မိူဝ်ႈဝႃး ဝၼ်းတီႈ 24 လိူၼ်ၾႅပ်ႉပိဝ်ႊရီႇ ယၢမ်းတၢမ်းၶမ်ႈ မွၵ်ႈ 5 မူင်း ၵူၼ်းယိပ်းၵွင်ႈပွတ်းသၢမ်ၵေႃႉ ၶီႇၵႃးသီၶၢဝ်မႃးသေ ၶဝ်ႈၵႂႃႇၼႂ်းႁၢၼ်ႉၶၢႆၵုၼ်ႇၵူႈသႅၼ်းသႅၼ်း တီႈပွၵ်ႉ 5 ဝဵင်းလႃႈသဵဝ်ႈ တီႉၺွပ်း ႁွင်ႉဢဝ်တူဝ်ၸဝ်ႈႁၢၼ်ႉၵႂႃႇၵူၺ်းဢမ်ႇၵႃး ၸူၼ်ဢဝ်ၵႂႃႇပႃးတူဝ်ငိုၼ်း ဝႃႈၼႆ။
ၼႂ်းၶလိပ်ႉငဝ်းႁၢင်ႈတူင်ႉ ဢၼ်ၽႄႈၶိုၼ်ႈမႃးၼိူဝ်သိုဝ်ႇတူင်ႇဝူင်းၵူၼ်း (ဢွၼ်ႊလၢႆႊ) ၼႆႉ – မီးၵူၼ်းၸၢႆးပူၵ်ႉၼႃႈတႃသၢမ်ၵေႃႉ ၶဝ်ႈၵႂႃႇၼႂ်းႁၢၼ်ႉၶၢႆၵုၼ်ႇယွႆႈ ႁဵတ်းၵႅင်ႈတေၶဝ်ႈၵႂႃႇသိုဝ်ႉၵုၼ်ႇသေ ဢဝ်ၵွင်ႈၸမ်ႈသႂ်ႇ ၼၢင်းယိင်းသၢမ်ၵေႃႉ လႄႈ ၵူၼ်းႁဵတ်းၵၢၼ်ၼႂ်းႁၢၼ်ႉၶၢႆၵုၼ်ႇၼၼ်ႉသေ တီႉၺွပ်းဢဝ် ၼၢင်းယိင်းၵေႃႉၼိုင်ႈၶိုၼ်ႈၵႃးၵႂႃႇ ။
ၵူၼ်းမိူင်းပိုၼ်ႉတီႈဝဵင်းလႃႈသဵဝ်ႈလၢတ်ႈတီႈၽူႈတွႆႇႁွၵ်ႈဝႃႈ “ႁၢၼ်ႉဢၼ်ၶဝ်ၵႂႃႇၸူၼ်ၼၼ်ႉ ၸိုဝ်ႈမၼ်းပဵၼ် တွမ်ကျားကုန်စုံဆိုင် ဢၼ်မီးႁိမ်းၵၢတ်ႇပလွင်ႈ ၾၢႆႇၼိူဝ်မၢၼ်ႈဢၢႆႇ ၼၼ်ႉ။ ပေႃးတူၺ်းၾၢင်ႁၢင်ႈ လႄႈ တၢင်းႁဵတ်းသၢင်ႈ ၵူၼ်းၸိူဝ်းဢၼ်မႃးၸူၼ်ၼၼ်ႉ ၸၢင်ႈပဵၼ်လႆႈ PDF ဢၼ်ယူႇၼႂ်းသိုၵ်းၵဝ်ႈၵၢင်ႉ။ ၶဝ်ႁွင်ႉၵႂႃႇယွၼ်းၵႃႈထုတ်ႇတူဝ်ၵူၺ်း” ဝႃႈၼႆ။
ၵူၺ်းၵႃႈတေႃႇထိုင်ယၢမ်းလဵဝ် ယူႇတီႈၽူႈတွႆႇႁွၵ်ႈပႆႇလႆႈၶေႃႈယိုၼ်ယၼ်ဝႃႈပဵၼ်ၸုမ်းလႂ်တႄႉတႄႉ။
လႆႈႁူႉဝႃႈ ႁၢၼ်ႉတေႃႇထိုင်ယၢမ်းလဵဝ်ၵေႃႈ ၾၢႆႇၸဝ်ႈၼႃႈတီႈပလိၵ်ႈ ဝဵင်းလႃႈသဵဝ်ႈၶဝ် ယင်းပႆႇတီႉၺွပ်းလႆႈ ၵူၼ်းၸူၼ် လႄႈ ၼၢင်းယိင်းၵေႃႉထုၵ်ႇတီႉၺွပ်းတူဝ်ၵႂႃႇၼၼ်ႉၵေႃႈ မီးဝႆႉတီႈလႂ်ၼႆ ဢမ်ႇပႆႇလႆႈႁူႉၸွမ်းႁူဝ် ယွႆႈတႅတ်ႈတေႃး ဝႃႈၼႆ။
ဝဵင်းလႃႈသဵဝ်ႈၼႆႉ လင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး သိုၵ်းၵဝ်ႈၵၢင်ႉ တင်း ၸုမ်းဢူၺ်းလီၶဝ် PDF ၵုမ်းၵမ်ပၼ်ႇၵၢၼ်ၽွင်းငမ်းၵႂႃႇ ႁိုင်ၶၢဝ်းတၢင်း 9 လိူၼ်။ ယွၼ်ႉလူင်ပွင်ၸိုင်ႈမိူင်းၶႄႇ ပၼ်ႁႅင်းဢီးမိပ်ႇငႅၼ်းၵူႈၾၢႆႇယဝ်ႉ ႁဵတ်းၶဵဝ်ပၼ်ႁႂ်ႈသိုၵ်းမၢၼ်ႈတင်း သိုၵ်းၵဝ်ႈၵၢင်ႉၵႂႃႇႁူပ်ႉဢုပ်ႇၵၼ်ၼႂ်းမိူင်းၶႄႇ လၢႆပွၵ်ႈလၢႆၵမ်းလႄႈ မိူဝ်ႈလိူၼ်ဢေႊပရႄႇ ဝၼ်းတီႈ 22 ပီ 2025 သိုၵ်းမၢၼ်ႈႁွင်ႉဢဝ်ႁႅင်းသိုၵ်းၼပ်ႉႁူဝ်ႁဵင် ၶဝ်ႈၵႂႃႇၵုမ်းၵမ်ပၼ်ႇၵၢၼ်ၽွင်းငမ်းဝႆႉ ပဵၼ်တၢင်းၵၢၼ် ႁၢၼ်ႉတေႃႇထိုင်ယၢမ်းလဵဝ် ။
ၽွင်းသိုၵ်းမၢၼ်ႈၵုမ်းၵမ်ပၼ်ႇၵၢၼ်ၽွင်းငမ်းၶိုၼ်းၼႆႉ ၽူႈလၵ်ႉၸၵ်ႉၶုတ်ႈ၊ ၵူၼ်းၸူၼ်လိူင်ႇၼမ်မႃးႁႅင်းတေႉတေႉ ၾၢႆႇၸုမ်းပလိၵ်ႈဢမ်ႇတွၼ်ႉတီႉၺွပ်းလႆႈ ၵူၼ်းၸူၼ်မႃးသေပွၵ်ႈၼႆ ၵူၼ်းမိူင်းပိုၼ်ႉတီႈဝဵင်းလႃႈသဵဝ်ႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ