ႁူင်းၵဵပ်းယၢမ်း ၶွင်ၸုမ်းသိုၵ်းလွႆ (တဢၢင်း) TNLA ဢၼ်တင်ႈဝႆႉၼႂ်းၵၢင်ဝၢၼ်ႈၵွင်းတပ်ႉ ၾၢႆႇဢွၵ်ႇၵၢင်ဝဵင်း ၼမ်ႉၶမ်း ၵိုင်ႉၵၢင်ႉတႅၵ်ႇၽူင်ႉ ႁၢဝ်ႈႁႅင်းမိူဝ်ႈႁၢင်လိူၼ်မေႊပူၼ်ႉမႃးၼႆႉ ႁဵတ်းႁႂ်ႈႁိူၼ်းယေး လူႉၵွႆၵႂႃႇမွၵ်ႈ 1000 လင်လႄႈ ၵူၼ်းမိူင်းၸိူဝ်း ယူႇၼႂ်းပိုၼ်ႉတီႈ လူႉတၢႆမၢတ်ႇၸဵပ်းၵႂႃႇၸွမ်း 100 ပၢႆ ပႆႇလႆႈတၢင်းၸွႆႈထႅမ်တႃႇပူၵ်းပွင်ၶိုၼ်းတီႈယူႇႁိူၼ်းယေး။

မိူဝ်ႈဝၼ်းတီႈ 31/5/2026 ယၢမ်းၵၢင်ဝၼ်း 12 မူင်းၶိုင်ႈ ႁူင်းၵဵပ်းယၢမ်း ၵိုင်ႉၵၢင်ႉတႅၵ်ႇ ႁိူၼ်း ယေး ၵူၼ်းမိူင်းၼႂ်းဝၢၼ်ႈၵွင်းတပ်ႉဝၢၼ်ႈလဵဝ်ၵူၺ်း လူႉၵွႆၵႂႃႇမွၵ်ႈ 400 လင်။ ႁိူၼ်းယေးႁိမ်းႁွမ်းဝၢၼ်ႈၵွင်းတပ်ႉဢိၵ်ႇ တၢင်ႇ ဝၢၼ်ႈၼႂ်းၸႄႈဝဵင်းၼမ်ႉၶမ်း လူႉၵွႆၵႂႃႇဢမ်ႇယွမ်း 200 လင် ။

ၼၢင်းယိင်းဢႃႇယု 40 ပၢႆ ၵေႃႉယူႇဝႆႉ ၼႂ်းဝဵင်းၼမ်ႉၶမ်း လၢတ်ႈၼႄတီႈၽူႈတွႆႇႁွၵ်ႈဝႃႈ “ၵွၼ်ႇမိူဝ်ႈႁူင်းယၢမ်း ပႆႇတႅၵ်ႇၼၼ်ႉ ၼင်လိၼ်မိူင်းသၼ်ႇ မိူၼ်ၼင်ႇဢိင်ႇသၼ်ႇၼၼ်ႉၵႂႃႇၵမ်းၼိုင်ႈ။ ယူႇတၢၼ်ႇတၢၼ်ႇမၼ်း ၵေႃႈ လႆႈငိၼ်းသဵင်တႅၵ်ႇမႃးႁႅင်းတေႉတေႉ။ ႁဵတ်းႁိုဝ်တႅၵ်ႇပဵၼ်ယွၼ်ႉသင်ၼႆၵေႃႈ တေႃႇထိုင်မိူဝ်ႈလဵဝ် ဢမ်ႇ မီးၽႂ်ႁူႉတေႉတေႉ။ ႁူင်းၵဵပ်းယၢမ်းၶွင် TNLA ၶဝ်တႅၵ်ႇၵႂႃႇၼႆႉ ယွၼ်ႈႁႅင်း ယွၼ်ႈၵႂႃႇၵႆတေႉတေႉဢေႃႈ။ တေႃႈၼင်ႇမူႇၸေႊၼႆႉ ယၢၼ်ၵႆၵၼ်တင်းႁဝ်း မွၵ်ႈ 20 လၵ်းၸိူဝ်းၼႆႉၵေႃႈ ယင်းလႆႈႁပ်ႉလွင်ႈတုမ်ႉယွၼ်ႈ ပႃး။ တၢင်းမိူင်းမၢဝ်းၸိူဝ်းၼႆႉၵေႃႈ ယွၼ်ႈထိုင်ပႃးထႅင်ႈ။ မၢင်ၸိူဝ်း မၢၼ်ႇၽၵ်းတူႁူးလႅင်းၶဝ် တႅၵ်ႇပႃးၸိူဝ်းၼႆႉ။ ႁိူၼ်းယေးဢၼ်လူႉၵွႆၵႂႃႇႁႅင်းႁႅင်း ထိုင်တီႈတေလႆႈသၢင်ႈၶိုၼ်းမႂ်ႇမႂ်ႇၼႆႉ တီႈၵွင်းတပ်ႉလၢႆလၢႆၵူၺ်း မီးမွၵ်ႈ 80 လင် ၼႂ်းၼၼ်ႉ တေပႃးႁိူၼ်းတႆးႁဝ်းယူႇမွၵ်ႈ 10 လင်ဢေႃႈ။ ပေႃးၼပ်ႉၸိူဝ်းလူႉၵွႆ တင်းဝဵင်း တင်းသဵင်ႈတႄႉ တေမီးယူႇမွၵ်ႈ 1000 လင်ၸိူဝ်းၼႆႉယူႇ” ၼႆယဝ်ႉ။

မိူၼ်ၼင်ႇၵျွင်းမုၼ်ၸဝ်ႈတႆးလင်ၼိုင်ႈ တီႈမၢၼ်ႈၶမ်း ၼၼ်ႉၵေႃႈ လူႉၵွႆလႅဝ်ၽႅဝ်ႉ – ပေႃးတေၶိုၼ်းမႄးၵေႃႇသၢင်ႈၼႆႉ တေလႆႈၸႂ်ႉငိုၼ်းဢမ်ႇယွမ်း 1000 သႅၼ်ပျႃး – ၵူၼ်းပိုၼ်ႉတီႈလၢတ်ႈၼင်ႇၼႆ။

ယၢမ်းလဵဝ် တီႈဝၢၼ်ႈၵွင်းတပ်ႉၼၼ်ႉ မီးၶွမ်ႊမတီႊၸွႆႈထႅမ်တႂ်ႈသိုၵ်းလွႆတဢၢင်းၵုမ်းၵမ် တင်ႈဝႆႉႁူင်းၵဵပ်းငိုၼ်း ၵမ်ႉၸွႆႈ။ သင်ဝႃႈ ၸဝ်ႈတႃႇၼတီႈၸမ်/ၵႆ ၶႂ်ႈမႃးၵမ်ႉၸွႆႈလူႇတၢၼ်းၸိုင် လႆႈၵႂႃႇပၼ်တီႈသုမ်ႉၼၼ်ႉၵမ်းသိုဝ်ႈသေ ယူႇတီႈၶွမ်ႊမတီႊၼၼ်ႉၸင်ႇၶိုၼ်းၸႅၵ်ႇပၼ်ၵူၼ်းဝၢၼ်ႈလႄႈႁဵတ်းႁႂ်ႈၸဝ်ႈတႃႇၼ ၵမ်ႈၽွင်ႈႁၼ်ထိုင်ဝႃႈ မီးလွင်ႈၸႅၵ်ႇပၼ်ဢမ်ႇၽဵင်ႇပဵင်း – ၼႆၸိူဝ်းၼႆႉ။လွင်ႈၸိူဝ်းၼႆႉၵေႃႈႁဵတ်းႁႂ်ႈတုမ်ႉယွၼ်ႈ ၵူၼ်းဝၢၼ်ႈၼၢၼ်းလႆႈလွင်ႈၵမ်ႉၸွႆႈ ၵူၼ်းပိုၼ်ႉတီႈလၢတ်ႈၼင်ႇၼႆ။

ၵူၼ်းမိူင်းၸိူဝ်းလႆႈႁူပ်ႉ ၽေးႁူင်းၵဵပ်းယၢမ်းတႅၵ်ႇ ၼႂ်းဝဵင်းၼမ်ႉၶမ်းၼႆႉ မီးၸၢဝ်းၶိူဝ်းတႆး၊ ၸၢဝ်းၶိူဝ်းလွႆ (တ ဢၢင်း) ၸၢဝ်းၶိူဝ်းၶၢင် ၊ ၸၢဝ်းၶိူဝ်းလႃးႁူႇ လႄႈ ၸၢဝ်းၶိူဝ်းၶႄႇ ၸဵမ်ၸိူဝ်းၼႆႉ ႁၢၼ်ႉတေႃႇထိုင်ယၢမ်းလဵဝ် ၵေႃႈ တိုၵ်ႉလူဝ်ႇတၢင်းၸွႆႈထႅမ်ဝႆႉႁၢဝ်ႈႁႅင်းယူႇ။ ဢၼ်ၺႃးလွင်ႈလူႉသုမ်းတီႈဝၢၼ်ႈၵွင်းတပ်ႉၼၼ်ႉ ပဵၼ်ၵူၼ်းဝၢၼ်ႈ ၸၢဝ်းလွႆတဢၢင်းၵမ်ႈၼမ် ၵူၼ်းမိူင်းပိုၼ်ႉတီႈ လၢတ်ႈၼင်ႇၼႆ။

ၸၢႆးၼုမ်ႇ ၵေႃႉတူင်ႉၼိုင်ၸွႆႈထႅမ် တႃႇၵူၼ်းမိူင်းထူပ်းၽေးႁူင်းယၢမ်းတႅၵ်ႇၽူင်ႉၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “သဵၼ်ႈမၢႆၵူႈလွင်ႈလွင်ႈၼႆႉ မိူဝ်ႈလဵဝ်တႃႇတေၵဵပ်းမၼ်းယၢပ်ႇႁႅင်းၼႃႇ ပႆႇၸၢင်ႈလၢတ်ႈလႆႈ တႅတ်ႈတေႃးၶႃႈ။ တီႈႁူင်းယႃၵေႃႈ ၶဝ်ဢမ်ႇပၼ်ႁဝ်းၶႃႈ ၶဝ်ႈၵႂႃႇၵဵပ်းၶေႃႈမုၼ်းလီလီ။ မိူဝ်ႈတႄႇတႄႇပဵၼ်သေ လႆႈတူဝ်တၢႆ ၵႂႃႇၵမ်းသိုဝ်ႈၼႆႉ မီးယူႇ 30 ပၢႆ ၽႅဝ်ႁူင်းယႃၵႂႃႇႁႄ လႆႈတၢႆၵႂႃႇထႅင်ႈၼၼ်ႉ မီးယူႇ 40 ပၢႆယဝ်ႉဢေႃႈ။ ၼႂ်းဢၼ်လူႉတၢႆၵႂႃႇ 70 ပၢႆၼၼ်ႉ ပႃးပီႈၼွင်ႉတႆး ၵေႃႉၼိုင်ႈဢေႃႈ။ မိူဝ်ႈလဵဝ် လုၵ်ႈဢွၼ်ႇတႆးႁဝ်းၶႃႈ ဢၼ်မၢတ်ႇၸဵပ်းဝႆႉယူႇႁၢဝ်ႈႁႅင်းသေ ပႆႇလႆႈလူင်းႁူင်းယႃၵေႃႈ မီးဝႆႉယူႇ ၼိုင်ႈၵေႃႉၶႃႈ”။

“ယွၼ်ႉသင်လႄႈ မၼ်းပႆႇၸၢင်ႈႁူႉသဵၼ်ႈမၢႆမၼ်းတႅတ်ႈတေႃးၼႆၸိုင် ၸွမ်းၼင်ႇႁဝ်းၶႃႈလႆႈလူင်းပိုၼ်ႉတီႈ ၵႂႃႇလဵပ်ႈႁဵၼ်း တီႈၵွင်းတပ်ႉတီႈႁူင်းၵဵပ်းမၢၵ်ႇတႅၵ်ႇၼၼ်ႉ တီႈၼႂ်းႁူင်းၵၢၼ်ၵဵပ်းယၢမ်း ၶဝ်ၼၼ်ႉ မီးဝႆႉပႃးၸၢဝ်းၶိူဝ်းၶႄႇ ဢၼ်ၶဝ်ႁဵတ်းၵၢၼ်ၼႆႉ မၼ်းဢမ်ႇၸႂ်ႈၵူၼ်းၼႂ်းပိုၼ်ႉတီႈဝဵင်းၼမ်ႉၶမ်း တီႈလဵဝ်ၵူၺ်း တင်းသဵင်ႈၼႆႉ တီႈၼၼ်ႉၵူၺ်း ၵူၼ်းၶဝ်ႈၵူၼ်းဢွၵ်ႇ ၼႂ်းႁူင်းၵဵပ်းယၢမ်းၶဝ်ၼၼ်ႉ မီးယူႇမွၵ်ႈ 100 ၵေႃႉပၢႆ။ မၼ်းပဵၼ်ၵူႈတီႈတီႈႁႄ မႃးႁဵတ်းၵၢၼ်ဝႆႉၶႃႈဢေႃႈ။ တီႈႁူင်းၵၢၼ်ၼၼ်ႉ ၾၢႆႇသိုၵ်း လွႆၶဝ် ဢမ်ႇပၼ်ၽႂ်ၶဝ်ႈဢွၵ်ႇလႄႈ သဵၼ်ႈမၢႆမၼ်း မီးၵႃႈႁိုဝ်ၼႆ ဢမ်ႇမီးၽႂ်ႁူႉတႅတ်ႈၼႅတ်ႈၶႃႈ။ ၶဝ်မႃးတင်ႈဝႆႉ ႁူင်းၵၢၼ်ၵဵပ်းယၢမ်း ၼႂ်းၵၢင်ဝၢၼ်ႈ တီႈမီးၵူၼ်းမိူင်း ယူႇသဝ်းၼမ်လႄႈ ၸင်ႇဝႃႈတိူဝ်ႉၵူၼ်းၵႂႃႇၼမ်ႁႅင်းတေႉတေႉ“– ဝႃႈၼႆ။

ႁူင်းၵဵပ်းယၢမ်းၼၼ်ႉ သိုၵ်းလွႆၶဝ်တိုၵ်ႉမႃးတင်ႈဝၢႆးလင် ၶဝ်ယိုတ်းလႆႈဝဵင်းၼမ်ႉၶမ်းသေ ပၼ်ႇၵၢၼ်ၽွင်းငမ်းၼႆႉၵူၺ်း ။ မိူဝ်ႈဢွၼ် တၢင်း ဢွင်ႈတီႈၼႆႉ ပဵၼ်ဝႆႉလွၵ်းလိၼ်ပဝ်ႇ ။ ၸဝ်ႈၶွင်တီႈလိၼ်ၼႆႉ ပဵၼ်ၵူၼ်းသိုၵ်းပျီႇတူႉၸိတ်ႉ ၸၢဝ်း ၶိူဝ်းၶႄႇ။ ၶႄႇၸိူဝ်းမႃးယူႇသဝ်း ႁဵတ်းၵၢၼ်ဝႆႉ ၼႂ်းႁူင်းၵၢၼ်ၵဵပ်းယၢမ်းၶွင် သိုၵ်းလွႆ (တဢၢင်း) TNLA ၼႆႉ ဢမ်ႇၸႂ်ႈၶႄႇ ၼႂ်းမိူင်းတႆးၵူၺ်း မီးပႃးၶႄႇ ၸိူဝ်းယူႇၼႂ်းမိူင်းၶႄႇလူင်ထႅင်ႈ ၵူၼ်းပိုၼ်ႉတီႈလၢတ်ႈၼင်ႇၼႆ။

ၵွပ်ႈၼႆလႄႈ ၼႂ်းႁူင်းၵၢၼ်ၵဵပ်းယၢမ်းၼၼ်ႉ ပဵၼ်ၽႂ်ယူႇဝၢၼ်ႈလႂ်ဝဵင်းလႂ် ႁူဝ်ၼပ်ႉတႅတ်ႈတေႃးတင်းမူတ်း ဢမ်ႇပႆႇၸၢင်ႈႁူႉလႆႈ။ ၼွၵ်ႈလိူဝ်ၵဵပ်းယၢမ်း ဝႆႉယဝ်ႉ ပဵၼ်ဢွင်ႈတီႈႁဵတ်းၵၢၼ်သင်တေႉတေႉၼႆ ဢမ်ႇလႆႈႁၼ်ၸုမ်းသိုၵ်းလွႆတဢၢင်း TNLA ဢွၵ်ႇမႃးၸီႉ ၸႅင်ႈ ႁႂ်ႈၵူၼ်းမိူင်းပေႃးလႆႈႁူႉၸွမ်း လွင်ႈတၢင်းတႅတ်ႈတေႃး ။