ယႃႈမဝ်းၵမ်ၼႂ်းမိူင်းတႆးပွတ်းဢွၵ်ႇ ၸွမ်းလႅၼ်လိၼ် လိူင်ႇၼမ်မႃးႁႅင်း – ပိူဝ်ႉထူင်ယႃႈၵႂႃႇမႃးၼိူဝ်သဵၼ်ႈတၢင်းလူင် တီႈဢိူင်ႇမိူင်းၽူင်း – ၺႃးပလိၵ်ႈမၢၼ်ႈလမ်းယိုဝ်းသေ တီႉၺွပ်းလႆႈတင်းၵူၼ်းတင်းယႃႈ။
မိူဝ်ႈဝၼ်းတီႈ 29/1/2026 ယၢမ်းတၢမ်းၶမ်ႈ ၵူၼ်းၸၢႆးမွၵ်ႈ 10 ၵေႃႉ ပႃးထူင်ပိူဝ်ႉလမ်လတ်းမႃးၸွမ်းသဵၼ်ႈတၢင်း ႁိမ်းသူၼ်ယၢင်တင်ရႃႇပႃႇ ဝၢၼ်ႈသီဝုၼ်းထွင်း ၸႄႈဝဵင်းတႃႈၶီႈလဵၵ်း ပလိၵ်ႈမၢၼ်ႈႁႄႉ ၶဝ်ဢမ်ႇၵိုတ်းလႄႈ လႆႈပိုတ်းယိုဝ်းၵၼ် သဵင်ၵွင်ႈတႅၵ်ႇၵႂႃႇၵမ်းၼိုင်ႈၼႆယဝ်ႉ။
ၵူၼ်းၸၢႆးၸိူဝ်းၼၼ်ႉ ဢဝ်ထူင်ပိူဝ်ႉၶဝ် ထိုမ်ႈပႅတ်ႈသေ လႅၼ်ႈပၢႆႈ ။ ပလိၵ်ႈလမ်းၸွမ်းၵႂႃႇတီႉၺွပ်းဢဝ်လႆႈတင်းယႃႈ၊ တင်းၵူၼ်းၼႆ လႆႈႁူႉၼင်ႇၼႆ။
ပလိၵ်ႈၶဝ်တႄႉ ပိုၼ်ၽၢဝ်ႇဝႃႈ “တီႉၺွပ်းလႆႈယႃႈၵတ်ႉတမိၼ်း ၼမ်ႉမၵ်း 350 ၵရမ်ႊ၊ ယႃႈဢၢႆႉသ် တႃႇ 357 ၵရမ်ႊ လႄႈ ၵွင်ႈပွတ်း သႅၼ်းဢၼ်ႁဵတ်းဢွၵ်ႇမိူင်းဢီႇတလီႇ PIETRO BERETTA ၼိုင်ႈလဝ်း လႄႈ မၢၵ်ႇၵွင်ႈ 14 ဢၼ်။ ၵႃႈၶၼ်ယႃႈမဝ်းၵမ်ၸိူဝ်းတီႉၺွပ်းလႆႈဝႆႉၼၼ်ႉ ၵိုင်ႇငိုၼ်းမၢၼ်ႈမွၵ်ႈ 60,060 သႅၼ်ပျႃး ” ဝႃႈၼႆ။
ငဝ်ႈငႃႇဢွင်ႈတီႈ ၵူၼ်းၸၢႆးၸုမ်းၼၼ်ႉတေႃႉဢဝ်ယႃႈမဝ်းၵမ်မႃးၼၼ်ႉ ပဵၼ်တၢင်းဝဵင်းၵဵင်းတုင်၊ ဢၢၼ်း တေႃႉဢဝ်ၵႂႃႇသူင်ႇပၼ်တၢင်း ႁိမ်းၾင်ၼမ်ႉမႄႈၶွင် ၼႆယဝ်ႉ။
ယၢမ်းလဵဝ် ၾၢႆႇၸဝ်ႈၼႃႈတီႈပလိၵ်ႈၶဝ် တီႉၺွပ်းလႆႈဝႆႉ ၵူၼ်းတေႃႉယႃႈမဝ်းမႃး တႃႇ 2 ၵေႃႉ လႄႈ ၺႃးတီႉ ၺွပ်းဝႆႉတီႈႁူင်းပလိၵ်ႈဝၢၼ်ႈပုင်ႇ ၸႄႈဝဵင်းတႃႈၶီႈလဵၵ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ