ၼႂ်းပီ 2026 ၼႆႉ ၸုမ်းလုၵ်ႉၽိုၼ်ႉ PDF ၼင်ႇၵၼ် ၶဝ်ႈယိုတ်းပၢင်သဝ်းၵၼ် ပိုတ်းယိုဝ်းၵၼ်ၶိုၼ်း တီႉၺွပ်းၵၼ်ၶိုၼ်း ။ ပိူင်ပဵၼ်ၸိူဝ်းၼႆႉ ၼႂ်းပီၼႆႉ မီးမႃး ဢမ်ႇယွမ်း 10 ၵမ်းယဝ်ႉဝႃႈၼႆသေတႃႉ ၼႂ်းလိူၼ်ၵျုၼ်ႊပူၼ်ႉမႃးၼႆႉၵူၺ်း သမ်ႉပေႃးပဵၼ်ၵႂႃႇမွၵ်ႈ 4 ၵမ်းယဝ်ႉ။ ပေႃးသိုပ်ႇပဵၼ်ၼႆၵႂႃႇၸိုင် ၵၢၼ်လုၵ်ႉၽိုၼ်ႉတေထိုင်တီႈလႆႈမိူဝ်ႈလႂ်- ၵူၼ်းၸိူဝ်းယၢမ်ႈပၼ်ႁႅင်း PDF ၶဝ်လၵ်ႉလွမ်မႆႈၸႂ်ဝႆႉႁင်းၽႂ်မၼ်း ။ပဵၼ်ၸုမ်းဢၼ် ၵူၼ်းမိူင်းမၢၼ်ႈ ထၢင်ႇယႂ်ႇ ယုမ်ႇယမ် ၵမ်ႉထႅမ် မႃးတေႉတေႉဝႃႈဝႃႈ ။

ၸဵမ်မိူဝ်ႈ ၵိင်ႇၽႄ ၸုမ်း PDF ၼမ်မႃးသေ ၸုမ်းၼိုင်ႈလႄႈၸုမ်းၼိုင်ႈ တႄႇမီးလွင်ႈတွၵ်ႉတႅၵ်ႉၵၼ်မႃး ဢမ်ႇပိူင် ၼိုင်ႈၵေႃႈ ပိူင်ၼိုင်ႈ ။ ပၼ်ႁႃမီးမႃးၶိူဝ်းယႂ်းသေတႃႉ ၾၢႆႇၵဵဝ်ႇၶွင်ႈ ဢမ်ႇတွၼ်ႉပိုၼ်ၽၢဝ်ႇလၢတ်ႈသင် ၵူဝ်တုမ်ႉတိူဝ်ႉ ၸိုဝ်ႈသဵင်သရေႇၼႃႈတႃ ၸုမ်းလုၵ်ႉၽိုၼ်ႉၼႆႉ ၵူၼ်းလဵပ်ႈႁဵၼ်းၵၢၼ်လုၵ်ႉၽိုၼ်ႉၶဝ်လၢတ်ႈၼင်ႇၼႆ။

ပိူင်ပဵၼ် ဢၼ် ၸုမ်းလုၵ်ႉၽိုၼ်ႉၼင်ႇၵၼ် တုမ်ႉတိူဝ်ႉၵၼ်ၼႆႉ ၼႂ်းပီ 2026 တင်းမူတ်း မီး 10 ၵမ်း ။ မွၵ်ႈ 6 ၵမ်းၼႆႉ ပဵၼ်ၵႂႃႇၼႂ်းတိူင်းၸႄႈၵႅင်း မိူင်းမၢၼ်ႈတွၼ်ႈၼိူဝ်ၼႆ BBC ႁၢႆးငၢၼ်းဝႆႉ ။

ပၼ်ႁႃဢၼ်ႁဵတ်းႁႂ်ႈ ၸုမ်းလုၵ်ႉၽိုၼ်ႉၼင်ႇၵၼ် ဢမ်ႇၶဝ်ႈၵၼ်ၼႆႉ ပဵၼ်ယွၼ်ႉသင်တေႉတေႉၼႆ ႁဵတ်းႁႂ်ႈ ၽူႈလဵပ်ႈႁဵၼ်းၵၢၼ်သိုၵ်းၵၢၼ်မိူင်းၶဝ် တူၵ်ႇတၵ်ႉမႃးၼမ်။

ၸုမ်းလုၵ်ႉၽိုၼ်ႉၼႂ်းမိူင်းမၢၼ်ႈ ၼႆႉ ပေႃးၸႅၵ်ႇသေတူၺ်း လႆႈႁၼ်မီးဝႆႉ 4 သႅၼ်း ။ ၸုမ်းလုၵ်ႉၽိုၼ်ႉ (EROs) ဢၼ်ၸၢဝ်းၶိူဝ်း ၽႂ်မၼ်းတင်ႈဝႆႉ မီးဝႆႉၶေႃၶေႃ ၸဵမ်မိူဝ်ႈ မိၼ်းဢွင်ႇလၢႆႇ ပႆႇယိုတ်းမိူင်း ။
ထႅင်ႈသႅၼ်းၼိုင်ႈသမ်ႉ ဝၢႆးသိုၵ်းယိုတ်းမိူင်း 2021 ယဝ်ႉ ၸင်ႇမီးမႃး PDF ၸုမ်းလုၵ်ႉၽိုၼ်ႉၶၢဝ်းႁွင် နွေဦးတော်လှန်ရေး ။

ဝၢႆးၼၼ်ႉ ၸင်ႇမီးမႃး ၸုမ်းလုၵ်ႉၽိုၼ်ႉၶၢဝ်းႁွင်ၼင်ႇၵၼ်ႁူမ်ႈႁွမ်းၵၼ် ပဵၼ်မႃး ၸုမ်း SRA (Spring Revolution Alliance) သႅၼ်းၼိုင်ႈ။ လိူဝ်ၼၼ်ႉ ဢၼ်ဢမ်ႇၶဝ်ႈၸုမ်းလႂ်သေ လုၵ်ႉၽိုၼ်ႉယူႇႁင်းၵူၺ်းၼၼ်ႉ မီးထႅင်ႈသႅၼ်းၼိုင်ႈ ဢၼ်ႁွင်ႉဝႃႈ COC (Change of command)။

ဝၢႆးသေမီးမႃး ၸုမ်းလုၵ်ႉၽိုၼ်ႉၶၢဝ်းႁွင်ႈယဝ်ႉၼၼ်ႉ ၼႂ်းမိူင်းႁူမ်ႈတုမ်ၼႆႉ မီးမႃးထႅင်ႈၸုမ်းလုၵ်ႉၽိုၼ်ႉ 19 ၸုမ်း ။ မိူဝ်ႈတႄႇတင်ႈတႄႉ ဢမ်ႇယူႇတႂ်ႈၽႂ်သေတႃႉ ၼႂ်းပီ 2025 ၼႆႉ ဢိင်ၼိူဝ်လူဝ်ႇၶိူင်ႈၵမ်ႉၵႅမ်လၢႆလွင်ႈသေ ၸင်ႇ ယူႇတႂ်ႈ NUG ၵုမ်းယူႇ။

ၸုမ်းလုၵ်ႉၽိုၼ်ႉမႂ်ႇမၢင်ၸုမ်းၵေႃႈ တိုၼ်းဝႃႈ ဢမ်ႇဢၢၼ်းယူႇတႂ်ႈၽႂ် ။ မိူၼ်ၼင်ႇ တပ်ႉသိုၵ်းပူတ်းပွႆႇၵူၼ်းမိူင်း (ပြည်သူ့လွတ်မြောက်ရေးတပ်မတော် ) PLA လႄႈ ၸုမ်း BNRA ဢၼ် ပူဝ်ႇၼၵႃး ဢွၼ်ႁူဝ် ၼႆၸိူဝ်းၼႆႉ။

ၸဵမ်မိူဝ်ႈ တႄႇဢွၼ်ၵၼ်ယိပ်းၵွင်ႈလုၵ်ႉၽိုၼ်ႉမႃးၵေႃႈ ဢမ်ႇၸႂ်ႈၵူၼ်းတီႈလဵဝ်ၵၼ် ဢမ်ႇၸႂ်ႈႁူဝ်ၼႃႈလဵဝ်ၵၼ်လႄႈ ၸင်ႇမီးလွင်ႈတုမ်ႉတိူဝ်ႉတွၵ်ႉတႅၵ်ႉတေႃႇၵၼ်ငၢႆႈ ၼႆ ၽူႈလဵပ်ႈႁဵၼ်းၶဝ်လၢတ်ႈၼင်ႇၼႆ။
ၼႂ်းလိူၼ်ၾႅပ်ႊပိဝ်ႊရီႊ ၼၼ်ႉ မီးလွင်ႈယိုတ်းပၢင်သဝ်းၵၼ်တီႈ ဝဵင်းပလႄး ၸႄႈတွၼ်ႈယိၼ်းမႃႇပိၼ်ႇ မီးလုၵ်ႈၸုမ်းလူႉတၢႆ ။

ၼႂ်းလိူၼ်မၢတ်ႉၶျ်ၼၼ်ႉသမ်ႉ တီႈၸႄႈၵႅင်းၵူၺ်းၼင်ႇၵဝ်ႇ ႁူဝ်ၼႃႈၸုမ်းလုၵ်ႉၽိုၼ်ႉ အမျိုးသားလွတ်မြောက်ရေးတပ်တော် NLA ၵူဝ်ႇၵျီးၵွတ်ႉလႄႈလုၵ်ႈၸုမ်း ၺႃးတီႉၺွပ်း ။
ၼႂ်းလိူၼ်မၢတ်ႉၶျ်ၼၼ်ႉၵူၺ်းၼင်ႇၵဝ်ႇ ၼႂ်းတိူင်းမၵူၺ်းၵေႃႈ ၾၢႆႇၵႅတ်ႇၶႄၸၢဝ်းယေႃး ယောကာကွယ်ရေးတပ် YDF တိုၵ်းတေႃးၸုမ်းဢၼ်ယူႇတႂ်ႈၶဝ်ၶိုၼ်း ယွၼ်ႉမီးငဝ်းလၢႆးၶႂ်ႈၽၢတ်ႇဢွၵ်ႇ( ၼႆႉတႄႉ ဢမ်ႇမီးၵူၼ်းလူႉတၢႆ) ။

ထိုင်မႃး လိူၼ်ဢေႊပရူဝ်ႊလ်ၼၼ်ႉ PDF ၼႂ်းဝဵင်းမျၢႆႇ တိူင်းမၵူၺ်း ၶိုၼ်းတိုၵ်းတေႃး ၸုမ်းပ3တူဝ် (ၾၢႆႇၵႅတ်ႇၶႄ ၾၢႆႇၽွင်းငမ်း ၾၢႆႇႁူမ်ႇလူမ်ႈ) ဢၼ်ပဵၼ်ၸုမ်းလုၵ်ႉၽိုၼ်ႉၼင်ႇၵၼ် ။

လိူၼ်ဢေႊပရိူဝ်လ်ႊၵူၺ်းၼင်ႇၵဝ်ႇ တီႈမိူင်းပၢႆး လႅၼ်လိၼ်တႆး-ယၢင်းလႅင် ၸုမ်း PDF ဢၼ်ဢူးဢွင်ႇမိၼ်း ဢွၼ်ႁူဝ်ဝႆႉ ၺႃးလုၵ်ႈၸုမ်း ၸုမ်းလုၵ်ႉၽိုၼ်ႉဢႅဝ်ႊလ်ၾႃႊ ပိုတ်းယိုဝ်း ( မီးလွင်ႈလူႉတၢႆ)
လိူဝ်ၼၼ်ႉ တေႃႇထိုင်လိူၼ်ၵျုၼ်ႊ မီးလွင်ႈတုမ်ႉတိူဝ်ႉၵၼ်ထႅင်ႈ 5 ပွၵ်ႈ ၵမ်ႈၼမ် ပဵၼ်ၵႂႃႇၼႂ်းတိူင်းၸႄႈၵႅင်းလႄႈတိူင်းတႃႈလိူဝ်ႇ ။

ၵဵဝ်ႇလွင်ႈ ပိူင်ပဵၼ်ၸိူဝ်းၼႆႉသေ ၸွမ်းၼင်ႇ ၽူႈတူင်ႉၼိုင်ႈ ၼႂ်းၸုမ်းလုၵ်ႉၽိုၼ်ႉၸိူဝ်းၼႆႉ မွၵ်ႈ 7 ၵေႃႉ လၢတ်ႈတီႈ BBC ဝႃႈ ၵမ်ႈၼမ် လုၵ်ႈၸုမ်းႁဵတ်းၽိတ်းပိူင်လႄႈ ထိုင်တီႈယိပ်းၵွင်ႈယိပ်းၵၢင်ႇၵႄႈလိတ်ႈ သင်ႇသွၼ်ၵၼ်ၵူၺ်း ဝႃႈၼႆ။
ၵူၺ်းၵႃႈ ပေႃးထွမ်ႇၵူၼ်းပိုၼ်ႉတီႈလႂ်တီႈၼၼ်ႈလၢတ်ႈတႄႉ ၸုမ်းဢဵၼ်ႁႅင်းယႂ်ႇ သမ်ႉ ၶဝ်ႈယိုတ်းၵုမ်းၸုမ်းဢဵၼ်ႁႅင်းလဵၵ်ႉ လႄႈ တင်းသွင်ၾၢႆႇ ၸင်ႇ မီးလွင်ႈ ပိုတ်းယိုဝ်းၵၼ်ၶိုၼ်းႁၢဝ်ႈႁႅင်းၼႆယူႇ ။

ပေႃးတူၺ်းပွတ်းတၢင်း မိူင်းယၢင်းလႅင်ၵေႃႈ ၸုမ်းဢဵၼ်ႁႅင်းယႂ်ႇယၢမ်ႈၶဝ်ႈၵုမ်းၸုမ်းလဵၵ်ႉမႃး။ မိူၼ်ၼင်ႇ ၸုမ်းဢႄႊလ်ၾႃႊ ဢၼ်ယူႇတႂ်ႈ IEC ယိုတ်းၵုမ်း PDF မိူင်းပၢႆး ထိုင်တီႈ ၾၢႆႇၺႃးယိုတ်းၵုမ်း ဢမ်ႇၸၢင်ႈပၼ်ႇၵၢၼ်ၶိုၼ်းထိုင်မိူဝ်ႈလဵဝ် ။

ဝၢႆးသေ ၸုမ်းလုၵ်ႉၽိုၼ်ႉၼင်ႇၵၼ် ယိုတ်းၵုမ်းၵၼ်မႃးၼႆႉ လိူဝ်သေၸုမ်း PLA ယဝ်ႉ ၸုမ်း ဗမာအမျိုးသားတော်လှန်ရေးတပ်မတော် BNRA ၊ NLA လႄႈ SRF ဢမ်ႇပၼ်ႇၵၢၼ်လႆႈသေၸုမ်းယဝ်ႉဝႃႈၼႆ။

ဢၼ်ၸုမ်းလုၵ်ႉၽိုၼ်ႉၸိူဝ်းၼႆႉ ပဵၼ်ပၼ်ႁႃၵၼ်ၼႆႉ ၸွမ်းၼင်ႇ ၽူႈႁူႉႁၼ်ၸွမ်းလၢတ်ႈတီႈ BBC တႄႉ ပဵၼ်ယွၼ်ႉ ပၵ်းပိူင်ၽၼ်ႇတႃႇငိုၼ်းတွင်းလႄႈ ပၵ်းပိူင်ၽွင်းငမ်း ၼႆယူႇ။ မၢင်ၸုမ်းၵေႃႈ ဢမ်ႇၸႂ်ႈယူႇတႂ်ႈ NUG ၵမ်းသိုဝ်ႈလႄႈ တႃႇၵုမ်းထိင်းၵၼ်ၼႆႉ ယၢပ်ႇႁႅင်းၼႆထႅင်ႈ ။

တေႃႈၼင်ႇ ၸုမ်းလုၵ်ႉၽိုၼ်ႉဢၼ်ယူႇတႂ်ႈ NUG ၼင်ႇၵၼ်ၵေႃႈ ပႆႇမိူၼ်ၵၼ်လႆႈတင်းပိုၵ်း ။ ၸုမ်းဢၼ်ယူႇတႂ်ႈ ၽူႈမီးၸၼ်ႉၼႂ်းKIA လႄႈ ၸုမ်းဢၼ်ယူႇတႂ်ႈ ႁွင်ႈၵၢၼ်ၵႅတ်ႇၶႄဢၼ် NUG ၶွတ်ႇၽွတ်ႈၼႆသေ တႅၵ်ႇပဵၼ်သွင်ၵိူင်း ။

တေႃႇထိုင်မိူဝ်ႈလဵဝ် ၸုမ်းလုၵ်ႉၽိုၼ်ႉ ၸိူဝ်းဢဝ်ပုၼ်ႈၽွၼ်းယူႇဝႆႉ ပွတ်းတၢင်း ၵၢတ်ႇသႃ ၵေႃလၢင်း ( ၵွင်းလၢင်း ) ၵၢၼ်ႉၿလူ ပႃၸဵမ် ၵၢတ်ႇလိုဝ်း တူပ်းမိုဝ်း(တမူး) ၸိူဝ်းဢၼ်မီးပွတ်းၼိူဝ်ၸႄႈၵႅင်းၸိူဝ်းၼၼ်ႉ ပဵၼ်ၸုမ်းလုၵ်ႉၽိုၼ်ႉမၢႆၼိုင်ႈ ဢၼ်ယူႇတႂ်ႈ သိုၵ်းၶၢင် KIA ၵုမ်းၵမ်ဝႆႉ ။

ပွတ်းတၢင်း ၸႄႈၵႅင်း ၊ မုင်ႇယႂႃႇ ၊ ယိၼ်းမႃႇပိၼ်ႇ သူၺ်ႇၿူဝ်ႇ( မီးၸုမ်းၼိုင်ႈၸုမ်းသွင်) ၸိူဝ်းၼႆႉတႄႉ တိုၵ်ႉယူႇတႂ်ႈ NUG ။
ၸုမ်းလုၵ်ႉၽိုၼ်ႉၸိူဝ်းၼႆႉ တႄႇၸဵမ်မိူဝ်ႈ သိုၵ်းမၢၼ်ႈယိုတ်းမိူင်းၼၼ်ႉမႃး ႁူမ်ႈၵၼ် ၵွင်ႉၵၼ် ၸင်ႇဢဵၼ်ႁႅင်းယႂ်ႇမႃးသေတႃႉ ၽိူဝ်ႇဢဵၼ်ႁႅင်းယႂ်ႇမႃးသမ်ႉ ၶိုၼ်းဝၢႆႇပၢၵ်ႇၵွင်ႈႁႃၵၼ်ၶိုၼ်း ။ တႃႇပၢၵ်ႈပႅတ်ႈ ၸဝ်ႈဢႃႇၼႃႇ ဢၼ်ၵုမ်းမိူင်းမႃး ၶၢဝ်းတၢင်း 5 ပီပၢႆၼႆႉ လူဝ်ႇတိုၵ်းတေႃးထိုင်တီႈသေတႃႉ သမ်ႉၵုမ်ႇမိုင်ႉလႆႈၵုမ်းၵၼ်ၶိုၼ်းၵူၺ်းလႄႈ တေယၢင်ႈၵႂႃႇတၢင်းၼႃႈႁႃႉ ထွႆလင်ၼႆ ပဵၼ်ၶေႃႈလီဝူၼ်ႉ ၸိူဝ်းပၵ်းတႃပႂ်ႉတူၺ်းဝႆႉယူႇ ။

တႃႇၵႄႈလိတ်ႈပၼ်ႁႃၸိူဝ်းၼႆႉ NUCC NUG ႁူပ်ႉဢုပ်ႇၵၼ်ဝႆႉသေ ယုမ်ႇယမ်ဝႃႈ တေဢဝ်ပိူင်ၾႅတ်ႊတရႄႊၸိူဝ်းၼႆႉ ငူပ်ႉငီႉၵၼ်လႆႈၶိုၼ်းယူႇ ၼႆ ပိုၼ်ၽၢဝ်ႇၵႂႃႇ မိူဝ်ႈဝၼ်းတီႈ 29/06/2026 ။

တေႃႇထိုင်မိူဝ်ႈလဵဝ် NUCC ၸတ်းပၼ် ပၢင်ဢုပ်ႇဢူဝ်း PDFလၢႆၸုမ်းယူႇသေတႃႉ ႁဵတ်းပဵၼ်ပၢင်ၵႂႃႇၵူၺ်း ပႆႇထိုင်တီႈဝႃႈ လွင်ႈၶဝ်ႈဢွၵ်ႇၵၼ်ၶႅမ်ႉလႅပ်ႈ ၼႆ ၽူႈႁူႉႁၼ်ၸွမ်းလၢတ်ႈတီႈသိုဝ်ႇ BBC ၼင်ႇၼႆ။

ဢၼ်ဝႃႈ ၸုမ်းၼိုင်ႈလႄႈၸုမ်းၼိုင်ႈ တေလႆႈၶွၼ်ႈႁႅင်းၵၼ် ၸူႉတုမ်ၵၼ်ၼႆၼၼ်ႉ ပွင်ႇၸႂ်ယူႇ ၊ ဢၼ်ႇဝႃႈ တေလႆႈပၢၵ်ႈပႅတ်ႈပၢႆးဝူၼ်ႉသုၼ်ႇတူဝ် တေလႆႈပူတ်းပႅတ်ႈၽႅၼ်ၵၢၼ်သုၼ်ႇၸုမ်းလႂ်ၸုမ်းၼၼ်ႉတႄႉ ဢမ်ႇၵိုင်ႇလီပဵꧣ် ။ ၶႂ်ႈႁႂ်ႈမီးမႃး ၵၢၼ်မိူင်း ဢၼ်သုၼ်ႇလႆႈသုၼ်ႇပဵၼ်ၽဵင်ႇပဵင်းၵၼ် ယဝ်ႉ ၼႆ – ၵူဝ်ႇယႅၼ်ႇၽဵဝ်းမူဝ်း ၼႂ်းၸုမ်း PLA လၢတ်ႈၼင်ၼႆ။