မိူဝ်ႈဝႃး ဝၼ်းတီႈ 17 လိူၼ်ဢေႊပရႄႊလ် ပီမႂ်ႇဝၼ်းၼိုင်ႈ ၶၢဝ်းသွၼ်းၼမ်ႉ သိုၵ်းမၢၼ်ႈယိုတ်းမိူင်း ပွႆႇၵူၼ်းတူၵ်းၶွၵ်ႈၵၢၼ်မိူင်း လႄႈ ၵူၼ်းတူၵ်းၶွၵ်ႈ ယွၼ်ႉတၢင်းၽိတ်းတၢင်ႇလွင်ႈ တင်းသဵင်ႈမီးယူႇ 6000 ၵေႃႉပၢႆ။ ဢူးဝိၼ်းမိၼ်ႉ ၸွမ်ၸိုင်ႈမိူင်းႁူမ်ႈတုမ် ဢၼ်သိုၵ်းမၢၼ်ႈ တီႉၺွပ်းယဵတ်ႈ သႂ်ႇၶွၵ်ႈၶင်ဝႆႉ တင်း တေႃႇဢွင်ႇသၢၼ်းၸူႉၵျီႇ ၽွင်းပီ 2021 မိူဝ်ႈ မိၼ်း ဢွင်ႇလၢႆႇ ယိုတ်းဢဝ်ဢႃႇၼႃႇၸိုင်ႈမိူင်းၼၼ်ႉၵေႃႈ ဢွၵ်ႇမႃးၶိုၼ်းယဝ်ႉ ဝႃႈၼႆ။

ဢူးဝိၼ်းမိၼ်ႉ ထုၵ်ႇၵုမ်းၶင်တူဝ်ဝႆႉ ႁိုင်ၶၢဝ်းတၢင်း 5 ပီ မိၼ်းဢွင်ႇလၢႆႇ လႆႈၶိုၼ်ႈပဵၼ်ၸွမ်ၸိုင်ႈ ပဵၼ်တၢင်းၵၢၼ်ယဝ်ႉ ၸင်ႇပွႆႇဢွၵ်ႇမႃးၶိုၼ်း။

ဝၢႆးၼၼ်ႉ ၶွင်ႊသီႇၵိူဝ်းၵုမ်ၵၢၼ်ၸိူဝ်ႉၸၢတ်ႈၽွမ်ႉႁူမ်ႈ NUCC ၵေႃႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ ၵမ်းသိုဝ်ႈဝႃႈ – ႁူမ်ၸူမ်းၸွမ်း ၸွမ်ၸိုင်ႈဢူးဝိၼ်းမိၼ်ႉ လႆႈပူၼ်ႉလွတ်ႈ ဢွၵ်ႇၶွၵ်ႈၶင်မႃးၶိုၼ်းတေႉတေႉသေ တိုၵ်ႉသိုပ်ႇမၵ်းမၼ်ႈ ဢူးဝိၼ်းမိၼ်ႉ ပဵၼ်ၸွမ်ၸိုင်ႈ မိူင်းႁူမ်ႈတုမ်ၵႂႃႇယူႇ ၼႆယဝ်ႉ။

ၼႂ်းဢၼ်သိုၵ်းမၢၼ်ႈပွႆႇၵူၼ်းတူၵ်းၶွၵ်ႈ ၵူၼ်းမီးတၢင်းၽိတ်းဢွၵ်ႇမႃးၼၼ်ႉ တေႃႇဢွင်ႇသၢၼ်းၸူႉၵျီႇတႄႉ ဢမ်ႇပႃးမႃးလႄႈ ၼင်ႇႁိုဝ် တေႃႇဢွင်ႇသၢၼ်းၸူႉၵျီႇလႄႈ ၵူၼ်းတူၵ်းၶွၵ်ႈၵၢၼ်မိူင်း ၸိူဝ်းၵိုတ်းဝႆႉ ဢွၵ်ႇမႃးလႆႈ တင်းသဵင်ႈၼၼ်ႉၵေႃႈ ၶွင်ႊသီႇၵိူဝ်းၵုမ်ၵၢၼ်ၸိူဝ်ႉၸၢတ်ႈၽွမ်ႉႁူမ်ႈ NUCC တေသိုပ်ႇၶတ်းၸႂ် ႁဵတ်းသၢင်ႈတူင်ႉၼိုင်ၵႂႃႇထႅင်ႈယူႇ ၼႆယဝ်ႉ။

လိူဝ်ၼၼ်ႉ ၸုမ်းၸၢတ်ႈၸိုင်ႈလုမ်ႈၾႃႉၵေႃႈ ပိုၼ်ၽၢဝ်ႇဢီးသူၼ်း ႁႂ်ႈသိုၵ်းမၢၼ်ႈယိုတ်းမိူင်း ပွႆႇပၼ်ၶိုၼ်း တေႃႇဢွင်ႇသၢၼ်းၸူႉၵျီႇ လႄႈ ၵူၼ်းတူၵ်းၶွၵ်ႈၵၢၼ်မိူင်း ၶၼ်ၶၼ်ဝႆးဝႆး ပိူဝ်ႈတႃႇၵၢၼ်မိူင်း မိူင်းႁူမ်ႈတုမ် တေမၼ်ႈၵိုမ်း ယိုၼ်းယၢဝ်းၵႂႃႇ ၼႆယဝ်ႉ။