ၼႂ်းၶၢဝ်းတၢင်း မိၼ်းဢွင်ႇလၢႆႇ ၶိုၼ်ႈပဵၼ်ၸွမ်ၸိုင်ႈယိုတ်းမိူင်းသေ ၶွတ်ႇၽွတ်ႈလူင်ပွင်ၸိုင်ႈမႂ်ႇယဝ်ႉ ႁိုင်ၶၢဝ်းတၢင်းသွင်လိူၼ်ၵူၺ်း ပလိၵ်ႈ လႄႈ သိုၵ်းမၢၼ်ႈ ၸိူဝ်းပႂ်ႉၵူတ်ႇထတ်းယူႇ ၸွမ်းၵဵတ်ႉလၢၼ်ႇ ၸႂ်ႉတိုဝ်းလွၵ်းလၢႆး IT သေ တီႉၺွပ်းဢဝ်ၵူၼ်းမိူင်းၵႂႃႇ 746 ၵေႃႉ ဝႃႈၼႆ။

မိူဝ်ႈပူၼ်ႉမႃး ဝၼ်းတီႈ 7/6/2026 ၸေႃႇလိၼ်းထုၼ်း ၽူႈၵွၼ်းပလိၵ်ႈ ၸုမ်းလူင်ပွင်ၸိုင်ႈယိုတ်းမိူင်း မွၵ်ႇလၢတ်ႈၵႂႃႇၼႂ်းႁူင်းပွႆႇငဝ်းႁၢင်ႈသဵင် MRTV ဝႃႈ “ၼႂ်းၶၢဝ်းတၢင်းလူင်ပွင်ၸိုင်ႈမႂ်ႇၶိုၼ်ႈမႃးၼႆႉ ပတီႉၺွပ်းလႆႈ ရူတ်ႉၵႃး ၸိူဝ်းဢမ်ႇမီးဝႂ်လၢႆႇၸိၼ်ႊ 208 လမ်း၊ ရူတ်ႉၶိူင်ႈ 334 လမ်း၊ ၶူဝ်းၵုၼ်ႇ ၸိူဝ်းဢမ်ႇၶဝ်ႈတၢင်းတၢင်း 104 လိူင်ႈလႄႈ တီႉၺွပ်းဢဝ်ၶိူင်ႈၵွင်ႈၵၢင်ႇသေ ပိုတ်ႇလိူင်ႈဝႆႉ တႃႇ 10 လိူင်ႈ ၵူၺ်းဢမ်ႇၵႃး ဢိင်ၼိူဝ်ၵၢၼ်ၸႂ်ႉတိုဝ်းလွၵ်းလၢႆး IT သေပႂ်ႉၵူတ်ႇထတ်း ၸွမ်းၵဵတ်ႉလၢၼ်ႇ တၢင်းၶဝ်ႈဢွၵ်ႇဝဵင်းၼၼ်ႉၵေႃႈ တီႉၺွပ်းဢဝ်ၵူၼ်းၸိူဝ်းမီးတၢင်းၽိတ်းသေ ပၢႆႈလွတ်ႈဝႆႉၼၼ်ႉ တႃႇ 746 ၵေႃႉ” ဝႃႈၼႆ။

ဝၢႆးသိုၵ်းမၢၼ်ႈယိုတ်းမိူင်းယဝ်ႉသေ ပဵၼ်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃးၼၼ်ႉ ပလိၵ်ႈ တင်း သိုၵ်းမၢၼ်ႈ တင်ႈၵဵတ်ႉလၢၼ်ႇ ပႂ်ႉၵူတ်ႇထတ်း ၵူၼ်းၶဝ်ႈဢွၵ်ႇဝဵင်းၵူႈတီႈ ပတ်းပိုၼ်ႉမိူင်းႁူမ်ႈတုမ် ၸႂ်ႉတိုဝ်းပႃး ၶိူင်ႈဢၢႆႊတီႊ IT ဢဝ်လၢႆးတၢင်း PSMS (Person Scrutinization and Monitoring System) သေၵူတ်ႇထတ်းႁၢဝ်ႈႁႅင်း ။

ၾၢႆႇၸုမ်းပလိၵ်ႈၵေႃႈ ႁူမ်ႈၵၼ်တင်း သိုၵ်းမၢၼ်ႈသေ ၸွမ်းတီႉၺွပ်း ၵူၼ်းႁဵတ်းၵၢၼ်ၵျႃႊၽျႅၼ်ႉ ၼႂ်းမိူင်းတႆး လႄႈ မိူင်းၶၢင် ၸိူဝ်းၼႆႉ ႁူမ်ႈသဵၼ်ႈ လႆႈပိုတ်ႇလိူင်ႈဝႆႉ တႃႇ 36 လိူင်ႈ၊ တီႉၺွပ်းလႆႈ ၵူၼ်းမိူင်းမၢၼ်ႈ 238 ၵေႃႉ လႄႈ ၵူၼ်းၼွၵ်ႈမိူင်း 28 ၵေႃႉ ၼႆယဝ်ႉ။

ၸူဝ်ႈသိုၵ်းမၢၼ်ႈယိုတ်းမိူင်းယဝ်ႉသေ မိၼ်းဢွင်ႇလၢႆႇ လႆႈၶိုၼ်ႈပဵၼ်ၸွမ်ၸိုင်ႈယိုတ်းမိူင်းယဝ်ႉၼၼ်ႉ ၶၢဝ်းတၢင်းသွင်လိူၼ်ၵူၺ်း ၾၢႆႇၸုမ်းပလိၵ်ႈ ၸတ်းႁဵတ်းၵႂႃႇ ပၢင်ၵႅဝ်ႈလွင်ႈႁူမ်ႇလူမ်ႈ ၸၼ်ႉၸိုင်ႈမိူင်း 7 ပွၵ်ႈ၊ ပိူဝ်ႈတႃႇဢဝ်ႁူမ်ႇလူမ်ႈ ၽွင်းဢွၵ်ႇၶၢဝ်းတၢင်း 5 ပွၵ်ႈ၊ တႃႇဢဝ်ႁူမ်ႇလူမ်ႈ ၸွမ်းပိုၼ်ႉတီႈလႂ်ပိုၼ်ႉတီႈၼၼ်ႉ တႃႇ 60 ပွၵ်ႈ ၼႆယဝ်ႉ။

ဝၢႆးလင်သိုၵ်းမၢၼ်ႈယိုတ်းမိူင်းမႃးၼႆႉ ၾၢႆႇၸုမ်းပလိၵ်ႈ ၸွမ်းတီႉၺွပ်းဢဝ် ၵူၼ်းမိူင်းၸိူဝ်းဢမ်ႇၵမ်ႉထႅမ် ဢမ်ႇႁၼ်လီၸွမ်း သိုၵ်းမၢၼ်ႈ ယဵတ်ႈသႂ်ႇၶွၵ်ႈၶင်သေ မၵ်းမၼ်ႈဝႃႈ ပဵၼ် ၵူၼ်းၵေႃႇၵၢၼ်ႁၢႆႉၵေႃႈ မီးၼပ်ႉႁူဝ်ႁဵင်ၵေႃႉယူႇ။