မိူဝ်ႈဝၼ်းတီႈ 9/1/2026 သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇတီႈလႅၼ်ၶႅၼ်ႈ သီႇပေႃႉ -မိူင်းယႆသေ တီႉၺွပ်းလႆႈႁူင်းႁုင်ယႃႈယႂ်ႇလူင် 3 တီႈ။ ဝၢႆးၼၼ်ႉ 5 ဝၼ်းၼႂ်းဝၼ်းတီႈ 14/1/2026 သိုၵ်းမၢၼ်ႈ ၵႂႃႇႁဵတ်းပၢင်သပ်းၸႅင်ႈၶၢဝ်ႇတီႈဝဵင်းပၢင်ႇဢူႈလူင် တိူင်းတႃႈလိူဝ်ႇ။ ႁွင်ႉဢဝ်ပႃး တူဝ်တႅၼ်းလုမ်းၽွင်းတၢင်ၼွၵ်ႈမိူင်း လႄႈ ၽူႈသိုဝ်ႇၶၢဝ်ႇၼႂ်းမိူင်း ၼွၵ်ႈမိူင်း ၶဝ်ႈႁူမ်ႈၸွမ်း ၼႆယဝ်ႉ။

သိုၵ်းမၢၼ်ႈယိုတ်းမိူင်း ဢဝ်ၶိူင်ႈမိၼ်သိုၵ်းသေ ၸူဝ်းဢဝ်ၽူႈမီးပုၼ်ႈၽွၼ်း တီႈလုမ်းတၢင်၊ တူဝ်တႅၼ်းၸုမ်းယႃႈမဝ်းၵမ် ၸၢတ်ႈၸိုင်ႈလုမ်ႈၾႃႉ၊ ၽူႈသိုဝ်ႇၶၢဝ်ႇၼွၵ်ႈမိူင်း ၼႂ်းမိူင်း လၢႆလၢႆမိူင်း ၵႂႃႇတူၺ်း ထိုင်တီႈႁူင်းႁုင်ယႃႈဢၼ်ယိုတ်းလႆႈၸိူဝ်းၼၼ်ႉ။

ႁူင်းႁုင်ယႃႈၸိူဝ်းၼႆႉ သိုၵ်းမၢၼ်ႈပိုၼ်ၽၢဝ်ႇဝႃႈ မီးၼႂ်းၼႃႈလိၼ် SSPP ၵုမ်းၵမ် ဝႃႈၼႆသေတႃႉ လွင်ႈၼႆႉယူႇတီႈ SSPP ၵေႃႈဢွၵ်ႇလိၵ်ႈပိုၼ်ၽၢဝ်ႇၼႂ်းဝၼ်းဢၼ်တီႉလႆႈၼၼ်ႉ ၵမ်းသိုဝ်ႈဝႃႈ – “ SSPP သေဢမ်ႇၵဵဝ်ႇၶွင်ႈၸွမ်းလွင်ႈၵၢၼ်ႁုင်ယႃႈႁဵတ်းယႃႈၸိူဝ်းၼၼ်ႉလႄႈ တေၸွပ်ႇႁႃငဝ်ႈ ငိူၼ်ႈမၼ်းလီလီသေ တေဢဝ်လိူင်ႈပၼ်တူတ်ႈတၢမ်ႇၵႂႃႇ ” ဝႃႈၼႆ။

ၸွမ်ႁၢၼ်ၸေႃႇမိၼ်းထုၼ်းၽူႈၶၢၼ်ပၢၵ်ႇ ၸုမ်းသိုၵ်းမၢၼ်ႈယိုတ်းမိူင်းလၢတ်ႈတီႈ ၽူႈသိုဝ်ႇၶၢဝ်ႇဝႃႈ ”ဢၼ်မႃးယိုတ်းလႆႈတီႈႁုင်ယႃႈၼႆႉပဵၼ်ယွၼ်ႉ ၶႄႇၸွႆႈသိုပ်ႇၶၢဝ်ႇပၼ်” ဝႃႈၼႆ။

ၵူၺ်းၵႃႈ ႁဵတ်းၸိူင်ႉႁိုဝ်၊ ၸႂ်ႉလၢႆးတၢင်းဢၼ်လႂ်သေ သူင်ႇၶၢဝ်ႇပၼ်တီႈၸုမ်းသိုၵ်းမၢၼ်ႈ လႄႈ ဢဝ်ႁႅင်းသိုၵ်းတပ်ႉလႂ်သေၶဝ်ႈၵႂႃႇယိုတ်းသိမ်းဢဝ် ႁူင်းႁုင်ယႃႈမဝ်းၵမ် ၼႆတႄႉမၼ်းၸၢႆးဢမ်ႇလၢတ်ႈပႃးဝႆႉ ႁူဝ်ယွႆႈမၼ်းႁႂ်ႈတႅၵ်ႇလႅင်း။

ၼႂ်းၸေႈၽိုၼ်ၶၢဝ်ႇသိုၵ်းမၢၼ်ႈတႄႉတႅမ်ႈဢွၵ်ႇပိုၼ်ၽၢဝ်ႇဝႆႉဝႃႈ – သိုၵ်းမၢၼ်ႈၸႂ်ႉႁႅင်းသိုၵ်း ၶွမ်ႊမႅၼ်ႊၻူဝ်ႊ 3 တပ်ႉၽႄ၊ သိုၵ်းႁၢၼ် 3 တပ်ႉၵွင်သေၶဝ်ႈယိုတ်း။ ယိုတ်းလႆႈ ႁူင်းႁုင်ယႃႈယႂ်ႇ ၊ ႁူင်းႁေႃႇႁႅၼ်းယႃႈမဝ်းၵမ်ၵူႈသႅၼ်းသႅၼ်းတႃႇသူင်ႇၶၢႆၼႂ်းလွၵ်းၵၢတ်ႇၸိူဝ်းၼႆႉတင်းမူတ်း 3 ႁူင်း။တီႉလႆႈ မေႃႁုင်ယႃႈ၊ မေႃႈၵႅတ်ႉသ် သႅၼ်းလီလၢႆလၢႆသႅၼ်း တႃႇႁုင်ယႃႈ၊ ၶိူင်ႈဢိၼ်ႊထိူဝ်ႊ ၼႅတ်ႉ သတႃႊလိင်ႉ၊ ရူတ်ႉၵႃးတႃႇတေႃႉသူင်ႇၸိူဝ်းၼႆႉၵူၺ်းဢမ်ႇၵႃးတီႉလႆႈပႃး- ယႃႈဢၢႆႉသ် 27 တၼ်ႊ၊ ၶိူင်ႈၶႅမ်ႊမီႊၶိူဝ်ႊလ်တင်းၼမ်တင်းလၢႆ ဢၼ်ၸၢင်ႈႁဵတ်းဢွၵ်ႇလႆႈယႃႈမႃႉ 810 လၢၼ်ႉမဵတ်ႉ- ဢၼ်မီးၵႃႈၶၼ်တင်းမူတ်း ၼိုင်ႈသႅၼ်ႁူၵ်းမိုၼ်ႇလၢၼ်ႉပျႃး 1620 ပီႊလီႊယၼ်ႊ ဝႃႈၼႆ။

ၵူၼ်းပၵ်းတႃၵၢၼ်မိူင်းၶဝ်လၢတ်ႈဝႃႈ – တီႉလႆႈယႃႈမဝ်းၵမ်ၵႃႈၶၼ်ယႂ်ႇၼမ်ထၢၼ်ႇၼႆႉ ဢမ်ႇပႃးၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈတႄႉဢမ်ႇပဵၼ်လႆႈ ၼႆယဝ်ႉ။

ၾၢႆႇၼိုင်ႈၵေႃႈ ၽူႈၶၢၼ်ပၢၵ်ႇၶွင်ၸုမ်းသိုၵ်းမၢၼ်ႈၵေႃႈ ယင်းဢမ်ႇပိုၼ်ၽၢဝ်ႇယိုၼ်ယၼ်ၼႄဝႆႉဝႃႈ ၸဝ်ႈၶွင်ႁူင်းႁုင်ယႃႈမဝ်းၵမ်ၼၼ်ႉ ပဵၼ်ၽႂ် ၸုမ်းလႂ်ၼႆတေႉတေႉသေ ၵူၺ်းပၢၵ်ႇလၢတ်ႈဝႃႈ “ၸဝ်ႈငိုၼ်းသႃး လႄႈ တင်းၸုမ်းယိပ်းၵွင်ႈၵၢင်ႇ ၼႂ်းပိုၼ်ႉတီႈႁူမ်ႈၵၼ်ႁဵတ်းသၢင်ႈဝႆႉ” ဝႃႈၼႆ။

ယွၼ်ႉၼၼ်လွင်ႈၸဝ်ႈၶွင် ႁူင်းႁုင်ယႃႈ တီႈႁဵတ်းၶူင်ႁဵတ်းဢွၵ်ႇယႃႈမဝ်းၵမ်လႆႈၵူႈသႅၼ်းသႅၼ်းၼႆႉ ပဵၼ်ႁင်းမူႇလႂ်ၸုမ်းလႂ် လႄႈ ပဵၼ်ၶွင်ၽႂ်ၼႆၼၼ်ႉ ႁၢၼ်ႉတေႃႇထိုင်ဝၼ်းမိူဝ်ႈ ၼႆႉ (17/01/2026) ၵေႃႈ ပႆႇယိုၼ်ယၼ်လႆႈပဵၼ်တၢင်းၵၢၼ်လႄႈ ပႆႇတီႉလႆႈၵူၼ်းၸိူဝ်းၵဵဝ်ႇၶွင်ႈၼၼ်ႉသေၵေႃႉ။

ၵဵဝ်ႇလူၺ်ႈလွင်ႈၼႆႉသေ သိုဝ်ႇၶၢဝ်ႇၵူႈၸုမ်းၸုမ်း ၶတ်းၸႂ်ၵပ်းသိုပ်ႇၸူး ၽူႈမီးပုၼ်ႈၽွၼ်းၼႂ်း ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆး (SSPP/SSA) ၵေႃႈ ဢမ်ႇလႆႈ ၼႆယဝ်ႉ။