မိူဝ်ႈဝႃး ဝၼ်းတီႈ 20/04/2026 မိၼ်းဢွင်ႇလၢႆႇၸွမ်ၸိုင်ႈယိုတ်းမိူင်း ၸတ်းပၢင်ၵုမ် လူင်ပွင်ၸိုင်ႈသိုၵ်း ဢွၼ်တၢင်းသုတ်း ၼႂ်းၶၢဝ်းတၢင်းယိုတ်းမိူင်းယဝ်ႉ 5 ပီသေ လၢတ်ႈၵႂႃႇဝႃႈ ၼႂ်းၶၢဝ်းတၢင်း 3 လိူၼ် တေႁွင်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်းတင်းသဵင်ႈ ဢုပ်ႇဢူဝ်းၵၢၼ်ငမ်းယဵၼ် လႄႈ PDF ၵေႃႈ တေလႆႈဝၢင်းၶိူင်ႈ ၼႆယဝ်ႉ။

ၼႂ်းပၢင်ၵုမ် လူင်ပွင်ၸိုင်ႈသိုၵ်း ပွၵ်ႈၵမ်းႁႅၵ်ႈၼၼ်ႉ မိၼ်းဢွင်ႇလၢႆႇ လၢတ်ႈၵႂႃႇဝႃႈ “ၸုမ်းယိပ်းၵွင်ႈၵၢင်ႇ ၸိူဝ်းလူင်းလၢႆးမိုဝ်းၵိုတ်းတိုၵ်းဝႆႉသေ ၼႂ်းၶၢဝ်းတၢင်း 5 ပီၼႆႉ ဢၼ်ပႆႇလႆႈ ႁူပ်ႉထူပ်းၵၼ်ၵေႃႈတိုၵ်ႉမီးယူႇ။ တူဝ်ယၢင်ႇ ၸုမ်းယၢင်း KNU ၸုမ်းၶျၢင်း CNF ၸုမ်းသိုၵ်းလုၵ်ႈႁဵၼ်းလုၵ်ႉၽိုၼ်ႉ ABSDF ၶဝ်ၸိူဝ်းၼႆႉ။ ယိၼ်းလီႁပ်ႉတွၼ်ႈ EAO တင်းသဵင်ႈ တႃႇမႃးႁူပ်ႉထူပ်းဢုပ်ႇဢူဝ်းၵၼ် ဝႃႈတေၶႂ်ႈႁဵတ်းသင် ၸဵမ်ၸိူဝ်းၼႆႉယူႇ” ဝႃႈၼႆ။

ၼႂ်းၽိုၼ်လိၵ်ႈၵိၼ်ၵႅၼ်ႇလူင်းလၢႆးမိုဝ်းၵိုတ်းတိုၵ်းၵၼ်ဝႆႉၼၼ်ႉ မီးၶေႃႈတူၵ်းလူင်းၵၼ်ဝႆႉ တႃႇ 43 ၶေႃႈ။ မိူဝ်ႈၽွင်းလူင်းလၢႆးမိုဝ်း NCA ဝႆႉၼၼ်ႉ မီးပႃးၶေႃႈတူၵ်းလူင်း Union Accord (ၶေႃႈတူၵ်းလူင်းၸၼ်ႉမိူင်းႁူမ်ႈတုမ်) ဝႆႉယူႇ။ လွင်ႈၼႆႉၵေႃႈ တေဢဝ်တၢင်ႇလၢတ်ႈၵႂႃႇတီႈ လုမ်းသၽႃးမိူင်းႁူမ်ႈတုမ် ၵမ်းၶၵ်ႉၵမ်းတွၼ်ႈသေ ႁဵတ်းသၢင်ႈၵႂႃႇ – ၼႆ ဢူးမိၼ်းဢွင်ႇလၢႆႇ သိုၵ်းယိုတ်းဢႃႇၼႃႇၸိုင်ႈမိူင်း ဢၼ်ၶိုၼ်ႈပဵၼ် ၸွမ်ၸိုင်ႈႁင်းၵူၺ်းၼၼ်ႉ လၢတ်ႈၼင်ႇၼႆ။

ပၢင်ဢုပ်ႇဢူဝ်းၵၢၼ်ငမ်းယဵၼ်ၼႆႉ တေၸတ်းႁဵတ်းၵႂႃႇ ၼႂ်းၶၢဝ်းတၢင်း 100 ဝၼ်း ၵွၼ်ႇပႆႇထိုင် လိူၼ်ၵျူႊလၢႆႊ ဝၼ်းတီႈ 31 သေ သင်ဝႃႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်းၵိုတ်းတိုၵ်းဝႆႉလႄႈ ဢမ်ႇလူင်းလၢႆးမိုဝ်းဝႆႉၼၼ်ႉ ၶဝ်ႈမႃးတုၵ်းယွၼ်း တူၵ်ႇတၵ်ႉလၢတ်ႈ လွင်ႈဢၼ်တေဢမ်ႇၸတ်းပွင်ပဵၼ်လႆႈၼၼ်ႉၸိုင် မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း တိုၼ်းတေဢမ်ႇၽွမ်ႉၸွမ်းလႆႈ ၼႆယဝ်ႉ။

ဢူးမိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း လၢတ်ႈၵႂႃႇၼႂ်းပၢင်ၵုမ်လူင်ပွင်ၸိုင်ႈသိုၵ်းၼၼ်ႉထႅင်ႈဝႃႈ –“ပိူဝ်ႈတႃႇၸုမ်းၸဝ်ႈၵဝ်ႇတေသိုပ်ႇၸုၵ်းမၼ်ႈၵႂႃႇလႆႈၶၢဝ်းႁိုင်ၼၼ်ႉ ၸုမ်းလႂ်သေ ဢမ်ႇဝႃႈ သင်မႃးတုၵ်းယွၼ်းႁႂ်ႈႁဵတ်းသၢင်ႈပၼ် ဢၼ်ဢမ်ႇပွင်ပဵၼ်လႆႈၼၼ်ႉတႄႉ တေၽိတ်းလူင်ၽိတ်းလၢင်ယူႇ။ ပေႃးပဵၼ်ၼၼ်မႃး ယူႇတီႈၸိုင်ႈမိူင်းႁႄ တေလႆႈႁဵတ်းသၢင်ႈ ၶိုၼ်းဢၼ်ထုၵ်ႇလီႁဵတ်းၼၼ်ႉယူႇ” ဝႃႈၼႆ။

လိူဝ်ၼၼ်ႉ ယွၼ်ႉၸုမ်းၵူၼ်းၼုမ်ႇၸၢဝ်းၶိူဝ်းမၢၼ်ႈ ဢမ်ႇပဵင်းပေႃးၸႂ်ၼိူဝ် ၶေႃႈတွပ်ႇပၢင်လိူၵ်ႈတင်ႈ 2020 ၼၼ်ႉသေ ၸင်ႇၵိူတ်ႇပဵၼ်မႃး PDF ၾၢႆႇၼိုင်ႈၵေႃႈ ယွၼ်ႉၵူၼ်းႁဵတ်း ၵၢၼ်မိူင်း ၸိူဝ်းယူႇၼႂ်းမိူင်း ၼွၵ်ႈမိူင်းၶဝ် ၸႂ်ႉတိုဝ်းၶေႃႈယူပ်ႈယွမ်း လွင်ႈဢူၼ်ႈဢွၼ်ႇ ၼႂ်းၶၵ်ႉၵၢၼ်ပၢႆးပၺ်ႇၺႃႇ လႄႈ ၵၢၼ်ပၼ်တၢင်းႁူႉဢေႇၸိူဝ်းၼႆႉသေ သေႃႇသူၼ်းႁႂ်ႈၸုမ်း ၵူၼ်းၼုမ်ႇ လုၵ်ႉႁိုၼ်ႇၶိုၼ်ႈမႃးယိပ်းၵွင်ႈၵၢင်ႇ ၸုမ်း PDF ႁႅင်းယႂ်ႇမႃး ၼႆ ဢူးမိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း လၢတ်ႈဝႆႉၼင်ႇၼႆ။

“ၸုမ်းယိပ်းၵွင်ႈၵၢင်ႇ PDF ၼႆႉ ပဵၼ်ၸုမ်းၵေႃႇၵၢၼ်ႁၢႆႉတေႃႇၸိုင်ႈမိူင်းသေ မိူဝ်ႈလဵဝ်ၼႆႉ ၶဝ်ပူၼ်ႉပႅၼ်ႁဵတ်း ၽိတ်းပၵ်းပိူင် ၸိုင်ႈမိူင်းသေ ႁႃၵဵပ်းၶွၼ်ႇ တင်ႈၵဵတ်ႉလၢၼ်ႇသေပႂ်ႉ ယွၼ်းငိုၼ်းၵူၼ်းမိူင်းၸွမ်းတႃႈၸွမ်း တၢင်း။ ၸွမ်းသွၵ်ႈႁႃၶုတ်းဢွၵ်ႇ ၶူဝ်းႁႄႈတိုၼ်းလၢင်း ယႃႉထိူၼ်ႇၶိူဝ်းပႃႇမႆႉသေ ၼိူဝ်လိၼ် တႂ်ႈၼမ်ႉသေ ၸႂ်ႉတိုဝ်းတႃႇ ပုၼ်ႈသုၼ်ႇတူဝ်ၶဝ်ယူႇ။”

ယၢမ်းလဵဝ် ၸုမ်းၵူၼ်းၼုမ်ႇမၢၼ်ႈၸိူဝ်းလုၵ်ႉၽိုၼ်ႉယိပ်းၵွင်ႈၵၢင်ႇ ပဵၼ်ၸုမ်း PDF ယူႇၼႆႉ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉ ၵႂႃႇၶဝ်ႈႁူမ်ႈယူႇၶိုၼ်းတႂ်ႈတိူင်းသိုၵ်းပွတ်းၵၢင် (လပခ) လႄႈ တိူင်းသိုၵ်းပွတ်းၸၢၼ်း (တပခ) ဝႆႉ ၼပ်ႉႁူဝ်ပၢၵ်ႇၵေႃႉယဝ်ႉၼႆ ဢူးမိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း လၢတ်ႈ။

ၾၢႆႇၼိုင်ႈၵေႃႈ ပေႃးထိုင်မႃး ပီသွၼ်ၵၢၼ်ႁဵၼ်း ဢၼ်မႂ်ႇၼႆႉ ဢူးမိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ယင်းႁၢင်ႈႁႅၼ်းဝႆႉပႃး တႃႇပိုတ်ႇ “ႁူင်းႁဵၼ်းသွၼ်ၵၢၼ်သိုၵ်းၵူၼ်းၼုမ်ႇ” တီႈ ဝဵင်းလူင်ၼေႇပျီႇတေႃႇ တင်း ဝဵင်းလူင်တႃႈၵုင်ႈထႅင်ႈယူႇ ၼႆယဝ်ႉ။