မိူင်းတႆးပွတ်းႁွင်ႇ ၼႂ်းၸႄႈဝဵင်းၼမ်ႉတူႈ ၼၼ်ႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼႂ်းမိူင်းတႆးၼင်ႇၵၼ် ယိုဝ်းၵၼ် မၢၵ်ႇလူင် တူၵ်းသႂ်ႇႁိူၼ်းၵူၼ်းဝၢၼ်ႈ လင်ၼိုင်ႈ လူႉၵွႆ ဝႃႈၼႆ။
ဝၼ်းတီႈ 24/2/2021 ယၢမ်းၵၢင်ၶမ်ႈမွၵ်ႈ 8 မူင်းၼႆႉ ၸုမ်းသိုၵ်းဢူၺ်းလီပွတ်းႁွင်ႇ ဢၼ်မီးသိုၵ်း TNLA , SSPP တင်း ၸုမ်းသိုၵ်း RCSS ဝႅတ်ႉလွမ်ႉလေႃႇတိုၵ်းၵၼ်၊ မၢၵ်ႇလူင်တူၵ်းသႂ်ႇႁိူၼ်းၵူၼ်းမိူင်း ၼႂ်းဝၢၼ်ႈၸၢမ် လင်ၼိုင်ႈ ပွင်ႇပင်းလူႉၵွႆ ။
ၽူႈၸွႆႈထႅမ်ၵူၼ်းပၢႆႈၽေး တီႈမၢၼ်ႈၸၢမ် ၵေႃႉၼိုင်ႈ လၢတ်ႈဝႃႈ – “မိူဝ်ႈဝႃး ယၢမ်းၵၢင်ၶမ်ႈမွၵ်ႈ 8 မူင်းၼႆႉ မၢၵ်ႇလူင် တူၵ်း တႅၵ်ႇသႂ်ႇႁိူၼ်းၵွႆလင်ၼိုင်ႈ။ ၵူၼ်းတႄႉ ဢမ်ႇတုမ်ႉတိူဝ်ႉသင်။ မၢၵ်ႇလူင် တူၵ်းႁွတ်ႈၽႅဝ်ၼႂ်းဝၢၼ်ႈ ၸိူင်ႉၼႆ ႁဝ်းၶႃႈ ဢွၼ် ၵၼ်မႆႈၸႂ် ၵူဝ်ၶႃႈဢေႃႈ”- ဝႃႈၼႆ။
ၼႂ်းဢိူင်ႇဝၢၼ်ႈၸၢမ်ၼႆႉ ယွၼ်ႉၸုမ်းသိုၵ်း ၼႂ်းမိူင်းတႆး ၼင်ႇၵၼ်ယိုဝ်းၵၼ်သေ မီးၵူၼ်းပၢႆႈၽေးမႃးယူႇဝႆႉ သွင်တီႈ။ တီႈဝတ်ႉၵမ်ႇမထၢၼ်းတင်း ၵျွင်းႁွင်ႇ ႁူဝ်ၵူၼ်း ပၢၵ်ႇပၢႆ။ ၵူၼ်း ပၢႆႈၽေးၵမ်ႈၼမ် ပေႃးၵၢင်ဝၼ်းသမ်ႉ ဢွၼ်ၵၼ်မိူဝ်းႁဵတ်း ၵၢၼ် ပေႃးၶၢမ်ႈမႃးသမ်ႉ ဢွၼ်ၵၼ်မႃး ၼွၼ်း တီႈဝတ်ႉ ၸ။
မိူဝ်ႈၼႆႉ ဝၼ်းတီႈ 25/2/2021 ယၢမ်းၵၢင်ၼႂ်မွၵ်ႈ 10 မူင်းၼႆႉ သိုၵ်းသွင်ၾၢႆႇ တိုၵ်ႉလေႃႇတိုၵ်းၵၼ် ႁၢဝ်ႈႁႅင်း။ ယွၼ်ႉပၢင်တိုၵ်း ဝူင်ႈၵၢင်သွင်ၾၢႆႇသေ ဢမ်ႇၵွမ်ႉၵႃႈ ၵူၼ်းဝၢၼ်ႈ ၵူၼ်းမိူင်း ၼႂ်းၸႄႈဝဵင်းၼမ်ႉတူႈၵူၺ်း တၢင်း ၸႄႈဝဵင်း ၵျွၵ်ႉမႄး၊ သီႇပေႃႉ ၸိူဝ်းၼႆႉ ႁူဝ်ၵူၼ်း ႁဵင်ပၢႆ လႆႈပၢႆႈယၢၼ်ႁိူၼ်းယေးတီႈယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ