ၵူၼ်းမိူင်း မွၵ်ႈ 300 တီႈၸႄႈဝဵင်းၵျွၵ်ႉမႄး ၶမ်ၼႂ်းၵႄႈပၢင်တိုၵ်းသေ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ႁၢဝ်ႈႁႅင်း ဝႃႈၼႆ။

 ၸုမ်း ဢူၺ်းလီ ပွတ်းႁွင်ႇ TNLA, SSPP ပိုတ်းယိုဝ်းၵၼ်တင်း RCSS တၢင်းၾၢႆႇႁွင်ႇ ၸႄႈဝဵင်းၵျွၵ်ႉမႄး   ၵူၼ်းဝၢၼ်ႈ တေႃႉသၢင်ႇ ႁူဝ်ၵူၼ်း 180 ၵေႃႉ တင်း ဝၢၼ်ႈပႃႇၶႃး ႁူဝ်ၵူၼ်း မွၵ်ႈ 100 ၵေႃႉ ၶမ်ဝႆႉၼႂ်းဝၢၼ်ႈ   ဢမ်ႇၸၢင်ႈဢွၵ်ႇၵႂႃႇမႃး လႄႈ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ႁၢဝ်ႈႁႅင်း  ။

ၵူၼ်းပၢႆႈၽေး တၢင်းပွတ်းတေႃႉသၢင်ႇ ၵေႃႉၼိုင်ႈ လၢတ်ႈဝႃႈ – “ႁဝ်းၶႃႈ ၶမ်ဝႆႉၼႂ်း ဝၢၼ်ႈဢမ်ႇၸၢင်ႈဢွၵ်ႇၵႂႃႇမႃး ႁႃၵိၼ် တၢင်းလႂ်ၶႃႈ။ ယၢမ်းလဵဝ် ၵိၼ်းၸႂ်လူဝ်ႇၶဝ်ႈၼမ်ႉတၢင်းၵိၼ်တႄႉတႄႉၶႃႈ။ တပ်ႉပွင်းၸူႉသမ်ႉမႃးပိၵ်ႉဢိုတ်းပႅတ်ႈ သဵၼ်ႈ တၢင်းတီႈတွင်ႇပလူဝ်ႉၼၼ်ႉလႄႈ ႁဝ်းၶႃႈ ဢမ်ႇၸၢင်ႈၶိုၼ်ႈလူင်း။ ၸုမ်းၵူၼ်းၸွႆႈ ထႅမ် ၵေႃႈ ဢမ်ႇၸၢင်ႈၶဝ်ႈမႃးၸွႆႈ ႁဝ်းၶႃႈ”- ဝႃႈၼႆ။

   လွင်ႈၼႆႉၸုမ်းၶၢဝ်ႇၽူႈတွႆႇႁွၵ်ႈၶတ်းၸႂ်တိတ်းတေႃႇၸူးတင်းၾၢႆႇပွင်ႇၶၢဝ်ႇ ၸုမ်းဢူၺ်းလီပွတ်းႁွင်ႇ ၵေႃႈတိတ်းတေႃႇဢမ်ႇလႆႈ။ ၵူၺ်းၵႃႈ ၸုမ်းတူင်ႉၼိုင်တူင်ႇဝူင်းၵူၼ်း ၸုမ်းသင်ၶၸဝ်ႈၵေႃႈလၢတ်ႈဝႃႈ ဢၢၼ်းၶဝ်ႈၸွႆႈထႅမ် ၵူၼ်းမိူင်း ပွတ်း တေႃႉသၢင်ႇ ပႃႇၶႃး ၸိူဝ်းၶၢင်ႉၶမ်ဝႆႉၼၼ်ႉၵေႃႈ  ဢမ်ႇၸၢင်ႈၶဝ်ႈႁႃလႆႈဝႃႈၼႆ။

ၸၢႆးၵူး ၽူႈတူင်ႉၼိုင်ၼႂ်းၸုမ်းၼမ်ႉၶူင်း ၶႅၵ်ႇလီပၢင်ၸႃႉတႆး ဝဵင်းၵျွၵ်ႉမႄး လၢတ်ႈဝႃႈ – “ၵူၼ်းဝၢၼ်ႈ တေႃႉသၢင်ႇ ပႃႇၶႃး လူဝ်ႇတၢင်းၸွႆႈထႅမ်ႁၢဝ်ႈႁႅင်းၼႆႉ ၸႂ်ႈၶႃႈဢေႃႈ။ ၵူၺ်းၵႃႈတႃႇတေၶိုၼ်ႈၸူး ၵူၼ်းဝၢၼ်ႈၼၼ်ႉ   လူဝ်ႇလႆႈပဵၼ်ၵႃးၽူဝ်းဝီး ၶႃႈ သဵၼ်ႈတၢင်းၵႅပ်ႈ လွႆၸၼ်း  ဢေႃႈ ။ၾၢႆႇၼိုင်ႈ တပ်ႉပွင်းၸူႉၵေႃႉပႂ်ႉၵူတ်ႇထတ်းႁၢမ်ႈႁႄႉဝႆႉလႄႈ ဢမ်ႇၸၢင်ႈၶဝ်ႈၸူးၶဝ်ၶႃႈ။ ” – ဝႃႈၼႆ။

 ယွၼ်ႉပိူဝ်ႈဢမ်ႇၸၢင်ႈၶဝ်ႈ/ဢွၵ်ႇ လႄႈတႃႇသိုဝ်ႉၶူဝ်းၶွင်ၵိၼ်ယမ်ႉ တႃႇၸႂ်ႉၸၢႆႇၵေႃႈ ဢမ်ႇၸၢင်ႈ။ ၵွပ်ႈၼႆၵူၼ်းဝၢၼ်ႈ လႄႈၾၢႆႇၸွႆႈထႅမ် ဢွၼ်ၵၼ်တုၵ်းယွၼ်းႁႂ်ႈပိုတ်ႇသဵၼ်ႈတၢင်းပၼ်ၶိုၼ်း ၽူႈၸွႆႈထႅမ်ၵူၼ်းပၢႆႈၽေး ၵေႃႈၼိုင်ႈၵေႃႈ လၢတ်ႈၼင်ႇၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵျွၵ်ႉမႄးၼႆႉ ပၢင်ၸၢမ် ႁူဝ်ၵူၼ်းမီး 400 ပၢႆ၊ တီႈၵၢင်ႉၵၢင် ႁူဝ်ၵူၼ်း 500 ပၢႆ၊ တီႈဝတ်ႉၼမ်ႉၸဵတ်းလိၼ်း 35 ၵေႃႉလႄႈ တီႈဢုမ်းငႃး မီးႁူဝ်ၵူၼ်း 60 ပၢႆ ။

ၵူၼ်းပၢႆႈၽေးသိုၵ်း ဢၼ်ပၢႆႈဢွၵ်ႇမႃးသမ်ႉ တီႈပၢင်ၸၢမ် ပဵၼ်ၵူၼ်းဝၢၼ်ႈၵွင်းလွင်း ဝွင်း၊ တွင်ႇပလူဝ်ႉလႄႈ မၢၼ်ႈမႂ်ႇ။ တီႈ ၵၢင်ႉၵၢင်သမ်ႉ ပဵၼ်ၵူၼ်းဝၢၼ်ႈၸၢင်ႉႁိူၼ်း လႄႈမၢၼ်ႈၸၢၼ်း၊ တီႈဢုမ်းငႃးသမ်ႉပဵၼ်ၵူၼ်းမၢၼ်ႈမႂ်ႇ။ တီႈတေႃႉသၢင်ႇ သမ်ႉ ပဵၼ်ၵူၼ်းၼႂ်းပိုၼ်ႉတီႈ ပွတ်းဢိူင်ႇတေႃႉသၢင်ႇ ၸိူဝ်းၼႆႉ။

တီႈဝဵင်းၼမ်ႉတူႈၵေႃႈ ႁူဝ်ၵူၼ်း 100 ပၢႆ ပႆႇၸၢင်ႈပွၵ်ႈႁိူၼ်းယေး။ သွၼ်ႈဝႆႉ တီႈၵျွင်းၶမ်းမုင်ႈသႃႇ တင်းဝတ်ႉပူပ်ႉပႃႇရူင်ႇ ၼႆယဝ်ႉ။

လုင်းပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း လၢတ်ႈဝႃႈ – “တီႈမၢၼ်ႈၸၢမ်ႁဝ်းၶႃႈ ဢၼ်ပၢႆႈၵႂႃႇ မီး ဝႆႉတီႈ မိူင်းမူႉၼၼ်ႉတႄႉ ၸိူဝ်းပဵၼ်ၵူၼ်းထဝ်ႈ လုၵ်ႈဢွၼ်ႇတႄႉ ယူႇတီႈမိူင်းမူႇ ၵူၼ်းၼုမ်ႇသမ်ႉ ဢွၼ်မႃးႁဵတ်း ၽွင်း ၶၢဝ်း ၵၢင်ဝၼ်း ပေႃးၶမ်ႈမႃးသမ်ႉ ပွၵ်ႈမိူဝ်းၼွၼ်းတီႈၼၼ်ႈၶိုၼ်း။ ၵူၼ်းပၢႆႈၽေးသိုၵ်း တီႈပၢင်လူင်ၼၼ်ႉတႄႉ ဢမ်ႇ မီးယဝ်ႉ။ ၵူၺ်းၵႃႈ ဢၼ်ပၢႆႈၵႂႃႇတၢင်းသီႇပေႃႉတႄႉ မီးဝႆႉယူႇ” –  ဝႃႈၼႆ။

မိူဝ်ႈဝႃး တင်း မိူဝ်ႈၼႆႉမႃး သဵင်ၵွင်ႈ တၢင်းပွတ်းၼမ်ႉတူႈ ယဵၼ်လူင်းဝႆႉ ၵူၺ်းၵႃႈ သိုၵ်းတၢင်းသွင်ၾၢႆႇၶဵင်ႈၶႅင် ထႅမ် ႁႅင်းသိုၵ်းၼင်ႇၵၼ်ထႅင်ႈယူႇ။ ၼွၵ်ႈလိူဝ်ၼၼ်ႉ တီႈတၢင်းၵျွၵ်ႉမႄးၵေႃႈ မိူၼ်ၵၼ်။

ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉမႃး ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၼင်ႇၵၼ် TNLA,SSPP လႄႈ RCSS ပိုတ်ႇပၢင်တိုၵ်းၵၼ် တၢင်းၵျွၵ်ႉမႄး၊ သီႇပေႃႉလႄႈ ၼမ်ႉတူႈ ၸိူဝ်းၼႆႉမႃး ႁၢဝ်ႈႁႅင်း။

ထႅင်ႈၾၢႆႇၼိုင်ႈၵေႃႈ သိုၵ်းမၢၼ်ႈသမ်ႉ ႁႅၼ်းသိုၵ်းလေႃႇတိုၵ်း RCSS တီႈၸႄႈဝဵင်းသီႇပေႃႉ၊ လေႃႇတိုၵ်း SSPP, KIA  ထႅင်ႈ ၼႂ်းၵႄႈမူႇၸေႊ – ၵူတ်ႇၶၢႆ ၸိူဝ်းၼႆႉမႃးထႅင်ႈႁၢဝ်ႈႁႅင်း။