ဢိင်ၼိူဝ် ၸုမ်းဢူၺ်းလီပွတ်းႁွင်ႇ TNLA, SSPP တင်း RCSS ပဵၼ်ပၢင်တိုၵ်းၵၼ် မႃးႁၢဝ်ႈႁႅင်းသေ မၢၵ်ႇလူင် တူၵ်းသႂ်ႇ ၼႂ်းဝၢင်းႁိူၼ်းယေး ၵူၼ်းဝၢၼ်ႈ တီႈဝဵင်းၼမ်ႉတူႈ ထႅင်ႈလုၵ်ႈၼိုင်ႈ ဢမ်ႇတၼ်းတႅၵ်ႇ ဝႃႈၼႆ။
ဝၼ်းတီႈ 28/2/2021 မၢၵ်ႇလူင် တူၵ်းသႂ်ႇ ၼႂ်းဝၢင်းႁိူၼ်း ၵူၼ်းဝၢၼ်ႈၼွင်ဢေႃႈ လုၵ်ႈၼိုင်ႈ ဢၼ်မီးတၢင်းၾၢႆႇႁွင်ႈ မၢၼ်ႈ ၸၢမ် ၼႂ်းၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ။
ၵူၼ်းၼႂ်းဢိူင်ႇမၢၼ်ႈၸၢမ် ၵေႃႉၼိုင်ႈ လၢတ်ႈဝႃႈ – “မိူဝ်ႈဝႃးၼႆႉ ပၢင်တိုၵ်းပဵၼ်ႁိမ်းႁွမ်းမၢၼ်ႈၸၢမ်ႁဝ်းၶႃႈၼႆႉ ပၢင်တိုၵ်း ပဵၼ်ၵၼ်ႁႅင်းၼႃႇၶႃႈ။ ပဵၼ်တပ်ႉပွင်းၸူႉ တင်း ၶူဝ်းလၢႆး ၶႃႈဢေႃႈ။ တီႈဝၢၼ်ႈၼွင်ဢေႃႈၼၼ်ႉ မၢၵ်ႇလူင် တူၵ်းလုၵ်ႈၼိုင်ႈ ၶႃႈ။ ၵတ်းၵႃႈ ဢမ်ႇတႅၵ်ႇၶႃႈဢေႃႈ တူၵ်းသႂ်ႇတီႈၼႂ်းဝၢင်းႁိူၼ်းၵမ်းလဵဝ်ၶႃႈဢေႃႈ၊ ပဵၼ်မၢၵ်ႇၽႂ် ယိုဝ်းသႂ်ႇတႄႉ ဢမ်ႇႁူႉၶႃႈ”- ဝႃႈၼႆ။
ယၢမ်းလဵဝ်ၼႆႉတႄႉ ၵူၼ်းဝၢၼ်ႈၼွင်ဢေႃႈ လႆႈဢွၼ်ၵၼ်ပၢႆႈၽေးသိုၵ်းဝႆႉမူတ်းယဝ်ႉ ဝႃႈၼႆ။
“ယၢမ်းလဵဝ် ၼႂ်းဝၢၼ်ႈၼွင်ဢေႃႈ တင်း မၢၼ်ႈၸၢမ်တႄႉ ဢမ်ႇၵိုတ်းၽႂ်ဝႆႉၶႃႈ ပၢႆႈဢွၵ်ႇမႃးမူတ်းယဝ်ႉၶႃႈဢေႃႈ။ ဢၼ်ပၢႆႈ ၵႂႃႇတၢင်းသီႇပေႃႉ၊ မိူင်းမူႉ၊ ပၢင်လူင် ၸိူဝ်းၼႆႉ ၵေႃႈမီးၶႃႈ ၵႃႈၸၢၵ်ႇ၊ ၵႃႈၸၢႆၵၼ် ၵႂႃႇယူႇၵေႃႉတီႈ ၵေႃႉတၢင်းၽွင်ႈယဝ်ႉၶႃႈ”- ၵူၼ်းၸွႆႈထႅမ် တူင်ႇဝူင်းၵူၼ်း တီႈၼမ်ႉတူႈ ၵေႃႉၼိုင်ႈလၢတ်ႈၼႄၼင်ၼႆ။
မိူဝ်ႈဝႃး ဝၼ်းတီႈ 28/2/2021 ၼႆႉ ယွၼ်ႉသိုၵ်းတင်းသွင်ၾၢႆႇ ပိုတ်းယိုဝ်းၵၼ် ႁၢဝ်ႈ ႁႅင်းသေ မၢၵ်ႇလူင်တူၵ်းတႅၵ်ႇသႂ်ႇႁိူၼ်းၵူၼ်းမၢၼ်ႈၸၢမ် လုၵ်ႈၼိုင်ႈ ၾႆးမႆႈ ၶွၵ်ႈမူ၊ သိုင်ႇ ၶဝ်ႈၵၢပ်ႇလႄႈ ၵၢင်ႉၽိူင်း ဢၼ်မီးႁိမ်းၶၢင်ႈၼၼ်ႉ မႆႈမူတ်း။
မူတၢႆ 4 တူဝ်၊ ၵႂၢႆးသမ်ႉ လႆႈတိူဝ်ႉၺႃးမၢၵ်ႇၵွင်ႈတၢႆ 2 တူဝ်လႄႈ မႃ 1 တူဝ် ၼႆယဝ်ႉ။
ပၢင်တိုၵ်း ဢၼ်ပဵၼ်ယူႇတၢင်းပွတ်းၼမ်ႉတူႈယူႇယၢမ်းလဵဝ်ၼႆႉ ပဵၼ်ၸုမ်းဢူၺ်းလီ ပွတ်းႁွင်ႇ တင်း RCSS ပဵၼ်ၸုမ်း ယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းတႆးၼင်ႇၵၼ် ၼႆယဝ်ႉ။
ထႅင်ႈၾၢႆႇၼိုင်ႈၵေႃႈ မိူဝ်ႈၼႆႉ ဝၼ်းတီႈ 1/3/2021 ယူႇတီႈၸုမ်းဢူၺ်းလီ ပွတ်းႁွင်ႇ 3 ၸုမ်း သိုၵ်းၵူဝ်းၵၢင်ႉ NMDAA, သိုၵ်း တဢၢင်း TNLA လႄႈ သိုၵ်းရၶႅင်ႇ AA ၸိူဝ်းၼႆႉ ႁူမ်ႈၵၼ် သိုပ်ႇပိုၼ်ၽၢဝ်ႇၾၢႆႇလဵဝ် ၵိုတ်းတိုၵ်းထႅင်ႈ တေႃႇထိုင် ဝၼ်းတီႈ 31/3/2021 သဵင်ႈ တႃႇၶၢဝ်းတၢင်း ၼိုင်ႈလိူၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ