ၼႂ်းႁၢင်လိူၼ်ၼူဝ်ႊဝႅမ်ႊပိူဝ်ႊၼႆႉ သိုၵ်းတဢၢင်း တင်း သိုၵ်းၵူၼ်းၼုမ်ႇမၢၼ်ႈ (PDF) ၸိူဝ်းတူင်ႉၼိုင်ယူႇ ၼႂ်းၸႄႈဝဵင်းမိူင်းၵုတ်ႈ လႄႈ ၸႄႈဝဵင်းမိူင်းမိတ်ႈ ဢွၼ်ၵၼ်ထွႆႁႅင်းသိုၵ်း ဢွၵ်ႇဝဵင်းၵႂႃႇသေ ၵူၼ်းၾၢႆႇသိုၵ်း မၢၼ်ႈၵေႃႈ ၶဝ်ႈဢဝ်တီႈယူႇဝႆႉၼႂ်းဝဵင်းၶိုၼ်းယဝ်ႉၵမ်ႈၽွင်ႈ ၼႆယဝ်ႉ။

ၼင်ႇႁိုဝ်သိုၵ်းမၢၼ်ႈတေၶဝ်ႈၵုမ်းၵမ် ပၼ်ႇၵၢၼ်ၽွင်းငမ်းလႆႈၼႂ်းဝဵင်းတဵမ်ထူၼ်ႈၼၼ်ႉ ၾၢႆႇသိုၵ်းတဢၢင်း (TNLA) ငူပ်ႉငီႉၵၼ်တင်း ၸုမ်းၸိူဝ်းႁူမ်ႈၽၢၵ်ႈတိုၵ်းဢဝ် ဝဵင်းမိူင်းၵုတ်ႈ၊ ဝဵင်းမိူင်းမိတ်ႈဝႆႉၼၼ်ႉ သေ တုၵ်းယွၼ်းတီႈ (PDF) ႁႂ်ႈထွႆဢွၵ်ႇဝဵင်းၵႂႃႇပၼ်တင်းသဵင်ႈ ဝၼ်းတီႈ 27 လိူၼ်ၼူဝ်ႊဝႅမ်ႊပိူဝ်ႊၼႆႉ လိုၼ်းသုတ်း ၼႆယဝ်ႉ။

ၽူႈၶဝ်ႈၸုမ်းၼႂ်းတပ်ႉသိုၵ်းၵူၼ်းၼုမ်ႇမၢၼ်ႈ (PDF) မိူင်းၵုတ်ႈတွပ်ႇလၢတ်ႈဝႆႉတီႈသိုဝ်ႇၶၢဝ်ႇဝႃႈ “TNLA ၶဝ်လၢတ်ႈတီႈၸုမ်းႁဝ်းဝႆႉ ႁႂ်ႈထွၼ်ဢွၵ်ႇၼႂ်းဝဵင်းမိူင်းၵုတ်ႈ လိုၼ်းသုတ်း (27/11/2025) ” ဝႃႈၼႆ။

မိူဝ်ႈပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်း 2 ၼၼ်ႉ သိုၵ်းတဢၢင်းလႄႈ ၸုမ်းသိုၵ်းၵႅတ်ႇၶႄၵူၼ်း မိူင်းမၢၼ်ႈထုင်ႉပဵင်း (PDF) ၶဝ်လၢႆၸုမ်း ႁူမ်ႈၵၼ်သေ တိုၵ်းသိမ်းဢဝ် ဝဵင်းမိူင်းၵုတ်ႈသေ ၶဝ်ႈပၵ်းတပ်ႉ ပၼ်ႇၵၢၼ်ၽွင်းငမ်းၵႂႃႇ ႁိုင်ၶၢဝ်းတၢင်း မွၵ်ႈ 1 ပီ ။

ၵူၼ်းမိူင်းၵေႃႉႁဵတ်းၵၢၼ်ၶုတ်းသႅင် ၼႂ်းၸႄႈဝဵင်းမိူင်းၵုတ်ႈၵေႃႉၼိုင်ႈတႄႉလၢတ်ႈၼႄဝႃႈ “ယၢမ်းလဵဝ်ၼႂ်းဝဵင်းၼႆႉဢမ်ႇပေႃးႁၼ်သိုၵ်း PDF ၶဝ်ယဝ်ႉ။ ၸုမ်းသိုၵ်းပလွင်ႈ (တဢၢင်း) တႄႉ တိုၵ်ႉလႆႈႁၼ်ယူႇၵမ်ႈၽွင်ႈ။ ၶဝ်ပႆႇဢွၵ်ႇၵႂႃႇတင်းသဵင်ႈ။ ဢၼ်ဝႃႈ သိုၵ်းမၢၼ်ႈမႃးၽႅဝ်ထိုင်ၼႂ်းဝဵင်းယဝ်ႉၼႆၼၼ်ႉၵေႃႈ ႁႂ်ႈပေႃးဝႃႈ ႁၼ်ၶဝ်ၼုင်ႈၶူဝ်းသိုၵ်းႁႄၶဝ်ႈမႃးၸိူင်ႉ ၼၼ်တႄႉပႆႇႁၼ်။ ဢၼ်ၶဝ်ၼုင်ႈၶူဝ်းၵူၼ်းမိူင်းႁႄၶဝ်ႈမႃးယူႇဝႆႉၸိူဝ်းၼၼ်ႉတႄႉတေမီးယူႇၵမ်ႈၽွင်ႈ။ ၵူၺ်းဢၼ်ၶဝ်ၼုင်ႈၶူဝ်းသိုၵ်း ဢဝ်ၵႃးသိုၵ်းႁႄၶဝ်ႈမႃးပဵၼ်တၢင်းၵၢၼ် ၸိူင်ႉၼၼ်တႄႉ ဢမ်ႇပႆႇႁၼ်” ၼႆယဝ်ႉ။

ဝၢႆးလင် လူင်ပွင်ၸိုင်ႈမိူင်းၶႄႇ ယူႇၵၢင်ႁဵတ်းၶဵဝ်သေ ၸွႆႈၶပ်းၶိုင်ပၼ် ႁႂ်ႈသိုၵ်းတဢၢင်း တင်း သိုၵ်းမၢၼ်ႈ ဢုပ်ႇဢူဝ်းငူပ်ႉငီႉၵၼ်ထႅင်ႈ ၵမ်းထူၼ်ႈ (9) တီႈဝဵင်းၶုၺ်းမိင်ႊ ၼႂ်းမိူင်းၶႄႇ ၼၼ်ႉယဝ်ႉသေ တင်းသွင်ၾၢႆႇလႆႈၶေႃႈတူၵ်းလူင်းၵိုတ်းတိုၵ်းၵၼ် လူၺ်ႈဢမ်ႇမီးၵၢၼ်မၵ်းမၼ်ႈၶၢဝ်းႁိုင်။ လွင်ႈသိုၵ်းမၢၼ်ႈ တေၶဝ်ႈၵုမ်းၵမ်ၶိုၼ်း ဝဵင်းမိူင်းၵုတ်ႈ၊ ဝဵင်းမိူင်းမိတ်ႈၼႆႉ ၶၢဝ်ႇႁူင်လိုဝ်းဢွၵ်ႇ ဢမ်ႇထၢတ်ႇ။

ၼႂ်းပၢင်ၵုမ်ၵၢၼ်တူၵ်းလူင်းၵိုတ်းတိုၵ်းၵၼ်တင်းသိုၵ်းမၢၼ်ႈ တီႈမိူင်းၶႄႇၼၼ်ႉဢမ်ႇပႃးၸုမ်းသိုၵ်း PDF ။ ၼႂ်းၸႄႈဝဵင်းမိူင်းၵုတ်ႈ၊ ၸႄႈဝဵင်းမိူင်းမိတ်ႈသမ်ႉ မီးၸုမ်းသိုၵ်း PDF ၵုမ်း ၵမ်ဝႆႉၸွမ်းထႅင်ႈသေ ၵွၼ်ႇၼႃႈၼႆႉ PDF ၵေႃႈ ႁဵတ်းလိၵ်ႈပိုၼ်ၽၢဝ်ႇဢွၵ်ႇဝႃႈ တိုၼ်းတေဢမ်ႇထွႆဢွၵ်ႇဝဵင်းသေ တေသိုပ်ႇႁဵတ်းၵၢၼ်ၵႅတ်ႇၶႄႇဝဵင်းၵႂႃႇ ၼင်ႇပွင်ပဵၼ်လႆႈၼႆယူႇ။

ယွၼ်ႉၼၼ်ႉ ၵူၼ်းမိူင်းၸိူဝ်းယူႇသဝ်းၼႂ်းၸႄႈဝဵင်းမိူင်းၵုတ်ႈ၊ ၸႄႈဝဵင်းမိူင်းမိတ်ႈၵေႃႈ မႆႈၸႂ်ၵူဝ်ၸုမ်း သိုၵ်းၶဝ် ပဵၼ်ပၢင်တိုၵ်းၵၼ်၊ ယိုဝ်းၵၼ်ထႅင်ႈလႄႈ ဢွၼ်ၵၼ်ငိူင်ႉဢွၵ်ႇဝဵင်းၵႂႃႇယူႇသဝ်းဝႆႉတၢင်ႇတီႈ၊ တၢင်ႇဝဵင်း ဢွင်ႈတီႈတေၸၢင်ႈလွတ်ႈၽေးၼၼ်ႉ ႁင်းၽႂ်ႁင်းမၼ်းလႄႈ ယၢမ်းလဵဝ် ၼႂ်းဝဵင်းမိူင်းၵုတ်ႈၼႆႉ ပေႃးယဵၼ်သီႇသီႇလူင်ဝႆႉ ၼႆယဝ်ႉ။

ၼုမ်ႇၸၢႆးၵေႃႉယူႇဝဵင်းမိူင်းၵုတ်ႈသေ ငိူင်ႉဢွၵ်ႇၵႂႃႇယူႇဝႆႉတီႈဝဵင်းလိူဝ်ႇ (မၢၼ်းတလေး) ၼၼ်ႉ ယိုၼ်ယၼ်လၢတ်ႈၼႄဝႃႈ “ၵူၼ်းမီးငိုၼ်း၊ ၵူၼ်းၸိူဝ်းပွင်ပဵၼ်လႆႈၶဝ်ၵမ်ႈၼမ်တႄႉဢွၼ်ၵၼ်ငိူင်ႉဢွၵ်ႇထႃႈလူင်ႈၼႃႈ ၵမ်ႈၼမ်ယဝ်ႉ။ ၵူၼ်းၸိူဝ်းမႆႈၸႂ်ၵူဝ်သိုၵ်းၶဝ်ယိုဝ်းၵၼ်ၶိုၼ်းၼၼ်ႉၵေႃႈ ငိူင်ႉဢွၵ်ႇၸွမ်းထႅင်ႈ။ ယၢမ်းလဵဝ် ၼႂ်းဝဵင်းၼႆႉ ၵိုတ်းၵူၼ်းႁဵတ်း ၵၢၼ်ၶုတ်းသႅင်ၶဝ်ႁႄ ၵူၼ်းၸိူဝ်းဢမ်ႇမီးငိုၼ်း တႃႇငိူင်ႉဢွၵ်ႇၼၼ်ႉၵူၺ်းယဝ်ႉ” ဝႃႈၼႆ။

ၼႂ်းဝဵင်းမိူင်းၵုတ်ႈ ဢၼ်ဢွၵ်ႇသႅင်ၸိုဝ်ႈသဵင်လိုဝ်းလင် တူဝ်ႈလုမ်ႈၾႃႉၼႆႉ တင်းမူတ်းမီးယူႇ 5 ပွၵ်ႉသေ မီးၵူၼ်းမိူင်းယူႇသဝ်း မွၵ်ႈ ၼိုင်ႈသႅၼ်ၵေႃႉ။

မိူၼ်ၼၼ်ၼင်ႇၵဝ်ႇ ၸႄႈဝဵင်းမိူင်းမိတ်ႈ ဢၼ်မီးၸုမ်းသိုၵ်းၸၢဝ်းၶိူဝ်းလၢႆၸုမ်း ပၵ်းတပ်ႉပၢင်သဝ်းယူႇဝႆႉ ၸွမ်းၼၼ်ႉၵေႃႈ ၾၢႆႇသိုၵ်းတဢၢင်း တုၵ်းယွၼ်းႁႂ်ႈထွႆဢွၵ်ႇ ၼႂ်းဝၼ်းတီႈ 27/11/2025 ဝၼ်းလိုၼ်းသုတ်း မိူၼ်ၵၼ် ၼႆယဝ်ႉ။

လႆႈႁူႉဝႃႈ ၸွမ်းသၢပ်ႇဝဵင်းမိူင်းမိတ်ႈႁွပ်ႈႁွပ်ႈၼႆႉ မီးဝႆႉၸုမ်းသိုၵ်းၶၢင် (KIA) ၊ တပ်ႉသိုၵ်းရၶႅင်ႇ (AA) ၊ တပ်ႉသိုၵ်းတႅဝ်းႁူမ်ႈတီႇမူဝ်ႊၶရႅတ်ႉတိၵ်ႉလုၵ်ႈႁဵတ်းမိူင်းမၢၼ်ႈပတ်းပိုၼ်ႉ (ABSDF) လႄႈ တပ်ႉၸုမ်း ပၵၽ ၶဝ်ၸိူဝ်းၼႆႉ ၼႆယဝ်ႉ။

ၼုမ်ႇၸၢႆး ၵေႃႉယူႇဝဵင်းမိူင်းမိတ်ႈတႄႉ လၢတ်ႈဝႃႈ “တႃႇသိုၵ်းမၢၼ်ႈတေၶဝ်ႈမႃးထိုင်လႆႈၼႂ်းဝဵင်းမိူင်းမိတ်ႈတႄႉ တေဢမ်ႇပေႃးငၢႆႈမိူၼ်တၢင်းမိူင်းၵုတ်ႈ။ တီႈႁဝ်းၼႆႉၸုမ်းသိုၵ်းၸၢဝ်း ၶိူဝ်းၶဝ်မီးၼမ် လိူဝ်ဝႆႉ” ၼႆယဝ်ႉ။

မိူဝ်ႈဝၼ်းတီႈ 29 လိူၼ်ဢွၵ်ႉထူဝ်ႊပိူဝ်ႊၼၼ်ႉ သိုၵ်းမၢၼ်ႈ တင်း သိုၵ်းတဢၢင်း (TNLA) တူၵ်းလူင်းၵိုတ်း တိုၵ်းၵၼ်ဝႆႉသေ ၾၢႆႇသိုၵ်းတဢၢင်းပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ တေထွၼ်သၢႆသိုၵ်းဢွၵ်ႇၶိုၼ်း ၼႂ်းၸႄႈဝဵင်းမိူင်းၵုတ်ႈ လႄႈ ၸႄႈဝဵင်းမိူင်းမိတ်ႈတင်းသဵင်ႈယဝ်ႉ ႁႂ်ႈသိုၵ်းမၢၼ်ႈၶဝ်ႈၵုမ်းၵမ်ၶိုၼ်း ၼႆယဝ်ႉ။

လွင်ႈသိုၵ်းတဢၢင်းတူၵ်းလူင်းၵၼ်ၵႂႃႇတင်းသိုၵ်းမၢၼ်ႈၸိူင်ႉၼၼ်ၼၼ်ႉ ဢမ်ႇပၼ်ၾၢင်ႉ ဢမ်ႇမွၵ်ႇလၢတ်ႈ သင်လူင်ႈၼႃႈတီႈ ၸုမ်းဢူၺ်းလီၸိူဝ်းႁူမ်ႈၽၢၵ်ႈၶဝ်သေ တိုၵ်းဢဝ် ၸႄႈဝဵင်းမိူင်းၵုတ်ႈ၊ ၸႄႈဝဵင်းမိူင်းမိတ်ႈ ၼၼ်ႉလႄႈ ႁဵတ်းႁႂ်ႈမီးလွင်ႈထၢင်ႇထိူမ်ပိူင်ႈၸႂ်ၵၼ်ဝႆႉ ၼႆယဝ်ႉ။

ၼင်ႇႁိုဝ်သိုၵ်းမၢၼ်ႈ တေၶဝ်ႈၵုမ်းၵမ် ပၼ်ႇၵၢၼ်ၽွင်းငမ်းပဵၼ်တၢင်းၵၢၼ်လႆႈငၢႆႈၼၼ်ႉလူမ်ၼၼ်ႉ ၾၢႆႇသိုၵ်းတဢၢင်း (TNLA) ႁပ်ႉပုၼ်ႈၽွၼ်း ဢဝ်ႁူမ်ႇလူမ်ႈပၼ်သေ တေႁွင်ႉ ၶဝ်ႈၵႂႃႇၼႂ်းဝဵင်းၶိုၼ်းၼႆ – သိုဝ်ႇၶၢဝ်ႇ ၼႂ်းမိူင်းႁူမ်ႈတုမ် လၢႆလၢႆႁွင်ႈၵၢၼ်တႅမ်ႈဢွၵ်ႇဝႆႉသေတႃႉ ၾၢႆႇသိုၵ်းတဢၢင်းတႄႉ ပႆႇယိုၼ်ယၼ် သင်ဢွၵ်ႇမႃးပဵၼ်တၢင်းၵၢၼ်။

ၽွင်းပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်း (2) ယဝ်ႉၼႆႉ သိုၵ်းတဢၢင်း ပိုၼ်ၽၢဝ်ႇဝႃႈ ၵုမ်းၵမ်လႆႈ ဝဵင်းသီႇပေႃႉ၊ ဝဵင်းၵျွၵ်ႉမႄး၊ ဝဵင်းၼွင်ၶဵဝ်၊ ဝဵင်းမိူင်းလူင်၊ ဝဵင်းမိူင်းငေႃႉ၊ ဝဵင်းမိူင်းမိတ်ႈ၊ ဝဵင်းၼမ်ႉသၼ်ႇ၊ ဝဵင်းမၢၼ်ႈတူင်ႈ၊ ဝဵင်းၵူတ်ႉၶၢႆ၊ ဝဵင်းၼမ်ႉၶမ်း၊ ဝဵင်းၼမ်ႉတူႈၸဵမ်ၸိူဝ်းၼႆႉ။

ၼႂ်းၸႄႈဝဵင်းၸိူဝ်းသိုၵ်းတဢၢင်းယိုတ်းသိမ်းလႆႈဝႆႉ ၼႂ်းပီ 2024 ၼၼ်ႉ ထိုင်မႃးၼႂ်းၵၢင်ပီ 2025 မႃး ယွၼ်ႉႁႅင်းမိပ်ႇဢီးၶွင် လူင်ပွင်ၸိုင်ႈမိူင်းၶႄႇ၊ ယွၼ်ႉသိုၵ်းမၢၼ်ႈၸႂ်ႉႁိူဝ်းမိၼ် တင်း ၶိူင်ႈတရူၼ်ႊဢၼ်ၶိုတ်းၸၼ်ႉၼၼ်ႉသေ ယိုဝ်းတိုၵ်းသႂ်ႇဢွင်ႈတီႈသိုၵ်းတဢၢင်းၵုမ်းၵမ်ဝႆႉၼၼ်ႉႁၢဝ်ႈႁႅင်း။ TNLA လႆႈပၼ်သိုၵ်းမၢၼ်ႈၶဝ်ႈၵုမ်းၵမ်ၶိုၼ်း ဝဵင်းၼွင်ၶဵဝ်၊ ဝဵင်း ၵျွၵ်ႉမႄး၊ ဝဵင်းသီႇပေႃႉ ၸဵမ်ၸိူဝ်းၼႆႉ။