ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ ၸုမ်းဢွၼ်ႁူဝ်ဢုပ်ႇဢူဝ်းၵၢၼ်မိူင်း PPST  ၸုမ်းၵိုတ်းတိုၵ်းတူဝ်ႈမိူင်း NCA-S EAO ၸတ်းႁဵတ်း ပၢင်ၵုမ်လူင် တၢင်း Online သေ မွၵ်ႇလၢတ်ႈၶေႃႈၵႂၢမ်းဝႃႈ – “တေယူႇၾၢႆႇပေႃႈမႄႈၵူၼ်းမိူင်း၊ တေႁူမ်ႈမိုဝ်းၸွမ်း ၸုမ်းဢၼ် ၸုၵ်းမၼ်ႈႁဵတ်းသၢင်ႈ တႃႇပေႃႈမႄႈၵူၼ်းမိူင်းၵႂႃႇ”– ဝႃႈၼႆ။

ဝၼ်းတီႈ 11-12/3/2021 ယူႇတီႈ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉ တူဝ်ႈမိူင်း NCA 10 ၸုမ်း ဢၼ်ၶွတ်ႇၽွတ်ႈ ၸုမ်းဢွၼ်ႁူဝ်ဢုပ်ႇဢူဝ်းၵၢၼ်မိူင်း PPST ၼၼ်ႉ ၸတ်းႁဵတ်းပၢင်ၵုမ်လူင်၊ တီႈပၢင်ၵုမ်ၼၼ်ႉ ၵေႃႉႁပ်ႉတၼ်းႁဵင်းႁူဝ်ပဝ်ႈ PPST ဝႆႉၸူဝ်ႈၶၢဝ်း ၸွမ်သိုၵ်းလူင် ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်။  

ၸွမ်သိုၵ်းလူင် ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵုမ်ၼၼ်ႉဝႃႈ – “ယူႇတီႈႁဝ်းၶႃႈ ၸုမ်း PPST  တေၸုၵ်းမၼ်ႈ ယူႇၾၢႆႇ ပေႃႈမႄႈၵူၼ်းမိူင်းသေ တေႁူမ်ႈမိုဝ်းၸွမ်းၸုမ်းဢၼ်ၸုၵ်းမၼ်ႈႁဵတ်းသၢင်ႈတႃႇ ပေႃႈမႄႈ ၵူၼ်းမိူင်းလႄႈ ၼင်ႇႁိုဝ်ပိူင်ဢုပ်ႉပိူင်ႇၸဝ်ႈဢႃႇၼႃႇသိုၵ်းမၢၼ်ႈ ပေႃးတေမူၺ်ႉႁၢႆၵႂႃႇၼၼ်ႉ တေသိုပ်ႇႁဵတ်းသၢင်ႈၵႂႃႇ”-  ဝႃႈၼႆ။

လိူဝ်ၼၼ်ႉ ၽွင်းယၢမ်းငဝ်းလၢႆး ဢၼ်ပဵၼ်ယၢမ်းလဵဝ်ၼႆႉ ယူႇတီႈ PPST  တေသိုပ်ႇၵမ်ပၼ်ႈ ၶေႃႈတႅပ်းတတ်းလွင်ႈဝႃႈ တေဢမ်ႇႁူပ်ႉထူပ်းဢုပ်ႇဢူဝ်းၵဵဝ်ႇၵပ်းၵၢၼ်မိူင်းၸွမ်း ၶွင်ႊသီႊသိုၵ်းမၢၼ်ႈ လႃးလႃး – ဝႃႈၼႆ။

တီႈပၢင်ၵုမ်လူင်ၼၼ်ႉ ၼႂ်းတႆး ႁၼ်ၸွမ်သိုၵ်းလူင် ယွတ်ႈသိုၵ်း၊ ၽူႈၵိူဝ်းၵုမ် ၸဝ်ႈၶိုၼ်းသႂ်ၸႂ်ယဵၼ်၊ ၸၢႆးလႅင်း လႄႈ  Dr.ၸၢႆးဢူး (PI) ၶဝ်ၸိူဝ်းၼႆႉၶဝ်ႈႁူမ်ႈၸွမ်း။ တၢင်ႇၸုမ်းၵေႃႈ ၵမ်ႈၼမ် ပဵၼ်တူဝ်ႁူဝ်ပဝ်ႈ ဢွၼ်ၼမ်းတူဝ်တႅၼ်းမူႇၽႂ်ၸုမ်းမၼ်း တီႈဢေႇသုတ်း 2 ၵေႃႉတေႃႇ 3 ၵေႃႉၶဝ်ႈႁူမ်ႈၸွမ်း။ 

ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း လူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA 10 ၸုမ်းၼႆႉ မီးမိူၼ်ၼင်ႇ ၶွင်ႇသီႇ ဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)၊ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်းႁူမ်ႈၸိူဝ်ႉ ၸၢတ်ႈၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊလုၵ်ႈႁဵၼ်း မိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU)၊ တပ်ႉသိုၵ်းယၢင်း ၵမ်ႉထႅမ်ၻီႊမူဝ်ႊၶရေႊၸီႊ(DKBA)၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း-ၶွင်ႇသီႇ ငမ်းယဵၼ် (KNLA-PC)၊ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ (ALP)၊ ၸုမ်းလႃးႁူႇတီႇမူဝ်ႊၶရႅတ်ႉတိၵ်ႉ LDU လႄႈ ၸုမ်းပႃႇ တီႇမိူင်း မွၼ်းမႂ်ႇ NMSP ၸဵမ်ၸိူဝ်းၼႆႉ။