သိုၵ်းမၢၼ်ႈ တင်း သိုၵ်းလွႆတဢၢင်း ၵႂႃႇႁူပ်ႉထူပ်းဢုပ်ႇဢူဝ်းၵၼ် တီႈဝဵင်းၶုၺ်ႊမိင်ႊ ၼႂ်းမိူင်းၶႄႇ ႁိုင်ၶၢဝ်းတၢင်း 2 ဝၼ်း ၾၢႆႇသိုၵ်းမၢၼ်ႈ တုၵ်းယွၼ်းဢဝ်ၶိုၼ်း ၸႄႈဝဵင်းၼမ်ႉၶမ်း၊ ၼမ်ႉတူႈ၊ မိူင်းလူင် လႄႈ မိူင်းငေႃႉ ၸိူဝ်းၸုမ်းသိုၵ်းလွႆတဢၢင်းၵုမ်းၵမ်ပၼ်ႇၵၢၼ်ၽွင်းငမ်းဝႆႉ ၼႆယဝ်ႉ။

ၾၢႆႇလူင်ပွင်ၸိုင်ႈမိူင်းၶႄႇ ယူႇၵၢင်ႁဵတ်းၶဵဝ်ပၼ်သေ ၽူႈမီးၸၼ်ႉ တင်းသွင်ၸုမ်း လႆႈၵႂႃႇႁူပ်ႉဢုပ်ႇၵၼ် မိူဝ်ႈဝၼ်းတီႈ 12-13/5/2026 ယွၼ်ႉသိုၵ်းမၢၼ်ႈလၢတ်ႈႁႂ်ႈသိုၵ်းလွႆတဢၢင်း ထွႆဢွၵ်ႇပၼ်ၶိုၼ်း ၼႂ်းၶၢဝ်းတၢင်း 1 လိူၼ် ၼႆယဝ်ႉ။

ၵူၼ်းမိူင်းပိုၼ်ႉတီႈၵေႃႉယူႇဝႆႉ ၼႂ်းဝဵင်းၼမ်ႉၶမ်း လၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈလဵဝ်ၼႆႉ ၼႂ်းပိုၼ်ႉတီႈႁဝ်း ဢမ်ႇမီးလွင်ႈလၢၵ်ႇလၢႆးသင် သိုၵ်းလွႆၶဝ်ၵေႃႈ တိုၵ်ႉတူင်ႉၼိုင်ၵႂႃႇမႃး ႁဵတ်းၵၢၼ်ၽွင်းငမ်းၶဝ်မိူၼ်ၵဝ်ႇၵူၺ်း။ ပၢၼ်ႇဢၼ်တေမႃးပိုတ်ႇမႂ်ႇတီႈၼႂ်းဝဵင်းၼၼ်ႉၵေႃႈ တိုၵ်ႉမီးႁၢင်ႈမၼ်းၵူၺ်း ၶဝ်ပႆႇပိုတ်ႇတေႉတေႉ” ဝႃႈၼႆ။

လႆႈႁူႉဝႃႈ တူဝ်တႅၼ်း တပ်ႉသိုၵ်းမၢၼ်ႈယိုတ်းမိူင်း ၸိူဝ်းၵႂႃႇႁူပ်ႉဢုပ်ႇဢူဝ်းတင်း သိုၵ်းလွႆတဢၢင်း ၼႂ်းမိူင်းၶႄႇၼၼ်ႉ ပႃးၸွမ်သိုၵ်းၵူဝ်ႇၵူဝ်ႇဢူး ၽူႈၸၼ်းၵၢၼ် တပ်ႉၼမ်ႉ တပ်ႉပႆလိၼ် တပ်ႉလူမ်း လႄႈ ၸွမ်သိုၵ်းၼီႇလိၼ်းဢွင်ႇၵႂႃႇၶဝ်ႈႁူမ်ႈ။ ၾၢႆႇတူဝ်တႅၼ်းတပ်ႉသိုၵ်းလွႆတဢၢင်း TNLA ၵေႃႈ ပဵၼ်ၸၼ်ႉၸွမ်သိုၵ်း ၵႂႃႇၶဝ်ႈႁူမ်ႈဢုပ်ႇဢူဝ်း ၼႆယဝ်ႉ။

မိူဝ်ႈပူၼ်ႉမႃး ၼႂ်းလိူၼ်ဢႄႊပရႄႊလ် ၵေႃႈသိုၵ်းမၢၼ်ႈ တင်း သိုၵ်းတဢၢင်း ႁူပ်ႉဢုပ်ႇၵၼ် တီႈႁူင်းႁႅမ်းၸၢင်ႉသွင်တူဝ် ၼႂ်းၵၢင်ဝဵင်းလႃႈသဵဝ်ႈယဝ်ႉၵမ်းၼိုင်ႈ။ ထိုင်မႃးႁူဝ်လိူၼ်မေႊ ၾၢႆႇသိုၵ်းလွႆတဢၢင်း လႆႈပွႆႇႁၢႆးသိုၵ်းပၼ်ၶိုၼ်းတီႈ သိုၵ်းမၢၼ်ႈ တႃႇ 110 ၵေႃႉၼႆ ၵူၼ်းမိူင်းပိုၼ်ႉတီႈ လၢတ်ႈၼင်ႇၼႆ။

“ၼႂ်းဝၼ်းၼၼ်ႉ ၶဝ်ပွႆႇမႃးပၼ် ၵူၼ်းသိုၵ်း 80 ပၢႆ ၊ ၾၢႆႇပလိၵ်ႈ 20 ပၢႆ တင်းသဵင်ႈၼႆႉ မီးယူႇ 100 ပၢႆ ၼႆႉဢေႃႈ။ ငိၼ်းဝႃႈ ပဵၼ်ၵူၼ်းၸိူဝ်းဢၼ်သိုၵ်းလွႆၶဝ် ၺွပ်းၵႂႃႇ မိူဝ်ႈၽွင်းၶဝ်ယိုဝ်းၵၼ် တၢင်းသီႇပေႃႉ၊ ၵျွၵ်ႉမႄး၊ မိူင်းၵုတ်ႈ၊ မိူင်းငေႃႉ၊ ၼမ်ႉၸၢင်၊ ၼမ်ႉတူႈ၊ ၼွင်မွၼ် ၸိူဝ်းၼႆႉ ၼႆယူႇဢေႃႈ” ဝႃႈၼႆ။

မိူဝ်ႈပီ 2025 လိူၼ်ဢွၵ်ႇထူဝ်ႊပိူဝ်ႊ 27-28 ဝၼ်းၼၼ်ႉ သိုၵ်းမၢၼ်ႈ တင်း သိုၵ်းတဢၢင်း ၵႂႃႇႁူပ်ႉဢုပ်ႇၵၼ် ၼႂ်းမိူင်းၶႄႇ ဝဵင်းၶုၺ်ႊမိင်ႊသေ ၾၢႆႇလူင်ပွင်ၸိုင်ႈမိူင်းၶႄႇ ပၼ်ႁႅင်းဢီးတေႃႇသိုၵ်းတဢၢင်းႁၢဝ်ႈႁႅင်းလႄႈ ထိုင်တီႈလႆႈၸုၼ်ႉပွႆႇထွႆတပ်ႉသိုၵ်းဢွၵ်ႇၶိုၼ်း ၼႂ်းဝဵင်းမိူင်းၵုတ်ႈ လႄႈ မိူင်းမိတ်ႈ ပၼ်ႁႂ်ႈသိုၵ်းမၢၼ်ႈၶဝ်ႈၵုမ်းၵမ် ပၼ်ႇၵၢၼ်ၽွင်းငမ်းၶိုၼ်းဝႆႉ ႁၢၼ်ႉတေႃႇထိုင်ယၢမ်းလဵဝ်။

ပိုၼ်ႉတီႈၸိူဝ်းၸုမ်းသိုၵ်းတဢၢင်းယၢမ်ႈၵုမ်းၵမ်ပၼ်ႇၵၢၼ်ၽွင်းငမ်းလႆႈ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇ သိုၵ်း 1027 မႃး မိူၼ်ၼင်ႇ ၸႄႈဝဵင်းသီႇပေႃႉ၊ ၵျွၵ်ႉမႄး လႄႈ ၼွင်ၶဵဝ်ၸိူဝ်းၼႆႉၵေႃႈ ယွၼ်ႉတၢင်းၸွႆႈထႅမ် လူင်ပွင်ၸိုင်ႈမိူင်းၶႄႇသေ ၾၢႆႇသိုၵ်းမၢၼ်ႈၶဝ်ႈၵုမ်းၵမ်ပၼ်ႇ ၵၢၼ်ၽွင်းငမ်းဝႆႉၶိုၼ်း ၼႆယဝ်ႉ။

ၵဵဝ်ႇလူၺ်ႈ ၶေႃႈတႅပ်းတတ်း ပၢင်ႁူပ်ႉထူပ်းဢုပ်ႇဢူဝ်း သိုၵ်းမၢၼ်ႈ တင်း သိုၵ်းလွႆတဢၢင်း တီႈမိူင်းၶႄႇ ၼႂ်းၵၢင်လိူၼ်မေႊ ပီ 2026 ၼႆႉတႄႉ ပႆႇမီးၸုမ်းလႂ်ပိုၼ်ၽၢဝ်ႇဢွၵ်ႇမႃး ပၢၵ်ႇလၢတ်ႈပဵၼ်တၢင်းၵၢၼ်။