ၾၢႆႇၼိုင်ႈၵေႃႈ သိုၵ်းမၢၼ်ႈ ၶႂ်ႈၵမ်ၵိၼ်းၸုမ်းလုၵ်ႉၽိုၼ်ႉၶဝ်လႄႈ သိုၵ်းမၢၼ်ႈတတ်းပႅတ်ႈလႅင်းၾူၼ်ႊ လႅင်ႊဢိၼ်ႊ ထိူဝ်ႊၼႅတ်ႉၼႂ်းၸိုင်ႈမိူင်း ၼႂ်းဢွင်ႈတီႈဢၼ်ၸုမ်းလုၵ်ႉၽိုၼ်ႉတူင်ႉၼိုင် ။

ၾၢႆႇၶွမ်ႊပၼီႊ ဢၼ်ၶူင်ႁဵတ်း ဢွၵ်ႇသၻႃႊလိင်ႉၶ်ၵေႃႈ ပၼ်ၶေႃႈဢၢင်ႈလၢႆဢၼ်သေ တႄႇ တတ်းသၻႃးလိင်ႉၶ်ၼႂ်းမိူင်းႁူမ်ႈတုမ်မၢၼ်ႈလၢႆတီႈ လႄႈ ၸုမ်းလုၵ်ႉၽိုၼ်ႉဢမ်ႇၸၢင်ႈလႆႈၶေႃႈမုလ်းၶၢဝ်ႇသၢၼ်ငၢႆႈ။ ၼႂ်းၵႄႈၼၼ်ႉ ၵူၼ်းမိူင်းၸိူဝ်းယူႇၸွမ်းဢွင်ႈတီႈၸုမ်းလုၵ်ႉၽိုၼ်ႉၵုမ်းၵမ်ၵေႃႈ ယၢပ်ႇၸႂ်ၸွမ်း ။

ဢၼ်ၸုမ်းလုၵ်ႉၽိုၼ်ႉၼႂ်းမိူင်းမၢၼ်ႈ လႆႈၸႂ်ယႂ်ႇတႃႇၵပ်းသိုပ်ႇၵပ်းသၢၼ်ၵၼ်ယူႇၼႆႉ ပဵၼ်သၻႃႊလိင်ႉၶ် ၊ ၵမ်းၼႆႉသမ်ႉ ၶွမ်ႊပၼီႊသၻႃႊလိင်ႉၶ် သင်ႇပိၵ်ႉဢိုတ်းဝႆႉယဝ်ႉလႄႈ တုမ်ႉတိူဝ်ႉပႃး တူင်ႇဝူင်းၵူၼ်း ဝၢၼ်ႈ ၵူၼ်းမိူင်းႁၢဝ်ႈႁႅင်း။

ပေႃးတူၺ်းၶိုၼ်း ပိုၼ်းၶွမ်ႊပၼီႊ SpaceX ဢၼ်ၶူင်ႁဵတ်းဢွၵ်ႇ သၻႃးလိင်ႉၶ် တီႈဢမေႊရိၵၼ်ႊၼႆႉ ပိူင်လူင် တႃႇပူၵ်းပွင်ပၼ် ပိုၼ်ႉတီႈဢၼ်လႆႈလႅင်းဢိၼ်ႊထိူဝ်ႊၼႅတ်ႉယၢပ်ႇ ။ ဢွင်ႈတီႈဢၼ် ၵပ်းသိုပ်ႇတိတ်းတေႃႇ ၶဝ်ႈၸူးယၢပ်ႇၼႆၸိူဝ်းၼႆႉ။

တႄႇဢဝ် ၼႂ်းပီ 2021 ၼႆႉ မိူင်းႁူမ်ႈတုမ်မၢၼ်ႈၵေႃႈ ၵႃႈလႆႈသိုဝ်ႉၸႂ်ႉ သၻႃႊလိင်ႉၶ် ။ ၸႂ်ႉၼႂ်းဢွင်ႈတီႈ ၸုမ်းလုၵ်ႉ ၽိုၼ်ႉ တူင်ႉၼိုင်ယူႇသဝ်း။ ယွၼ်ႉဝႃႈ သိုၵ်းမၢၼ်ႈ တင်ႈၸႂ်ၵမ်ၵိၼ်း ၊ ဢမ်ႇပၼ်ၸႂ်ႉလႅင်းၾူၼ်း လႅင်းၼဵတ်ႇ ဢၼ်ႁဵတ်း ဢွၵ်ႇၼႂ်းမိူင်း ။

ၸုမ်းလုၵ်ႉၽိုၼ်ႉမီးၼမ်တီႈလႂ်ၵေႃႈ သိုၵ်းမၢၼ်ႈၵမ်ၵိၼ်းတတ်းပႅတ်ႈၵၢၼ်ၸႂ်ႉဢိၼ်ႊထိူဝ်ႊၼႅတ်ႉ ထိုင်တီႈၼၼ်ႈ ပႃးၸဵမ် ၼႂ်းၸႄႈမိူင်းၶၢင် မိူင်းတႆးပွတ်းႁွင်ႇ ပွတ်းၸၢၼ်း ၊ မိူင်းယၢင်းလႅင် ၊ ၸႄႈၵႅင်း ၊ မၵူၺ်း ၊ ၸႄႈမိူင်းရၶၢႆႇ ၸဵမ်ၸိူဝ်းၼႆႉ ။

သိုၵ်းမၢၼ်ႈတႄႉဝႃႈ ၵမ်ၵိၼ်းၸုမ်းလုၵ်ႉၽိုၼ်ႉၼႆသေတႃႉ ၵူၼ်းမိူင်းၸိူဝ်းယူႇၸွမ်း ၶွပ်ႇၶဵတ်ႇ လႅၼ်လိၼ် ဢၼ်ၸုမ်း လုၵ်ႉၽိုၼ်ႉ ၵုမ်းၵမ်သမ်ႉ ယၢပ်ႇၽိုတ်ႇၸွမ်း ယွၼ်ႉဝႃႈ ဢမ်ႇၸၢင်ႈၵပ်းသိုပ်ႇၵပ်းသၢၼ်ၵၼ်တင်း ပီႈၼွင်ႉတီႈၵႆ ။
ၽွင်းမိူဝ်ႈၺႃးသိုၵ်းမၢၼ်ႈ တတ်းပႅတ်ႈလွင်ႈၵပ်းသိုပ်ႇၵပ်းသၢၼ်ၼိူဝ်ဢွၼ်ႊလၢႆႊယူႇၼၼ်ႉ ၾၢႆႇလုၵ်ႉၽိုၼ်ႉၸႂ်ယႂ်ႇ သၻႃႊလိင်ႉၶ်မႃး ။

ဝၢႆးသေ ၶၢဝ်ႇလိုဝ်းဝႃႈ ၸုမ်းၵျႃႊၽျႅၼ်ႉ ၸိူဝ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊၸိူဝ်းၼႆႉ ပၢႆႈသွၼ်ႈ ယူႇဝႆႉၸွမ်းဢွင်ႈတီႈဢၼ်ၵႆဝဵင်းယႂ်ႇဝဵင်းလူင်သေ ၸႂ်ႉသၻႃႊလိင်ႉၶ် ပၼ်ႇၵၢၼ်လွၵ်ႇလႅၼ်ဝႆႉယူႇၼႆလႄႈ ၾၢႆႇၶွမ်ႊပၼီႊၸင်ႇ တႄႇ ဢွၵ်ႇပိူင်ပေႃႊလသီႊ ႁႄႉႁၢမ်ႈသၻႃႊလိင်ႉၶ်မႃး ။

တႄႇဢဝ် ၵၢင်ပီ 2026 ၼႆႉမႃး ၵူၼ်းၸိူဝ်းၸႂ်ႉသၻႃႊလိင်ႉၶ် ၼႂ်းၸႄႈမိူင်းရၶၢႆႇ ၸႄႈမိူင်းယၢင်းလႅင် ၸႄႈမိူင်းၶၢင် တိူင်းၸႄႈၵႅင်း တိူင်းတႃႈလိူဝ်ႇ ၸိူဝ်းၼႆႉ ၺႃးပိၵ်ႉဢိုတ်း ။
ၵွၼ်ႇပႆႇပိၵ်ႉဢိုတ်းၼႆႉ ၶွမ်ႊပၼီႊသၻႃႊလိင်ႉၶ် သူင်ႇဢီႊမေလ်ႊၸူးၵူၼ်းၸႂ်ႉတိုဝ်းမၼ်းယူႇ ဝႃႈ ၽႂ်ၸႂ်ႉလူၺ်ႈတီႈဢမ်ႇၸႂ်ႈတၢင်းၵၢၼ် ဢမ်ႇမီးဝႂ်ၶႂၢင်ႉ official ၊ ၶိူင်ႈဢၼ်သႂ်ႇ ၶေႃႈမုလ်းဢွင်ႈတီႈယူႇ address ဢမ်ႇမႅၼ်ႈၸိူဝ်းၼႆႉ တေပိၵ်ႉဢိုတ်းပႅတ်ႈၼႆယူႇ။

လွင်ႈၼႆႉ ၽူႈတူင်ႉၼိုင်ႁဵတ်းၵၢၼ်ၾၢႆႇဢၢႆႊထီႊ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႆႉၼင်ႇၼႆ –

ၼႂ်းမိူင်းႁူမ်ႈတုမ် ပတ်းပိုၼ်ႉၼႆႉ သၻႃႊလိင်ႉၶ် ၺႃးပိၵ်ႉဢိုတ်းလၢႆၶိူင်ႈယဝ်ႉၼႆၼၼ်ႉ ပႆႇႁူႉႁူဝ်ယွႆႈမၼ်းသေတႃႉ ၶိူင်ႈဢၼ်ယၢမ်ႈၸၢႆႇငိုၼ်းပၼ်ယူႇၵူႈလိူၼ် မွၵ်ႈ 100 ၶိူင်ႈၼႆႉ ၺႃးပိၵ်ႉဢိုတ်း 80 ၶိူင်ႈယဝ်ႉၼႆ ၵူၼ်းဢၼ်ယၢမ်ႈသိုဝ်ႉၶၢႆတေႃႇၸုမ်းလုၵ်ႉၽိုၼ်ႉၵေႃႉၼိုင်ႈ လၢတ်ႈတီႈ Myanmar Now ဝႆႉၼင်ႇၼႆ။

သၻႃႊလိင်ႉၶ်ၼႆႉ ဢမ်ႇၸႂ်ႈဝႃႈ ပိၵ်ႉတီႈလႂ်တီႈၼၼ်ႈၵူၺ်း ဢၢၼ်းပိၵ်ႉတင်းမိူင်းမၢၼ်ႈပတ်းပိုၼ်ႉယဝ်ႉၶႃႈ။ဢမ်ႇၸႂ်ႈဝႃႈ ပိၵ်ႉဢိုတ်းပႅတ်ႈၼႂ်းတွၼ်ႈၸုမ်းယိပ်းၵွင်ႈၵၢင်ႇၵူၺ်း ။ ၶဝ်ဢွၵ်ႇပေႃႊလသီႊမႃးဝႃႈ ပေႃးၸႂ်ႉသတႃႊလိင်ႉၶ် ဢွၵ်ႇၼွၵ်ႈမိူင်းၸိုင် ၼႂ်းၶၢဝ်းတၢင်း 60 ဝၼ်းၼႆႉ ႁႂ်ႈလႆႈၸႂ်ႉၶိုၼ်းၼႂ်းမိူင်း ။ ပွင်ႇဝႃႈ တေလႆႈၶိုၼ်းၶဝ်ႈၸႂ်ႉၼႂ်းမိူင်းဢၼ်ၸႂ်ႉလႆႈပဵၼ်တၢင်းၵၢၼ်

သၻႃႊလိင်ႉၶ် ၼႆႉ မီးၶိူင်ႈၸႂ်ႉမၼ်းလၢႆသႅၼ်း သႅၼ်းဢၼ် ဢဝ်ၵႂႃႇလႆႈၵူႈတီႈ ၸွတ်ႇတူဝ်ႈလုမ်ႈၾႃႉ (Global) ၊ သႅၼ်းဢၼ်ၸႂ်ႉၸွမ်းႁိူၼ်းၸွမ်းယေး (Residential) လႄႈ သႅၼ်းဢၼ်ၸႂ်ႉၽွင်းမိူဝ်ႈဢွၵ်ႇၶၢဝ်းတၢင်း (Roam) ။
ၼႂ်းမိူင်းႁူမ်ႈတုမ်မၢၼ်ႈၼႆႉ ၵမ်ႈၼမ် ၸႂ်ႉၶိူင်ႈဢၼ်တႃႇၸႂ်ႉၽွင်းဢွၵ်ႇတၢင်း (Roam) ၵမ်ႈၼမ် ။ သၻႃႊလိင်ႉၶ်ၼႆႉ ပေႃးတူၺ်းပိူင်ၸိုင်ႈမိူင်းဝႃႈတႄႉ ၼႂ်းမိူင်းႁူမ်ႈတုမ်မၢၼ်ႈၼႆႉ ပႆႇမီးၶႂၢင်ႉသိုဝ်ႉၸႂ်ႉ official ၼင်ႇပဵၼ်တၢင်းၵၢၼ် ။

ပေႃးသိုဝ်ႉၸႂ်ႉၵေႃႈ တိုၼ်းတေလႆႈသႂ်ႇၸိုဝ်ႈ သႂ်ႇၶေႃႈမုလ်းဢၼ်ၶိူင်ႈသၻႃႊလိင်ႉၶ်ယွၼ်းဝႆႉ ။ မိူင်းႁူမ်ႈတုမ် မၢၼ်ႈ ၼႆႉသမ်ႉ ဢမ်ႇၸႂ်ႈမိူင်းဢၼ်လႆႈၶႂၢင်ႉဝႆႉလႄႈ ၵႃႈလႆႈၸႂ်ႉၸိုဝ်ႈၸႂ်ႉတီႈယူႇတၢင်ႇမိူင်း ဢၼ်လႆႈၶႂၢင်ႉၸိူဝ်းၼႆႉၵူၺ်း ။

သင်ဝႃႈ ၶႂ်ႈၸႂ်ႉၼႂ်းမိူင်းမၢၼ်ႈၵေႃႈ ၵႃႈတေလႆႈသႂ်ႇၸိုဝ်ႈတီႈယူႇ address မိူၼ်ၼင်ႇ မိူင်းၵျပၼ်ႊ မိူင်းၾိလပိၼ်ႊ မလေႊသျႃႊ ၸဵမ်ၸိူဝ်းၼႆႉ ။ ဝၢႆးသေ ၶွမ်ႊပၼီႊသၻႃႊလိင်ႉၶ် ႁူႉဝႃႈ မီးၵူၼ်းသိုဝ်ႉၸႂ်ႉၸိူင်ႉၼၼ်ယဝ်ႉ ၸင်ႇၾၢင်ႉဝႃႈ တေပိၵ်ႉဢိုတ်း ။

ၸဵမ်မိူဝ်ႈၼႂ်းပီ 2025 ၼၼ်ႉၵေႃႈ ယၢမ်ႈပိၵ်ႉပႅတ်ႈ သၻႃႊလိင်ႉၶ် ဢၼ်ၵဵဝ်ႇၶွင်ႈၸွမ်းၵၢၼ်ၵျႃႊၽျႅၼ်ႉ ၼႂ်းမိူင်းႁူမ်ႈတုမ်မၢၼ်ႈ 2500 ပၢႆ ၼႆ သိုဝ်ႇၶၢဝ်ႇ AFP ယၢမ်ႈႁၢႆးငၢၼ်းၵႂႃႇၼႂ်း လိူၼ်ဢွၵ်ႊထူဝ်ႊပိူဝ်ႊ 2025 ၼၼ်ႉၼင်ႇၼႆ။

ၽွင်းၼၼ်ႉ ၶိူင်ႈသၻႃႊလိင်ႉၶ် ဢၼ်မီးၸွမ်းၼႂ်းၼႃႈလိၼ်ၸုမ်းလုၵ်ႉၽိုၼ်ႉ မိူင်းယၢင်းၽိူၵ်ႇလႄႈ ရၶၢႆႇ ၸိူဝ်းၼႆႉၵေႃႈ ၺႃးပိၵ်ႉဢိုတ်းၵမ်ႈၽွင်ႈ။
ၼႂ်းပီ 2026 ၼႆႉ ဢၼ်ၺႃး ပိၵ်ႉဢိုတ်းပႅတ်ႈ ၸမ်မူတ်းၸမ်သဵင်ႈၼႆႉ ပဵၼ်ၼႂ်းၸႄႈမိူင်းရၶၢႆႇ ။ ၸႄႇမိူင်းရၶၢႆႇၼႆႉ ၸဵမ်မိူဝ်ႈသိုၵ်းမၢၼ်ႈတႄႉယိုတ်းမိူင်းၵေႃႈ သိုၵ်းမၢၼ်ႈတင်ႈၸႂ်တတ်းပႅတ်ႈလႅင်းဢိၼ်ႊထိူဝ်ႊၼႅတ်ႉတင်းမိူင်း ။ ဝၢႆးသေ ႁူႉဝႃႈ ၸႂ်ႉၶိူင်ႈသၻႃႊလိင်ႉၶ်လႆႈၼၼ်ႉ ၵူၼ်းမိူင်းၵေႃႈ သင်ႇသိုဝ်ႉၸႂ်ႉၸွမ်း ။

ၶွၼ်ႇသၻႃႊလိင်ႉၶ် ဢၼ်ၵူၼ်းမိူင်းရၶၢႆႇသိုဝ်ႉၸႂ်ႉၼႆႉ လႆႈပၼ်တီႈၸုမ်းသိုၵ်းရၶၢႆႇ AA ။ ၵမ်ႈၼမ် ၸႂ်ႉၼႂ်းတွၼ်ႈ တႃႇဢူၼ်းငိုၼ်း သူင်ႇငိုၼ်းၸူး တီႈၼိုင်ႈလႄႈတီႈၼိုင်ႈ ။ ပေႃးဢမ်ႇမီးဢိၼ်ႊထိူဝ်ႊၼႅတ်ႉ ၵၢပ်ႈယၢမ်းလဵဝ် ယၢပ်ႇၵိၼ်းဝႆႉ ။

ၵူၼ်းမိူင်းရၶၢႆႇ ၵမ်ႈၼမ် ၸႂ်ယႂ်ႇ သၻႃႊလိင်ႉၶ်သေ ၵပ်းသိုပ်ႇပီႈၼွင်ႉၸိူဝ်းယူႇတၢင်ႇဝၢၼ်ႈတၢင်ႇဝဵင်း ၊ လႄႈ ၸိူဝ်းၸႂ်ႉၼႂ်းတွၼ်ႈလဵပ်ႈႁဵၼ်းပၢႆးပၺ်ႇၺႃႇၵေႃႈမီးတင်းၼမ်တင်းလၢႆ ။ မုင်ႉႁေႃႁိူၼ်းဢၼ် လူဝ်ႇႁပ်ႉငိုၼ်းသူင်ႇငိုၼ်း ပီႈၼွင်ႉၼွၵ်ႈမိူင်းၸိူဝ်းၼၼ်ႉၵေႃႈ လႆႈၸႂ်ယႂ်ႇ သၻႃႊလိင်ႉၶ်ၵူၺ်း ။

ပွတ်းတၢင်းမိူင်းမၢၼ်ႈ တွၼ်ႈၵၢင် ၸႄႈတွၼ်ႈယိၼ်းမႃႇပိၼ်ႇ ၸိူဝ်းၼႆႉၵေႃႈ ၺႃးပိၵ်ႉဢိုတ်း ၊ မၢင်ၶိူင်ႈၵေႃႈ သိုပ်ႇၸႂ်ႉလႆႈ ယူႇ ။ သင်ဝႃႈ ၺႃးပိၵ်ႉဢိုတ်းၵႂႃႇတၢင်းမူတ်းတႄႉ ၵူၼ်းဝၢၼ်ႈၵူၼ်းသူၼ်ဢၼ်ယူႇၵႆဝဵင်း တေယၢပ်ႇၽိုတ်ႇတႃႇၵပ်းသိုပ်ႇၵပ်းသၢၼ်ၵၼ်။ သင်ဝႃႈ လူဝ်ႇတၢင်းၸွႆႈထႅမ် တႃႇပၢႆးယူႇလီ တႃႇပၢႆးပၺ်ႇၺႃႇၸိူဝ်းၼႆႉ တေဢမ်ႇငၢႆႈ ၼႆ ၵူၼ်းဝဵင်းပလႄး ၸႄႈတွၼ်ႈယိၼ်းမႃႇပိၼ်ႇ လၢတ်ႈၼင်ႇၼႆ။

သင်ဝႃႈ မီးႁိူဝ်းမိၼ်ဢၼ်လီထၢင်ႇထိူမ် လတ်းမႃးၼႆ ၵူၼ်းၸိူဝ်းယူႇႁိမ်းတပ်ႉပၢင်သဝ်း ၸုမ်းယိပ်းၵွင်ႈၵၢင်ႇၵေႃႈ ၸၢင်ႈပွင်ႇၶၢဝ်ႇၸူးၵၼ် ၸၢင်ႈဝႄႈၽေးဝႆႉ ။ ပေႃး ၵပ်းသိုပ်ႇၸူးၵၼ်ယၢပ်ႇတႄႉ ဢမ်ႇၸၢင်ႈႁူႉသင်လူင်ႈၼႃႈ ။

ၼႂ်းမိူင်းယၢင်းလႅင်ၵေႃႈ ၼႂ်းဝူင်ႈဝၢင်ႈၼႆႉၵူၺ်း ဢွင်ႈတီႈဢၼ်ၸုမ်းလုၵ်ႉၽိုၼ်ႉယူႇသဝ်း ၺႃးပိၵ်ႉသၻႃႊလိင်ႉၶ် ဢမ်ႇယွမ်း 30 ၶိူင်ႈ ၼႆ ၵူဝ်ႇပၺႃး ၽူႈၼမ်းၼႂ်းၵူႈလွင်ႈလွင်ႈ IEC လူင်ပွင်ၸိုင်ႈၸူဝ်ႈၵၢင်မိူင်းယၢင်းလႅင် လၢတ်ႈ။

သင်ဝႃႈ ပိၵ်ႉဢိုတ်းပႅတ်ႈသၻႃႊလိင်ႉၶ် ၼႂ်းမိူင်းႁူမ်ႈတုမ်မၢၼ်ႈၸိုင် တႃႇတေပိုၼ်ၽၢဝ်ႇလၢတ်ႈၼႄလုမ်ႈၾႃႉ လွင်ႈ ၵူၼ်းမိူင်းၺႃးပူၼ်ႉပႅၼ်သုၼ်ႇလႆႈသုၼ်ႇပဵၼ် ၊ တႃႇပၼ်ၾၢင်ႉၽေးၵူႈလွင်ႈလွင်ႈပၼ်ၵူၼ်းမိူင်းၸိူဝ်းၶၢတ်ႇလႅင်းၾူၼ်းလႅၼ်းဢိၼ်ႊထိူဝ်ႊၼႅတ်ႉလူင်ႈၼႃႈၵေႃႈ တေဢမ်ႇၸၢင်ႈ ဝႃႈၼႆ။

ၽူႈတူင်ႉၼိုင်ႁဵတ်းၵၢၼ်ၾၢႆႇဢၢႆႊထီႊ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႆႉၼင်ႇၼႆ –

လိူဝ်သေ သၻႃႊလိင်ႉၶ်ယဝ်ႉ တႃႇၸႂ်ႉတၢင်ႇလၢႆးတႄႉ တေမီး IP star ၶဝ်လႄႈ တၢင်ႇသႅၼ်းလႆႈ။ မၼ်းၸႂ်ႉမိူၼ်သၻႃႊလိင်ႉၶ်ၼႆႉလႆႈယူႇ ၵူၺ်းၼႃႇ ၵႃႈမၼ်းတေသုင် ။တေသဵင်ႈငိုၼ်းၼမ်လိူဝ် ။ သၻႃႊလိင်ႉၶ်ၼႆႉ လႆႈဝႃႈၵႃႈမၼ်းထုၵ်ႇလိူဝ်ပိူၼ်ႈယဝ်ႉ။တွၼ်ႈတႃႇၵူၼ်းယူႇထိူၼ်ႇၼႂ်းပႃႇတႄႉ တေယၢပ်ႇယဝ်ႉ ပေႃးဢမ်ႇမီးသၻႃႊလိင်ႉၶ်

ပၼ်ႁႃလွင်ႈ သၻႃႊလိင်ႉၶ်ၼႆႉ ၸုမ်းလုၵ်ႉၽိုၼ်ႉလၢႆၸုမ်းဢၼ်ယူႇတႂ်ႈ NUG တႄႉ မုင်ႈမွင်းႁႂ်ႈ NUG ၸွႆႈႁႃတၢင်းၵႄႈလိတ်ႈပၼ် ။
ၾၢႆႇၼိုင်ႈၵေႃႈ ႁွင်ႈၵၢၼ်ၵပ်းသိုပ်ႇၵပ်းသၢၼ်တႂ်ႈသိုၵ်းမၢၼ်ႈ ယၢမ်ႈပိုၼ်ၽၢဝ်ႇမိူဝ်ႈ 2023 ၼၼ်ႉဝႃႈ ၽႂ်ယိပ်းတိုဝ်းၶိူင်ႈဢိၼ်ႇထိူဝ်ႊၼႅတ်ႉ ဢမ်ႇမီးဝႂ်ၶႂၢင်ႉၼႆ တေဢဝ်လိူင်ႈပၼ်တူတ်ႈတၢမ်ႇ ။ ဝႃႈၼၼ်သေတႃႉ ၾၢႆႇတပ်ႉသိုၵ်းမၢၼ်ႈၵေႃႈ ယင်းတိုၵ်ႉသိုပ်ႇၸႂ်ႉသၻႃႊလိင်ႉၶ် ယူႇ။

ၽွင်းၶွမ်ႊပၼီႊသၻႃႊလိင်ႉၶ်ႉ တတ်းပႅတ်ႈသၻႃႊလိင်ႉၶ်ၼႂ်းမိူင်းႁူမ်ႈတုမ်မၢၼ်ႈယူႇၼႆႉ ၸွင်ႇတတ်းပႃးၶိူင်ႈဢၼ်သိုၵ်းမၢၼ်ႈၸႂ်ႉႁိုဝ်ၼႆ ပႆႇမီးၽႂ်ႁူႉတႅတ်ႈတေႃး ။

ဢၢင်ႈဢိင် – Myanmar Now