လုၵ်ႈဢွၼ်ႇယိင်း လုၵ်ႈမႄႈတႆး ၵေႃႉၺႃးၸၢၵ်ႇမၢၵ်ႇယၢမ်းတႅၵ်ႇၽူင်ႉသႂ်ႇ တီႈဝၢၼ်ႈၵွင်းတပ်ႉ ဝဵင်းၼမ်ႉၶမ်း ၼၼ်ႉ ယၢမ်းလဵဝ် လႆႈယူတ်းယႃတူဝ်ဝႆႉတီႈႁူင်းယႃလူင် ဝဵင်းၼမ်ႉၶမ်း လူဝ်ႇတၢင်းၵမ်ႉၸွႆႈဝႆႉယူႇ ၼႆယဝ်ႉ။

ဝၢႆးလင် ႁူင်းၵဵပ်းယၢမ်း ၶွင်ၸုမ်းသိုၵ်းလွႆ (တဢၢင်း) TNLA ၵိုင်ႉၵၢင်ႉတႅၵ်ႇၽူင်ႉၵႂႃႇယဝ်ႉ ၵူၼ်းမိူင်းၸိူဝ်းယူႇ သဝ်းၼႂ်းပိုၼ်ႉတီႈ တႃႇ 15 ဝၢၼ်ႈ ႁူပ်ႉတၢင်းယၢပ်ႇၽိုတ်ႇ လွင်ႈယူႇသဝ်း လွင်ႈၵိၼ်ယမ်ႉ ဝႆႉႁၢဝ်ႈႁႅင်း ၼႆယဝ်ႉ။

ယိင်းဢွၼ်ႇ ၸိုဝ်ႈႁွင်ႉ ၼၢင်းမူၺ်ၶမ်း ဢႃႇယု 6 ၶူပ်ႇ ယူႇဝၢၼ်ႈၵွင်းတပ်ႉ ၵေႃႉမၢတ်ႇၸဵပ်းၸၢၵ်ႇၽူင်ႉပိဝ်သႂ်ႇ ၸွမ်းၼႃႈ ၸွမ်းတႃ လႄႈ မိုဝ်း တင်း တိၼ်ၸိူဝ်းၼႆႉႁၢဝ်ႈႁႅင်းၼၼ်ႉၵေႃႈ လႆႈၵႂႃႇယူတ်းယႃတူဝ်ဝႆႉ တီႈႁူင်းယႃလူင် ဝဵင်းၼမ်ႉၶမ်းသေ ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇလႆႈႁပ်ႉတၢင်းၵမ်ႉၸွႆႈ ပဵင်းပေႃးတႃႇယူတ်းယႃတူဝ် ႁႂ်ႈၶႅၼ်းလီငၢမ်း ၼႆယဝ်ႉ။

ၸၢႆးၼုမ်ႇ ဢႃႇယု 40 ပီပၢႆ ၵေႃႉၵႂႃႇၸွႆႈထႅမ် ၵူၼ်းႁူပ်ႉၽေး ႁူင်းယၢမ်းတႅၵ်ႇ တီႈဝဵင်းၼမ်ႉၶမ်းၼၼ်ႉ လၢတ်ႈၼႄတီႈၽူႈတွႆႇႁွၵ်ႈဝႃႈ “ မိူဝ်ႈႁူင်းယၢမ်းတႅၵ်ႇၵႂႃႇၼႆႉ ၵူၼ်းဝၢၼ်ႈဢၼ်ပဵၼ်တႆး လူႉတၢႆၵႂႃႇၸွမ်း 1 ၵေႃႉ မၢတ်ႇၸဵပ်းၵႂႃႇႁၢဝ်ႈႁႅင်း 1 ၵေႃႉ။ ဢၼ်လူႉတၢႆၵႂႃႇၼၼ်ႉတႄႉ ၸိုဝ်ႈႁွင်ႉၼၢႆးထွၼ်ႉ ဢႃႇယု 70 ယဝ်ႉၶႃႈ။ ၵေႃႉမၢတ်ႇၸဵပ်းႁႅင်းၼႆႉဢေႃႈ သမ်ႉပဵၼ်လုၵ်ႈဢွၼ်ႇႁႄၼႆ ၾၢႆႇၸဝ်ႈၼႃႈတီႈသိုၵ်းလွႆၶဝ်ၵေႃႈ ဢမ်ႇမႃးတူၺ်း ဢမ်ႇၸွႆႈသင်တေႉတေႉဝႃႈဝႃႈ။ မိူဝ်ႈဝၼ်းပုၼ်ႉၼၼ်ႉ မီးၸုမ်းသိုၵ်း SSPP ၶဝ်ၵႂႃႇၸွႆႈထႅမ်ဝႆႉ ၵႃႈယူတ်းယႃတူဝ် 10 သႅၼ်ပျႃး။ ၶဝ်သမ်ႉယူႇဝႆႉတီႈ မၢၼ်ႈၵွင်းတပ်ႉ (ၽၢႆႇတႆး) လႄႈ တိူဝ်ႉၺႃးၼမ်ဢိတ်းၼိုင်ႈ။ လုၵ်ႈဢွၼ်ႇၼႆႉ လႆႈယဵပ်ႉတီႈၸွမ်းၼႃႈမၼ်းတႃႇ 45 ၶဵမ်ၼႆႉဢေႃႈ။ ၸွမ်းမိုဝ်း ၸွမ်း တူဝ်ၶိင်းဢွၼ်ႇမၼ်းၼၢင်းၵေႃႈ ၺႃးၼမ်ႁႅင်းဝႆႉ” ဝႃႈၼႆ။

ၼၢင်းမူၺ်ၶမ်းၼႆႉ ပဵၼ်လုၵ်ႈယိင်း ၸၢႆးၼုမ်ႇမၢဝ်း လႄႈ ၼၢင်းငိုၼ်းလူႇ ယူႇဝၢၼ်ႈၵွင်းတပ်ႉ (ၽၢႆႇတႆး) ၵပ်းသိုပ်ႇတိတ်းတေႃႇၸွႆႈထႅမ်လႆႈတီႈ ၵေႃႉပဵၼ်မႄႈ ၼၢင်းငိုၼ်းလူႇ 09680416075 လႆႈယူႇ။

လွင်ႈၸိူဝ်းၼႆႉ ယူႇတီႈၸုမ်းသိုၵ်း TNLA လႄႈၶွမ်ႊမတီႊ ၾၢႆႇၸွႆႈထႅမ် ဢမ်ႇပႆႇသႂ်ႇၸႂ်ၸွႆႈထႅမ် ပၼ်သင်တႄႉတႄႉ ဝႃႈဝႃႈ။ မီးပီႈၼွင်ႉၼႂ်းဝဵင်းၼမ်ႉၶမ်း မူႇၸေႊ ၸေႊၵဝ်ႇ ၸိူဝ်းၼႆႉ ၵမ်ႈၽွင်ႈ မႃးယိုၼ်ႈမႃးၸွႆႈယူႇ ၽွင်ႈသေတႃႉ ပႆႇလႆႈ လွင်ႈၸွႆႈထႅမ်ၵုမ်ႇထူၼ်ႈ။ တေႃႇထိုင်ၼႂ်း ဝၼ်းတီႈ 4/6/2026 ၼၼ်ႉၵေႃႈ ၽူႈမီးပုၼ်ႈၽွၼ်း ၼႂ်းပႃႇတီႇမႂ်ႇသုင် ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) ၸင်ႇၵႂႃႇၸွႆႈထႅမ်ပၼ်။

ၽူႈမီးပုၼ်ႈၽွၼ်းၼႂ်း SSPP/SSA လၢတ်ႈဝႃႈ – ယူႇတီႈ SSPP/SSA သေၸွႆႈထႅမ် ပီႈၼွင်ႉၵူၼ်းမိူင်းၼမ်ႉၶမ်း ၸိူဝ်းယူႇဝၢၼ်ႈၵွင်းတပ်ႉ (တႆး/လွႆ) ငိုၼ်း 200 သႅၼ်ပျႃး လႄႈ ၶဝ်ႈသၢၼ် 40 ထူင်၊ တႃႇပီႈၼွင်ႉမၢၼ်ႈၶမ်း 156 ႁိူၼ်း 70 သႅၼ်ပျႃး၊ ဝၢၼ်ႈပၢင်ႇလူင် 90 ႁိူင်း 50 သႅၼ်ပျႃး ၶဝ်ႈသၢၼ် 10 ထူင် ၊ ဝၢၼ်ႈၵွင်းၼွင်ၸၢင်ႉ 110 ႁိူၼ်း 50 သႅၼ်ပျႃး၊ ဝၢၼ်ႈ ၸေႊႁႆး 31 ႁိူၼ်း – 40 သႅၼ်ပျႃး၊ ဝၢၼ်ႈပၢင်ႇထူဝ်ႇလိၼ် 30 ႁိူၼ်းပၢႆ တႃႇငိုၼ်း 40 သႅၼ်ပျႃး လႄႈ ၵမ်ႉၸွႆႈပၼ်ၵူၼ်းၼႂ်းမုင်ႉႁေႃႁိူၼ်း ၸိုဝ်ႈႁွင်ႉ ၼၢႆးထွၼ်ႉ ယူႇဝၢၼ်ႈပွၵ်ႉၸရေးတၢၼ်း ၵေႃႉလူႉတၢႆၵႂႃႇၼၼ်ႉ 10 သႅၼ်ပျႃး လႄႈ တႃႇ ၼၢင်းမူၺ်ၶမ်း ဢႃႇယု 6 ၶူပ်ႇ ၵေႃႉမၢတ်ႇၸဵပ်းသေ ၶိုၼ်ႈႁူင်းယႃဝႆႉၼၼ်ႉ 10 သႅၼ်ပျႃး ႁူမ်ႈသဵၼ်ႈ ၾၢႆႇ SSPP/SSA ၵမ်ႉၸွႆႈငိုၼ်းဝႆႉတႃႇ 470 သႅၼ်ပျႃး လႄႈ ၶဝ်ႈသၢၼ် 50 ထူင် ၼႆယဝ်ႉ။

ဝၢၼ်ႈၸိူဝ်းဢၼ်ၺႃးၸၢၵ်ႇယၢမ်းတႅၵ်ႇၾူင်ႉ လႄႈ ႁိူၼ်းယေးလူႉၵွႆ ဢိၵ်ႇပႃး ၵူၼ်းမိူင်းမၢတ်ႇၸဵပ်းၵႂႃႇ တီႈၼႂ်းၸႄႈဝဵင်းၼမ်ႉၶမ်းၼႆႉ ပဵၼ်ဝၢၼ်ႈၵွင်းတပ်ႉ တႆး၊ ဝၢၼ်ႈၵွင်းတပ်ႉ လွႆ၊ ဝၢၼ်ႈပၢင်ႇတလူဝ်း၊ မၢၼ်ႈၶမ်း ၊ ဝၢၼ်ႈပၢင်လူင် ၊ ဝၢၼ်ႈၵွင်းၼွင်ၸၢင်ႉ၊ ဝၢၼ်ႈပၢင်ႇထူဝ်ႇလိၼ်၊ ဝၢၼ်ႈၼွင်၊ ဝၢၼ်ႈၵုင်းသႃႇ၊ ပွၵ်ႉဝဵင်းသႃႇ၊ ပွၵ်ႉၸရေးတၢၼ်း ၊ ဝၢၼ်ႈႁူဝ်ၼႃး၊ ပွၵ်ႉလူင်၊ ပွၵ်ႉမူဝ်ၶမ်း လႄႈ ၵျွင်းတေႃႇၵၢင်မိူင်း ၸဵမ်ၸိူဝ်းၼႆႉ ဝႃႈၼႆ။

ယၢမ်းလဵဝ် ၼင်ႇႁိုဝ် ၵူၼ်းမိူင်း ၸိူဝ်းထူပ်းၽေးႁူင်းၵဵပ်းယၢမ်း တႅၵ်ႇသႂ်ႇၼၼ်ႉ တေလႆႈႁပ်ႉတၢင်းၵမ်ႉၸွႆႈၼၼ်ႉ ၸုမ်းၵေႃႇမတီႇ ၼႂ်းပွၵ်ႉၼႂ်းဢိူင်ႇၸႄႈဝဵင်းၼမ်ႉၶမ်း ႁူမ်ႈၵၼ် တင်ႈဝႆႉ ဢွင်ႈတီႈႁပ်ႉတၢင်းၵမ်ႉၸွႆႈယူႇ 3 တီႈ။ မၢၼ်ႈၵွင်းတပ်ႉ ၽၢႆႇတႆး၊ မၢၼ်ႈၵွင်းတပ်ႉ ၽၢႆႇလွႆ ၊ မၢၼ်ႈပၢင်ႇလူင် ၸဵမ်ၸိူဝ်းၼႆႉ။

သင်ၶႂ်ႈတိတ်းတေႃႇ ၵပ်းသိုပ်ႇလူႇတၢၼ်းၵႂႃႇတီႈ ပီႈၼွင်ႉၵူၼ်းမိူင်းမၢၼ်ႈပၢင်ႇလူင် ၸိူဝ်းႁူပ်ႉၺႃးၽေးႁူင်းယၢမ်းတႅၵ်ႇၾူင်ႉယူႇၼၼ်ႉၸိုင် တိတ်းတေႃႇၵပ်းသိုပ်ႇၵႂႃႇလႆႈတီႈ ၸုမ်းၵေႃပွင်ၵၢၼ်ၸွႆႈထႅမ်ၵူၼ်းႁူပ်ႉၽေးႁူင်းယၢမ်းတႅၵ်ႇ တေႃႇၼၢင်းၶိၼ်ႇတၢၼ်း 09680833792 ၊ ၸၢႆးမျိၼ်ႉဢွင်ႇ 09672426474 ၊ ၸၢႆးတၢၼ်းဢွင်ႇ – 09689217545 လႆႈၵမ်းသိုဝ်ႈ။

ၵူၼ်းမိူင်းၸိူဝ်းလႆႈႁူပ်ႉ ၽေးႁူင်းၵဵပ်းယၢမ်းတႅၵ်ႇ ၼႂ်းဝဵင်းၼမ်ႉၶမ်းၼႆႉ မီးၸၢဝ်းၶိူဝ်းတႆး၊ ၸၢဝ်းၶိူဝ်းၶၢင်၊ ၸၢဝ်းၶိူဝ်းလႃးႁူႇ၊ ၸၢဝ်းၶိူဝ်းၶႄႇ လႄႈ ၸၢဝ်းၶိူဝ်းလွႆ (တဢၢင်း) ၸဵမ်ၸိူဝ်းၼႆႉသေတႃႉ ၵိူတ်ႇပဵၼ်ပၼ်ႁႃ ႁူင်းယၢမ်းတႅၵ်ႇၵႂႃႇ ႁိုင်ၼိုင်ႈဝူင်ႈယဝ်ႉ ၾၢႆႇၵူၼ်းမိူင်းၸိူဝ်းလႆႈႁူပ်ႉၽေးသေ တူၵ်းတၢင်းယၢပ်ႇၽိုတ်ႇယူႇၼႆႉ ဢမ်ႇပႆႇလႆႈႁပ်ႉတၢင်းၵမ်ႉၸွႆႈ ႁႂ်ႈၽဵင်ႇပဵင်း ၵၼ်ၵူႈဝၢၼ်ႈ ၼႆယဝ်ႉ။

ၼၢင်းယိင်း ဢႃႇယု 40 ပၢႆ ၵေႃႉယူႇၼႂ်းဝဵင်းၼမ်ႉၶမ်းသေ တူင်ႉၼိုင်ႁဵတ်းသၢင်ႈပၼ်လွင်ႈၵမ်ႉၸွႆႈ ၵူၼ်းႁူပ်ႉၽေး လၢတ်ႈၼႄတီႈၽူႈတွႆႇႁွၵ်ႈဝႃႈ “ၸဝ်ႈၼႃႈတီႈၾၢႆႇသိုၵ်းလွႆ (တ ဢၢင်း) ၶဝ် ဢမ်ႇမႃးတူၺ်း ဢမ်ႇမႃး ၵမ်ႉၸွႆႈသင် တီႈၸွမ်းဝၢၼ်ႈတႆး၊ ဝၢၼ်ႈၶၢင် ၸိူဝ်းၼႆႉ။ ၾၢႆႇဢွင်ႈႁပ်ႉတၢင်းၵမ်ႉၸွႆႈ တၢင်းလွႆ (တဢၢင်း) ၶဝ်တႄႉ ပိူၼ်ႈၵႂႃႇၸွႆႈၼမ်တေႉၼမ်ဝႃႈယဝ်ႉ။ ၵူၺ်းတၢင်းၵမ်ႉၸွႆႈ ဢၼ်ၶဝ်လႆႈမႃးၼၼ်ႉ ဢမ်ႇပႆႇႁၼ်ၶဝ်မႃး ၸႅၵ်ႇပၼ်ၶိုၼ်း ၵူၼ်းဝၢၼ်ႈတၢင်ႇၸၢဝ်းၶိူဝ်း။ ႁဝ်းၵႂႃႇႁၼ်ၶဝ် ၸႅၵ်ႇၶဝ်ႈၼမ်ႉတၢင်းၵိၼ်၊ ၽႃႈယၢင်ႈ ၶိူင်ႈၸႂ်ႉၶူဝ်းတိုဝ်း တႃႇၸႂ်ႉ တိုဝ်း ၸိူဝ်းၼၼ်ႉ ပၼ်ၵူၼ်းၸၢဝ်းၶိူဝ်းလွႆၶဝ်ယူႇ။ မိူၼ်ၼင်ႇ ၶၢင် လႄႈ တႆးႁဝ်း ၵႂႃႇယွၼ်းသမ်ႉ ၶဝ်ဢမ်ႇပၼ်။ ၶဝ်ဝႃႈ ဢမ်ႇပႃးၼႂ်းသဵၼ်ႈမၢႆၶဝ်ၼႆႁႄ လိုပ်ႈၼၢႆးၶၢင် ၼၼ်ႉဢွၵ်ႇမႃး ႁဝ်းႁၼ်ဢဝ် တႂ်ႈၼႃႈတႂ်ႈတႃလီလီယဝ်ႉ” ဝႃႈၼႆ။

လႆႈႁူႉဝႃႈ တင်ႈတႄႇ ဝၼ်းတီႈ 4/6/2026 ထိုင် 7/6/2026 ၼႆႉ ၾၢႆႇၵေႃႇမတီႇၸွႆႈထႅမ် (ၾၢႆႇလွႆ) ၶဝ်ၵဵပ်းလႆႈဝႆႉၼႆႉ ငိုၼ်းမၢၼ်ႈ မီးမွၵ်ႈ 7 ႁဵင်သႅၼ်ပျႃး လႄႈ ငိုၼ်းၶႄႇ မွၵ်ႈ 4 မိုၼ်ႇယႂၢၼ်ႊယဝ်ႉၼႆ ၵူၼ်းတူင်ႉၼိုင်ၸွမ်းၼႂ်းၵေႃႇမတီႇ ၾၢႆႇပႂ်ႉၵဵပ်းငိုၼ်းၵမ်ႉၸွႆႈ တႃႇပူၵ်းပွင်ၶိုၼ်းႁိူၼ်းယေး ၼႂ်းဝၢၼ်ႈၵွင်းတပ်ႉ လၢတ်ႈၼင်ႇၼႆ။

ႁူင်းၵဵပ်းယၢမ်းၼၼ်ႉ သိုၵ်းလွႆၶဝ်တိုၵ်ႉမႃးတင်ႈဝၢႆးလင် ၶဝ်ယိုတ်းလႆႈဝဵင်းၼမ်ႉၶမ်းသေ ပၼ်ႇၵၢၼ်ၽွင်းငမ်းၼႆႉၵူၺ်း ။ မိူဝ်ႈဢွၼ် တၢင်း ဢွင်ႈတီႈၼႆႉ ပဵၼ်ဝႆႉလွၵ်းလိၼ်ပဝ်ႇ ။ ၸဝ်ႈ ၶွင်တီႈလိၼ်ၼႆႉ ပဵၼ်ၵူၼ်းသိုၵ်းပျီႇတူႉၸိတ်ႉ ၸၢဝ်းၶိူဝ်းၶႄႇ။ ၶႄႇၸိူဝ်းမႃးယူႇသဝ်း ႁဵတ်းၵၢၼ်ဝႆႉ ၼႂ်းႁူင်းၵၢၼ်ၵဵပ်းယၢမ်းၶွင် သိုၵ်းလွႆ (တဢၢင်း) TNLA ၼႆႉ ဢမ်ႇၸႂ်ႈၶႄႇ ၼႂ်းမိူင်းတႆးၵူၺ်း မီးပႃးၶႄႇ ၸိူဝ်းယူႇၼႂ်းမိူင်းၶႄႇလူင်ထႅင်ႈ ၵူၼ်းပိုၼ်ႉတီႈလၢတ်ႈၼင်ႇၼႆ။

ၵွပ်ႈၼႆလႄႈ ၼႂ်းႁူင်းၵၢၼ်ၵဵပ်းယၢမ်းၼၼ်ႉ ပဵၼ်ၽႂ်ယူႇဝၢၼ်ႈလႂ်ဝဵင်းလႂ် ႁူဝ်ၼပ်ႉတႅတ်ႈတေႃးတင်းမူတ်း ဢမ်ႇပႆႇၸၢင်ႈႁူႉလႆႈ။ ၼွၵ်ႈလိူဝ်ၵဵပ်းယၢမ်း ဝႆႉယဝ်ႉ ပဵၼ်ဢွင်ႈတီႈႁဵတ်းၵၢၼ်သင်တေႉတေႉၼႆ ဢမ်ႇလႆႈႁၼ်ၸုမ်းသိုၵ်းလွႆတဢၢင်း TNLA ဢွၵ်ႇမႃးၸီႉ ၸႅင်ႈ ႁႂ်ႈၵူၼ်းမိူင်းပေႃးလႆႈႁူႉၸွမ်း လွင်ႈတၢင်းတႅတ်ႈတေႃး ။