ပၢင်တၢၼ်ႈၶႆႈၸတ်းႁဵတ်းၵႂႃႇလၢႆလၢႆတီႈ ၼႂ်းပိုၼ်ႉတီႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး RCSS/SSA တုင်ႉၼိုင်ၵုမ်းၵမ် ၽွင်းငမ်း ၼႂ်းၸိုင်ႈတႆးပွတ်းၸၢၼ်း။
ဝၼ်းတီႈ 11/6/2026 တႄႇၶၢဝ်းယၢမ်းၵၢင်ၼႂ် 9 မူင်းထိုင်ဝၢႆးဝၼ်း 1 မူင်း ၸဝ်ႈၼႃႈတီႈ ၽွင်းငမ်းမၢႆ (3) ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ဢွၼ်ဢဝ်ၵူၼ်းမိူင်း ၼႂ်းၼႃႈတီႈႁူဝ်ၸုမ်း (3) တင်း ႁူဝ်ၸုမ်း (5) သေၸတ်းႁဵတ်း ပၢင်တၢၼ်ႈၶႆႈၵႂႃႇ တီႈဝတ်ႉဝိၸႃႇရီႇ ဝဵင်း မိူင်းၼၢႆး ၸိုင်ႈတႆးပွတ်းၸၢၼ်း ဝႃႈၼႆ။
တီႈပၢင်တၢၼ်ႈၶႆႈၼၼ်ႉ မီးၽူႈတၢၼ်ႈၶႆႈ 3 ၵေႃႉ ပဵၼ်ၸဝ်ႈၶူးသီႇရိထမ်ႇမ ဝတ်ႉႁူမ်ႈယဵၼ် ၼွင်ၽႃ၊ ၸရေး ၵေႃႇမိူင်း လႄႈ ၽူႈႁွင်ႉၽဵင်းၵႂၢမ်း ၼၢင်းသႅၼ်ပႅင်း ၵႃလီႉ၊ မီးၽူႈယႂ်ႇၵူၼ်းလူင် လႄႈ ၵူၼ်းမိူင်း ၼႂ်းၸႄႈဝဵင်းမိူင်းၼၢႆး ၼႂ်းဝဵင်း/ၼွၵ်ႈဝဵင်း မႃးၶဝ်ႈႁူမ်ႈထွမ်ႇငိၼ်း 1245 ၵေႃႉ ၼႆယဝ်ႉ။
ၽူႈမီးပုၼ်ႈၽွၼ်း ၼႂ်းၸုမ်းဢုပ်ႉပိူင်ႇပိုၼ်ႉတီႈ ၼႃႈတီႈ(3) ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး (RCSS/SSA) လၢတ်ႈဝႃႈ -“ ယိူင်းဢၢၼ်းဢၼ်လႆႈၸတ်းႁဵတ်းပၢင်တၢၼ်ႈၶႆႈၼႆႉ ၼင်ႇႁိုဝ် ၵူၼ်းမိူင်း ပေႃးတေၵၢင်းယၢၼ် ယႃႈမဝ်းၵမ် လႄႈ ႁႂ်ႈၼႂ်းပိုၼ်ႉတီႈ မီးလွင်ႈႁုၼ်ႈမုၼ်းၶိုၼ်ႈယႂ်ႇ။ ယွၼ်ႉ ၼၼ် ၸင်ႇလႆႈမွၵ်ႇႁွင်ႉဢဝ် ၸဝ်ႈၶူး လႄႈ ၽူႈတၢၼ်ႈၶႆႈၶဝ် မႃးသင်ႇသွၼ်ပၼ်ဢေႃးဝႃႇတ ပိုၼ်ၽႄႈ လႅၵ်ႈလၢႆႈ ပၼ်ပိုၼ်ႉႁူႉပၢႆးႁၼ်” ဝႃႈၼႆ။
ၼႂ်းပၢင်တၢၼ်ႈၶႆႈ တီႈဝဵင်းမိူင်းၼၢႆး ဝၼ်းမိူဝ်ႈၼႆႉ ၸဝ်ႈၶူးသီႇရိထမ်ႇမ ဝတ်ႉႁူမ်ႈယဵၼ် ၼွင်ၽႃ လႆႈ တၢၼ်ႈၶႆႈၵႂႃႇလွင်ႈ “ ႁႂ်ႈၵျႃႉမိူင်းၽီ ႁႂ်ႈလီမိူင်းၵူၼ်း လႄႈ လွင်ႈပိုၼ်းမိူင်းၼၢႆး” ၊ ၸရေး ၵေႃႇမိူင်းသမ်ႉ တၢၼ်ႈၶႆႈလွင်ႈ “ မင်ႇၵလႃႇတြႃး 38 သုတ်ႈ” လႄႈ ၽူႈႁွင်ႉၽဵင်းၵႂၢမ်း ၼၢင်းသႅၼ်ပႅင်း ၵႃလီႉ တၢၼ်ႈ ၶႆႈလွင်ႈ “ပၢႆးမွၼ်း” ။
ထဝ်ႈၸၢႆး ၵူၼ်းဝဵင်းမိူင်းၼၢႆးၵေႃႉၼိုင်ႈ လၢတ်ႈဝႃႈ “ပၢင်တၢၼ်ႈၶႆႈၸိူင်ႉၼႆ တီႈဝဵင်းမိူင်းၼၢႆးၼႆႉ ဢမ်ႇ တွၼ်ႉမီး။ ပွၵ်ႈၼႆႉပဵၼ်ၵမ်းဢွၼ်တၢင်းသုတ်း။ မႃးႁဵတ်းပၼ်ၸိူင်ႉၼႆၵေႃႈ မီးၽွၼ်းလီတႃႇ ၵူၼ်း မိူင်းႁဝ်းတေႉၶႃႈဢေႃႈ” ဝႃႈၼႆ။
ပၢင်တၢၼ်ႈၶႆႈ ၼႂ်းၼႃႈတီႈဢုပ်ႉပိူင်ႇမၢႆ (3) ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး(RCSS/ SSA) ၼႆႉ တေၸတ်းႁဵတ်းၵႂႃႇ တႃႇၶၢဝ်းတၢင်း 3 ဝၼ်း။ မိူဝ်ႈဝၼ်းတီႈ 10/6/2026 ၼႆႉ လႆႈၸတ်းႁဵတ်း ၵႂႃႇတီႈ သၢမ်ဢိူင်ႇပွတ်းၼိူဝ် ၸႄႈဝဵင်းလၢင်းၶိူဝ်း ၵူၼ်းမိူင်းမႃးၶဝ်ႈႁူမ်ႈထွမ်ႇငိၼ်း 1300 ပၢႆ၊ ၼႂ်းဝၼ်း တီႈ 11/6/2026 သမ်ႉ လႆႈၸတ်းႁဵတ်းတီႈ ဝဵင်းမိူင်းၼၢႆး မီးၵူၼ်းၶဝ်ႈထွမ်ႇငိၼ်း 1245 ၵေႃႉ လႄႈ ၼႂ်းဝၼ်းတီႈ 12/6/2026 ၼႆႉသမ်ႉ ၸတ်းႁဵတ်းၵႂႃႇတီႈ ဝၢၼ်ႈၵုင်း မူင်ႈ၊ ဢိူင်ႇၵုင်းမူင်ႈ ၸႄႈဝဵင်းၼမ်ႉၸၢင် လႆႈႁူႉၼင်ႇၼႆ။
ပၢႆၵမ်- CJ ထုင်ႉမိူင်းၼၢႆး
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ