ဝၼ်းတီႈ 09/07/2025 ၼႆႉ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ (NUG) ဢွၵ်ႇလိၵ်ႈတိုၵ်းသူၼ်းႁႂ်ႈသိုၵ်းၶျၢင်း သွင်ၸုမ်း ၸႂ်ႉလၢႆးတၢင်းၵၢၼ်မိူင်း ႁူပ်ႉထူပ်းၵႄႈလိတ်ႈပၼ်ႁႃၵၢၼ်သိုၵ်းၵႂႃႇ လူၺ်ႈလၢႆးတၢင်းဢုပ်ႇဢူဝ်းငူပ်ႉငီႉၵၼ် ၼႆယဝ်ႉ။
ၵႅမ်ၸွမ်ၸိုင်ႈ NUG လၢတ်ႈၵႂႃႇဝႃႈ – “ထုၵ်ႇလီၵိုတ်းယိုတ်းဝႆႉ ၵၢၼ်ၸႂ်ႉတိုဝ်းၵွင်ႈၵၢင်ႇသေ ၵႄႈလိတ်ႈပၼ်ႁႃ ၼႂ်းၵႄႈၵၢင်ၸၢဝ်းၶိူဝ်းၼင်ႇၵၼ်သေ ၸႂ်ႉတိုဝ်းလၢႆးတၢင်းၶၵ်ႉၵၢၼ်ငမ်းယဵၼ် ဢၼ်ၵူၼ်းမိူင်းၶျၢင်းမုင်ႈမွင်းၶႂ်ႈလႆႈၶႂ်ႈပဵၼ်ၼၼ်ႉသေ ဢုပ်ႇဢူဝ်းငူပ်ႉငီႉ ႁႃၶေႃႈတွပ်ႇၵႄႈလိတ်ႈပၼ်ႁႃၵႂႃႇယူႇ”- ဝႃႈၼႆ။
ၼႂ်းၵႄႈၵၢင်ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼႆႉ တေမီးတၢင်းႁၼ်ထိုင်ဢမ်ႇမိူၼ်ၵၼ်သေ ၸၢင်ႈၵိူတ်ႇပဵၼ်ပၼ်ႁႃၵၼ်မႃးယူႇသေတႃႉ ဢမ်ႇထုၵ်ႇလီၸႂ်ႉၶိူင်ႈၵွင်ႈၵၢင်ႇ လၢႆးတၢင်းၵၢၼ်သိုၵ်းၵႄႈလိတ်ႈသေ ၵူႈၸုမ်း ထုၵ်ႇလီယိပ်းၵမ်ဝႆႉမူႇပိူင် ဢၼ်ဢဝ်လၢႆးတၢင်းၵၢၼ်မိူင်း ၵႄႈလိတ်ႈၵႂႃႇၼၼ်ႉၸင်ႇ တေၸၢင်ႈထိုင်လႆႈ ယိူင်းမၢႆၵၢၼ်လုၵ်ႉၽိုၼ်ႉ ၼႆယဝ်ႉ။
ၵဵဝ်ႇလူၺ်ႈလွင်ႈ NUG ပိုၼ်ၽၢဝ်ႇဢွၵ်ႇ တိုၵ်းသူၼ်းႁႂ်ႈၸႂ်ႉလၢႆးတၢင်းၶၵ်ႉၵၢၼ်ငမ်းယဵၼ်၊ ၵၢၼ်မိူင်းၵႄႈ လိတ်ႈပၼ်ႁႃၵၼ်ၵႂႃႇၼၼ်ႉသေ ၽူႈၶၢၼ်ပၢၵ်ႇ ၸုမ်းသိုၵ်းၶျၢင်း CNF/CNA တုမ်ႉတွပ်ႇလၢတ်ႈဝႆႉဝႃႈ – ယိၼ်းလီႁူမ်ၸူမ်းႁပ်ႉတွၼ်ႈ ၶေႃႈၼႄႉၼမ်းသေ တေသိုပ်ႇၶတ်းၸႂ်ႁဵတ်းသၢင်ႈၵႂႃႇ ၸွမ်းၼင်ႇပွင်ပဵၼ်လႆႈ – ၼႆယဝ်ႉ။
လႆႈႁူႉဝႃႈ ၼႂ်းပိုၼ်ႉတီႈၼႆႉ ၸုမ်းသိုၵ်းၶျၢင်းသွင်ၸုမ်း မီးလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်သေတႃႉ ယွၼ်ႉၸုမ်းသူၼ်းတုမ် ၾၢႆႇၶၵ်ႉၵၢၼ်ငမ်းယဵၼ် Advocacy Group For Peace ဢၼ်ၸွမ်ၽွင်းလူင် ၸႄႈမိူင်းမီႊသူဝ်ႊရမ်ႊ မိူင်းဢိၼ်ႊတီႊယိူဝ်ႊ ဢွၼ်ႁူဝ် ၼမ်းၼႃႈ ၶဝ်ႈၵၢင်ႁဵတ်းၶဵဝ်ပၼ်လႄႈ သိုၵ်းၶျၢင်း တင်းသွင်ၸုမ်း တေမီးၵၢၼ်ႁူပ်ႉထူပ်းဢုပ်ႇဢူဝ်း ၵႄႈလိတ်ႈပၼ်ႁႃၵႂႃႇယူႇ ၼႆယဝ်ႉ။
တႄႇဝၼ်းတီႈ 02/07/2025 ၼၼ်ႉမႃး သိုၵ်းၶျၢင်းသွင်ၸုမ်း မီးပၼ်ႁႃလွင်ႈၵုမ်းၵမ်ၼႃႈတီႈၵၼ်သေ သဵင်ၵွင်ႈတႅၵ်ႇ ပဵၼ်ပၢင်တိုၵ်းၵၼ်ယဝ်ႉ ဢွင်ႈတီႈသုၼ်ၵၢၼ်ၵႃႉၶၢႆ လႅၼ်လိၼ်မိူင်းၶျၢင်း- မိူင်းဢိၼ်ႊတီႊယိူဝ်ႊ ရိၶေႃႊတႃႊ (ရိခေါ်ဒါ) ဢၼ်ၸုမ်းသိုၵ်းၶျၢင်း CDF-Hualngoram ၵုမ်းၵမ်ဝႆႉၼၼ်ႉ ၺႃးၸုမ်းသိုၵ်းၶျၢင်း CNDF ၶဝ် ယိုတ်းၵုမ်းဢဝ်ၵႂႃႇ ၼႆယဝ်ႉ။
ဝၢႆးလင် ၸုမ်းသိုၵ်းၶျၢင်း CNA ၶဝ်ႈလူမ်ႇတိုၵ်းယိုတ်းၵုမ်းဢဝ် ငဝ်ႈငုၼ်းၸုမ်းသိုၵ်းၶျၢင်း CNDF ယဝ်ႉ ၸုမ်းသိုၵ်းၶျၢင်းတင်းသွင်ၸုမ်း ၸင်ႇတႄႇပဵၼ်ပၢင်တိုၵ်းၵၼ်မႃး ၼႂ်းၸႄႈဝဵင်းၽလၢၼ်း ဝႃႈၼႆ။
ၼႂ်းၸႄႈမိူင်းၶျၢင်းၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶျၢင်း ၵုမ်းၵမ်ဝႆႉ ဝဵင်းမတူႇပီႇ၊ မိၼ်းတႅတ်ႉ (မင်းတပ်)၊ ၵၢၼ်ႇပလႅတ်ႉ (ကန်ပလက်)၊ ၽလၢၼ်း (ဖလမ်း) ၸိူဝ်းၼႆႉသေ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းရၶႅင်ႇ AA သမ်ႉၵုမ်းၵမ်ဝႆႉ ဝဵင်းပလႅတ်ႉဝ (ပလက်ဝ) တင်းသဵင်ႈ။
ဝၢႆးလင်သိုၵ်းမၢၼ်ႈယိုတ်းမိူင်းမႃး ၶၢဝ်းတၢင်း 4 ပီပၢႆၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းၸႄႈမိူင်းၶျၢင်း ၵုမ်းၵမ်လႆႈ ၸႄႈဝဵင်းၼႂ်းပိုၼ်ႉတီႈ တႃႇ 80 % ယဝ်ႉ ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ