ဢွၼ်ႇယိင်း 14 ၵေႃႉ ၵူၼ်းဝၢၼ်ႈၵွင်လိူဝ်း ၸႄႈဝဵင်းပၢင်လွင်း ၺႃးၼၢႆးၼႃႈႁူၺ်းႁွင်ႉၵႂႃႇဝႃႈတေႁႃပၼ်ၵၢၼ်ၼႆသေ ဢဝ်ၵႂႃႇၶၢႆတီႈလႅၼ်လိၼ်တႆး-ၶႄႇၼၼ်ႉ ယၢမ်းလဵဝ်ပၢႆႈလွတ်ႈပွၵ်ႈမႃးထိုင်ႁိူၼ်းၶိုၼ်း 10 ၵေႃႉယဝ်ႉ တိုၵ်ႉႁၢႆဝႆႉယူႇ 4 ၵေႃႉ ။

တႄႇၼႂ်းၵၢင်လိူၼ်မတ်ႉၶျ်မႃးၼႆႉ ၼၢင်းယိင်းၵေႃႉၼိုင်ႈဢၼ်ပဵၼ် ၼၢႆးၼႃးပွႆးသႃး (မၼ်းလၢတ်ႈဝႃႈမၼ်းယူႇဝဵင်းလႃႈသဵဝ်ႈ) ၼႆၼၼ်ႉ  ႁူၺ်းႁွင်ႉဢွၼ်ႇယိင်းတီႈဝဵင်းပၢင်လွင်းၵႂႃႇ တၢင်းလႅၼ်လိၼ်တႆး-ၶႄႇ ၼၼ်ႉ 14  ၵေႃႉယဝ်ႉ။  

ၼၢႆးၼႃႈ လၢတ်ႈဝႃႈ ႁႃဝႆႉပၼ်ၵၢၼ်တီႈႁူင်းၸၢၵ်ႈယဵပ်ႉသိူဝ်ႈၶူဝ်း တီႈဝဵင်းမူႇၸေႊ ၼႆသေ မႃး ႁူၺ်းၵႂႃႇ – ဝၢႆးလင်ဢွၵ်ႇႁိူၼ်းၵႂႃႇၵေႃႈ ၵူၼ်းတၢင်းႁိူၼ်း ဢမ်ႇလႆႈတၢင်းၵပ်းသိုပ်ႇ သေဢိတ်း လႆႈၸမ် 2 လိူၼ် တေႃႇထိုင်ၸိူဝ်းၶဝ်ၵမ်ႈၽွင်ႈပၢႆႈပွၵ်ႈထိုင်ႁိူၼ်းၶိုၼ်းဝႃႈၼႆ။

 ၵူၼ်းမိူင်းဝဵင်းပၢင်လွင်း ဢၼ်ႁဵတ်းၵၢၼ်ၸွႆႈထႅမ်တူင်ႇဝူင်းၵူၼ်းၵေႃႉၼိုင်ႈလၢတ်ႈဝႃႈ-“ ၶဝ်ၶိုၼ်းမႃးလၢတ်ႈၼႄဝႃႈ ၽိူဝ်ႇၶဝ်ထိုင်တီႈဝဵင်းမူႇၸေႊ ၶဝ်ၺႃးၶင်ဝႆႉတီႈၼႂ်းႁွင်ႈၵဵပ်းၶူဝ်း  (ဂိုဒေါင်) ႁိုင် 2 လိူၼ်တေႃႇထိုင်ပေႃးပွၵ်ႈမႃးထိုင်ႁိူၼ်းၶိုၼ်းၼၼ်ႉၼႃႇ ၊ ထုၵ်ႇၼၢႆးၼႃႈ ပွႆးသႃး သိမ်းဝႆႉ ၾူင်းၶဝ် ၊ မၢႆၾၢင်ၸိူဝ်းၼၼ်ႉဝႆႉတင်းသဵင်ႈ ၼႆၼႃႇ” – ၼႆယဝ်ႉ ။

ဝၢႆးၼၼ်ႉ ဢွၼ်ႇယိင်း 10 ၵေႃႉပၢႆႈဢွၵ်ႇလႆႈသေ ၸင်ႇၵပ်းမႃးၸူးတၢင်းႁိူၼ်းၶဝ် –  ႁႂ်ႈၵူၼ်းႁိူၼ်းႁွင်ႉ  ၵၢင်ႉၵႄႇၼႂ်းဝၢၼ်ႈ ၵႂႃႇႁပ်ႉၶဝ်ပွၵ်ႈၶိုၼ်းႁိူၼ်း ၼႂ်းဝၼ်းတီႈ 4/6/2026  ။  ဢၼ်ၵိုတ်း 4 ၵေႃႉၼၼ်ႉတႄႉ  ထိုင်ဝၼ်းမိူဝ်ႈၼႆႉ ပႆႇ ၵပ်းသိုပ်ႇမႃးတၢင်းႁိူၼ်းဝႃႈၼႆ ။

ၽူႈၸၢႆး ၵူၼ်းဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ – “လုၵ်ႈဢွၼ်ႇၸိူဝ်းၼၼ်ႉ ႁၼ်ပိူၼ်ႈႁွင်ႉ ၵူၼ်းႁဵတ်းၵၢၼ် တီႈဝဵင်းမူႊၸေႊ လႅၼ်လိၼ် တႆး-ၶႄႇ ၼႂ်းဢွၼ်ႊလၢႆႊသေယဝ်ႉၵေႃႈ ၵပ်းသိုပ်ႇၵႂႃႇ ၊  ၼၢႆးပွႆးၸႃးမႃးႁပ်ႉၶဝ်ထိုင်ႁိူၼ်း ”- ဝႃႈၼႆ ။

တွၼ်ႈတႃႇဢွၼ်ႇယိင်းၸိူဝ်းၵိုတ်းဝႆႉၼၼ်ႉတႄႉ ပေႃႈမႄႈလႆႈတိူင်ႇလၢတ်ႈဝႆႉတီႈ ၽူႈမီးပုၼ်ႈၽွၼ်း ၼႂ်းပိုၼ်ႉတီႈယဝ်ႉဝႃႈၼႆသေတႃႉ ထိုင်ဝၼ်းမိူဝ်ႈၼႆႉ  ဢမ်ႇမီးလွင်ႈဢဝ်ပုၼ်ႈၽွၼ်းပၼ်သင်ႁႂ်ႈထိုင်တီႈ – ၵူၼ်းပိုၼ်ႉတီႈလၢတ်ႈ ။

 ယၢမ်းလဵဝ် လုၵ်ႈဢွၼ်ႇ 10 ၵေႃႉဢၼ်ႁွတ်ႈထိုင်ၶိုၼ်းတီႈႁိူၼ်းယေးၼၼ်ႉ  ႁဵတ်းၵၢၼ်ဝႆႉယူႇၼႂ်းဝၢၼ်ႈၼႂ်းၶူင်ႇၼၼ်ႉၼႆ ၵၢင်ႉၵႄႇၼႂ်းဝၢၼ်ႈၵွင်လိူဝ်း လၢတ်ႈၽူႈတွႆႇႁွၵ်ႈၼင်ႇၼႆ ။  

“မိူဝ်ႈၶဝ်ၵႂႃႇၼႆႉ ၵူၼ်းလူင်ၼႂ်းဝၢၼ်ႈဢမ်ႇလႆႈႁူႉၸွမ်းသင် ၊ ပဵၼ်မႃးၸိူင်ႉၼႆႉၵၢင်ႉၵႄႇလႆႈၵႂႃႇႁပ်ႉ ထိုင် မူႊၸေႊ ၊ လုၵ်ႈဢွၼ်ႇဢၼ်ပွၵ်ႈမႃးၶိုၼ်းၼၼ်ႉမိူဝ်ႈလဵဝ်မီးတီႈဝၢၼ်ႈၵူၺ်းၶႃႈ ၊ ပဵၼ်ၽွင်းၽုၵ်ႇသွမ်ႈလႄႈ ယၢမ်းလဵဝ်ၶဝ်ၵေႃႈၵႂႃႇပိတ်းၼဵင်ႈ ၊ သွမ်ႈၶဝ်ႈၸွမ်းၵူၼ်းဝၢၼ်ႈဝႆႉယူႇဢေႃႈ  ”- ဝႃႈၼႆ ။ 

ဝၢၼ်ႈၵွင်လိူဝ်း(တောင်လေး) ၼႆႉ မီးၾၢႆႇၸၢၼ်းဝၼ်းဢွၵ်ႇ ဝဵင်းပၢင်လွင်း ယၢၼ်ၵႆၵၼ်မွၵ်ႈ 7-8 လၵ်း ၊ ပဵၼ်ဝၢၼ်ႈၸၢဝ်းပဢူဝ်းယူႇသဝ်းဝႆႉ  မီးလင်ႁိူၼ်း 70-80 လင်  ၵူၼ်းပိုၼ်ႉတီႈလၢတ်ႈ။ 

ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၵိၼ်းၸႂ်မႃးႁႅင်းလႄႈ  လွင်ႈလွၵ်ႇလႅၼ်ဢဝ် ၼၢင်းယိင်း ၵႂႃႇၶၢႆသေ တဵၵ်းၸႂ်ႉႁဵတ်းမေးၶႄႇၼႆႉ ၼမ်မႃးလိူဝ်ၵဝ်ႇတေႉ တေႉဝႃႈဝႃႈ ၊ ယွၼ်ႉၼၼ် သင်ဝႃႈမီးၵူၼ်းမႃးႁူၺ်းႁွင်ႉဝႃႈ တေႁႃပၼ်ၵၢၼ်ၼႆၸိုင် ႁႂ်ႈၸွပ်ႇထၢမ်လီလီယဝ်ႉ ၸင်ႇၵႂႃႇ – ၵူၼ်းပိုၼ်ႉတီႈလၢတ်ႈ။

ၵူၼ်းၸိူဝ်းထုၵ်ႇႁူၺ်းႁွင်ႉၵႂႃႇၶၢႆတူဝ် ၸွမ်းလႅၼ်လိၼ် မိူင်းၶႄႇ – မိူင်းမၢၼ်ႈ လႄႈ ၼႂ်းမိူင်းၶႄႇၼႆႉ ပဵၼ်ၼၢင်းယိင်းၸိူဝ်းမီးဢႃႇယု 20 ပီပၢႆ ၵမ်ႈၼမ်သေ ပဵၼ်ၵူၼ်းမိူင်းၸိူဝ်းယူႇသဝ်း ၼႂ်းတိူင်းမၵူၺ်း၊ ပၶူၵ်ႉၵူႇ၊ တႃႈၵုင်ႈ လႄႈ ၸႄႈဝဵင်းၸိူဝ်းယူႇသဝ်းၸွမ်း လႅၼ်လိၼ် မိူင်းၶႄႇ။

ၵဵဝ်ႇလူၺ်ႈလိူင်ႈၵၢၼ်ၵႃႉၶၢႆၵူၼ်း (ၼၢင်းယိင်း) ၸိူဝ်းၼႆႉသေ ပိူဝ်ႈတႃႇမိူင်းမၢၼ်ႈ တင်း မိူင်းၶႄႇ တေႁူမ်ႈမိုဝ်းၵၼ် ၸတ်းၵၢၼ် တီႉၺွပ်း ဢဝ်လိူင်ႈၵႂႃႇၼၼ်ႉ မီးလွင်ႈယၢပ်ႇၽိုတ်ႇလိူဝ်ႁႅင်း၊ ၾၢႆႇလင် ၵၢၼ်ၵႃႉၶၢႆၵူၼ်းၼႆႉ မီးၸုမ်းယိပ်းၵွင်ႈၵၢင်ႇ၊ ၸုမ်းတူင်ႇဝူင်း ၵူၼ်း လႄႈ ၽူႈမီးဢႃႇၼႃႇၶဝ်တင်းၼမ် ၵဵဝ်ႇၶွင်ႈၸွမ်းဝႆႉၼႆ ၸုမ်းၾၢႆႇၸွႆႈထႅမ်လွင်ႈၵႃႉၶၢႆၵူၼ်းၶဝ် လၢတ်ႈၼႄဝႆႉၼင်ႇၼႆ။