ထုင်ႉၼမ်ႉမႃႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼႆႉ ၸဵမ်မိူဝ်ႈ 2004 ပုၼ်ႉမႃး ၵမ်းၵမ်းဝႃႈ မီးပၼ်ႁႃ ၵၢၼ်ၶုတ်းထၢၼ်ႇႁိၼ် ။ ၵူၼ်းမိူင်း လုၵ်ႉႁိုၼ်ႇသၢၼ်ၶတ်းမႃး လၢႆပွၵ်ႈလၢႆၵမ်းၵေႃႈ ဢမ်ႇႁၼ်ၵိုတ်းယင်ႉၵႂႃႇတင်းပိုၵ်း ။ တေႃႇထိုင်ငဝ်းလၢႆးမိူဝ်ႈလဵဝ်ၵေႃႈ ပၼ်ႁႃပႆႇယဝ်ႉပႆႇဝၢႆး ။ ၼႂ်းထုင်ႉၼမ်ႉမႃႉၼႆႉ ဢိင်ၼိူဝ် ၵၢၼ်ၶုတ်းထၢၼ်ႇႁိၼ်ၼႆႉသေ ဢမ်ႇလၢႆးဢွမ်ႈၵေႃႈ ၵမ်းသိုဝ်ႈ တိုၼ်းမီးပၼ်ႁႃသိုၵ်းမႃးၵဵဝ်ႇၶွင်ႈ။ ၼႂ်းဝူင်ႈဝၢင်ႈၼႆႉ ၵူၼ်းမိူင်းၺႃးသိုၵ်းၵဝ်ႈၵၢင်ႉတီႉၺွပ်းပေႃႉထုပ်ႉ ဢမ်ႇယွမ်း 3 ၵေႃႉ ။ ဢိင်ၼိူဝ် ၼႂ်းပိုၼ်ႉတီႈ မီး ထၢၼ်ႇႁိၼ်ၼၼ်ႉသေ သိုၵ်းၵေႃႈဢမ်ႇယဵၼ် ၵူၼ်းမိူင်းၵေႃႈဢမ်ႇလွတ်ႈၶဵၼ်မႃးသေပွၵ်ႈ ။

ဝၼ်းတီႈ 10 /01/2026 ၼႆႉ သိုၵ်းၶႄႇၵဝ်ႈၵၢင်ႉ MNDAA ႁႂ်ႈသိုၵ်း SSPP/SSA ထွႆထွၼ်ဢွၵ်ႇၼႂ်းပိုၼ်ႉတီႈ ထုင်ႉၼမ်ႉမႃႉ ၸႄႈဝဵင်းသီႇပေႃႉ ။ ၾၢႆႇၼိုင်ႈၵေႃႈ ဢမ်ႇတုမ်ႉဢမ်ႇတွပ်ႇသင်ၶိုၼ်း ။ ယူႇယူႇၵေႃႈ သိုၵ်းၵဝ်ႈၵၢင်ႉၶဝ်ႈဢဝ်တီႈယူႇလူၺ်ႈ ဢမ်ႇလႆႈၶေႃႈတူၵ်းလူင်းသင် ၊ ဝၢႆးၼႆႉ ၸင်ႇမီးပၼ်ႁႃမႃးၶိူဝ်းယႂ်း ၼႆ ၵူၼ်းပိုၼ်ႉတီႈလၢတ်ႈၼႄၼင်ႇၼႆ ။
ပၼ်ႁႃဢၼ်ၼိုင်ႈ ပႆႇယဝ်ႉ ဢၼ်ၼိုင်ႈသိုပ်ႇထႅင်ႈ ။ ထိုင်မႃး ဝၼ်းတီႈ 11/01/2026 ၶၢဝ်း 1 မူင်း 15 မိၼိတ်ႉ ၼႆႉသမ်ႉ သိုၵ်းၵဝ်ႈၵၢင်ႉ ဢၼ်မႃးဢဝ်တီႈယူႇဝႆႉ ၸွမ်းဝၢၼ်ႈၶူဝ်ၼႃးၽႃႉ ဢိူင်ႇၼႃးၼိဝ်ႉၼၼ်ႉ ၵႂႃႇတီႈသူၼ်ဢွႆႈ ၸၢႆးမူၼ်းၵျေႃႇ ဢႃယု 30 ပၢႆသေ လၢတ်ႈဝႃႈ ၶႂ်ႈလႆႈတူဝ်ၵူၼ်းႁဵတ်းၵၢၼ်သူၼ်ဢွႆႈ ၼႆထႅင်ႈ ။

ၸဝ်ႈသူၼ်ဢွႆႈလၢတ်ႈတုမ်ႉတွပ်ႇၶိုၼ်းဝႃႈ ပေႃးၶႂ်ႈလၢတ်ႈသင်တီႈလုၵ်ႈၼွင်ႉမၼ်းၵေႃႈ ႁႂ်ႈလၢတ်ႈတီႈတူဝ်မၼ်း ၼႆလႄႈ သိုၵ်းၵဝ်ႈၵၢင်ႉ ႁွင်ႉဢဝ် ၵူၼ်းသိုၵ်းမႃးထႅင်ႈ 4 ၵေႃႉသေ တီႉၺွပ်းပေႃႉထုပ်ႉၸဝ်ႈသူၼ်ဢွႆႈ ထိုင်တီႈပေႃးမၢၼ်ႉပေႃးၵမ်ႇသေ ပွႆႇပၼ်ၶိုၼ်း ၼႆ ၵူၼ်းႁူႉႁၼ်ၸွမ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။
ဝၼ်းၼၼ်ႉၵူၺ်းၼင်ႇၵဝ်ႇ ထိုင်မႃး ၶၢဝ်းယၢမ်း 2 မူင်းၶိုင်ႈၼႆႉသမ်ႉ မီးထႅင်ႈပၼ်ႁႃဢၼ်ၼိုင်ႈ ။ သိုၵ်း SSPP ဢၼ်လုၵ်ႉတီႈတပ်ႉၵွင်းႁၢၼ် ဝၢၼ်ႈၼႃးလိၼ်းသေ တိုၵ်ႉလူင်းၸူးဝၢၼ်ႈလူင်ၼၼ်ႉၵေႃႈ ၺႃးသိုၵ်း MNDAA ဢၼ်ပၵ်းယူႇဝႆႉတီႈဝၢၼ်ႈၶူဝ်ၼႃးၽႃႉၼၼ်ႉ ဢမ်ႇတၼ်းႁူႉငဝ်ႈႁူႉႁၢၵ်ႈသင်သေ တီႉၺွပ်းပေႃႉထုပ်ႉထႅင်ႈ ။ ဝၼ်းတီႈ 12/01/2026 ၶၢဝ်းၵၢင်ၼႂ် ၼႆႉ ၸင်ႇပွႆႇပၼ်ၶိုၼ်း ၼႆ ၵူၼ်းပိုၼ်ႉတီႈသိုပ်ႇလၢတ်ႈ။

ၵဵဝ်ႇလူၺ်ႈ ဢၼ်သိုၵ်းၶႄႇၵဝ်ႈၵၢင်ႉ လႄႇႁႃ တီႉၺွပ်းၵူၼ်းၼႂ်းထုင်ႉၼမ်ႉမႃးၵေႃႉၼိုင်ႈယဝ်ႉၵေႃႉၼိုင်ႈၼႆႉသေ ၵူၼ်းပိုၼ်ႉတီႈလၢတ်ႈဝႃႈ – “ သိုၵ်းၵဝ်ႈၵၢင်ႉၶဝ် ၼႄၶေႃႈဢၢင်ႈဝႃႈ လုၵ်ႈသိုၵ်းၶဝ်ႁၢႆၵေႃႉၼိုင်ႈလႄႈ သွၵ်ႈႁႃ ၊ ပေႃး ထၢင်ႇထိူမ်သင်ဢိတ်းၼိုင်ႈၵေႃႈ ၺွပ်းၵူၼ်းထၢမ်တႂ်ႈတႂ်ႈၼိူဝ်ၼိူဝ် ” – ဝႃႈၼႆ။

ၵွၼ်ႇပႆႇမီးပၼ်ႁႃၸိူဝ်းၼႆႉၵေႃႈ ႁူဝ်လိူၼ်ၵျၼ်ႊၼိဝ်ႊရီႊ 2026 ၼႆႉ သိုၵ်းၶႄႇၵဝ်ႈၵၢင်ႉ ဢဝ်ဢဵၼ်ႁႅင်းသိုၵ်းၶဝ်သေ ယုၵ်ႉတၢင်ႇဢဝ် ၶိူင်ႈၶုတ်းထၢၼ်ႇႁိၼ်ၸိူဝ်းၼႆႉ မႃးဝၢင်းဝႆႉႁိမ်းၾင်ႇၼမ်ႉမႃႉ ဢွင်ႈတီႈၶုတ်းထၢၼ်ႇႁိၼ်ၵဝ်ႇ ဢၼ်မီးႁိမ်းဝၢၼ်ႈၼႃးၼၢင်း ၊ ပဵၼ်ဢွင်ႈတီႈ ဢၼ်ၶွမ်ႊပၼီႊၶဝ်ၶုတ်းဝႆႉ မိူဝ်ႈ ၽႅၼ်ယၼ်ႇသိုၵ်း 1027 ပႆႇတႄႇၼၼ်ႉဝႃႈၼႆ။
မိူဝ်ႈသိုၵ်းၶႄႇၵဝ်ႈၵၢင်ႉၶဝ် တေဢၢၼ်းၸုပ်ႇၼမ်ႉ ၼႂ်းထၢင်ၶုတ်းထၢၼ်ႇႁိၼ်ၵဝ်ႇၼၼ်ႉ ထွၵ်ႇပႅတ်ႈၼႂ်းၵေးၼမ်ႉမႃႉၼၼ်ႉ သိုၵ်း SSPP သမ်ႉႁႄႉႁၢမ်ႈ ။ ၾၢႆႇသိုၵ်းၶႄႇၵဝ်ႈၵၢင်ႉလၢတ်ႈဝႃႈ ၶဝ်လႆႈၶေႃႈၸီႉသင်ႇ ၸၼ်ႉပႃႈၼိူဝ် ၵူၼ်းလူင်ၸၼ်ႉထီႉ 2 တီႈလၢဝ်ႇၵၢႆး မႃးလႄႈ ၸင်ႇတေလူင်းမိုဝ်းႁဵတ်းဝႃႈၼႆတွပ်ႇၶိုၼ်း ။ ႁဵတ်းၼၼ်သေ တင်းသွင်ၾၢႆႇ ၶဵင်ၶႅင်ၵၼ်မႃး ၸဵမ်မိူဝ်ႈႁူဝ်လိူၼ်ၼႆႉ ၼႆ ၵူၼ်းပိုၼ်ႉတီႈသိုပ်ႇလၢတ်ႈ။

တေႃႇထိုင် ဝၼ်းတီႈ 13/01/2026 ၼႆႉ ယၢမ်းၵၢင်ၼႂ် 10 မူင်းၼႆႉ သိုၵ်းၵဝ်ႈၵၢင်ႉ တိုၵ်ႉထႅမ်ႁႅင်း ၶဝ်ႈမႃးၸွမ်း ဝၢၼ်ႈလူင် ဝၢၼ်ႈပဵင်းသၢႆး ဝၢၼ်ႈၼွင်ၼူၺ်း ၸိူဝ်းၼႆႉသေ သွၵ်ႈႁႃ ၵူၼ်းသိုၵ်းၶဝ် ၵေႃႉဢၼ်ႁၢႆၵႂႃႇၼၼ်ႉယူႇ ။ ၶဝ်ထႅမ်ႁႅင်းသိုၵ်းၶဝ်မႃး ၵႃးသိုၵ်း 4 လမ်း ၊ ႁူဝ်ၼပ်ႉၵူၼ်းမီးႁိမ်း 30 ၵေႃႉၼႆႉ ၼႆ ၽူႈႁူႉႁၼ်ၸွမ်းၵေႃႉၼိုင်ႈလၢတ်ႈ။
ၵဵဝ်ႇလူၺ်ႈပၼ်ႁႃၸိူဝ်းၼႆႉသေ ၵူၼ်းမိူင်းတႄႉ သုၵ်ႉၸႂ်ယူႇၼႂ်းၵႄႈမၼ်း ပေႃးသိုၵ်းမီးပၼ်ႁႃၵၼ်မႃးၼႆ ၵူၼ်းမိူင်းတႄႉ ဢမ်ႇၵဵဝ်ႇသင်ၸွမ်းၵေႃႈ လႆႈၶၢမ်ႇၼႂ်းၵႄႈမၼ်း ၼႆ ၵူၼ်းပိုၼ်ႉတီႈၵေႃႉၼိုင်ႈလၢတ်ႈၼႄၼင်ႇၼႆ –

မိူဝ်ႈဝႃး ၵၢင်ၶမ်ႈဢေႃႈ လႆႈၵူဝ်ႁႅင်းတႄႉ ။ မိူဝ်ႈသိုၼ်းၼၼ်ႉ ၶဝ်ပိၵ်ႉတၢင်းပႅတ်ႈသဵင်ႈမူတ်း ။ ပိၵ်ႉတၢင်းၼႆႉ တင်းဝၼ်း ။ ၵူၼ်းမိူင်းဢမ်ႇလႆႈၵႂႃႇလႆႈပႆ ။ ၶဝ်ပိၵ်ႉပႅတ်ႈမူတ်း တႃႇတေၵႂႃႇ ၼမ်ႉပွင်ႈၵေႃႈ ဢမ်ႇၸၢင်ႈ ။ လုၵ်ႉၼမ်ႉပွင်ႈမႃး သီႇပေႃႉၵေႃႈ ဢမ်ႇလႆႈ ။ ၶဝ်ပိၵ်ႉပႅတ်ႈသၢႆတၢင်းၵူႈတီႈတီႈၶႃႈဢေႃႈ ၊ ၵူၼ်းမိူင်းလႆႈၵူဝ် ။ၵူၺ်းၵႃႈ မိူဝ်ႈဝႃး တၢမ်းၶမ်ႈတႄႉ ၶိုၼ်းပိုတ်ႇမူတ်းယဝ်ႉၶႃႈ ။ မိူဝ်ႈၼႆႉတႄႉ ၵႂႃႇလႆႈပႆလႆႈ ဢမ်ႇလႆႈၵူဝ်သင်ၼင်ႇၵဝ်ႇၶႃႈ ။
ဢွင်ႈတီႈ ဢၼ်သိုၵ်းၶႄႇၵဝ်ႈၵၢင်ႉ ၶႂ်ႈမႃးဢဝ်တီႈယူႇသေ ၶုတ်းထၢၼ်ႇႁိၼ်ၼႆႉ ၸမ်ၾင်ႇၼမ်ႉမႃႉ ၊ မီးၾၢႆႇဢွၵ်ႇ ဝၢၼ်ႈၼႃးၼၢင်း ဢိူင်ႇၼမ်ႉမႃႉ ။
မိူဝ်ႈသိုၵ်းၶႄႇၵဝ်ႈၵၢင်ႉမႃး ဢဝ်ႁႅင်းၵူၼ်းမႃး မွၵ်ႈ 15 ၵေႃႉ ပႃးမႃး (တွႆးၵႃး) ရူတ်ႉတၢင်ႇၶိူင်ႈ 2 လမ်း ၊ ၵႃးၶုတ်းၼၼ်ႉ လမ်းၼိုင်ႈ ။ ၵႃးဢၼ်တၢင်ႇသိုၵ်းမႃးသမ်ႉ လမ်းၼိုင်ႈ ၼႆ ၵူၼ်းပိုၼ်ႉတီႈလၢတ်ႈ။

ၼႂ်းဢိူင်ႇၼမ်ႉမႃႉၼႆႉ တေမီးဝၢၼ်ႈၼႃးၼၢင်း ဝၢၼ်ႈလူင် ဝၢၼ်ႈပဵင်းသၢႆး ဝၢၼ်ႈၼွင်ၼူၺ်း ဝၢၼ်ႈၼႃးၵုၼ် ဝၢၼ်ႈပႃတႅပ်း ၸိူဝ်းၼႆႉ မီးဢမ်ႇယွမ်း 7- 8 ဝၢၼ်ႈ ၼိုင်ႈဝၢၼ်ႈလႂ် ႁူဝ်ႁိူၼ်း မီးထိုင် 90 လင်ၸိူဝ်းၼႆႉ ၼႆ ၵူၼ်းပိုၼ်ႉတီႈလၢတ်ႈ။

ၽွင်းပၢင်တိုၵ်းယၼ်ႇသိုၵ်း 1027 ၼႆႉ သိုၵ်းၵဝ်ႈၵၢင်ႉ ၵုမ်းလႆႈဝႆႉ ဝၢၼ်ႈမႂ်ႇ ဝၢၼ်ႈလႃႉႁူဝ်ႇ ၸွမ်းဢွင်ႈတီႈ တၢင်းၽႄ ၼမ်ႉပွင်ႈ – သီႇပေႃႉၼၼ်ႉ ။ တီႈၼၼ်ႈ ယၢၼ်ၵႆၵၼ်တင်း ဝၢၼ်ႈၼႃးၼၢင်း ဢၼ် SSPP ၵုမ်းဝႆႉ ယၢၼ် မွၵ်ႈ 1 လၵ်း သင်ဢမ်ႇမီးလွႆႁႄႉဝႆႉတႄႉ မုင်ႈႁၼ်ၵၼ်ယူႇယဝ်ႉၼႆ ၵူၼ်းပိုၼ်ႉတီႈလၢတ်ႈ။
မိူဝ်ႈလဵဝ် သိုၵ်းၵဝ်ႈၵၢင်ႉ ဢွၼ်သုတ်ႉၶဝ်ႈမႃးဢဝ်တီႈယူႇၸွမ်းၼႂ်း ပိုၼ်ႉတီႈ SSPP ၵုမ်းၵမ်ဝႆႉသေ ပႆႇသုတ်ႇဢွၵ်ႇၶိုၼ်း။ ၵူၼ်းလူင်တင်းသွင်ၾၢႆႇတူၵ်းလူင်းၵၼ်ဝႃႈ ႁႂ်ႈယူႇတီႈၽႂ်တီႈမၼ်းသေတႃႉ ပႆႇႁၼ်ၶၢႆႉဢွၵ်ႇၶိုၼ်း ၼႆ ၽူႈႁူႉႁၼ်ၸွမ်းၵေႃႉၼိုင်ႈလၢတ်ႈၼင်ႇၼႆ ။

ဢၼ်သိုၵ်းၵဝ်ႈၵၢင်ႉ ဢၢၼ်းမႃးၶုတ်းထၢၼ်ႇႁိၼ်ၼၼ်ႉၵေႃႈ မိူဝ်ႈၼႆႉ ဢမ်ႇႁၼ်ၶုတ်း ဢမ်ႇတူင်ႉၼိုင်သင်သေတႃႉ ၶိူင်ႈၸၢၵ်ႈမၼ်းၸိူဝ်းၼႆႉ ပႆႇၶၢႆႉၵႂႃႇတၢင်းလႂ် ။ လွင်ႈၼႆႉ မိူၼ်ၶဝ် တေဢမ်ႇဢၢၼ်းထွႆ ။ ၶဝ်ဢမ်ႇဝႆႉၵၢင်ၸႂ် ၵူၼ်းမိူင်းပဵၼ်ယႂ်ႇ ။

ၼၢင်းယိင်းၵူၼ်းသီႇပေႃႉ ဢၼ်ယၢမ်ႈဢွၵ်ႇသဵင်သၢၼ်ၶတ်းၸွမ်းလွင်ႈၶုတ်းထၢၼ်ႇႁိၼ်ၼႆႉတႃႇသေႇၼၼ်ႉ သိုပ်ႇလၢတ်ႈတီႈၽူႈတွႆႇႁွၵ်ႈဝႃႈ –
ဢမ်ႇၵွမ်ႉဝႃႈ ၶုတ်းထၢၼ်ႇႁိၼ်ၵူၺ်း ၊ ဢၼ်ၶုတ်းမေႃႇသႅင် ငိုၼ်း ၶမ်း ဢၼ်မီးၼႂ်းၼမ်ႉၼိူဝ်လိၼ်ၸိူဝ်းၼႆႉ။ ၸဝ်ႈၶွင်မၼ်းတႄႉတႄႉၼႆႉ ပဵၼ်ၵူၼ်းမိူင်း ဢၼ်ယူႇသဝ်းၵိၼ်သၢင်ႈယူႇၼႂ်းပိုၼ်ႉတီႈ။ၸုမ်းဢၼ်လႂ်ၵေႃႈယဝ်ႉ ယႃႇဝႃႈ သိုၵ်းၵဝ်ႈၵၢင်ႉလႃႈ သိုၵ်းတၢင်ႇၸုမ်းၵေႃႈယဝ်ႉ သိုၵ်းမၢၼ်ႈၵေႃႈယဝ်ႉ ဢမ်ႇထွမ်ႇၵၢင်ၸႂ်ၵူၼ်းမိူင်းႁေၵေႃႈ ဢဝ်ၶိူင်ႈၵွင်ႈၵၢင်ႇသေ ဢထမ်ႇမ မႃးၶုတ်းၸိူင်ႉၼႆၼႆႉ မၼ်းပၼ်ၵၢၼ်ၶတ်းၵၢင်ၸႂ်ၵူၼ်းမိူင်း ။ မၼ်းပဵၼ် လၢႆးၸဝ်ႈဢႃႇၼႃႇၼႆလႄႈ ႁဝ်းလူဝ်ႇလႆႈသၢၼ်ၶတ်း။ သိုၵ်းၵဝ်ႈၵၢင်ႉၸိူဝ်းၼႆႉၵေႃႈ မၼ်းဢမ်ႇၸႂ်ႈၼႃႈလိၼ်ၶဝ် မၼ်းပဵၼ်တီႈမိူင်းတႆး။ ၶဝ်သမ်ႉၶႂ်ႈမႃးႁဵတ်းၸိူင်ႉၼႆဢၼ်ဝႃႈၼႆႉၵေႃႈ မၼ်းတေပဵၼ်မႃး ပၼ်ႁႃၸၢဝ်းၶိူဝ်း။ ၸိူင်ႉၼႆ မၼ်းဢမ်ႇထုၵ်ႇလီပဵၼ်

ၵၢၼ်ၶုတ်းထၢၼ်ႇႁိၼ်ပွတ်းတၢင်းဢိူင်ႇၼမ်ႉမႃႉၼႆႉ ၶုတ်းတီႈလႂ်ၵေႃႈ မၼ်းတိုၼ်းတုမ်ႉတိူဝ်ႉၵူၼ်းမိူင်း။ ၵူၼ်းဝၢၼ်ႈၸိူဝ်းၸႂ်ႉၼမ်ႉမႃႉ တႃႇဢၢပ်ႇ တႃႇၵိၼ် တႃႇၸႂ်ႉၼၼ်ႉ လႆႈႁၼ်ၼမ်ႉမႃႉ ၶုၼ်ႇဢူၼ် ၵမ်ႇလမ်မႃးလိူဝ်ၵဝ်ႇ ယွၼ်ႉၶွမ်ႊပၼီႊၶုတ်းထၢၼ်ႇႁိၼ် ။ ဢမ်ႇၸၢင်ႈဢဝ်မိူဝ်းၸႂ်ႉၵိၼ် ၸႂ်ႉသုၵ်ႈလၢင်ႉၽၵ်းယိူဝ်ႈၼၢင်းၶဵဝ် – ဝႃႈၼႆ။
ၵုၼ်ႁူဝ်ၼႃးၾႃႉၼႆႉ ပဵၼ်ဝႆႉဢွင်ႈတီႈလႅင်ႇၼမ်ႉ တႃႇ ၵူၼ်းဝၢၼ်ႈၵူၼ်းသူၼ်ၼႂ်းထုင်ႉဢိူင်ႇၼမ်ႉမႃႉၸႂ်ႉတိုဝ်းလႄႈ ၵူၼ်းဝၢၼ်ႈ ႁၵ်ႉသႃၼမ်ႉလိၼ်ႁိၼ်ၽႃမႃးတႃႇသေႇ။ ၼမ်ႉႁွင်ႈ သၢႆၼမ်ႉ ဢၼ်လုၵ်ႉတီႈႁူဝ်ၼႃးၾႃႉလႆလူင်းမႃး ၼၼ်ႉ လေႃႇလဵင်ႉပၼ် ႁႆႈၼႃး ၵူၼ်းဝၢၼ်ႈၼပ်ႉ ႁူဝ်ပၢၵ်ႇဢေႊၵႃႊသေ ပဵၼ်ဝႆႉ ပိုၼ်ႉတီႈ ဢၼ်ၵူၼ်းမိူင်း ၵူၼ်းဝၢၼ်ႈထုင်ႉ ၼမ်ႉမႃႉ လႆႈၸႂ်ယႂ်ႇ ပိုင်ႈဢိင်ႁဵတ်းႁႃၵိၼ်လဵင်ႉ တွင်ႉမႃးပၢၼ်သိုပ်ႇပၢၼ်။