လုၵ်ႈႁဵၼ်းၸိူဝ်းတွပ်ႇလိၵ်ႈဝႆႉ တႃႇသိုပ်ႇႁဵၼ်းၶဝ်ႈၸၼ်ႉၸွမ် ၼႂ်းမိူင်းႁူမ်ႈတုမ် ပၢၼ်လူင်ပွင်ၸိုင်ႈယိုတ်းမိူင်းၼႆႉ တေလႆႈႁူႉၶေႃႈတွပ်ႇ ၵၢၼ်ဢွင်ႇပူၼ်ႉၸၼ်ႉ ၼႂ်းဝူင်ႈလိုၼ်းသုတ်း လိူၼ်ၵျုၼ်ႊၼႆႉ ဝႃႈၼႆ။

ႁွင်ႈၵၢၼ်ၾၢႆႇထတ်းလိၵ်ႈ တႂ်ႈလူင်ပွင်ၸိုင်ႈသိုၵ်းယိုတ်းမိူင်းလၢတ်ႈဝႃႈ “ၶေႃႈတွပ်ႇ ပၢင်တွပ်ႇလိၵ်ႈၸၼ်ႉသုင် တင်းသွင်ဢၼ်ၼႆႉ ၾၢႆႇႁွင်ႈၵၢၼ်ပၢႆးပၺ်ႇၺႃႇ တေပိုၼ်ၽၢဝ်ႇပၼ် ၼႂ်းဝၼ်းတီႈ 28/6/2026 ယၢမ်းၵၢင်ၼႂ် 4 မူင်း (သၼ်းဢႃးတိတ်ႉ) ဝူင်ႈလိုၼ်းသုတ်းၼႆႉ တီႈဝႅပ်ႉသၢႆႉ result.dme.gov.mm လႄႈ myanmarexam.org ႁႂ်ႈပဵၼ်တၢင်းၵၢၼ်ၵႂႃႇ” ဝႃႈၼႆ။

လိူဝ်ၼၼ်ႉ ၸွမ်းႁူင်းႁဵၼ်း ဢွင်ႈတီႈထတ်းလိၵ်ႈ ၸႄႈဝဵင်းလႂ်ဝဵင်းၼၼ်ႉၵေႃႈ တေဢဝ်ၽိုၼ်ၸေႈသဵၼ်ႈမၢႆဢွင်ႇပူၼ်ႉၸၼ်ႉၶဝ် ၵႂႃႇတိတ်းဝႆႉပၼ် တႄႇၶၢဝ်းယၢမ်းၵၢင်ၼႂ် 6 မူင်း ၵူႈတီႈ ဝႃႈၼႆ။

ပၢင်တွပ်ႈလိၵ်ႈ တႃႇၶဝ်ႈၸၼ်ႉၸွမ် ဢၼ်ႁွင်ႈၵၢၼ်ၾၢႆႇပၢႆးပၺ်ႇၺႃႇသိုၵ်းမၢၼ်ႈ ၸတ်းႁဵတ်းမႃး ၼႂ်းဝၼ်းတီႈ 11 ထိုင် ဝၼ်းတီႈ 17 လိူၼ်မၢတ်ႉၶျ်ပူၼ်ႉမႃးၼၼ်ႉ တူဝ်ႈမိူင်းပတ်းပိုၼ်ႉ မီးလုၵ်ႈႁဵၼ်းၶဝ်ႈတွပ်ႇလိၵ်ႈ 265,000 ပၢႆ။

သဵၼ်ႈမၢႆ ပၢင်တွပ်ႇလိၵ်ႈ ၶဝ်ႈၸၼ်ႉၸွမ် မိူဝ်ႈပီ 2025 ၼၼ်ႉတႄႉ ပိုၼ်ၽၢဝ်ႇၵႂႃႇ ၼႂ်းဝၼ်းတီႈ 27 လိူၼ်ၵျူႊလၢႆႊ၊ မီးလုၵ်ႈႁဵၼ်းဢွင်ႇပူၼ်ႉၸၼ်ႉ 48% ၵူၺ်း ၼႆယဝ်ႉ။

တႅမ်ႈ- ၼၢင်းငိုၼ်းႁွမ်