သိုၵ်းၵဝ်ႈၵၢင်ႉ (MNDAA) တင်း သိုၵ်းတဢၢင်း (TNLA) ယိုဝ်းၵၼ် ႁၢဝ်ႈႁႅင်း ပၢင်တိုၵ်းလၢမ်းၵႂႃႇထိုင် ၼႂ်းဝဵင်းၵူတ်ႉၶၢႆ ႁဵတ်းႁႂ်ႈၵူၼ်းမိူင်း ၸိူဝ်းယူႇၼႂ်းပိုၼ်ႉတီႈ ဢမ်ႇၸၢင်ႈဢွၵ်ႇ ႁိူၼ်း၊ ဢွၵ်ႇၵႂႃႇမႃးတၢင်းၼွၵ်ႈ ယၢပ်ႇၽိုတ်ႇၵူႈလွင်ႈဝႆႉယူႇ ၼႆယဝ်ႉ။

တင်ႈတႄႇ မိူဝ်ႈဝႃး ဝၼ်းတီႈ 14/3/2026 ထိုင် မိူဝ်ႈၼႆႉ ဝၼ်းတီႈ 15/3/2026 ယၢမ်းၵၢင်ဝၼ်းၼႆႉ သိုၵ်းၶႄႇ ၵဝ်ႈၵၢင်ႉ တင်း သိုၵ်းတဢၢင်း (လွႆ) ၶဝ် တိုၵ်ႉသိုပ်ႇယိုဝ်းၵၼ်ယူႇႁၢဝ်ႈ ႁႅင်း ပၢင်တိုၵ်းလုၵ်ႉတၢင်းၾၢႆႇၼွၵ်ႈဝဵင်းၸွတ်ႇၽႄႈ လၢမ်းၵႂႃႇထိုင်ၸွမ်းၼႂ်းဝဵင်းၵူတ်ႉၶၢႆ ၵူၺ်းဢမ်ႇၵႃး ၽွင်းပဵၼ်ပၢင်တိုၵ်းယူႇၼၼ်ႉ ၵူၼ်းသိုၵ်းတဢၢင်း (လွႆ) ၺႃးသိုၵ်းၶႄႇၵဝ်ႈ ၵၢင်ႉ တီႉၺွပ်းၵႂႃႇ ဢမ်ႇယွမ်း 50 ၵေႃႉ ဝႃႈၼႆ။

သိုၵ်းၶႄႇၵဝ်ႈၵၢင်ႉ (MNDAA) ၼႆႉ ၸႂ်ႉတိုဝ်းၶိူင်ႈတရူၼ်ႊ၊ ၵွင်ႈၵၢင်ႇၵူႈသႅၼ်းသႅၼ်းသေ ၶဝ်ႈလူမ်ႇယိုဝ်းၸွမ်းတပ်ႉပၢင်သဝ်းသိုၵ်းတဢၢင်း (TNLA) ၸွမ်းသၢပ်ႇဝဵင်း လႄႈ ၼႂ်းဝဵင်း ၵူတ်ႉၶၢႆၵူၺ်းဢမ်ႇၵႃး ၸွမ်းပိုၼ်ႉတီႈ ထုင်ႉမိူင်းၸီး၊ မိူင်းႁွမ်း လႄႈ ၵဵတ်ႉလၢၼ်ႇ ၸျိၼ်ႊသၢၼ်ႊၵျေႃႉ (105) လၵ်း တင်း ၵဵတ်ႉလၢၼ်ႇ 12 လၵ်း ဢၼ်မီးၼႂ်းၵႄႈၵၢင် ၼမ်ႉၽၵ်းၵႃ လႄႈ ဝဵင်းၼမ်ႉၶမ်းၼၼ်ႉ ၼႂ်းၶၢဝ်းယၢမ်းလဵဝ်ၽွမ်ႉၽွမ်ႉၵၼ် ဝႃႈၼႆ။

ၵူၼ်းမိူင်းပိုၼ်ႉတီႈၵေႃႉယူႇဝႆႉၼႂ်းဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈလဵဝ်ၼႆႉ ၶဝ်တိုၵ်ႉယိုဝ်းၵၼ် ၼႂ်းဝဵင်းၸွမ်း ပိဝ်ႇႁႃႇၵူင်း ဢွင်ႈတီႈမီးတပ်ႉသိုၵ်းမၢၼ်ႈယူႇမိူဝ်ႈဝၼ်း ၼၼ်ႉ၊ ၸွမ်းႁူင်းပလိၵ်ႈၸိူဝ်းၼႆႉယူႇ။ ၼႂ်းတပ်ႉၵဝ်ႇသိုၵ်းမၢၼ်ႈၼၼ်ႉသမ်ႉ မီးဝႆႉၵူၼ်းပၢႆႈၽေး ၸိူဝ်းလုၵ်ႉတၢင်းမိူင်းၵုတ်ႈမႃးၼၼ်ႉ။ လႆႈမႆႈၸႂ် တႃႇၶဝ်ဝႆႉယူႇ။ မိူဝ်ႈလဵဝ် သဵင်ၵွင်ႈလူင်ၵွင်ႈဢွၼ်ႇ တိုၵ်ႉပၼ်းႁႅင်းယူႇ။ ၽႂ်ၵေႃႈဢမ်ႇႁတ်းဢွၵ်ႇႁိူၼ်း။ တေဝႃႈ ပၢႆႈၼႆၵေႃႈ ဢမ်ႇၸၢင်ႈပၢႆႈၵႂႃႇတၢင်းလႂ်ယဝ်ႉ။ လိူဝ်သေ မူၵ်းပႅပ်ႉယူႇၼႂ်းႁိူၼ်း၊ ၸွမ်းလုၵ်းပႅပ်ႉၸိူဝ်းၼႆႉ ႁင်းၽႂ်မၼ်း ” ဝႃႈၼႆ။

ၵဵဝ်ႇလူၺ်ႈပၢင်တိုၵ်း သိုၵ်းၶႄႇၵဝ်ႈၵၢင်ႉ (MNDAA) တင်း သိုၵ်းတဢၢင်း (လွႆ) TNLA ယိုဝ်းၵၼ်ႁၢဝ်ႈႁႅင်းယူႇၼၼ်ႉသေ မိူဝ်ႈဝႃး ဝၼ်းတီႈ 14/3/2026 ယၢမ်းတၢမ်းၶမ်ႈ ၸုမ်းသိုၵ်းတင်းသွင်ၾၢႆႇ ပိုၼ်ၽၢဝ်ႇဢွၵ်ႇလိၵ်ႈပဵၼ်တၢင်းၵၢၼ်ႁင်းၽႂ်မၼ်း ၵူၺ်းဢမ်ႇၵႃး သိုၵ်းတဢၢင်း (လွႆ) TNLA ယင်းတႅမ်ႈလိၵ်ႈ ယိုၼ်ႈယွၼ်းတၢင်းၸွႆႈထႅမ် တီႈလူင်ပွင်ၸိုင်ႈမိူင်းၶႄႇ ႁႂ်ႈၸွႆႈယူႇၵၢင် ဢုပ်ႇဢူဝ်းငူပ်ႉငီႉပၼ် ႁႂ်ႈသိုၵ်းၵဝ်ႈၵၢင်ႉ ၵိုတ်းယိုဝ်းတိုၵ်း။ ၾၢႆႇသိုၵ်းတဢၢင်း (လွႆ) TNLA ၽွမ်ႉမွပ်ႈဢၢပ်ႈပၼ် ပွၵ်ႉၵမ်ႈၽွင်ႈ ၸိူဝ်းမီးယူႇၼႂ်းဝဵင်းၵူတ်ႉၶၢႆ လႄႈ ၼႃႈလိၼ်ပိုၼ်ႉတီႈတၢင်ႇၸိူဝ်း ႁႂ်ႈသိုၵ်းၶႄႇၵဝ်ႈၵၢင်ႉ MNDAA ၽွင်းငမ်းၵႂႃႇ ပဵၼ်တၢင်းၵၢၼ်ယူႇ – ဝႃႈၼႆ။

ၾၢႆႇသိုၵ်းၶႄႇၵဝ်ႈၵၢင်ႉၵေႃႈ တႅမ်ႈလိၵ်ႈပိုၼ်ၽၢဝ်ႇဢွၵ်ႇဝႆႉဝႃႈ – ယွၼ်ႉသိုၵ်းတဢၢင်း (လွႆ) TNLA တႄႇယိုဝ်း သၢႆသိုၵ်းၶဝ် ၸိူဝ်းလတ်းၵႂႃႇမႃးၼႂ်းပိုၼ်ႉတီႈၸႄႈဝဵင်းၵူတ်ႉၶၢႆလႄႈ ၸင်ႇလႆႈတႄႇပဵၼ်ပၢင်တိုၵ်းၵၼ်မႃး။ လိူဝ်ၼၼ်ႉဢမ်ႇၵႃး သိုၵ်းတဢၢင်း (လွႆ) TNLA ၼႆႉ တၢင်းလၢတ်ႈ လႄႈ တၢင်းႁဵတ်းဢမ်ႇငမ်ႇမႅၼ်ႈႁွႆးလဵဝ် ၵၼ်သေ ယူင်းသေႃႇႁႂ်ႈၵိူတ်ႇၶိုၼ်ႈပဵၼ်ပၼ်ႁႃၵၼ်မႃးဢမ်ႇယဝ်ႉဢမ်ႇဝၢႆး – ဝႃႈၼႆ။

ၽူႈၼမ်းၼႂ်း တပ်ႉသိုၵ်းတဢၢင်း (လွႆ) TNLA ၸွမ်ႁၢၼ် တႃႉၽူင်းၵျေႃႇတႄႉ တွပ်ႇလၢတ်ႈတီႈသိုဝ်ႇၶၢဝ်ႇ ပဵၼ်တၢင်းၵၢၼ်ဝႆႉဝႃႈ “ၾၢႆႇသိုၵ်းၵဝ်ႈၵၢင်ႉ တႄႇလၼ်ႇၵွင်ႈသႂ်ႇဢွၼ်တၢင်း ယဝ်ႉၸႂ်ႉၶိူင်ႈတရူၼ်ႊယိုဝ်း။ တႄႇယၢမ်းၵၢင်ဝၼ်း 11 မူင်းမႃး သိုၵ်းၶႄႇၵဝ်ႈၵၢင်ႉၼႆႉ လုၵ်ႉတီႈၸၼ်ႉဢဝ် ၵွင်ႈယိုဝ်းသေ ၶိုၼ်ႈၸၼ်ႉ ဢဝ်ႁႅင်းသိုၵ်းတင်းၼမ် ၶဝ်ႈသိမ်းတပ်ႉပၢင်သဝ်းသိုၵ်းတဢၢင်း (လွႆ) TNLA ႁဝ်း။ ၾၢႆႇႁဝ်းသမ်ႉႁႅင်းၵူၼ်းဢေႇလႄႈ ဢမ်ႇၸၢင်ႈတုမ်ႉတွပ်ႇၶဝ်ၶိုၼ်းလႆႈတဵမ်ထူၼ်ႈ” ဝႃႈၼႆ။

လႆႈႁူႉဝႃႈ ယၢမ်းလဵဝ် ၾၢႆႇသိုၵ်းၶႄႇၵဝ်ႈၵၢင်ႉ ၵုမ်းထိင်းႁုပ်ႈသိမ်းဢဝ် တပ်ႉပၢင်သဝ်း သိုၵ်းတဢၢင်း (လွႆ) TNLA ၼႂ်းဝဵင်းၵူတ်ႉၶၢႆယဝ်ႉတင်းၼမ်သေ တႃႇယိုတ်းလႆႈဝဵင်းၵူတ်ႉၶၢႆ တင်းသဵင်ႈၼၼ်ႉ တိုၵ်ႉသိုပ်ႇယိုဝ်း တိုၵ်းၶဝ်ႈလူမ်ႇ တပ်ႉပိဝ်ႇႁႃႇၵူင်း ဢွင်ႈတီႈၵဝ်ႇ ဢၼ်သိုၵ်းမၢၼ်ႈယူႇ သဝ်းၵႂႃႇ ၵွၼ်ႇပႆႇပဵၼ်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၼၼ်ႉၵူၺ်းယဝ်ႉ ဝႃႈၼႆ။