NUG,NUCC ဢၼ်ၸၢဝ်းမၢၼ်ႈၵမ်ႈၼမ် သုမ်ႇငုမ်းၵုမ်းၵမ်ဝႆႉၼၼ်ႉ ယိုၼ်ပဵၼ်လူင်ပွင်ၸိုင်ႈမိူင်း ႁူမ်ႈတုမ် လႄႈ ၸုမ်းၵိူဝ်းၵုမ်တႃႇမိူင်းႁူမ်ႈတုမ်သေတႃႉ ၵၢၼ်မိူင်းၼႆႉ ၼွၵ်ႈလိူဝ်ၶဝ်ဢွၼ်ႁဵတ်း၊ ၼွၵ်ႈလိူဝ်ၶဝ်ဢွၼ်ႁူဝ်ထူဝ်းၼႃႈ ဢမ်ႇၼပ်ႉတေႃႈယွမ်းႁပ်ႉတၢင်ႇၸုမ်း။

ၽူႈလႂ်ၽႂ်ၶႂ်ႈႁဵတ်းၶႂ်ႈသၢင်ႈ မႃးယူႇတႂ်ႈႁူမ်ႈမုင်းၶဝ်တူင်ႉ ၸင်ႇၶႂ်ႈမၵ်းမၼ်ႈပဵၼ်တၢင်းၵၢၼ်၊ ၶိုင်ႁဵတ်းႁင်းၵွႆးၸိုင် ထုၵ်ႇၶဝ် ဢီးယဝ်ႈထိပ်ႇဢွၵ်ႇ ၶွပ်ႇဝူင်းၵၢၼ်မိူင်းၵမ်းသိုဝ်ႈၼႆ ၵႆႉလႆႈႁၼ်လႆႈငိၼ်းၼႃႇ၊ ႁၼ်ယဝ်ႉႁၼ်ထႅင်ႈ၊ တေႃႇမိူဝ်ႈဝႃးမိူဝ်ႈသိုၼ်း တိုၵ်ႉလႆႈႁၼ်လႆႈငိၼ်းယူႇ ဢမ်ႇထၢတ်ႇ။ သူပ်းတႄႉဝႃႈ တေသၢင်ႈမိူင်း ႁူမ်ႈတုမ်၊ ၽိူဝ်ႇထူပ်းမိုဝ်းမႃး ၶႂ်ႈႁုပ်ႈၸတ်းႁင်းၶေႃမူတ်း။

မိူၼ်ၸိူင်ႉ မိူင်းဢိၼ်ႊတူဝ်ႊၼီႊသျႃႊ ဢၼ်ပဵၼ်ႁူဝ်ၼႃႈၵဝ်ႇ ၶွင်ၸုမ်းASEAN မွၵ်ႇႁွင်ႉ ၸုမ်း ၵၢၼ်မိူင်းၸိူဝ်းၶတ်းၶၢၼ်ႉတေႃႇ တပ်ႉသိုၵ်းမၢၼ်ႈယိုတ်းမၢၼ်ႈမိူင်းၼၼ်ႉ  တႃႇႁႂ်ႈလႆႈၵႂႃႇဢုပ်ႇဢူဝ်းၶႆႈၸႂ် ႁႃလၢႆးၵေႈၶႆပၼ်ႁႃၵၢၼ်မိူင်းၸွမ်းၵၼ်ၼႆသေ ၶိုင်ၶွၼ်ႈပၼ်တီႈဝဵင်းလူင်ယွၵ်ႉၵျႃၵႃတႃ ၼႂ်း လိူၼ်ပူၼ်ႉ ဝၼ်းတီႈ 26 တေႃႇ 29 ၼၼ်ႉၼႆ လႆႈႁၼ်လၢႆးဝႆႉၸႂ်ၶွင်ၵူၼ်းၶႅပ်ႇၶၢင်ႈပၼ်NUG လႄႈ NUCC ၶဝ် ၸႅင်ႈလႅင်းၼႃႇ။ ယွၼ်ႉလႆႈၵႂႃႇၶဝ်ႈပႃးၸွမ်းၼႂ်းJCB ၼင်ႇပိူၼ်ႈၸုမ်း႞လႄႈ လႅပ်ႈမိူၼ် သလေႇၶဝ် တႅမ်ႇယေႃႈၵႂႃႇၼၼ်ႉၵေႃႈ လႆႈႁၼ်တႅမ်ႈတၢင်ႇလၢတ်ႈဢွၵ်ႇမႃးယဝ်ႉ။

“ NUCC, NUG ၼႆႉ ပဵၼ်လူင်ပွင်ၸိုင်ႈလူး၊ ယွၼ်ႉသင် ၵႂႃႇၶဝ်ႈပႃးၼႂ်း JCB ဢၼ်ၸုမ်းတႆးပႃးဝႆႉ တင်းၼမ်၊ ယွၼ်ႉသင် ၵႂႃႇႁူမ်ႈၸွမ်း JCB သေ လၵ်ႉလွမ်ႁူပ်ႉဢုပ်ႇၸွမ်းၸုမ်းသိုၵ်းမၢၼ်ႊ ”ၼႆ BBC ယူႇၽၢႆႇလဵဝ်သေ လၢမ်းလိမ်းၽၢဝ်ႇၶၢဝ်ႇဢွၼ်တၢင်း၊ ၵျေႃႇၵူဝ်ႇၵူဝ်ႇ ၵေႃႉပဵၼ် ၽူႈၼမ်းၼႂ်းလူင် ၶွင်ဆိုရှယ်ဒီမိုကရက်တစ်ပါတီ လႄႈ ႁူဝ်ပဝ်ႈဗကသ ၵေႃႉၵဝ်ႇ ဢၼ်တင်းၼမ်ႁူႉၸၵ်းဝႃႈ ပဵၼ်ၵူၼ်းမႅၵ်ႇၶႃ TNLA ၼၼ်ႉ သမ်ႉတင်ႈၸႂ်လၼ်ႇသူၼ်ႈထႅင်ႈ၊ “ လူလၢႆတေႃႇၵၢၼ်လုၵ်ႉၽိုၼ်ႉ ဢၼ်ၵူၼ်းႁူဝ်ႁဵင် လႆႈပွႆႇသုမ်းသၢႆၸႂ်ၼၼ်ႉႁေ ၸုမ်းၸႃႉဢၼ်လိူၵ်ႈလိူၵ်ႈၵႂႃႇလၵ်ႉထူပ်းတင်းၽူႈ ၶဵၼ်ၵေႃႈမီးဢိူဝ်ႈ” မၼ်းတႅမ်ႈဝႃႈၼႆ။

 တီႈတေႉၵေႃႈ JCB ၼႆႉ ဢမ်ႇၵႂႃႇႁူပ်ႉထူပ်း ဢမ်ႇၵႂႃႇဢုပ်ႇ ၸွမ်းသိုၵ်းမၢၼ်ႊလႃးလႃး၊ တၢင်းလၢတ်ႈမၼ်းၼႆႉ ၵွႆးပဵၼ်ၸႂ်ၼိင်ႈၵၢၼ်မိူင်း ဢၼ်ပႂ်ႉငွႆးယႃႉၵဝ်းတေႃႇ JCB ဢၼ်ၶဝ်မၢပ်ႇဝႃႈ ၸုမ်းတႆးၶဝ်ႈပႃးတင်းၼမ်ၼၼ်ႉမႃႇလၢႆသႄႈ။

ယၼ်ၼိူဝ်တပ်ႉသိုၵ်းတႆး ဢမ်ႇၶဝ်ႈပႃးၸွမ်းၼႂ်းပၢင်တိုၵ်းတေႃးသိုၵ်းမၢၼ်ႊ ၽွင်းၵၢၼ်လုၵ်ႉၽိုၼ်ႉၶၢဝ်းႁွင်ၼၼ်ႉသေ ပႂ်ႉသပ်းလင်တႆးယူႇတင်းၶိင်ႇဢမ်ႇၵႃး ပၢႆသၢတ်ႈသႄႈထႅၵ်ႇပႃး ၼႂ်းၵႄႈတႆးလႄႈတၢင်ႇၸုမ်း ၸၢဝ်း ႁႂ်ႈၸတ်ႉငၢၵ်ႈၵၼ်ထႅင်ႈၵွၼ်ႇ။

 ၵူၺ်းၵႃႈ ၵွပ်ႈပိူဝ်ႈၸေႇတၼႃႇ ဢမ်ႇသႅၼ်ႈသႂ်လႄႈ တၢင်း ဢဵၼ်းဢၢၼ်းမၼ်းၸၢႆးၵေႃႈ ဢမ်ႇဢွင်ႇမၢၼ်ၼင်ႇၵဝ်ႇ။

မိူင်းဢိၼ်ႊတူဝ်ႊၼီႊသျႃႊၼႆႉ ၸဵမ်မိူဝ်ႈမၼ်းတိုၵ်ႉပဵၼ်ႁူဝ်ၼႃႈ ၶွင်ASEAN ၼႂ်းပီ 2023 ပုၼ်ႉ ပၵ်းၸႂ်ပၵ်းၶေႃး ႁဵတ်းႁႂ်ႈၸုမ်းၸၢဝ်းၾၢႆႇၶတ်းၶၢၼ်ႉတင်းသဵင်ႈ ႁႂ်ႈလႆႈႁူပ်ႉဢုပ်ႇၵၼ်မႃး ပဵၼ်လၢႆလၢႆပွၵ်ႈ၊ ၸဵမ်မိူဝ်ႈၼၼ်ႉ မၼ်းလၢတ်ႈဝႆႉယူႇ တေႃႈဝႃႈမၼ်းဢမ်ႇၸႂ်ႈႁူဝ်ၼႃႈ ASEAN ယဝ်ႉၵေႃႈ တႃႇၸွႆႈၵေႈလိတ်ႈပၼ်ႁႃမိူင်းမၢၼ်ႊၼႆႉ တေသိုပ်ႇၸွႆႈယူႇယႂ်းယႂ်းၼႆ။

 ၵွပ်ႈပိူဝ်ႈ မိူင်းမၢၼ်ႈယၢမ်ႈ ၸွႆႈမိူင်းၶဝ်မႃး ၽွင်းမိူဝ်ႈၶဝ်တူၵ်းၵိၼ်း။ လိူဝ်ၼၼ်ႉ ပၼ်ႁႃဢၼ်မိူင်းၶဝ်လႆႈၺႃးလႆႈၵေႈမႃးၵေႃႈ ငၢႆးမိူၼ်ၵၼ်တင်းပၼ်ႁႃမိူင်းမၢၼ်ႈၵွႆး။

 မိူင်းၶဝ်ၵေႃႈ လုၵ်ႉတီႈတပ်ႉသိုၵ်းၵုမ်းၵမ်သေ ၶတ်းၸႂ်လူတ်းယွၼ်ႇၵမ်းၶၵ်ႉၶၵ်ႉသေ ၶၢႆႉလႅၵ်ႈပဵၼ်မႃးမိူင်းတီမူဝ်ၶရေၸီႇ၊ လႆႈၶတ်းၸႂ် လၢႆလၢႆႁူဝ်သိပ်းပီသေ လၢႆလၢႆလၢႆးတၢင်းသေ ၵေႈလိတ်ႈမႃး။

 ပၼ်ႁႃမိူင်းၶဝ် ယိုင်ႈၶႅၼ်းယုင်ႈလိူဝ်မိူင်းမၢၼ်ႊၵွၼ်ႇ။

 ၽႃႇသႃႇၵိူဝ်းယမ် ဢၼ်ဢမ်ႇမိူၼ်ၵၼ်လႃးလႃး မီးႁူၵ်းမဵဝ်း၊ ၵႂၢမ်းလၢတ်ႈၵူၼ်းၶိူဝ်း မီး700 လိူဝ်၊ ယူႇယႅၵ်ႈၵၼ်ၼိူဝ်ၵုၼ် 6,000 လိူဝ်၊ ပေႃးၼပ်ႉပႃးၵုၼ်ဢၼ်ၵူၼ်းဢမ်ႇယူႇ ႁူမ်ႈသဵၼ်ႈမီးထိုင် 17,000 လိူဝ်။ ၼႂ်းလွင်ႈတႅၵ်ႇယႅၵ်ႈၵၼ် ၼမ်လၢႆၸေးမဵဝ်းၼၼ်ႉ လွင်ႈယွၼ်းၽၢတ်ႇဢွၵ်ႇသေ ဢၢၼ်းတင်ႈမိူင်းႁင်းၶေႃၵေႃႈမီးပႃး။

 ၸင်ႇဝႃႈ ႁႂ်ႈၸၢင်ႈဢဝ်တွၼ်ႈသွၼ် ၼိူဝ်လၢႆးၵေႈလိတ်ႈပၼ်ႁႃမိူင်းၶဝ်သေ ၶႆႈၸႂ်တႃႇမိူင်းႁဝ်းၼႆလႄႈ ၵမ်းၵမ်းလႆႈမွၵ်ႇႁွင်ႉၵၼ် ၵႂႃႇလဵပ်ႈႁဵၼ်း။

ပၼ်ႁႃၼႆႉ ယူႇၽၢႆႇလဵဝ်ၵေႈလိတ်ႈ ဢမ်ႇလႆႈ၊ ၵူႈပၼ်ႁႃ ၵၼ်သွင်ၽၢႆႇ တေလႆႈပွင်ႇၸႂ်ၼင်ႇၵၼ် ၸင်ႇ တေႁၼ်လႆႈငိူၼ်ႈၵေႈမၼ်း။

ယွၼ်ႉၼၼ် ဢမ်ႇၵႃးၵွႆး ၾၢႆႇၶတ်းၶၢၼ်ႉ၊ ၾၢႆႇတပ်ႉသိုၵ်းၵေႃႈ ဢိၼ်ႇတူဝ်မွၵ်ႇႁွင်ႉယဝ်ႉ။ ၵူၺ်းၵႃႈ ဢမ်ႇၸႂ်ႈမိူဝ်ႈမိူဝ်ႈလဵဝ်၊ ဢမ်ႇၶိုင်ႁႂ်ႈ ၵႂႃႇၸွမ်းၵၼ်၊ ဢမ်ႇႁဵတ်း ႁႂ်ႈလႆႈ ၵႂႃႇႁူပ်ႉၵၼ်။ ပွင်ႇဝႃႈ ႁဵတ်းႁႂ်ႈပွင်ႇၸႂ်ႁၼ်ၸႅင်ႈၼိူဝ် ငဝ်ႈငိူၼ်ႈပၼ်ႁႃၵူၺ်း ။

 ၸဵမ်မိူဝ်ႈ ၼႂ်းပီ 2023 ပုၼ်ႉၵေႃႈ ယၢမ်ႈမွၵ်ႇပႃး NUG ၵႂႃႇၶဝ်ႈႁူမ်ႈၸွမ်းယူႇ၊ ၾၢႆႇသိုၵ်းမၢၼ်ႈၵေႃႈ ၵႂႃႇယူႇ။ ၵူၺ်း ၵႃႈ ဢမ်ႇၵႂႃႇႁူမ်ႈၵၼ်၊ ဢမ်ႇၵႂႃႇဢုပ်ႇၵၼ်။ ၸဵမ်မိူဝ်ႈၼၼ်ႉ NUG လႄႈ ၽၢႆႇသိုၵ်းမၢၼ်ႊ ၶႅင်ႇၵ ၼ်ၽၢဝ်ႇၶၢဝ်ႇဝႃႈ ၶဝ်ဢမ်ႇလႆႈၵႂႃႇၸွမ်း ၼႆၼင်ႇၵၼ်။

 တေထိမ်ႇလႆႈ ပႅတ်ႉလႆႈထိုင်လႂ်ၼႆ တေလႆႈပႂ်ႉတူၺ်းယူႇ၊ ဢိၼ်တူဝ်ဢၼ်ပဵၼ်ၸဝ်ႈႁိူၼ်းတႄႉ တေဢမ်ႇလွၵ်ႈၵဵတ်း၊ ၵူၺ်းၵႃႈ ၸိူဝ်းၵႂႃႇၸွမ်း ႁၼ်ၸွမ်းၼၼ်ႉ တႅမ်ႈတၢင်ႇမၢႆတမ်းဝႆႉယူႇလႄႈ ပိုၼ်းပဵၼ်တေႉၼႆႉ ႁိုဝ်တေႁၢႆ၊ ဝၼ်း႞ တၵ်းလႆႈ ၼႃႈဢူၵ်းၼႃႈဢၢႆ ဢမ်ႇႁၢင်ႉသႄႈ။

ၶၢဝ်းတၢင်းပွၵ်ႈၼႆႉၵေႃႈ တူဝ်တႅၼ်း CRPH, NUG, NUCC ပႃးၸွမ်းပိူၼ်ႈယူႇသႅၵ်ႇလႅၵ်ႇ ၵွပ်ႈသင် ဢမ်ႇဢွၵ်ႇယိုၼ်တူဝ်ၵေႈလိတ်ႈ၊ ယူႇမႃႇလၢႆ ၵူၼ်းၶႅပ်ႇၶၢင်ႈၶဝ် ပၢႆၼေးဝႃႈ ၸုမ်းတႆးဢွၼ်ၶဝ်ၵႂႃႇ ႁူပ်ႉဢုပ်ႇသိုၵ်းမၢၼ်ႊ ၼႆထႅင်ႈ။

ပေႃးၼႆ လီထၢမ်ၵၼ်ဝႃႈ ပေႃးၸုမ်းတႆးဢွၼ်ႁူဝ်ၼႆႉ ၵၢၼ်လီၵၢ ၼ်ၸႃႉ တိုၼ်းတေဢမ်ႇယွမ်းႁပ်ႉၼႆႁႃႉ၊ ဢမ်ႇၼၼ် ၸူဝ်ႈၵႃႈ CRPH,NUG, NUCC ဢမ်ႇလႆႈဢွၼ်ႁူဝ်ထူဝ်းၼႃႈ တိုၼ်းတေဢမ်ႇယိုၼ်တူဝ်ဢွၵ်ႇၼေၼႃႈႁႃႉ။

 တီႈတေႉၼႆ NUG, NUCC ဢမ်ႇပွင်ပဵၼ်လႆႈ တႃႇဢွၼ်ႁူဝ်တင်းလုမ်ႈၼႆ ၸိူဝ်းပိူင်ပဵၼ်ၼႂ်းၶၢဝ်းတၢင်းႁႃႈပီၸမ်တဵမ်ၼႆႉ ပဵၼ်ဝႆႉလၵ်းထၢၼ်ၸႅင်ႈလႅင်းယဝ်ႉလူး။

 တေလႆႈထၢမ်ဝႃႈ NUG, NUCC ၼႆႉ တေသိုပ်ႇထိမ်ႇတေႃႇၵူၼ်းမိူင်းၵႂႃႇထႅင်ႈတိၵ်းတိၵ်းႁႃႉ၊ တူဝ်ၵဝ်ႇၵေႃႈ ဢမ်ႇဢွၼ်ၼႃႈလႆႈ၊ တၢင်ႇၸုမ်းၸၢဝ်းဢွၼ်ပႆၵေႃႈ ဢမ်ႇႁတ်းယိုၼ်တူဝ်ဢွၵ်ႇၼႃႈ၊ ၸိူင်ႉၼႆ တေႁဵတ်းႁိုဝ်သၢင်ႈ လွင်ႈယုမ်ႇယမ်ၵၼ်တင်းၵူၼ်းမိူင်းၵူႈ ၸၢဝ်းၶိူဝ်း။

 လၢတ်ႈဝႃႈ တေလုၵ်ႉၽိုၼ်ႉၸဝ်ႈဢႃႇၼႃႇ တၢင်းႁဵတ်းသမ်ႉဢမ်ႇပၢႆႈပိူင်ႈတင်းၸဝ်ႈ ဢႃႇၼႃႇ၊ မိူၼ်ၼႆပႄႇ မိူဝ်ႈလႂ်တေၶွတ်ႇလိူတ်ႈၸၢဝ်းၶိူဝ်းလႆႈ၊ မိူဝ်ႈလႂ်တေပိူင်းလႅင်းလႆႈ တႃႇၵူႈၸၢဝ်းၶိူဝ်း လႆႈလွတ်ႈလႅဝ်းထၢင်ႇႁၢင်ႈၼႆ ဢမ်ႇတၢပ်ႈထၢမ်ၵေႃႈ လႅပ်ႈတေပွင်ၸႂ်ၵၼ်လႆႈယူႇ တႃႉလီဝႃႈၼႆယဝ်ႉဢေႃႈ။