီႈ 16 ၼၼ်ႉယဝ်ႉၶႃႈ။ တေႃႇထိုင်မိူဝ်ႈၼႆႉဢေႃႈ။ တေႃႈလဵဝ်သိုၵ်းမၢၼ်ႈ သမ်ႉ လုၵ်ႉတၢင်း ဝၢၼ်ႈၼႃးပႅၼ်း မုင်ႈၸူးတူဝ်မိူင်း မိူင်းယေႃ၊ တပ်ႉပွင်းၸူႉၶဝ်တႄႉ ဢွၵ်ႇၵႂႃႇတၢင်းၸၢၼ်း တေႃႈလဵဝ် ယဝ်ႉလႄႈ လူမ်ၸႂ်ၵႂႃႇၽွင်ႈၶႃႈဢေႃႈ” – ဝႃႈၼႆ။
ထုင်ႉမိူင်းယေႃၼႆႉ မီးၾၢႆႇဢွၵ်ႇ ဝဵင်းလႃႈသဵဝ်ႈ ယၢၼ် မွၵ်ႈ 32 လၵ်း၊ လုၵ်ႉမိူင်းယေႃ ၵႂႃႇ တၢင်း ၸဵင်ႇႁွင်ႇဝၼ်းဢွၵ်ႇဢိတ်းၼိုင်ႈတေထိုင်တၢင်းမိူင်းၵႅတ်ႈ၊ ၵႂႃႇတၢင်းဢွၵ်ႈသိုဝ်ႈသိုဝ်ႈ တေထိုင်တၢင်း ဝၢၼ်ႈမၢၵ်ႇ။ ပေႃးၶၢမ်ႈၶူင်းၵေႃႈ ထိုင် ပွတ်းတွၼ်ႈ ၼႃႈလိၼ်ၶိုၵ်ႉတွၼ်း မၢႆ 2 ဢၼ်တပ်ႉသိုၵ်းဝႃႉ UWSA ၵုမ်းၵမ်။
ၸုမ်းဢူၺ်းလီပွတ်းႁွင်ႇ 4 ၸုမ်းၼႆႉ – မီးၶၢဝ်ႇဢွၵ်ႇဝႆႉဝႃႈ တေ ႁူပ်ႉတင်း ၸုမ်းသိုၵ်းမၢၼ်ႈယိုတ်းဢႃႇၼႃႇ၊ ပေႃးႁူပ်ႉၵၼ် သင်ဢမ်ႇၸႂ်ႈတီႈပၢင်သၢင်းၵေႃႈ တေပဵၼ် ဝဵင်းမိူင်းလႃး – တေဢုပ်ႇဢူဝ်းၵၼ် လွင်ႈ တႃႇလူင်းလၢႆးမိုဝ်း NCA ။ ၵူၺ်းၵႃႈ ၾၢႆႇၸုမ်းဢူၺ်းလီသိုၵ်းပွတ်းႁွင်ႇတႄႉ ပႆႇယိုၼ်ယၼ်။
